1. Met meefien Jiowa usun ekkewe aramas mi tipetekison? Áweweei.

JIOWA a tongei aramas mi tipetekison. Chókkewe chék mi enletin tipetekison ra tongeni chiechiéch ngeni fán tong. Nge a “silleni ekewe chon lamalamtekia me toau.” (Kölf. 138:6) Kich meinisin sia mochen apwapwaai Jiowa me kúna an chen, ina minne a wor popun mi éch ach sipwe káé le ámááraatá tipetekison.

2. Met sipwe pwóróus wóón lón ei lesen?

² Lón ei lesen, sipwe pwóróus usun pélúwen ekkeei úlúngát kapas eis: (1) Met weween tipetekison? (2) Pwata a lamot ach sipwe ámááraatá? (3) Ineet a tongeni weires ach sipwe tipetekison? Sipwele kúna pwe lupwen sia ámááraatá tipetekison, sia apwapwaai letipen Jiowa me pwisin feiéch seni.​—SalF. 27:11; Ais. 48:17.

3. Met weween tipetekison?

³ Emén mi tipetekison ese ekieki pwe a tekia seni ekkewe ekkóch. Ese lamalamtekia. Ewe Paipel a erá pwe emén mi tipetekison a eáni ekiek mi pwúng usun an riri ngeni Jiowa Kot me an riri ngeni aramas. A pwal mirititi pwe aramas ra múrinné seni lón ekkóch mettóch.​—Fil. 2:3, 4.

4-5. Pwata enletin tipetekison ese pwá ren napanapen emén me lúkún?

⁴ Ekkóch aramas ra nikinikin tipetekison me lúkún, nge ren enletin rese. Neman ra mosonoson are nisássáw. Are neman ra pwári súfél me fáiro ngeni aramas pokiten a ina usun eérenien  fénúer are ar mááritá. Nge ren enletin ra fókkun lamalamtekia lón letiper. Nge fán eú fán eú, epwe pwápwááló enletin sókósókur me lón letiper.​—Luk. 6:45.

⁵ Nge mi wor ekkewe sókkun aramas usun ra fókkun alúkúlúk, me rese pireir le chék apasawu minne ra ekieki. Esap weween pwe ra lamalamtekia. (Joh. 1:46, 47) Nge mi lamot ngeni chókkewe rese nisássáw ar repwe túmúnú pwe resap lúkúlúk wóón pwisin tufichiir. Ese lifilifil ika kich mi nisássáw are sise, nge mi lamot ngenikich meinisin ach sipwe achocho le ámááraatá ach enletin tipetekison.

6. Met sia tongeni káé seni aposel Paulus usun met 1 Korint 15:10 a áiti ngenikich?

⁶ Sipwe nengeni pwóróusen aposel Paulus. Jiowa a fókkun néúnéú lón fférútáán ekkewe mineféén mwichefel lón eú me eú telinimw. Neman a fen féri chómmóng mettóch lón ewe angangen afalafal lap seni meinisin néún Jesus Kraist kewe aposel. Nge Paulus ese átekiatáái pwisin i seni pwiin kewe. A apasa fán tipetekison: “Ngang üa kis seni ekewe soukünö meinisin, esap fich ngeniei ai üpwe iteni eman soukünö, pun üa ariaföüü chon ewe mwichefelin Kot.” (1 Kor. 15:9) Iwe, a pwúng án Paulus apasa pwe a úéch mwen mesen Jiowa pokiten án Jiowa úméúméch ngeni, nge esap pokiten a kkóló aúchean are ren an féri chómmóng mettóch fán itan. (Álleani 1 Korint 15:10.) Paulus a isetiw leenien áppirú mi múrinné ren tipetekison. Lupwen a mak ngeni ekkewe Chón Kraist lón Korint, ese sikásini pwisin i inaamwo ika ekkóch lón ena mwichefel ra esiita.​—2 Kor. 10:10.

