1, 2. Pwata a chék wokkor ekkóch aramas mi mwelele lón ei ótót?

 LÓN ei fansoun, ótóten sopai me pekin moni a áweires me pwúngúngaw. Áwewe chék, a weires ngeni chómmóng alúwél me fépwúl ar repwe kúnékún ar angang. Ekkóch ra mwékút ngeni ekkewe fénú mi wéúmmóng inaamwo ika ar féri ena epwe tongeni efeiengawa manawer. A wor chómmóng aramas mi mwelele pwal mwo nge lón ekkewe fénú mi wéúmmóng. Wóón unusen fénúfan, a chék lallapóló wéún ekkewe aramas mi pisekisek, nge a lallapóló osupwangen ekkewe aramas mi mwelele. Me ren ekkewe repot lón chék ekkewe ier, kapachelapen wéún fitemén chék aramas mi fókkun pisekisek, a léllé ngeni kapachelapen wéún meinisin lusun aramas. A ffat pwe a kon watte néún ekkóch aramas moni iwe a fen naf ngeni ánein manawer feiló, nge chómmóng aramas ra fókkun osupwang. Jesus a affata ena lupwen a erá: “Ekewe chon wöüngau repwe nom remi fansoun meinisin.” (Mark. 14:7) Pwata a fis ena sókkun?

² Jesus a silei pwe Mwúún Kot chék a tongeni siwili ótóten pekin business me kamé wóón ei fénúfan. Ewe Paipel a pwáraatá pwe “ekewe chon amömö,” are ótóten pekin business me kamé, iir kinikinin án Satan ei fénúfan, fitifengen me lamalam me  ótóten mwúún fénúfan are politics. (Pwär. 18:3) Néún Kot kewe aramas ra tongeni unusen imu seni pekin politics me lamalam chofona. Iwe nge, lap ngeniir rese tongeni unusen áimuroló seni pekin business me kamé lón án Satan ei fénúfan.

3. Ikkefa ekkewe kapas eis sipwe pwóróus wóór?

³ Kich Chón Kraist, a lamot sipwe etittina ach ekiek usun án fénúfan pekin business me kamé. Ren ach sipwe féri ena, sipwe eisini pwisin kich: ‘Ifa usun ua tongeni áeá piseki me nei moni le pwári pwe ua tuppwél ngeni Kot? Ifa usun ua tongeni akúkkúnaló ai angolong lón pekin business me kamé? Ikkefa ekkóch pwóróusen néún Kot kewe aramas ikenái mi pwári pwe ra unusen lúkúlúk wóón?’

4, 5. (a) Met a fis ngeni ewe souwa lón án Jesus we kapas áwewe? (b) Met Jesus a ereni néún kewe chón káé ar repwe féri?

⁴ Álleani Lukas 16:1-9. Án Jesus we kapas áwewe usun ewe souwa ese pwúng, itá epwe efisi ach mochen pwisin etittinakich. Emén a tipi ngeni ewe souwa pwe a asolapaaló mettóchun néún we masta, iwe ewe masta a filatá an epwe atowu seni wisan we. * (Ppii ewe pwóróus fan.) Nge ewe souwa a “tipachem.” Pwe me mwen an katowu, a chiechi ngeni chókkewe mi tongeni álisi i mwirin. Án Jesus eáni ena kapas áwewe, ese wewe ngeni pwe a mochen néún kewe chón káé repwe féri minne ese pwúng ren ar repwe tongeni atufichi manawer. Ina met chón ei fénúfan ra kan féri. Nge Jesus a eáni ena kapas áwewe pwe epwe áiti ngenikich eú lesen mi fókkun lamot.

⁵ Jesus a silei pwe epwe fókkun weires ngeni lap ngeni néún kewe chón káé ar repwe atufichi manawer lón ei ótót mi uren pwúngúngaw, usun chék án ewe souwa osukosuk mi weiweitá. Ina minne a ereniir: “Oupwe aea wöün fanüfan an epwe wor chiechiemi.” Pwata? Pún lupwen ekkena wéún fénúfan repwe lamotongawoló, iwe chiechiach kewe, weween Jiowa me Jesus, “repwe etiwakemi lon ewe leni ia aramas repwe nom ie tori feilfeilachök.” Met sia tongeni káé seni án Jesus na kapasen fén?

