1, 2. (a) Met Jesus a ereni néún kewe chón káé lón ewe pwinin me mwen an epwele máló? (Ppii ewe sasing lepoputáán ei lesen.) (b) Pwata a lamot ngenikich ach sipwe chechchemeni popun sia afalafal? (c) Met sipwele káé?

LÓN ewe pwinin me mwen án Jesus epwele máló, a fóffós ngeni néún kewe aposel ren langattam fansoun. A alúkúlúkúúr pwe a fókkun tongeer. A pwal ereniir an kapas áwewe usun ewe iráán wain, ewe sia pwóróus usun lón ewe lesen mwen ei. Jesus a mochen apéchékkúla néún kewe chón káé ar repwe “uani ua mi chomong,” weween repwe sópweló le akkafalafala pwóróusen án Kot we Mwú.​—Joh. 15:8.

² Iwe nge, Jesus ese chék ereni néún kewe chón káé met mi lamot repwe féri nge a pwal ereniir pwata a lamot ar repwe féri. A ereniir popun mi lamot ar repwe sópweló le afalafal. A lamot ngenikich ach sipwe chechchemeni pwata a pwal lamot ach sipwe sópweló le afalafal. Ach ekieki usun ena mettóch epwe amwékútúkich le likiitú atun sia fiti ewe angangen “pwärätä ngeni aramas meinisin.” (Mat. 24:13, 14) Lón ei  lesen, sipwe pwóróus usun rúáánú popun me ren Paipel pwata sia afalafal. Pwal och, sipwe pwóróus usun rúáánú liffang seni Jiowa epwe álisikich le ukkuwa.

3. (a) Ifa ewe ákkáeúin popun sia afalafal me ren Johannes 15:8? (b) Met ekkewe kreip lón án Jesus we kapas áwewe ra wewe ngeni, me pwata a fich ena?

³ Ewe ákkáeúin popun sia afalafal, pokiten sia mochen elingaaló Jiowa me epinaaló itan we. (Álleani Johannes 15:1, 8.) Lupwen Jesus a eáni ewe kapas áwewe usun ewe iráán wain, a erá pwe Jiowa a usun emén chón túmún, are emén chón atake, mi kan ámáári ekkewe kreip. Jesus a erá pwe i pwisin ewe iráán wain, me ekkewe chón tapweló mwirin, iir palan kewe. (Joh. 15:5) Ina minne lón ei kapas áwewe, ekkewe kreip ra wewe ngeni ewe uwa néún Jesus chón káé ra uwaani are ewe angangen afalafal ra féri. Jesus a ereni néún kewe aposel: “Semei epwe küna ling ren, are oupwe uani ua mi chomong.” Lupwen ekkewe iráán wain ra uwaani féún kreip mi múrinné, ewe chón túmúnú ewe tánipiin wain a ling ren. Pwal ina chék usun, sia elingaaló Jiowa lupwen sia féri úkúkún ach tufich le afalafala pwóróusen Mwúún we.​—Mat. 25:20-23.

4. (a) Ifa usun sia epinaaló iten Kot we? (b) Met meefiom usun wisom le epinaaló iten Kot we?

⁴ Iten Kot we a fen unusen pin. Iwe ese pwal wor met sia tongeni féri pwe epwe lapóló ren pinin. Nge ifa usun sia epinaaló iten Kot we lupwen sia afalafal? Nengeni alon ewe soufós Aisea ei: “Oupwe chechemeni pwe ngang ewe Samol mi Unusen Manaman üa pin.” (Ais. 8:13) Sia epinaaló iten Kot we Jiowa lupwen sia aúcheani pwe ina ewe it mi tekia seni meinisin, me pwal lupwen sia álisi aramas le weweiti pwe mi pin ena it. (Mat. 6:9) Áwewe chék, lupwen sia áiti ngeni aramas ewe enlet usun napanapen Jiowa kewe mi amwarar, me pwal usun letipan pwe aramas repwe kúna manaw esemuch lón Paratis, sia álisiir le mirititi pwe meinisin met Satan a fen apasa usun Jiowa, a chék chofona. (Ken. 3:1-5) Sia pwal epinaaló iten Kot we lupwen sia álisi aramas le silei pwe a fich ngeni Jiowa “ling me iteüöch me manaman.” (Pwär. 4:11) Iei alon Rune, emén mi fen pioneer ren 16 ier: “Ua fókkun kilisou ren ai silei pwe mi suuk ngeniei ai upwe emén chón pwáraatá fán iten ewe Chón Fératá unuselapen láng me fénúfan. A amwékútúei le akkachocho le afalafal.”