7. Ifa usun emén pwiich chómmóng aramas ra sissilei lón ei fansoun a pwári pwe a tipetekison?

⁷ Pwiich Karl F. Klein, mi piin chóni ewe Mwichen Soupwúngúpwúng, a isetiw leenien áppirú mi múrinné ren an tipetekison. A  makkeei pwóróusen manawan mi fókkun apéchékkúlakich. A apwóróusa fán tipetekison usun an kewe apwangapwang me osukosuk a kúna lón manawan. Áwewe chék, a kerán sótun fiti ewe angangen afalafal imw me imw lón ewe ier 1922. A mmen weires ngeni, iwe ese chúen fiti ena angang ina epwe ren úkúkún ruu ier. Mwirin, lupwen Pwiich Klein a angang lón Bethel, ren ekis fansoun a song ren emén Chón Kraist mwán mwirin an fénéú. Pwal och, a semmwen lón pekin memmeef pokiten lululóón aúrek, nge mwirin a chikaretá. Nge a pwal feiéch ren an eáni chómmóng wis mi aúchea. A ifa me tipetekisonun pwiich na chómmóng ra sissilei, atun a apwóróusa an kewe apwangapwang! Chómmóng pwiich kewe ra tongei me chechchemeni Pwiich Klein, me wenecharan le apwóróusa pwóróusen manawan mi múrinné. *

8. Ifa usun 1 Petrus 5:6 a álisikich le kúna pwe Jiowa a pwapwa ren ewe napanap tipetekison?

⁸ Ewe ákkáeúin popun ach ámááraatá tipetekison, pokiten a apwapwaai letipen Jiowa. Ewe aposel Petrus a affata ena mettóch. (Álleani 1 Petrus 5:6.) Iei met néúch we puk itelapan “Come Be My Follower” a apasa usun alon Petrus kana: “Lamalamtekia a usun chék poison. A mmen efeiengaw. Kot esap fókkun néúnéú emén mi lamalamtekia inaamwo ika eménna mi fókkun sipeéch me lipwákéch. Nge Jiowa a tongeni néúnéú pwal mwo nge emén ese kon lipwákéch ika eménna a tipetekison. . . . [Epwe] . . . fókkun pwapwa le efeiéchuk pokiten ka tipetekison.” * Enlet, ese pwal wor met mi múrinné sia tongeni féri lap seni ach apwapwaai letipen Jiowa!​—SalF. 23:15.

9. Pwata aramas repwe mochen chiechi ngenikich ika sia tipetekison?

⁹ Me lúkún ach apwapwaai Jiowa, sia pwal kúna chómmóng feiéch seni ach ámááraatá tipetekison. Ika sia tipetekison, aramas repwe mochen chiechi ngenikich. Ren ach sipwe weweiti ena, sipwe mwo ekieki met sókkun aramas chómmóng ra mochen chiechi ngeni. (Mat. 7:12) Chómmóng kich sise mochen nóm ren ekkewe sókkun aramas iir mi péchéú wóón pwisin ar mochen nge rese mochen etiwa met ekkewe ekkóch ra sani. Nge, sia sani ika chienach kewe chón lúkú ra eáni “eu chök memef” me ra pwal pwári tong “usun chök pwipwi, o eäni kirikiröch o tipetekisonfengen.” (1 Pet. 3:8) Ika sia mochen chiechi  ngeni ekkena esin aramas, iwe ese mwáál repwe pwal mochen chiechi ngenikich ika sia tipetekison.