6. Ifa usun sia silei pwe án ei fénúfan pekin business me kamé esap ina met Kot a tipeni seni lepoputáán?

⁶ Inaamwo ika Jesus ese áweweei popun an erá pwe “ese pung” wéún fénúfan, nge Paipel a affata pwe án aramas achocho le awatteeló néúr moni, esap ina met Kot a tipeni seni lepoputáán. (Luk. 16:9, Testament Mi Fö) Áwewe chék, Jiowa a fangafangéch ngeni Atam me Efa chómmóng mettóch lón ewe tánipiin Eten. (Ken. 2:15, 16) Mwirin, lupwen Kot a ngeni ekkewe mi kepit ewe manaman mi fel, “esap fokun wor eman leir epwe apasa, pwe mine a wor ren epwe an chök, nge ra alilisfengen lefiler won meinisin mine ra eäni.” (Föf. 4:32) Ewe soufós Aisea a erá pwe epwe wor eú fansoun án aramas meinisin repwe pwapwaiti minne fénúfan a awora, nge esap wor pinepinan. (Ais. 25:6-9; 65:21, 22) Nge ren mwo iei, a lamot pwe ekkewe chón tapweló mwirin Jesus repwe “tipachem.” Epwe lamot ar repwe áeá wéún fénúfan le atufichi manawer, nge repwe pwal achocho le apwapwaai Kot.

7. Menni kapasen emmwen Jesus a ngenikich lón Lukas 16:10-13?

⁷ Álleani Lukas 16:10-13. Ewe souwa lón án Jesus we kapas áwewe a chiechi ngeni aramas ren an epwe kútta pwisin feiéchún. Iwe nge, Jesus a mochen pwe néún kewe chón káé repwe chiechi ngeni chókkewe lón láng esap ren ar repwe ekiekin kúna pwisin feiéchúr. A mochen sipwe weweiti pwe napanapen ach áeá wéún fénúfan a tongeni pwári ika sia tuppwél ngeni Kot. Ifa usun sia tongeni féri ena?

8, 9. Apwóróusa pwóróusen ekkóch pwiich mi pwári pwe ra tuppwél lón ar áeá met mi wor rer.

⁸ Eú mettóch sia tongeni féri le pwári ach tuppwél ngeni Kot lón ach áeá met mi wor rech, ina ren ach asor ngeni ewe angangen afalafal wóón unusen fénúfan, ewe Jesus a oesini pwe epwe fis. (Mat. 24:14) Emén kúkkún nengngin lón India a kan ekis me ekis isoni néún kewe féún moni lón eú kingko. A pwal mwo nge pennúkú an kamé néún lios ren an epwe isoni ena moni. Atun a ur an na kingko, a eáni asor unusan ngeni ewe angangen afalafal. Pwal emén mwán Chón Kraist lón India mi wor an ataken núú a liffang chómmóng ngeni ewe ofesin chiyakú lón fósun Malayalam. A meefi pwe a fen éch an liffang núú lap seni moni pún ena ofes a kan soun kamé núú. A pwári “tipachem.” Pwal ina usun pwiich kewe lón Kriis, ra kan liffang ngeni ewe Bethel apúra seni olif, cheese, me pwal ekkóch sókkun mwéngé.

⁹ Pwal emén Chón Kraist mwán a mut ngeni pwiich kewe fénúan we me imwan we pwe repwe áeá le mwich me mwichelap, me a pwal mut ngeni chókkewe mi angang ngeni Kot full-time ar repwe nóm lón. Pwiich na a pennúkú an moni tolong ren an féri ena, nge a fókkun álisi pwiich kewe ikena ese watte néúr moni. Lón eú fénú mi pinepin ewe angangen afalafal ie, pwiich kewe ra kan áeá imwer kewe pwe epwe Leenien Mwich. Ar féri ena a atufichi ekkewe pioneer me pwal ekkewe mi wéúngaw ar repwe tongeni mwich lón eú imw nge resap pwal mééni rent.