5. (a) Ifa ewe popun sia afalafal me ren Johannes 15:9, 10? (b) Ifa usun Jesus a álisi néún kewe chón káé le weweiti lamoten ar repwe likiitú?

⁵ Álleani Johannes 15:9, 10. Ewe oruuen popun sia afalafala pwóróusen ewe Mwú, pokiten sia tongei Jiowa me Jesus. (Mark. 12:30; Joh. 14:15) Jesus a ereni néún kewe chón káé pwe mi lamot repwe ‘nonom lon an chen.’ Pwata Jesus a apasa  ena? Pokiten a silei pwe mi lamot ngeni néún kewe chón káé likiitú ren ar repwe eáni manawen Chón Kraist mi enlet. Ren enletin, lón Johannes 15:4-10, sia kúna pwe fán chómmóng Jesus a néúnéú ewe kapas “nonom” ren an epwe álisi néún kewe chón káé le weweiti lamoten ar repwe likiitú.

6. Ifa usun sipwe pwári pwe sia mochen nónnóm lón án Kraist tong?

⁶ Ifa usun sipwe pwári pwe sia mochen nónnóm lón án Kraist tong me angei an chen? Ren ach álleasochisi. Jesus a chék erenikich le féri met a pwal pwisin féri. A erá: “Üa aleasochisi än Semei kewe allük o nonom lon an chen.” (Joh. 15:10) Jesus a isetiw eú leenien áppirú fán itach.​—Joh. 13:15.

7. Ifa usun álleasochis a riri ngeni tong?

⁷ Jesus a affata pwe álleasochis a riri ngeni tong lupwen a apasa: “Iö a etiwa ai kewe allük o aleasochisiir, i ätewe mi echeniei.” (Joh. 14:21) Án Jesus allúk a feito seni Seman we, ina minne lupwen sia álleasochisi án Jesus allúk pwe sipwe afalafal, sia pwal pwári ach tongei Jiowa. (Mat. 17:5; Joh. 8:28) Me Jiowa me Jesus ra onómukich lón ar tong lupwen sia pwári ach tongeer.

8, 9. (a) Ifa pwal ewe eú popun sia afalafal? (b) Ifa usun alon Jiowa kewe lón Isikiel 3:18, 19 me 18:23 ra amwékútúkich le akkachocho le afalafal?

⁸ Ewe aúlúngátin popun sia afalafal, pokiten sia mochen éúréúra aramas usun ránin Jiowa we epwele war. Ewe Paipel a apasa pwe Noa emén “chon afalafala usun pwüng.” (Álleani 2 Petrus 2:5.) Me mwen ewe Noter, atun Noa a afalafala aramas, ese mwáál a apachaalong pwóróusen ewe kata epwele fis. Pwata sia erá ena? Pokiten Jesus a apasa: “Non ekkewe ran me mwen ewe nȯter ekkewe aramas ra chok mommongo o ukkun, ekkewe mwan me fefin ra puppunu fengen, tori ewe ran Noah a tonong non ewe wa-imw. Iwe rese mo tepereni met a fis tori ewe nȯter a feito o a sȯnireno meinisin. Epwe pwal ina chok ussun nupwen ewe Noun Aramas epwe wareto.” (Mat. 24:38, 39, Kapasen God) Inaamwo ika lape ngeni aramas rese aúseling ngeni Noa, nge a tuppwél le afalafala ewe kapasen éúréúr Jiowa a ngeni.

⁹ Lón ei fansoun, sia afalafala pwóróusen  ewe Mwú pwe aramas repwe tongeni silei letipen Kot fán iter lón mwachkkan. Sia wesewesen mochen aramas repwe etiwa ewe pwóróus me “manau” usun met Jiowa a pwal tipeni. (Is. 18:23) Lupwen sia afalafal imw me imw, me ikewe aramas ra soun nóm ie, sia éúréúra chómmóng usun warotoon án Kot we Mwú me katalóón ei ótót mi ngaw.​—Is. 3:18, 19; Tan. 2:44; Pwär. 14:6, 7.

10. (a) Ifa ewe popun sia afalafal me ren Mateus 22:39? (b) Ifa usun Paulus me Silas ra álisi ewe chon masen imwen fétek lón Filipi?