10. Ifa usun tipetekison a tongeni ámecheresaaló manawach?

¹⁰ Tipetekison a pwal ámecheresaaló manawach. Fán ekkóch a tongeni pwisin fis lón manawach are lón manawen ekkewe ekkóch minne sia ekieki pwe ese pwúng. King Salomon, emén mi tipachem a pwal mirititi ena, a erá: “Üa küna pwe ekewe amanau ra wawa oris, nge samol ra fetal usun chök ekewe amanau.” (SalAf. 10:7) Fán ekkóch, chókkewe mi fókkun lipwákéch rese kúna án aramas asamoluur are mwareitiir. Nge chókkewe rese kon lien lipwákéch, fán ekkóch ra kúna watteen assamol. Inaamwo ika a ina usun, nge Salomon a mirititi pwe a eú alen tipachem ach sisap mángaw ren minne mi ngaw a fis ngenikich, nge sipwe chék ekieki pwe a chék ina usun manaw. (SalAf. 6:9) Ika sia tipetekison, epwe mecheres ngenikich ach sipwe etiwa met a fis lón manawach inaamwo ika sise sani.

11. Met itá sipwe féri ika emén a fénékich?

¹¹ Iteiten rán a suuk ngenikich chómmóng alen ach sipwe pwáraatá tipetekison. Ekieki ekkeei atun. Atun emén a fénékich. Mi éch sipwe chemeni pwe ika emén a fénékich, neman a fen watte met ewe sia mwáálliló wóón nge sise tepereni. Lón ekkena atun sia kerán angei ewe fén, neman sipwe meefi pwe sisap mochen etiwa. Neman sipwe esiita eménna are napanapen an fénékich. Nge ika sia tipetekison, sipwe achocho le eáni ekiek mi pwúng.

12. Me ren Än Salomon Fos 27:5, 6, pwata itá sipwe kilisou ngeni emén mi fénékich? Áweweei.

¹² Emén mi tipetekison a aúcheani kapasen fén. Áwewe chék, anchangei pwe ka fiti ach kewe mwich. Ka fen akkaasoos ngeni chómmóng chienom kewe chón lúkú, nge mwirin emén me leir a mwéngúnúngún ngonuk pwe a wor och mwéngé leféúniimw. Ese mwáál ka sáw. Nge esap pwe kopwe kilisou ngeni eménna ren an erenuk? Ren enletin, neman ka fen áneánei pwe amwo itá emén a fen mwittir erenuk! Pwal ina chék usun, mi lamot sipwe tipetekison le aúcheani án emén chienach chón lúkú pwora le eáni ewe esin fén mi lamot ngenikich. Me rech, eménna i chiechiach, nge esap chón oputakich!​—Álleani Än Salomon Fos 27:5, 6; Kal. 4:16.

13. Ifa usun sipwe pwári tipetekison lupwen ekkewe ekkóch ra wiseni ekkóch wis lón án Kot angang?

¹³ Atun ekkóch ra eáni ekkóch wis lón án Kot angang. Iei meefien emén mwán mi  ásimaw itan Jason: “Lupwen ua kúna án ekkewe ekkóch wiseni ekkóch wis, fán ekkóch ua ekieki ika pwata use kefil le wiseni ena wis.” Ka fen meefi ina usun? Ese wor ngawen án emén mochen wiseni pwal ekkóch wis lón an angang ngeni Jiowa. (1 Tim. 3:1) Iwe nge, mi lamot sipwe túmúnú minne sia ekieki. Ika sia túmúnúngaw, sia tongeni mut ngeni lamalamtekia an epwe máár lón letipach. Áwewe chék, emén Chón Kraist mwán a tongeni poputá le ekieki pwe i ewe a kon sip seni meinisin le féri eú angang lón ewe mwichefel. Are emén fin pwúpwúlú Chón Kraist epwe tongeni ekieki: ‘Mi fen fich ngeni pwúlúwei we ena wis lap seni átenan!’ Iwe nge, ika sia enletin tipetekison, sipwe túmúnúkich seni ekkena esin ekiek mi pwári lamalamtekia.

