1. Met sipwele káé lón ei lesen?

 NÉÚN Jekop kewe mwán ra mwicheto únúkkún me aúselingéch ngeni met semer na epwele ereni emén me emén iir. Lón ewe lesen mwen ei, sia káé ussun alon Jekop kewe ngeni Rupen, Simeon, Lifai, me Juta, ekkewe mettóch rese ekieki pwe epwe erá. Iwe, ese mwáál repwe ekieki iká met epwele pwal ereni néún kewe wanimén lusun mwán. Sipwe ppii ekkewe lesen sia tongeni káé seni alon ngeni Sepulon, Isakar, Tan, Kat, Aser, Naftali, Josef, me Peniamin. a

SEPULON

2. Met Jekop a ereni Sepulon, me ifa ussun a pwénúetá alon kena? (Keneses 49:13) (Pwal ppii ewe  pwóór.)

² Álleani Keneses 49:13. Jekop a pwáári pwe mwirimwirin Sepulon kewe repwe nóm kkan ngeni órosset efengin ewe Fénúen Pwon. Lap seni 200 ier mwirin, ekkewe chón Sepulon ra angei inetiir we fénú mi nóm lefilen ewe Setin Kalili me ewe Setin Mediterranean. Iei án Moses oesini: “Chon ewe ainangen Sepulon repwe pwapwa lupwen ar saifetal lematau.” (Tut. 33:18) Eli ena mettóch epwe ámecheresi án ekkewe chón Sepulon sái ngeni setin ekkena ruu leeni pwe repwe tongeni kamé me amémé mettóch ngeni aramas seni pwal ekkewe ekkóch leeni. Ese lifilifil met, nge a wor popun ar repwe pwapwa.

3. Met a tongeni álisikich le menemenéch?

³ Met sia tongeni káé? A wor popun ach sipwe pwapwa ese lifilifil ia sia nóm ie, are met nónnómun manawach. Ren  ach sipwe chék pwappwapwa, a lamot ach sipwe menemenéch ren met mi wor rech. (Kölf. 16:6; 24:5) Fán ekkóch, a tongeni mecheres ach sipwe nefótófót wóón met ese wor rech lap seni ach nefótófót wóón met ekkewe mi múrinné mi fen wor rech. Ina minne, kopwe achocho le chemeni ekkewe mettóch mi múrinné mi fen fis lón manawom.—Kal. 6:4.

ISAKAR

4. Met Jekop a ereni Isakar me ifa ussun a pwénútá alon kana? (Keneses 49:14, 15) (Pwal ppii ewe  pwóór.)

⁴ Álleani Keneses 49:14, 15. Jekop a apúnga Isakar ren an angang weires. A erá pwe Isakar i emén mi péchékkúl ussun emén man mi tongeni uwei mettóch mi chou. Jekop a pwal erá pwe Isakar epwe fénúeni eú fénú mi múrinné. Pwal och, met Jekop a apasa a pwénúetá pún ewe einangen Isakar a fénúeni eú fénú únúkkún ewe Chénúpupu Jortan, ikewe a máréch ataken ie. (Jos. 19:22) Ina popun ra fókkun achocho le atakeni fénúer na. Iwe nge, ra pwal achocho le álisi ekkewe ekkóch. (1 King 4:7, 17) Áwewe chék, chón ena einangen Isakar ra kan mmólnetá le álillis le maun fán iten ewe mwúún Israel, ussun chék met ra féri lón fansoun ewe Soukapwúng Parak me ewe soufós fefin Tepora.—Souk. 5:15.

5. Pwata a lamot ach sipwe angang weires?

⁵ Met sia tongeni káé? Jiowa a aúcheani ach angang weires lón an angang ussun chék an aúcheani angang weiresin chón ewe einangen Isakar. (SalAf. 2:24) Áwewe chék, ekieki ekkewe Chón Kraist mwán mi angang weires le túmúnú ewe mwichefel. (1 Tim. 3:1) Ekkena mwán rese fiti eú wesewesen maun, nge iir ra achocho le túmúnú néún Kot kewe aramas seni ekkewe mettóch mi tongeni atai ar riri ngeni i. (1 Kor. 5:1, 5; Juta 17-23) Ra pwal angang weires le ammólnatá ekkewe afalafal me eáni lón ekkewe mwiich pwe epwe apéchékkúla chón ewe mwichefel.—1 Tim. 5:17.

