1. Pwata ewe Áchechchem ina ewe rán mi kon aúchea? (Luk 22:​19, 20)

 ÁCHECHCHEMEN án Kraist we máló, ina ewe rán mi aúchea seni meinisin lón ei ier. Ina chék ewe atun Jises a allúkú ngeni néún kewe chón tapweló mwirin ar repwe féri. (Álleani Luk 22:​19, 20.) A wor fitu popun pwata sia mwétéresiiti ewe Áchechchem. Sipwele káé fitu me leir.

2. Ikkefa ekkóch popun sia mwétéresiiti ewe Áchechchem?

² Ewe Áchechchem a álisikich le ekilonei aúchean ewe méén kepich. A áchchema ngenikich ekkóch alen ach sipwe pwáári pwe sia aúcheani án Jises na asor. (2 Kor. 5:​14, 15) Sia pwal tufichin “apéchékkúlafengenikich” me chienach kewe. (Rom 1:12) Iteiten ier, chókkewe mi úkútiw lón ar angang ngeni Jiowa ra fiti ewe Áchechchem. Ekkóch me leir ra pwal mwo nge liwiniti Jiowa pokiten án chón ewe mwichefel etiwaéchúúr. Me chómmóng ra sani minne ra kúna me rong iwe ra mochen poputá le káé Paipel. Ina popun, ewe Áchechchem a fókkun aúchea me rech.

3. Ifa ussun ewe Áchechchem a etipeeúfengeni ach we mwicheichen pwipwi wóón unusen fénúfan? (Pwal ppii ewe sasing.)

³ Sia pwal mwétéresiiti ewe Áchechchem pokiten lón ena ránin sia tipeeúfengen me chienach kewe wóón unusen fénúfan. Lón na ránin mwirin tuputiwen ewe akkar Chón Pwáraatá Jiowa lón en me fénúer ra mwichfengen. Oukich meinisin sia rong eú afalafal mi menlapei lamoten ewe méén kepich. Sia eáni rúúaché kélún mwareiti Jiowa, pássini ewe pilawa me ewe wain, me apasa “amen” ren unusen letipach atun ekkewe rúáánú iótek. Iwe, lón úkúúkún 24 awa, meinisin mwichefel ra fen féri ekkena. Ka tongeni anchangei pwapwaan Jiowa me Jises atun ra kúna ach chufengen wóón unusen fénúfan pwe sipwe asamoluur lón ena napanap?

4. Met sipwele káé lón ei lesen?

 ⁴ Lón ei lesen sipwele pwóróus wóón ekkeei kapas eis: Ifa ussun sia tongeni ammólnatá letipach fán iten ewe Áchechchem? Ifa ussun sia tongeni álisi ekkewe ekkóch le kúna feiéch seni? Me ifa ussun sia tongeni álisi chókkewe mi úkútiw lón ar angang ngeni Jiowa? Pélúwen ekkeei kapas eis epwe álisikich le mmólnetá ngeni ena rán mi aúchea.

IFA USSUN SIPWE AMMÓLNATÁ LETIPACH FÁN ITEN EWE ÁCHECHCHEM?

5. (a) Pwata a lamot sipwe ekilonei aúchean ewe méén kepich? (Kölfel 49:​7, 8) (b) Met ka káé seni ewe video Pwata Jesus A Máló?

⁵ Eú alen ach sipwe ammólnatá letipach fán iten ewe Áchechchem, ina ach ekilonei aúchean án Jises Kraist we asoren méén kepich. Ese wor met sia tongeni pwisin féri le angasakich seni tipis me máló. (Álleani Kölfel 49:​7, 8; pwal ppii ewe video Pwata Jesus A Máló?) a Ina popun Jiowa a akkóta án Jises epwe fangoló manawan fán ásengesich. A watte minne Jiowa me Jises ra pennúkúóló. (Rom 6:23) Lapólóón ach ekilon wóón minne Jiowa me Jises ra pennúkú fán itach, pwal ina lapólóón ach aúcheani ewe méén kepich. Sipwele káé fitu mettóch mi weires Jiowa me Jises ra tipemecheres le féri fán ásengesich. Nge akkomw, met a kapachelong lón ewe méén kepich?