14. Met sia tongeni káé seni met Moses a féri lupwen ekkóch ra angei ekkóch wis?

¹⁴ Sia tongeni káé seni met Moses a féri lupwen ekkewe ekkóch ra angei ekkóch wis. Moses a aúcheani wisan we le emmweni ekkewe chón Israel. Nge met meefien Moses lupwen Jiowa a mut ngeni ekkewe ekkóch ar repwe pwal eáni ekkóch an kewe angang? Ese lólówó. (Num. 11:24-29) Fán tipetekison a mut ngeniir ar repwe féri ekkóch an angangen kapwúng wóón ekkewe aramas. (Eks. 18:13-24) Iwe pokiten ena, chómmóng ra tongeni álisi ekkewe chón Israel, iwe ra tongeni mwittir ataweei ar osukosuk. Iwe ren ena, Moses ese kon alamota wisan kewe lap seni met epwe amúrinnélóói nónnómun chón Israel. A ifa me échún ena leenien áppirú! Sia chemeni pwe Jiowa a chék tongeni enletin néúnéú kich ika sipwe akkomwa ach eáni tipetekison lap seni ach lipwákéch. Inaamwo ika Jiowa a “fokun tekia” nge a “afäli ekewe chon tekison.”​—Kölf. 138:6.

15. Ifa usun a siwil nónnómun chómmóng pwiich kewe?

¹⁵ Atun a siwil nónnómuch. Lón ekkewe ier kukkuto chék, a siwil wisen chómmóng  pwiich kewe mi fen angang ngeni Jiowa ren fite fite ier. Áwewe chék, lón ewe ier 2014, a siwil kókkótun ach mwicheich an esap chúen wor ewe wis district overseer, iwe chókkana me pwúlúwer kewe ra ketiw ar repwe féri pwal ekkóch angang. Lón pwal chék ena ier, a pwal poputá án ekkewe chónemmwen mi wisen sáifetál resap chúen eáni ena wis lupwen epwe tori 70 ieriir. Me ekkewe mwán mi ásimaw 80 ieriir feitá resap pwal chúen tongeni wiseni ewe wis chón akkót lón ewe kúmiin mwán mi ásimaw lón ewe mwichefel. Pwal och, lón ekkewe ier ra ló, chómmóng chón Bethel ra kewis ar repwe pioneer. Ekkóch ra úkútiw lón ar angangen special full time pokiten apwangapwangen inis, wiser lón famili, are pwal ekkóch mettóch.

16. Ifa usun pwiich kewe ra pwári tipetekison lupwen ra achocho le eérenaaló nónnómur minefé?

¹⁶ A weires ngeni chómmóng me lein pwiich kana ar repwe eérenaaló nónnómur iei. Pwúngún, ra fókkun sani wiser me lóóm, nge chómmóng me leir ra fen eáni ekkena esin wis ren fite ier. Ekkóch ra fókkun letipechou atun ra achocho le eérenaaló nónnómur minefé. Nge ló, ló, ló, ra tongeni eérenaaló. Pwata? Pún ra ákkáeúin tongei Jiowa. Ra silei pwe ra fen fangóló manawer ngeni Kot nge esap ngeni eú angang are eú wis. (Kol. 3:23) Ra pwapwa le sópweló chék le angang ngeni Jiowa fán tipetekison ese lifilifil wiser. Ra “likiti ngeni Kot [ar] öürek meinisin,” me silei pwe a tongeer.—1 Pet. 5:6, 7.

17. Pwata sia kilisou pwe án Kot we Kapas a apéchékkúlakich le ámááraatá tipetekison?

¹⁷ Esap pwe sia pwal kilisou pwe án Kot we Kapas a apéchékkúlakich le ámááraatá tipetekison? Lupwen sia ámááraatá ena napanap mi múrinné, sia kúna feiéch me ekkewe ekkóch repwe pwal feiéch. A atufichikich le likiitú fán ekkewe weires sia kúna lón manawach. Nge lap seni meinisin, sia arap ngeni Semach we lón láng. A ifa me pwapwaach le silei pwe inaamwo ika Jiowa “ewe mi Unusen Tekia,” nge a tongei me aúcheani néún kewe chón angang mi tipetekison!​—Ais. 57:15.