TAN

6. Ifa ewe angang chón ewe einangen Tan ra féri? (Keneses 49:17, 18) (Pwal ppii ewe  pwóór.)

⁶ Álleani Keneses 49:17, 18. Jekop a apépééi Tan ngeni emén snake mi tongeni fiu ngeni emén man mi watte seni, áwewe chék ren ekkewe oris aramas ra wawa le maun. Chón ewe einangen Tan ra pwora me mmólnetá le maun ngeni chókkewe mi oputa ewe mwúún Israel. Lón ewe atun meinisin ekkewe einang ra sái ngeni ewe Fénúen Pwon, chón ewe einangen Tan “ra kükümwirifoch” pwe repwe túmúnúúr. (Num. 10:25) Ina eú angang mi aúchea inaamwo iká meinisin chón ekkewe ekkóch einang rese kúna met ra féri.

7. Met sipwe meefi ren eú angang mi kewis ngenikich lón ach angang ngeni Jiowa?

⁷ Met sia tongeni káé? Ka fen eáni eú angang ussun itá ka meefi pwe ekkewe ekkóch rese kúna óm féri? Áwewe chék, ka álillis lón elimelimen me túmúnún ewe Leenien Mwiich, álillis atun fisin eú mwichelap, are pwal ekkóch angang. Iká ina, iwe a fich ngonuk óm kopwe angei kapasen apúng! Fansoun meinisin, kopwe chemeni pwe Jiowa a kúna me aúcheani meinisin met ka féri fán itan. A fókkun pwapwa atun ka angang ngeni, esap pokiten ka mochen án ekkewe ekkóch repwe mwareituk, nge pokiten ka mochen pwáári óm enletin tong ngeni.—Mat. 6:1-4.

KAT

8. Pwata a mecheres ngeni chón koputen chón Israel ar repwe maun ngeni chón ewe einangen Kat? (Keneses 49:19) (Pwal ppii ewe  pwóór.)

⁸ Álleani Keneses 49:19. Jekop a osuni pwe eú mwichen chón solá repwe fiu ngeni Kat. Ina epwe 200 ier mwirin ena, ewe einangen Kat a álemwiri ewe fénú mi nóm lepekin  ewe Chénúpupu Jortan, ena fénú a nóm kkan ngeni fénúen chón koputer kewe. Ina popun a mecheres án chón koputer kana repwe maun ngeniir. Iwe nge, chón ena einangen Kat ra mochen nóm ikena pwe a mmen éch fán iten néúr kewe man. (Num. 32:1, 5) A ffat pwe chón ena einangen Kat iir aramas mi pwora. Nge lap seni ena, ra lúkúlúk pwe Jiowa epwe álisiir le maun ngeni chón koputer kana me túmúnú ena fénú a fang ngeniir. Ren fite fite ier, ra pwal tiinaaló néúr kewe soufiu ar repwe álisi ekkewe ekkóch einang le maun pwe repwe fénúeni ewe fénú mi nóm epekin ewe Jortan. (Num. 32:16-19) Chón ewe einangen Kat ra lúkúlúk pwe Jiowa epwe túmúnú pwúlúwer kewe me néúr kewe atun ekkewe mwán rese nóm rer. Jiowa a efeiéchú ar pwora me ar álisi ekkewe ekkóch inaamwo iká ese mecheres.—Jos. 22:1-4.

9. Iká sia lúkúlúk wóón Jiowa, ikkefa ekkewe kefil sipwe eáni?

⁹ Met sia tongeni káé? Ren ach sipwe sópwósópwoló lón ach angang ngeni Jiowa fán sókkopaten weires, a lamot sipwe sópweeló le lúkúlúk wóón i. (Kölf. 37:3) Chómmóng lón ei fansoun ra pwáári ar lúkúlúk wóón Jiowa ren ar álillis lón ewe angangen kaú, álillis ikewe mi osupwangen chón afalafal ie, are féri pwal ekkóch angang inaamwo iká ese mecheres ngeniir. Ra féri ena pokiten ra lúkúlúk pwe fansoun meinisin Jiowa epwe túmúnúúr.—Kölf. 23:1.