10. Ikkefa ekkóch feiéchún ach fang fán kisáseú?

¹⁰ Ekkena esin pwóróus ra pwári pwe néún Kot kewe aramas ra “allükülük le tümwünü mettoch mi kisikis.” (Luk. 16:10) Ra kan áeá met mi nóm rer le álisi ekkewe ekkóch. Met meefien chienen Jiowa kana ren ar asor met mi wor rer? Ra fókkun pwapwa pún ra silei pwe lupwen ra kisáseú, ra angei ekkewe wéú lón láng mi “enlet” are “wesewesen aüchea.” (Luk. 16:11; TF) Emén fefin Chón Kraist a kan asor moni pwe epwe álisatá angangen ewe Mwúún Kot. A erá pwe a ámáirú ngeni met a fis: “Ua kúna pwe lupwen ua alapaaló ai kisáseú le fang met mi wor rei, a pwal lapóló ai tipemecheres ngeni aramas. Ua meefi lapólóón ai tipemecheres le omusaaló tipisin  ekkewe ekkóch, mosonottam ngeniir, etiwa ese lifilifil met epwe elichippúngúei me etiwa kapasen fén.” Chómmóng ra kúna pwe ar pwári kisáseú a atoto rer feiéch.—Kölf. 112:5; SalF. 22:9.

11. (a) Ifa usun ach kisáseú a pwári “tipachem”? (b) Met a fiffis lein néún Kot aramas ikenái? (Ppii ewe sasing lepoputáán ei lesen.)

¹¹ Sia pwal pwári “tipachem” lupwen sia áeá met mi wor rech le álisatá ekkewe ekkóch lón ewe angangen afalafal. Ikaamwo sise tongeni angang ngeni Kot full-time are mwékút ngeni ikewe mi watte osupwangen chón afalafal ie, nge sia chúen tongeni álisi ekkewe ekkóch. (SalF. 19:17) Áwewe chék, ach monien asor a efisi kaworen néúch kewe puk me álisatá ewe angangen afalafal lón ekkewe fénú mi fókkun osupwang, ikewe chómmóng ra chóni ewe enlet ie. Lón ekkóch fénú, áwewe chék ren Congo, Madagascar, me Rwanda, a fókkun mémmóng Paipel. Iwe eú Paipel a tongeni mé ren peioffun ekkóch aramas lón unusen eú wiik are eú maram. Ren fite ier, a nóm ren pwiich kewe eú kefil le kamé enen chón ar we famili are mééni eú Paipel. Pokiten néún Jiowa kewe aramas wóón unusen fénúfan ra áeáfengen ekkewe monien asor, iwe án Jiowa we mwicheich a tufichin afféwú me awora Paipel ese kamé ngeni emén me emén lón ekkewe famili me pwal ngeni ekkewe chón káé. (Álleani 2 Korint 8:13-15.) Iwe chón liffang me chón angei, ra tongeni wiliti chiechien Jiowa.

12. Ifa usun Apraham a pwáraatá pwe a lúkúlúk wóón Kot?

¹² Sia pwal tongeni wiliti chiechien Jiowa lupwen sia akúkkúnaló ach angolong lón pekin business me kamé pwal atun sia kútta wéú mi “enlet.” Ina met ewe mwán mi tuppwél Apraham a féri. A álleasochisi Jiowa me ló seni ewe telinimw mi fókkun wéúmmóng itan Ur pwe epwe imweimw chék tento pokiten a mochen chiechi ngeni Jiowa. (Ipru 11:8-10) A lúkúlúk wóón Kot iteitan nge esap mettóchun aion. (Ken. 14:22, 23) Jesus a apéchékkúla ngeni ekkewe ekkóch ar repwe pwal áppirú ena esin lúkú. Lón eú atun, a ereni emén alúwél mi wéúmmóng: “Are ka mochen unusen föföröch, kopwe feila o amömöla meinisin mine ka eäni, nge ewe moni kopwe fang ngeni ekewe chon wöüngau pwe epwe wor woumw lon läng. Mürin kopwe feito o tapweto müri.” (Mat. 19:21) Ese wor ren ena alúwél ewe esin lúkú Apraham a eáni. Nge a pwal wor ekkóch aramas mi lúkúlúk wóón Kot.

