Paulus a makkeei: “Ren pwüngün ekewe Allük ngang üa fen mäla, üa mäla ngeni ekewe Allük pwe üpwe manau fän iten Kot.”​—Kal. 2:19.

Minne Paulus a makkeei a riri ngeni ewe pwóróus mi aúchea a ereni chón ekkewe mwichefelin Kalatia mi nóm fán nemenien Rom. Ekkóch Chón Kraist ikena ie ra tipetipeló ren áitien ekkewe sense chofona. Ekkena sense ra afalafala pwe ren an emén epwe kúna manaw, a lamot an epwe álleasochisi ewe Allúkún Moses, ákkáeúin ren ewe allúkún sirkumsais. Nge Paulus a silei pwe Kot ese chúen allúkú ngeni ekkewe Chón Kraist ar repwe sirkumsais. Paulus a áweweéchú me ánneta ngeniir pwe ekkena afalafal ra chofona, me a apéchékkúla án pwiin kewe Chón Kraist lúkú án Jesus Kraist asorun méén kepich.​—Kal. 2:4; 5:2.

Ewe Paipel a affata pwe atun emén a máló, ese chúen silei och mettóch me met a fiffis únúkkún. (SalAf. 9:5) Atun Paulus a erá “üa mäla ngeni ekewe Allük,” a wewe ngeni pwe ese chúen nóm fán nemenien ewe Allúkún Moses. Nge Paulus a fókkun silei pwe ren an lúkú ewe asorun méén kepich, a “manau fän iten Kot.”

Ewe Allúk a efisi siwil ren nónnómun Paulus. Ifa usun? A kerán chék áweweei pwe “eman aramas a küna pwüng me ren Kot ren an lükü Jesus Kraist chök, nge esap ren an apwönüetä ekewe Allük.” (Kal. 2:16) Pwúngún, ewe Allúk a apwénúetá och mettóch mi fókkun aúchea. Paulus a áwewe ngeni ekkewe chón Kalatia: “Kot a apachatä ekewe Allük ngeni ewe pwonen atipeeu ar repwe aiti ngeni aramas ar föför mi mwäl, repwe pwal nonom tori epwe war mwirimwirin Apraham we, ätewe Kot a eäni ewe pwon fän itan.” (Kal. 3:19) Ewer, ewe Allúk a affata pwe aramas rese unuséch, rese tongeni unusen álleasochisi ewe Allúk, iwe a lamot ngeniir eú asor mi unuséch epwe fis fán eú chék. Iwe, ewe Allúk a álisi aramas le weweiti pwe Jesus, ina i ewe ‘mwirimwir.’ Ren án emén ákkeáni lúkú lón Jesus Kraist, a tongeni kúna pwúng me ren Kot. (Kal. 3:24) Paulus a mirititi pwe a etiwa me eáni lúkú lón Jesus ren ewe Allúk. Ina minne, Paulus a “mäla ngeni ekewe Allük,” me “manau fän iten Kot.” Ese chúen nóm fán nemenien ewe Allúk, nge a nóm fán nemenien Kot.

Paulus a pwal makkeei ena esin pwóróus lón néún we taropwe ngeni ekkewe chón Rom. “Ämi pwii kana, ina chök pwal usun ämi, oua mäla ngeni ewe Allük pokiten ämi oua eu kinikinin inisin Kraist . . . Sia ngas seni fän nemenien ewe Allük pokiten sia fen mäla ngeni mine a fötekinikich.” (Rom 7:4, 6) Ena wokisin me pwal Kalatia 2:19, ra pwári pwe Paulus ese fós usun an máló usun emén chón tipis fán ewe Allúk. Nge a fós usun an ngas. Ese chúen wor manamanen ewe Allúk wóór me ekkewe Chón Kraist. Ra ngas pokiten ar lúkú án Kraist we méén kepich.