 ASER

10. Met chón ewe einangen Aser ra tunaaló le féri? (Keneses 49:20) (Pwal ppii ewe  pwóór.)

¹⁰ Álleani Keneses 49:20. Jekop a osuni pwe ewe einangen Aser epwe pisekisek, me ina met a wesewesen fis. Iir ra álemwiri ewe fénú mi fókkun múrinné pwúlún. (Tut. 33:24) Fénúer na a nóm kkan ngeni ewe Setin Mediterranean me a kapachelong ewe orooren Siton ikewe a kan fis angangen kamé me amémé ie. Iwe nge, ekkena chón Aser rese asúoló ekkewe chón Kenan seni ena fénú. (Souk. 1:31, 32) Án ekkena chón Kenan etipetip mi ngaw fitifengen me wéún chón ena einangen Aser, eli ina met a efisi ar resap chúen kon tinikken fán iten ewe fel mi enlet. Chón Aser rese álisi Parak atun a tingor chón álisi le maun ngeni ekkewe chón Kenan. Ina minne, rese kúna ekkewe mettóch mi amwarar Jiowa a féri pwe epwe álisi ekkewe chón Israel le win lón ewe maun “arun ekewe kolukun Mekito.” (Souk. 5:19-21) Ese mwáál, chón ena einangen Aser ra sáw atun ra rong án Parak me Tepora eáni ar we kélún win, ewe mi kapachelong ei itiitin: “Chon ewe ainangen Aser ra chök nonom aroset.”—Souk. 5:17.

11. Pwata a lamot ach sipwe eáni ekiek mi pwúng ussun ewe mettóch moni?

¹¹ Met sia tongeni káé? Sia mochen fang ngeni Jiowa met mi múrinné seni meinisin. Ren ach sipwe féri ena, a lamot sipwe túmúnúkich pwe site eáni án chón fénúfan  ekiek ussun moni me pisek. (SalF. 18:11) Sipwe achocho le eáni ekiek mi pwúng ussun ewe mettóch moni. (SalAf. 7:12; Ipru 13:5) Sise mochen olusaaló ach fansoun me péchékkúl le achocho ngeni ekkewe mettóch sise kon wesewesen need. Nge sipwe fen achocho úkúúkún ach tufich le fang ngeni Jiowa ach fansoun me péchékkúl lón ei fansoun, pún sia silei pwe iká sipwe akkamwéchú ach túppwél ngeni, i epwe fang ngenikich eú manaw mi amwarar lón ewe ótót séfé.—Kölf. 4:8.

NAFTALI

12. Ifa ussun a pwénúetá alon Jekop ngeni Naftali? (Keneses 49:21, NW) (Pwal ppii ewe  pwóór.)

¹² Keneses 49:21, NW a apasa: “Naftali a ussun emén chia mi pichiló. A eáni kapas mi fókkun múrinné.” Án Jekop apasa pwe Naftali a eáni kapas mi fókkun múrinné, a tongeni wewe ngeni napanapen án Jises kapas atun an angangen afalafal. A lap án Jises nónnóm Kaperniom, ewe telinimw mi nóm lón kiánin chón ewe einangen Naftali. Ina popun Kaperniom a iteni “telinimwan we.” (Mat. 4:13; 9:1; Jon 7:46) Aisea a osuni pwe Jises epwe ussun “eu saram mi watte” wóón aramasen Sepulon me Naftali. (Ais. 9:1, 2) Jises i ewe “saram mi enlet mi asarama sókkopaten aramas” ren an angangen asukul.—Jon 1:9.

13. Ifa ussun sipwe túmúnú ach kapas pwe epwe apwapwaai Jiowa?

¹³ Met sia tongeni káé? Minne sia apasa me napanapen ach kapas, a aúchea me ren Jiowa. Ifa ussun sia tongeni eáni kapas mi “fókkun múrinné,” ewe esin kapas mi apwapwaai Jiowa? Ina ren ach eáni kapas mi enlet. (Kölf. 15:1, 2) Sia tongeni apéchékkúla ekkewe ekkóch lón ach kapas ren ach apúnger me achocho ach sisap pwal fósun met ra mwáálliló wóón. (Efi. 4:29) Me sia tongeni achocho ngeni ach sipwe lipwákéchúló lón ach poputááni ach pwóróus ngeni aramas mi emmweni ngeni ach sipwe poputá le afalafal ngeniir.

JOSEF

14. Ifa ussun a pwénúetá ewe oesini ussun Josef? (Keneses 49:22, 26) (Pwal ppii ewe  pwóór.)

¹⁴ Álleani Keneses 49:22, 26. Ese mwáál, Jekop a fókkun pwapwa ren Josef, ‘ewe mi imwü seni pwin kewe.’ Jekop a eita ngeni Josef, palen “efoch irä mi ua.” Jekop, i ena irá, nge Josef, i palen ena irá. Josef, i néún Jekop mwánichi me wóón Rechel, pwúlúwan we mi fókkun tongei. Jekop a osuni pwe Josef epwe wisen angei ewe álemwirien mwánichi, nge esap Rupen, néún we mwánichi me wóón Lea. (Ken. 48:5, 6; 1 Kron. 5:1, 2) Kinikinin ena oesini a pwénúetá atun néún Josef kewe, Efraim me Manasa ra wiliiti ruu einangen Israel me a pwisin wor inetiir fénú.—Ken. 49:25; Jos. 14:4.

