Ewer, án rúúemén annut lón eú chék imw nge ese wor popun mi pwúng, ina eú pisekin pwáraatá mi péchékkúl pwe iir ra féri tipisin lisowumwáál. Ina minne, ika ese wor popun mi pwúng, a lamot epwe wor eú kúmiin chón apwúng epwe angang wóón.​—1 Kor. 6:18.

Ewe kúmiin mwán mi ásimaw ra ekiekifichi minne a fis lón eú me eú fansoun pwe repwe silei ika mi lamot epwe wor kúmiin chón apwúng epwe angang wóón. Áwewe chék: Ekkewe rúúemén iir kammwet? Ekkewe mwán mi ásimaw ra fen éúréúrer lón ekkewe fansoun usun nikinikiir fengen lefiler? Met popun ra annut lón eú chék imw? Ra akkóta pwe repwe féri ena? A pwal wor ekkóch ar kefil, are a fis och mettóch ese wor ar nemenem wóór, choweán mettóch mi weiweitá are eú osukosuk mi atapwalapwal, ina popun ese chúen wor och mettóch ra tongeni féri lúkún chék ar repwe annut lón eú chék imw? (SalAf. 9:11) Ia ra annut ie? Minne a fis lón eú me eú fansoun ra sókkofesen, ina popun, neman epwe pwal wor och pwóróus mi tongeni kkúú minne ekkewe mwán mi ásimaw repwe apwúngaló.

Mwirin án ewe kúmiin mwán mi ásimaw ekieki meinisin pwóróus, iwe, epwele ffat ika mi lamot epwe wor kúmiin chón apwúng epwe angang wóón.