SEMEI kewe me inei ra mwékút seni ewe fénú Georgia lón ewe leeni Tbilisi, ngeni Canada ina epwe lón ewe ier 1910. Ra nónnóm lón eú kúkkún imw lón eú leenien atake arap ngeni ewe sóópw itan Pelly, Saskatchewan, mi nóm notoun Canada. Ua uputiw lón 1928, ám wonomén nge ngang ewe setupwutur. Semei we a máló wonu maram mwen ai upwe uputiw, nge inei we a máló me leménúkolui. Ekiseló mwirin ena, fefinei we finichi itan Lucy a máló atun a 17 ierin. Iwe ai we uncle itan Nick a wisen túmúnúkem me pwii kewe me fefinei.

Lón eú ránin atun ua chúen kúkkún, chón ai we famili ra kúnaei ai weiti úkún emén néúm kewe oris. Ra fókkun rúké ika pwe ewe oris epwe kikiniei, iwe ra púchér ngeniei ai upwe likitaló úkún we. Iwe nge, sékúrúi e sorengeniir, me use rong ar na púchér ngeniei. Ua kilisou pwe use feiengaw. Nge ina ewe rán chón ai we famili ra kerán silei pwe ngang mi selingepúng. *

Emén chiechiem lón ám famili a erá pwe neman epwe fen éch ai upwe fiti ewe sukul  fán iten ekkewe semirit mi selingepúng. Iwe, Uncle Nick a tinieiló ngeni eú sukul fán iten ekkewe mi selingepúng lón Saskatoon, Saskatchewan. Ena sukul a fókkun towau seni ai famili, me pokiten a chék nimu ieri, ua fókkun niwokkus. Ua chék tongeni chuuri ai famili atun aséséén ekkewe ráninipin me lón summer. Ló, ló, ló, ua káé sign language me ua pwapwaiti ai kukkunou ngeni ekkewe ekkóch semirit.

Lón 1939, Bill Danylchuck me fefinei we nampa ruu itan Marion ra pwúpwúlú, iwe ra poputá le túmúnúei me fefinei we itan Frances. Lón ai famili, iir ekkewe mi akkomw káé Paipel ren Chón Pwáraatá Jiowa. Atun ai asésé lón summer, ra achocho úkúkún ar tongeni le áiti ngeniei ewe enlet lón Paipel. Ese mecheres ám aupwe pwóróusfengen pún rese sile sign langauge. Nge ra tongeni esilla pwe ua fókkun pwapwaiti minne ua káé usun Jiowa. Ua weweiti pwe minne ra féri a riri ngeni ewe Paipel, iwe ua fitiir atun ra ló afalafal. Ekiseló mwirin ena, ua mochen papatais, iwe lón September 5, 1941, Bill a papataiseei lón eú tirongkang mi lélé ren konikin lón eú chénúttu. Ena konik a mmen fókkun patekkich!

Lón ewe ier 1946, lupwen ua liwiniti imwei atun summer, aua fiti eú mwichelap lón Cleveland, Ohio lón Merika. Atun ewe áeúin rán, fefinei kewe ra makkeei pwóróus seni ekkewe afalafal pwe upwe tongeni weweiti masouen ewe prokram. Nge lón ewe oruuen rán, ua fókkun pwapwa lupwen ua silei pwe a wor eú kúmiin chón selingepúng lón ena mwichelap nge a wor emén mi wisen áweweei ekkewe afalafal ngeniir lón sign language. Iwe, ua kerán tongeni pwapwaiti ewe prokram, me a fókkun múrinné ai kerán wewefichiti minne Paipel a apasa!