6. Met a kapachelong lón ewe méén kepich?

⁶ Ewe méén kepich ina ewe liwin emén epwe méénatiw ren an epwe angeisefáli och mettóch. Atun Kot a féri Atam, i mi unuséch, nge atun a tipis a péút seni ewe tufichin manaw esemuch esap chék fán itan nge meinisin mwirimwirin kewe. Jises a fangoló pwisin manawan mi unuséch pwe epwe méénisefáli minne a péút seni Atam. Lón ánein manawen Jises wóón fénúfan “ese féri och tipis, ese pwal apasa och kapas mi otuputup.” (1 Pit. 2:22) Jises a unuséch atun a máló ussun chék Atam me mwen an tipis. Iwe atun Jises a fangoló manawan, a unusen méénisefáli minne Atam a péútaaló.—1 Kor. 15:45; 1 Tim. 2:6.

7. Ikkefa ekkóch sóssót Jises a kúna atun a nóm wóón fénúfan?

⁷ Atun Jises a nóm wóón fénúfan a álleasochisi Jiowa inaamwo iká a weires ngeni. Inaamwo iká a unuséch seni lekúkkúnún we, a álleasochisi seman kewe me inan rese unuséch. (Luk 2:51) Atun a teenage, a lamot an epwe ú ngeni etipetipaen chókkewe mi mochen epwe álleasolapa seman kewe me inan, are Jiowa. Me atun a watte, a lamot án Jises epwe ú ngeni Setan ewe Tefil ewe a otupu an epwe tipis, me a pwal mwo nge ereni an esap túppwél ngeni Kot. (Mat. 4:​1-11) Setan a fókkun achocho le efisi án Jises epwe tipis pwe esap tongeni wiliiti ewe méén kepich.

8. Ikkefa ekkewe pwal ekkóch sóssót Jises a likiitú faar?

⁸ Atun Jises a afalafal wóón fénúfan, a kúna pwal ekkóch sóssót. Chón oputa i ra eriáfféwúmwááli me pwal sótun nieló. (Luk 4:​28, 29; 13:31) A pwal likiitú ngeni mwáállin chókkewe mi tapweló mwirin. (Mark 9:​33, 34) Atun a útá mwen ekkewe soukapwúng, aramas ra esiita me eriáfféwú fán kirikiringaw. Mwirin a ninniiló lón ewe napanap mi ássáw me fókkun ámmetek. (Ipru 12:​1-3) Me mwen chék an epwele máló, ese kúna túmún seni Jiowa me a likiitú fán ena sáingoon sóssót wóón pwisin an. b—Mat. 27:46.

9. Ifa meefiach ussun án Jises we asor? (1 Piter 1:8)

 ⁹ A ffat pwe Jises a nóm fán watteen weires ren an epwe awora ewe méén kepich. Esap pwe sia fókkun tongei Jises atun sia kan ekieki ussun an tipemecheres le fangoló manawan fán ásengesich?—Álleani 1 Piter 1:8.

10. Met Jiowa a pennúkúóló fán iten ewe méén kepich?

¹⁰ Nge ifa ussun ren Jiowa? Met Jiowa a tipemecheres le pennúkúóló pwe Jises epwe tongeni wiliiti ewe méén kepich? Ese wor eú riri lefilen emén sam me néún át a tongeni léllé ngeni ewe riri lefilen Jiowa me Jises. (SalF. 8:30) Ekieki mwo meefien Jiowa atun a kúna án Jises likiitú fán chómmóng sóssót wóón fénúfan. Ese mwáál a fókkun weires letipen Jiowa atun a kúna án aramas féfféringaw ngeni Néún we, oputa, me sótuni.

11. Eáni eú áweweei mi pwáári ifa meefien Jiowa atun Jises a ninniiló.

¹¹ Iká a má seni emén sam are in néún, iwe ra fókkun weweiti úkúúkún letipechoun ena memmeef. Sia fókkun lúkú ewe manawsefál nge atun emén attongeach a má senikich, a chúen metek letipach. Ena pwóróus a álisikich le weweiti meefien Jiowa atun a katol án Néún na mi áchengicheng riáfféú me máló lón ewe ier 33. c—Mat. 3:17.