¹⁰ Ewe arúáánún popun sia sópweló le afalafal, pokiten sia tongei aramas. (Mat. 22:39) Ena tong a álisikich le akkafalafal pokiten sia silei pwe ekiekin aramas a tongeni siwil lupwen a siwil nónnómur. Áwewe chék, ekkewe chón oputa Paulus me Silas ra otururelong lón kalapus lón ewe telinimwen Filipi. Nge lukenipwin, a fis eú chechchechin fénú mi áchechcha ewe imwen kalapus, iwe ekkewe asamalap ra suukuló. Ewe chon masen imwen fétek a ekieki pwe ekkewe chón kalapus ra sú, iwe a niwokkus me mochen pwisin nieló. Nge Paulus a eppeti me kéngeni: “Kosap püsin afeiengauok!” Iwe ewe chón mas a eis: “Met ngang üpwe föri pwe üpwe küna manau?” Paulus me Silas ra ereni: “Kopwe lükü ach Samol Jesus, iwe . . . küna manau.”​—Föf. 16:25-34.

11, 12. (a) Met ewe pwóróus usun ewe chón masen imwen fétek a áiti ngenikich usun ach angangen afalafal? (b) Pwata sia mochen sópweló le afalafal?

¹¹ Met ena pwóróus usun ewe chón masen imwen fétek a áiti ngenikich usun ach angangen afalafal? Nengeni pwe a kerán siwil án ewe chón mas ekiek me a tingor álillis mwirin ewe chechchechin fénú. Pwal ina chék usun, ekkóch aramas rese mochen aúseling ngeni pwóróusen Paipel nge a tongeni siwil ar ekiek me kútta álillis lupwen a fis ngeniir watteen osukosuk. Áwewe chék, a ámáirú ngeni ekkóch an péút seniir ar angangen moni are ar mufesen me pwúlúwer. Ekkóch neman ra fókkun letipechou pokiten a úriir samau watte are málóón attongeer. Lupwen a fis ekkena mettóch, aramas ra tongeni poputá le eáni ekkewe esin kapas eis rese fen ekieki me lóóm usun manawer. Ra mwo nge tongeni ekieki: ‘Met a lamot upwe féri pwe upwe kúna manaw?’ Ra tongeni kerán mochen aúseling ngeni pwóróusen ewe ápilúkúlúk.

¹² Ina minne, ika sia sópweló le afalafal fán tuppwél, sia tongeni álisi aramas lupwen ra mmólnetá le etiwa ach oururuur. (Ais. 61:1) Iei alon Charlotte emén mi pioneer ren 38 ier: “Aramas ikenái ra chék nóm lón kiroch. A lamot ngeniir ar repwe rong ewe kapas allim.” Ejvor, emén pioneer ren 34 ier, a erá: “A fen kon lapóló seni lóóm án chómmóng meefi watteen letipechou. Ua wesewesen mochen álisiir. Ina met a amwékútúei le afalafal.” A ffat pwe tong ngeni aramas ina eú popun mi fókkun múrinné ach sipwe sópweló le afalafal!

13, 14. (a) Ifa ewe liffang Johannes 15:11 a fós usun? (b) Ifa usun sipwe eáni ewe esin pwapwa Jesus a eáni? (c) Ifa usun pwapwa a álisikich lón ach angangen afalafal?

¹³ Atun ewe pwinin me mwen án Jesus epwele máló, a fós usun ekkewe liffang epwe álisi néún kewe aposel le ukkuwa.  Ikkefa ekkena liffang, me ifa usun ra tongeni álisikich ikenái?

¹⁴ Ewe liffang: Pwapwa. Mi áweires ach sipwe afalafal? Aapw. Mwirin án Jesus eáni ewe kapas áwewe usun ewe iráán wain, a apasa pwe ika sia afalafal sipwe eáni an pwapwa. (Álleani Johannes 15:11.) Ifa usun a fis ena? Chechchemeni lón án Jesus kapas áwewe, a apasa pwe i ewe iráán wain, nge néún kewe chón káé, iir palan. Palan kewe ra chék tongeni ún me mwéngé ika ra pachengeni ewe irá. Pwal ina chék usun, sia chék tongeni kúna pwapwa usun Jesus ika sia fitipachei me tapweló mwirin. Iwe, sia tongeni eáni ewe pwapwa a eáni, ewe esin pwapwa mi pop seni ach féri letipen Kot. (Joh. 4:34; 17:13; 1 Pet. 2:21) Emén pioneer lap seni 40 ier itan Hanne a erá: “Ewe pwapwa ua meefi mwirin ai fiti ewe angangen afalafal a apéchékkúlaei le sópweló lón ai angang ngeni Jiowa.” Pwapwa a ngenikich ach péchékkúl le akkafalafal inaamwo ika lape ngeni aramas rese aúseling.​—Mat. 5:10-12.

15. (a) Ifa ewe liffang Johannes 14:27 a fós usun? (b) Ifa usun kinamwe a álisikich le ukkuwa?