Lón ena fansoun, a kerán chék wesiló ewe Oruuen Maunen Fénúfan, me chómmóng aramas ra mochen pwáraatá ar tuppwél ngeni fénúer. Nge atun ai ua liwiniti sukul mwirin ewe mwichelap, ua tipeppós le akkamwéchú ai tuppwél ngeni Jiowa. Iwe, ua úkútiw le kapong ngeni ewe filáik, eáni ewe kélún mwú, me fiti apwapwaan ekkewe ráninipin. Ua pwal úkútiw le fiti chienei kewe chón sukul le ló fál. Ekkewe chón angang lón ewe sukul rese pwapwa ren met ua féri, iwe ra sótun eniwokkusuei me chofona ngeniei pwe upwe siwili ai ekiek. Chienei kewe chón sukul ra kúna minne a fis ngeniei, iwe pokiten ena a suuk ngeniei chómmóng atun ai upwe tongeni afalafal ngeniir. Ló, ló, ló, ekkóch chienei kewe chón sukul, kapachelong Larry Androsoff, Norman Dittrick, me Emil Schneider, ra etiwa ewe enlet, me iir ra chúen angang ngeni Jiowa iei.

Lupwen ua ló ngeni pwal ekkóch telinimw, ua fókkun achocho le afalafal ngeni ekkewe mi selingepúng. Áwewe chék, lón ewe telinimw itan Montreal, ua ló ngeni eú leeni ikewe ia ekkewe mi selingepúng ra kan chufengen ie. Lón ena leeni, ua afalafal ngeni emén itan Eddie Tager, emén alúwél mi fiti eú gang. Átena a fiti ewe mwichefel mi eáni sign language lón Laval, Quebec tori an a máló lón ewe ier. Ua pwal chuuri emén alúwél itan Juan Ardanez. I a usun ekkewe chón Perea lóóm, pún a chekifichi ika ekkewe pwóróus a káé mi wesewesen lóngólóng wóón Paipel. (Föf. 17:10, 11) I a pwal fiti ewe enlet, me a wiseni ewe wis mwán mi ásimaw lón Ottawa, Ontario tori an a máló.

Lón 1950, ua mwékút ngeni Vancouver. Inaamwo ika ua fókkun sani le afalafal ngeni ekkewe mi selingepúng, nge ese tongeni ménnúkseniei met a fis lupwen ua afalafal ngeni emén fefin ese selingepúng  itan Chris Spicer me wóón ewe al. A mochen ach mwicheich epwe kan tittititó ren ekkewe puk me a mochen ai upwe chuuri pwúlúwan we itan Gary. Ua ló ren imwer we, me aua pwóróusfengen fansoun langattam ren ám chék makfengen lón taropwe. Mwirin ena ause chúen kúnafengenikem ren fitu ier. Nge lón eú mwichelap lón Toronto, Ontario ua fókkun máirú atun ra feito kapong ngeniei. Gary epwele papatais lón ena chék ránin. Ena mettóch a áchema ngeniei lamoten ach sipwe chék akkafalafal, pún sisap silei ika ewe emén sia afalafal ngeni epwe wiliti chón angang ngeni Kot.

Mwirin och fansoun, ua mwékút sefál ngeni Saskatoon. Me ikena ie ua chuuri emén fefin, me a tingorei ei ai upwe káé Paipel ngeni néún kewe rúúemén nengngin nippwe mi selingepúng, iter Jean me Joan Rothenberger. Iir ra sussukul lón ewe sukul fán iten chón selingepúng ua pwal piin sukul lón. Ekiseló ekkena rúúemén nengngin ra ereni chiener kewe chón sukul minne ra kákkáé. Ló, ló, ló, nimmén me lón ar we class ra wiliti Chón Pwáraatá Jiowa. Emén me leir itan Eunice Colin. Ewe áeúin atun aua chufengen me Eunice, ina ewe sáingoon ierin ai sukul lón ena sukul. Lón ena atun a ngeniei eféú okasi me tingorei ei ám aupwe chiechi. Ló, ló, ló, i a wiliti emén mi fókkun aúchea me rei, a wiliti pwúlúwei!