12. Ikkefa ekkewe mettóch sia tongeni káé mwen ewe ránin Áchechchem?

¹² Seni ikenái tori ewe fansoun Áchechchem, pwata kese achocho le alapaaló óm sile ussun ewe méén kepich lón pwisin óm káé are atun óm Famili Fel? Áeá ewe Research Guide for Jehovah’s Witnesses (iká mi kawor lón óm fós) are ekkewe pwal ekkóch minen álillisin káé Paipel le kútta pwal ekkóch pwóróusen ewe méén kepich. d Pwal och, fiti ewe kókkótun Álleaan Paipel fán iten ewe Áchechchem mi kawor lón ewe Manawach Chón Kraist me Ach Angangen Afalafal—Minen Káé fán Iten Mwiich. Me atun ránin ewe Áchechchem, kosap ménúki le katol ewe videon lesenin rán mi kkóló aúchean. Atun sia ammólnatá letipach fán iten ewe Áchechchem, sia tufichin álisi ekkewe ekkóch le feiéch seni.—Esr. 7:10.

ÁLISI EKKEWE EKKÓCH LE FEIÉCH SENI

13. Ifa ewe áeúin mettóch sia tongeni féri le álisi ekkewe ekkóch le feiéch seni ewe Áchechchem?

¹³ Ifa ussun sia tongeni álisi ekkewe ekkóch le kúna feiéch seni ewe Áchechchem? Ewe  áeúin mettóch sia tongeni féri, ina ach etiwer. Me lúkún ach fós ngeni chókkewe sia chuuriir lón ewe angangen afalafal, sia tongeni makkeetiw iten chókkewe sia sissileer pwe sipwe etiwer. Áwewe chék ren aramasach kewe, chienach chón sukul, chienach chón angang, me ekkewe ekkóch. Me ikáámwo ese wor néúch taropween etiwetiw, sia tongeni ttin ngeniir ewe link fán iten ewe taropween etiwetiw online. Eli sipwe máirú ren úkúúkún chóchóón chókkewe repwe fiti.—SalAf. 11:6.

14. Áweweei aúchean ach ngeni emén pwisin néún taropween etiwetiw.

¹⁴ Atun ka pwisin etiwa emén ngeni ewe Áchechchem, eli repwe mochen fiti. Eú rán, emén Chón Kraist fefin a máirú atun pwúlúwan we, esap i emén Chón Pwáraatá, a ereni pwe epwe fiti lón ewe Áchechchem. Pwata a máirú? Pokiten fán chómmóng a ekketiwa, nge ese fiffiti. Pwata iei a siwil an ekiek? A ereni, “Emén a ngeniei pwisin nei taropween etiwetiw,” me a áweweei pwe emén mwán mi ásimaw a sissilei a etiwa. Pwúlúwen ena fefin na a fiti ewe Áchechchem lón na ier, me fán chómmóng lón ekkewe ier mwirin.

15. Met sipwe chechchemeni atun sia etiwa aramas ngeni ewe Áchechchem?

¹⁵ Chemeni pwe chókkewe sia etiwer, eli epwe wor ar kapas eis, ákkáeúin iká resaamwo fiti ach kewe mwiich fán eú. Ina popun, sia tongeni ekieki ussun ekkewe kapas eis eli repwe eáni, me ammólnatá pélúwer. (Kol. 4:6) Áwewe chék, eli ekkóch repwe eis: ‘Met epwe fis atun ewe Áchechchem?’ ‘Epwe ifa ttaman?’ ‘Met úpwe úféúf?’ ‘Mi kamé ái fiti?’ ‘Epwe wor assawen sepien asor?’ Atun sia etiwa emén ngeni ewe Áchechchem, sia tongeni eisini, “Mi wor óm kapas eis ussun ewe Áchechchem?” iwe mwirin pélúweni an kapas eis. Sia tongeni akkattola ngeniir ekkewe video, Chechchemeni Málóón Jesus me Met A Fiffis lón ewe Leenien Mwich? pwe sipwe tongeni álisiir le weweiti napanapen ach kewe mwiich. Me a wor lón lesen 28 lón ewe puk Eáni Manaw mi Pwapwa! pwóróus mi múrinné sia tongeni áiti ngeniir.