13. (a) Ifa án Paulus kapasen fén ngeni Timoty? (b) Ifa usun sia tongeni apwénúetá án Paulus fén ikenái?

¹³ A watte án Timoty lúkú. Paulus a erá pwe i “eman nöün Kraist Jesus sounfiu mi allükülük,” a ereni: “Eman sounfiu mi föri wisan a mochen föri met an samol epwe pwapwa ren, nge esap pachelong lon sokun angangen manauen aramas.” (2 Tim. 2:3, 4) Chókkewe mi tapweló mwirin Jesus lón ei fansoun, kapachelong lap seni eú million chón angang ngeni Kot full-time, ra achocho  le apwénúetá án Paulus na kapasen fén. Ra ú ngeni ekkewe advertise mi sótuni aramas lón ei ótót mi uren tipemmóng. Ra chechchemeni ei kapasen emmwen: “Ewe chon paaro i nöün ewe chon mwütätä amanau.” (SalF. 22:7) Satan a mochen ach sipwe unusen áeá ach fansoun me péchékkúl le angang fán iten an ótóten pekin business me kamé. Ekkóch ra liwinimmang watte pwe repwe tongeni mééni imw, tarakú, sukul, are pwal mwo nge kókkótun apwúpwúlú. Ika sise túmúnúéch, sia tongeni fétek lón liwinimmang ren fite fite ier. Nge sia pwári tipachem lupwen sia ámecheresaaló nónnómun manawach, túmúnúkich seni liwinimmang, me eiseisa ach moni towu. Ach féri ena epwe atufichikich le angang ngeni Kot nge esap ótóten pekin business me kamé lón ei fansoun.​—1 Tim. 6:10.

14. Met a lamot sipwe tipeppós le féri? Apwóróusa ekkóch pwóróus.

¹⁴ Ren ach sipwe ámenemenéchú nónnómun manawach, a lamot sipwe akkomwa án Kot we Mwú. Eú pea pwúpwúlú ra eáni eú watteen business a mmen win. Iwe nge, ra mochen angangsefál ngeni Kot full-time. Iwe ra améméló ar na angangen business, waar we mwoota me pwal ekkóch pisekiir kewe. Mwirin, ra lo álillis lón kaútáán ewe ofesilap lón Warwick, New York. A mmen aúchea ngeniir pún atun ra fiti ena angang, ra angangeppék me néúr we nengngin me pwúlúwan we lón Bethel. Iwe ren pwal fitu wiik ena pean pwúpwúlú ra pwal angangfengen me semen me inen ewe mwán kewe lón ewe angang lón Warwick. Pwal emén pioneer lón Colorado, U.S.A. a kúnékún an angang part-time lón eú bank. Néún kewe boss ra fókkun sani án neminna angang, iwe a suuk ngeni an epwe angang full-time, nge úkúkún peioffun epwe lapóló seni peioffun me mwan fán úlúngát. Iwe nge, pokiten ena angang epwe eppeti an unusen nefotofot wóón an angangen afalafal, iwe ese etiwa ena angang. Ikkeei chék ekkóch me lein pwóróusen chómmóngun met néún Jiowa kewe chón angang ra pennúkúóló. Lupwen sia tipeppós le akkomwa Mwúún Kot, a pwári pwe sia aúcheani ach chiechi ngeni Kot me ewe wéú mi enlet, lap seni ach aúcheani mettóchun aion.