Lupwen inen Eunice we a silei pwe a kákkáé Paipel a ereni ewe principal an epwe etipetipa pwe epwe úkútiw le káé. Inaamwo ika a sótun féri ena, me a pwal mwo nge angei seni Eunice néún kewe puk a kan kákkáé lón, nge i a chék tipeppós le akkamwéchú an tuppwél ngeni Jiowa. Lupwen a mochen an epwe papatais, seman kewe me inan ra ereni, “Ika ka wiliti emén Chón Pwáraatá Jiowa, kosap chúen nóm lón imwach ei!” Iwe, lupwen a 17 ierin Eunice, i a towu seni imwan we me a nónnóm lón imwen eú familien Chón Pwáraatá. A sópweló le káé me ekiseló mwirin a papatais. Lupwen aua apwúpwúlú lón ewe ier 1960, seman kewe me inan rese fiti. Iwe nge, lón ekkewe ier mwirin, ekis me ekis a lallapóló ar súfélitikem  pokiten minne aua lúkú me napanapen ám ámááraatá néúm kewe.

Ese mecheres ngenikem, ám sam me in mi selingepúng, ám aupwe túmúnú fúmén át rese selingepúng. Nge aua fókkun túmúnú pwe repwe sile sign language pwe epwe tongeni wor alen ám aupwe pwóppwóróusfengen me asukuler ewe enlet. Pwiich kewe lón ewe mwichefel ra fókkun álilliséch ngenikem. Áwewe chék, emén sam a makkeetiw lón taropwe me áiti ngenikem pwe emén lein néúm kewe át a kapasingaw lón ewe Leenien Mwich. Aua mwittir pwákini ena mettóch. Fémén me lein nei kana át iter James, Jerry, Nicholas, me Steven ra wiseni ewe wis mwán mi ásimaw me angang ngeni Jiowa fán tuppwél, iir me pwúlúwer kewe me néúr kewe. Pwal och, Nicholas me pwúlúwan we Deborah ra álillis lón angangen chiyakú fán iten sign language lón ewe keangen ofes lón Britain, nge Steven me pwúlúwan we Shannan, ra álillis lón ewe kúmiin chiyakú sign language lón Merika.

A eletipechou pún eú maram me mwen áfáiken ierin ám we ránin apwúpwúlú, Eunice a máló ren an we semwenin kanser. An lúkúlúk wóón ewe manawsefál ina met a akkapéchékkúla lón ekkewe fansoun mi áweires ngeni. Ua fókkun mwétéresiti ewe rán upwe kúnasefáli i.

 Lón February 2012, ua turuló me a kup chúún wálúkúi. Ua mirititi pwe a lamot ngeniei álillis, iwe ua mwékút ngeni imwen emén nei kewe át me nónnóm rer me pwúlúwan we. Iei aua fiti ewe mwichefel lón Calgary lón sign language, ikewe ie ua sópweló le wiseni ewe wis mwán mi ásimaw. Ren enletin epwe kerán iei ai chóni eú mwichefel lón sign language! Iwe ifa usun ua akkamwéchú péchékkúlen ai riri ngeni Jiowa lón ekkewe fite fite ier ua chék fiti mwichefel lón English? Jiowa a álisiei. A apwénúetá an we pwon pwe epwe túmúnú ekkewe nau ese wor semer. (Kölf. 10:14) Ua fókkun kilisou ren meinisin chókkewe mi tipemecheres le makkeei fán itei masouen ekkewe afalafal lón mwich, káé sign language, me álillis le áweweei ngeniei lón sign language úkúkún ar tongeni.

Mi wor ekkóch atun use tongeni weweiti met a katowu lón ekkewe mwich are ua meefi pwe ese wor emén a weweiti met mi lamot ngeni ekkewe mi selingepúng. Lupwen ua lichippúng me mochen fangetá lón ekkena atun, ua ekieki alon Petrus we ngeni Jesus: “Äm Samol, iö aipwe feila ren? En ka eäni kapasen manau esemüch.” (Joh. 6:66-68) Ua káé le mosonottam usun chék chómmóng pwiich kewe mi selingepúng mi fen fiti ewe enlet ren fansoun langattam. Ua káé ai upwe lúkúlúk wóón Jiowa me an we mwicheich, me ai féri ei a atoto chómmóng feiéch. Iei a wor chómmóng ekkewe mwéngéén lúkú mi kawor lón pwisin ai fós, me ua pwapwa pwe ua tongeni fiti ekkewe mwich me mwichelap lón American Sign Language. Enlet, ua kúna pwapwa me feiéch lón manawei lón ai angang ngeni Jiowa, ach we Kot mi lapalap.