16. Ikkefa pwal ekkóch kapas eis chókkewe mi fiti ewe Áchechchem eli repwe eáni?

 ¹⁶ Eli epwe pwal wor án chókkewe mi kerán fiti ewe Áchechchem kapas eis mwirin. Eli repwe ekieki iká pwata ese wor emén are fitemén chék a mwéngé ewe pilawa are ún ewe wain. Eli repwe pwal ekieki iká fán fite sia kan féri ewe Áchechchem. Me eli repwe mochen silei iká meinisin án Chón Pwáraatá Jiowa kewe mwiich ra chék taitap. Inaamwo iká ewe chón afalafal atun ewe Áchechchem epwe fós ussun meinisin ekkena pwóróus, eli epwe chúen lamot ach sipwe áwewefichi ena pwóróus ngeni chókkewe mi kerán fiti. Ewe lesen wóón jw.org itelapan “Why Do Jehovah’s Witnesses Observe the Lord’s Supper Differently From the Way Other Religions Do?” a tongeni álisikich le pélúweni ekkóch ar kewe kapas eis. Sipwe achocho úkúúkún ach tufich le álisi chókkewe “letiper a páengeni ar repwe etiwa ewe enlet” me mwen, atun, me mwirin ewe Áchechchem, pwe repwe kúna feiéch seni.—Féf. 13:48.

ÁLISI CHÓKKEWE MI ÚKÚTIW LÓN AR ANGANG NGENI JIOWA

17. Ifa ussun ekkewe mwán mi ásimaw ra tongeni álisi chókkewe mi úkútiw lón ar angang ngeni Jiowa? (Isikiel 34:​12, 16)

¹⁷ Atun ewe fansoun Áchechchem, ifa ussun ekkewe mwán mi ásimaw ra tongeni álisi chókkewe mi úkútiw lón ar angang ngeni Jiowa? Pwáári ngeniir pwe ka chúngúúr. (Álleani Isikiel 34:​12, 16.) Me mwen ewe Áchechchem, achocho le kéri chómmóng me leir úkúúkún óm tufich. Alúkúlúkúúr pwe ka chúngúúr me ka mochen álisiir. Etiwer ngeni ewe Áchechchem. Iká ra fiti, iwe etiwaéchúúr fán tong. Wesin ewe Áchechchem, sópweeló le chuchchuuri me kékkéri chienach kana mi áchengicheng, me awora ese lifilifil álillis lón pekin lúkú mi lamot ngeniir pwe repwe liwiniti Jiowa.—1 Pit. 2:25.

18. Ifa ussun oukich meinisin sia tongeni álisi chókkewe mi úkútiw lón ar angang ngeni Jiowa? (Rom 12:10)

¹⁸ Meinisin chón ewe mwichefel ra tongeni álisi chókkewe mi fiti ewe Áchechchem nge ra úkútiw lón ar angang ngeni Jiowa. Ifa  ussun? Ren ach tongeer, kirekiréch ngeniir, me súfélitiir. (Álleani Rom 12:10.) Chemeni pwe eli epwe weires ngeni ekkena siip mi áchengicheng ar repwe fitisefáli mwiich. Eli ra niwokkus ren met chón ewe mwichefel repwe ereniir are iká met repwe erá ussur. e Ina popun sisap eisiniir ekkewe sókkun kapas eis epwe ássáwer are apasa och mettóch epwe ámmetekiir. (1 Tes. 5:11) Iir chienach le fel ngeni Jiowa me sia pwapwa le angangfengen sefál me iir lón ach fel ngeni Jiowa!—Kölf. 119:176; Féf. 20:35.

19. Ikkefa ekkewe feiéch mi feito seni ach chemeni málóón Jises?

¹⁹ Sia fókkun kilisou ren án Jises erenikich ach sipwe chechchemeni an máló iteiten ier, me sia weweiti pwata a fókkun lamot ena. Atun sia fiti ewe Áchechchem, sia pwisin kúna feiéch me pwal ekkewe ekkóch. (Ais. 48:​17, 18) A lapóló ach tongei Jiowa me Jises. Sia pwáári úkúúkún ach aúcheani minne ra féri fán itach. A lapóló ach ririéchfengen me pwiich kewe. Me eli sia álisi ekkewe ekkóch ar repwe káé ifa ussun repwe pwal tongeni pwapwaiti ekkewe feiéch mi pop seni ewe méén kepich. Amwo oukich meinisin sipwe achocho úkúúkún ach tufich le mmólnetá fán iten ewe Áchechchem lón ei ier, ina ewe rán mi aúchea seni meinisin!