¹⁵ Ewe liffang: Kinamwe. (Álleani Johannes 14:27.) Lón ewe pwinin me mwen án Jesus máló, a ereni néún kewe aposel: “Ai kinamwe üa fang ngenikemi.” Ifa usun án Jesus kinamwe epwe álisikich le akkafalafal? Lupwen sia achocho le akkafalafal, sia meefi kinamwe pokiten sia silei pwe sia apwapwaai Jiowa me Jesus. (Kölf. 149:4; Rom 5:3, 4; Kol. 3:15) Emén pioneer ren 45 ier, itan Ulf a erá: “Ewe angangen afalafal a émélúlúei nge ua fókkun meefi menemenéch me aúchean manawei.” Sia kilisou pwe sia fen kúna ena sókkun kinamwe mi nómoffóch!

16. (a) Ifa ewe liffang Johannes 15:15 a fós usun? (b) Ifa usun ekkewe aposel ra tongeni chék chichiechien Jesus?

¹⁶ Ewe liffang: Chiechifengen me Jesus. Mwirin án Jesus ereni néún kewe aposel an mochen repwe pwapwa, a áwewe ngeniir lamoten ar repwe pwári ewe sókkun tong ese ekieki chék pwisin i. (Joh. 15:11-13) Mwirin a erá: “Üa aita ngenikemi chiechiei.” A ifa me aúchean ena liffang, án emén epwe chiechien Jesus! Nge ifa usun ekkewe aposel repwe chék chichiechien Jesus? Jesus a áweweei: “Oupwe feila o uani ua.” (Álleani Johannes 15:14-16.)  Weween pwe repwe akkachocho le afalafal. Ina epwe ruu ier me mwen ena, Jesus a ereni néún kewe aposel: “Oupwe feila o afalafala ei kapas, ‘Ewe Mwün Läng a arapoto.’” (Mat. 10:7) Ina popun, lón ewe pwinin me mwen án Jesus máló, a apéchékkúla néún kewe chón káé le likiitú lón ewe angangen afalafal. (Mat. 24:13; Mark. 3:14) Pwúngún, pwe Jesus a silei pwe ese mecheres ar apwénúetá an we allúk. Nge ra tongeni féri ena me chichchiechi ngeni chék. Ifa usun? Ren álillisin pwal eú liffang.

17, 18. (a) Ifa ewe liffang Johannes 15:7 a fós usun? (b) Ifa usun ena liffang a álisi néún Jesus kewe chón káé? (c) Ikkefa ekkewe liffang ra álisikich lón ei fansoun?

¹⁷ Ewe liffang: Án Kot pélúweni ach kewe iótek. Jesus a apasa: “Oupwe tüngor meinisin mine oua mochen, iwe, epwe torikemi.” (Joh. 15:7, 16) Ese mwáál án Jesus na pwon a fókkun apéchékkúla ekkewe aposel! * Ekkewe aposel rese unusen weweiti pwe ekiseló chék Jesus epwele máló. Nge inaamwo ika a máló nge saminne weween pwe esap chúen wor álillisiir. Jiowa a mmólnetá le pélúweni ar kewe iótek me álisiir lón ar angangen afalafal. Iwe, ina met Jiowa a féri. Ekiseló mwirin án Jesus máló, ekkewe aposel ra tingorei Jiowa an epwe apworar, iwe Jiowa a pélúweni ar kewe iótek.​—Föf. 4:29, 31.

¹⁸ A pwal ina usun ikenái. Lupwen sia sópwósópwóló lón ach angangen afalafal, sia chék chichchiechi ngeni Jesus. Me sia tongeni lúkúlúk pwe Jiowa a chék mómmólnetá le pélúweni ach kewe iótek me álisikich lupwen a áweires ach angangen afalafal. (2 Kor. 4:7) Sia fókkun kilisou ren án Jiowa pélúweni ach kewe iótek me kilisou ren án Jesus chiechiach. Ekkena liffang seni Jiowa ra apéchékkúlakich le ukkuwa.​—Jas. 1:17.

19. (a) Pwata sia akkachocho le afalafal? (b) Met a álisikich le áweséchúoló ewe angang Kot a ewisa ngenikich?

¹⁹ Lón ei lesen, sia fen káé ekkeei rúáánú popun ach akkachocho le afalafal pwe sipwe elingaaló Jiowa me epinaaló itan we, pwári ach tongei Jiowa me Jesus, éúréúra aramas, me ach pwári ach tongei aramas. Sia pwal káé usun rúáánú liffang, pwapwa, kinamwe, chiechifengen me Jesus, me án Kot pélúweni ach kewe iótek. Ekkena liffang ra apéchékkúlakich le áweséchúoló ewe angang Kot a ewisa ngenikich. Jiowa a fókkun pwapwa le kúna ach angang weires le akkachocho le “uani ua mi chomong”!