15. Met meefien Josef ussun ewe féfférún pwúngúngaw mi fis ngeni?

¹⁵ Jekop a pwal erá pwe ekkewe chón nikáppich repwe ‘fokun maun ngeni [Josef], ra likapichi o ariaföü.’ (Ken. 49:23) Chókkana, iir pwiin Josef kewe mi lólówóiti, kirikiringaw ngeni, me efisi an epwe nóm lón riáfféú. Iwe nge, Josef ese oputa pwiin kana, are tipi ngeni Jiowa met a fis. Jekop a apasa: ‘[Néún Josef] likapich a mei. Poun ra fokun lifech.’ (Ken. 49:24) Josef a lúkúlúk wóón Jiowa lón ena atun, me a omusaaló tipisin pwiin kana me a kirekiréch ngeniir. (Ken. 47:11, 12) Josef a mut ngeni ekkena sóssót an epwe fen émúrinnéló napanapan kewe. (Kölf. 105:17-19) Ina minne, Jiowa a tongeni néúnéú i le féri chómmóng mettóch mi aúchea.

16. Ifa ussun sia tongeni áppirú Josef atun sia nóm lón sóssót?

¹⁶ Met sia tongeni káé? Amwo sisap mut ngeni ekkewe sóssót ar repwe atowawaakicheló  seni Jiowa are seni chienach kewe chón lúkú. Chemeni pwe Jiowa a tongeni asukulakich atun sia sópweeló le angang ngeni lón fansoun weires. (Ipru 12:7) Ena asukul a tongeni álisikich le émúrinnéló napanapach kewe, napanapen Chón Kraist, áwewe chék ren ach úméúméch me omusaaló tipisin ekkewe ekkóch. (Ipru 12:11) Jiowa epwe efeiéchú ach likiitú ussun chék an efeiéchú Josef.

PENIAMIN

17. Ifa ussun a pwénúetá ewe oesini ussun Peniamin? (Keneses 49:27) (Pwal ppii ewe  pwóór.)

¹⁷ Álleani Keneses 49:27. Jekop a osuni pwe chón ewe einangen Peniamin repwe sipeéch lón angangen maun ussun chék emén wolif. (Souk. 20:15, 16; 1 Kron. 12:2) Saul, ewe áeménún kingen Israel, i seni ewe einangen Peniamin. I a pwora le maun ngeni ekkewe chón Filistia. (1 Sam. 9:15-17, 21) Fite fite ier mwirin, pwal rúúemén seni ewe einangen Peniamin, iir Kiwin Ester me Mortokai, ra seláni ekkewe chón Israel pwe rete ninniiló.—Est. 2:5-7; 8:3; 10:3.

18. Ifa ussun sia tongeni áppirú án chón ewe einangen Peniamin túppwél?

¹⁸ Met sia tongeni káé? Ese mwáál, ekkewe chón Peniamin ra fókkun pwapwa lupwen Saul, emén chón ar we einang a wiliiti king. Iwe nge, atun Jiowa a ewisa ngeni Tafit, emén seni ewe einangen Juta an epwe wisen king, ló, ló, ló, chón ewe einangen Peniamin ra álisaatá Tafit. (2 Sam. 3:17-19) Fitu ier mwirin, atun ekkewe ekkóch einang ra ú ngeni ewe einangen Juta, chón ewe einangen Peniamin ra chék túppwél ngeni ena einang me ewe king Jiowa a filaatá. (1 King 11:31, 32; 12:19, 21) Amwo sipwe pwal túppwél le álisaatá chókkewe Jiowa a ewisa ngeniir ar repwe emmwenikich lón ei fansoun.—1 Tes. 5:12.

19. Ifa ussun sia kúna feiéch seni án Jekop oesini me mwen an we epwele máló?

¹⁹ Minne sia káé seni án Jekop oesini, me ifa ussun a pwénútá, a alúkúlúkúkich pwe pwal ekkewe ekkóch oesini lón ewe Paipel, repwe wesewesen pwénúetá. A pwal álisikich le wewefichiti ifa ussun sipwe apwapwaai Jiowa.