15. Ifa ewe wéú a atoto ngenikich ewe pwapwa mi kon watte seni meinisin?

¹⁵ Án emén pisekisek esap weween pwe a fen angei án Kot chen. Jiowa a efeiéchú chókkewe mi “pisekisek lon ar föför mürina.” (Álleani 1 Timoty 6:17-19.) Áwewe chék, emén Chón Kraist itan Lucia a rong pwe a wor osupwangen chón afalafal lón Albania. Iwe a mwékút seni Italy lón 1993. Ese wor an angang, nge a lúkúlúk pwe Jiowa epwe túmúnú. Iwe a káé fósun Albania me a álisi lap seni 60 aramas le fangóló manawer. Neman ese kon ina usun uwaéchún ach angangen afalafal lón leeniach. Nge meinisin met sia féri le álisi ekkewe ekkóch le silei Jiowa me wiliti chiechian, epwe aúchea ngenikich tori feilfeiló chék.​—Mat. 6:20.

16. (a) Met epwe fis ngeni án ei fénúfan ótóten pekin business me kamé? (b) Pokiten sia silei ena, iwe itá epwe met meefiach usun wéún fénúfan?

¹⁶ Jesus a affata pwe ei ótóten pekin business me kamé epwe úkúló. Nge lupwen a fósun an esap chúen wor lamoten wéún fénúfan, a néúnéú ewe kapas “lupwen epwe itela” nge ese néúnéú ewe kapas ‘ika’  usun itá árere. (Luk. 16:9) Lón ekkeei ránin lesópwólóón, ekkóch bank ra peló, me lón ekkóch fénú ótóten sopai a tatiw me manamanen moni ese chúen iman. Nge ekiseló chék, epwe fen ngangngawoló. Meinisin kinikinin án Satan ei fénúfan ren choweán ótóten mwúún fénúfan, lamalam, me pekin business me kamé, repwele taló. Ekkewe soufós Isikiel me Sefanaia, ra oesini pwe epwe aúcheangawóló kolt me silifer, ekkewe mi fókkun lamot ngeni ótóten pekin business me kamé seni chék lóóm. (Is. 7:19; Sef. 1:18) Epwe met meefiach ika a tori sópwólóón manawach lón ei ótót nge sia mirititi pwe sia fen alamota wéún fénúfan nge esap fen ewe wéú mi enlet? Neman sipwe meefi pwe sia usun emén mi angang lón unusen manawan pwe epwe awatteeló néún moni, nge mwirin a mirititi pwe unusen ewe moni tipitipin chék. (SalF. 18:11) Mettóchun ei fénúfan repwe aúcheangawóló. Iwe kopwe alamota ei atun mi chúen suuk ngonuk iei le chiechi ngeni Jiowa me Jesus ren óm áeá met mi nóm reom. Minne sia féri fán iten Jiowa me an we Mwú epwe atoto ngenikich enletin pwapwa.

17, 18. Met chiechien Kot kewe ra mwétéresiti?

¹⁷ Lupwen Mwúún Kot epwe war, esap chúen wor emén epwe mééni rent are liwinimmang imw. Mwéngé esap chúen kamé nge epwe fókkun naféch, me esap chúen lamot sipwe mééni tokter are sáfei. Chiechien Jiowa kewe repwe pwapwaiti masouen fénúfan mi fókkun múrinné. Sipwe eáni minen eling kolt, silifer, me faú aúchea nge esap chúen fán iten minen awéú emén. Sisap chúen mééni irá, faú, me mechá mi fókkun múrinné ren ach sipwe áeá le kaú imw mi lingéch. Chienach kewe repwe álisikich pokiten ar mochen, nge esap pokiten sipwe mééniir. Sipwele chék áeáfengen meinisin met masouen fénúfan.

¹⁸ Ikkena ekkóch chék me lein ekkewe feiéch mi echipwér epwe nóm ren aramas mi chiechi ngeni chókkewe mi nóm láng, weween Jiowa me Jesus. Ekkewe chón fel ngeni Jiowa wóón fénúfan repwe mweireir fán pwapwa lupwen ra rong alon Jesus ei: “Oupwe feito ämi mi feiöch me ren Semei! Oupwe mwüni ewe mwü mi molotä fän itemi seni lepoputän fanüfan.”​—Mat. 25:34.