Ewe telinimw Jerusalem are Sion, ewe iolap lón Juta lón ena fansoun, a tupuni unusen ewe mwú. (Ais. 60:14; 62:​1, 2) Iwe, minne Aisea a apasa a eppiietá ruu kapas eis: Áeúin, ineet me ifa ussun Jerusalem a “ütä” me saramoló lón pekin ngún? Oruuan, minne Aisea a apasa epwe pwénútá lón eú napanap mi lap lón ach ei fansoun?

Ineet me ifa ussun Jerusalem a “ütä” me saramoló lón pekin ngún? Jerusalem me ewe imwenfel mi nónnóm lón ra ngawoló atun ekkewe chón Jus ra ooló lón Papilon úkúúkún 70 ier. Nge mwirin án Papilon kkuf ren ekkewe chón Metia me Persia, ekkewe chón Israel lón ekkewe leeni mi nóm fán nemenien Mwúún Papilon ra tongeni liwiniti pwisin fénúer me eliwinisefáli ewe fel mi enlet. (Esr. 1:​1-4) Lepoputáán ewe ier 537 mwen Kraist, ina met ekkewe lusun aramas mi túppwél seni lón ekkewe 12 einang ra féri. (Ais. 60:4) Ra poputá le eáni asor ngeni Jiowa, féri ekkewe ránin chulap, me férsefáli ewe imwenfel. (Esr. 3:​1-4, 7-11; 6:​16-22) Iwe, lingen Jiowa a ttinetiwsefál wóón Jerusalem, weween, a poputá le saram wóón néún kewe aramas. Iwe iir, ra wiliiti saram ngeni ekkewe mwú, ekkewe rese silei Jiowa.

Iwe nge, án Aisea we oesini a pwénútá och chék kinikinin lón ena fansoun. Lape ngeni ekkewe chón Israel, rese sópwósópwoló le álleasochisi Kot. (Ne. 13:27; Mal. 1:​6-8; 2:​13, 14; Mat. 15:​7-9) Ló, ló, ló, ra pwal mwo nge tunaaló ewe Messaia, Jises Kraist. (Mat. 27:​1, 2) Iwe, lón ewe ier 70 mwirin Kraist, Jerusalem me ewe imwenfel ra pwal ta sefál.

Jiowa a fen osuni pwe epwe fis ena. (Tan. 9:​24-27) A ffat pwe esap letipen Jiowa án ewe Jerusalem wóón fénúfan epwe unusen apwénúetá ewe oesini lón Aisea sópwun 60.

Minne Aisea a apasa epwe pwénútá lón eú napanap mi lap lón ach ei fansoun? Ewer, nge epwe pwénútá ren “ewe Jerusalem asan.” Iei met ewe aposel Paul a apasa ussun ena: “Ina i inach we.” (Kal. 4:26) Jerusalem asan, ina kinikinin án Kot we mwicheich mi nóm láng, iir mwicheichen néún kewe chónláng mi túppwél. “Néún” neminna kewe, a kapachelong Jises me ekkewe 144,000 Chón Kraist mi kepit, ekkewe mi ussun chék Paul le eáni ápilúkúlúkún manaw lón láng. Ekkewe Chón Kraist mi kepit ra chóni “eú mwú mi pin,” “ewe Israelin Kot.”—1 Pit. 2:9; Kal. 6:16.

Ifa ussun ewe Jerusalem asan a “ütä” me “saramala”? A féri ena lón napanap mi pachelong néún kewe mi kepit wóón fénúfan. Apépéfengeniir me met ewe a fen oesini lón Aisea sópwun 60.

A lamot ekkewe Chón Kraist mi kepit repwe “ütä” pún ra nóm lón kiroch lón pekin ngún atun a chéúló ewe angangen rikiló mwirin málóón ekkewe aposel. (Mat. 13:​37-43) Lón ena atun ra nóm fán nemenien Papilon mi Lapalap, ewe mwicheichen lamalam chofona wóón unusen fénúfan. Ekkewe mi kepit ra fétek tori “sópwólóón ótóten ei fénúfan,” ewe mi poputá lón ewe ier 1914. (Mat. 13:​39, 40) Ekiseló mwirin ena, lón ewe ier 1919, ra ngaseló me ra mwittir poputá le asarama ewe saram lón pekin ngún ren ar unusen féri ewe angangen  afalafala kapas allimen ewe Mwú. a Seni ena atun, aramasen ekkewe mwú meinisin ra feito ngeni ena saram, kapachelong lusun chóchóón ewe Israelin Kot, iir “ekewe king” Aisea 60:3 a fós ussur.—Pwár. 5:​9, 10.

Lón mwachkkan, ekkewe Chón Kraist mi kepit repwe achéwúoló ewe saram seni Jiowa lón eú napanap mi lap seni ena. Ifa ussun? Lupwen epwe much manawer me wóón ei fénúfan, repwe chóni “ewe Jerusalem mi Fé,” are wiliiti pwúlúwen Kraist, iir ekkewe 144,000 king me souasor.—Pwár. 14:1; 21:​1, 2, 24; 22:​3-5.

A fókkun watte wisen ewe Jerusalem mi Fé lón pwénútáán Aisea 60:1. (Apépééi Aisea 60:​1, 3, 5, 11, 19, 20 ngeni Pwáraatá 21:​2, 9-11, 22-26.) Ewe Jerusalem wóón fénúfan, ina iolapen ewe mwúún Israel lóóm, iwe, ewe Jerusalem mi Fé me Kraist, epwe wiliiti ewe mwú lón ewe ótóten fénúfan mi fé. Ifa ussun ena Jerusalem mi Fé “a feitiw seni láng me ren Kot”? Ina ren an áfánni aramas wóón ei fénúfan. Ekkewe aramas mi niwokkusiti Kot seni ekkewe mwú meinisin, repwe “fetál lón saraman.” Repwe pwal mwo nge ngaseló seni tipis me máló. (Pwár. 21:​3, 4, 24) Iwe mwirin, epwe unusen ‘liwinsefál meinisin ekkewe mettóch’ ussun chék met Aisea me ekkewe pwal ekkóch soufós ra osuni. (Féf. 3:21) Ena watteen angangen liwinsefál, a poputá atun Kraist a wiliiti King me epwe muchúló lesópwólóón an we Nemenem Úkúúkún Engéréú Ier.