Ua uputiw lón Quebec City, lón eú kinikinin Canada itan Quebec, ikewe aramas ra kan eáni fósun France ie. Semei we itan Louis me inei we itan Zélia ra pwári ar tongeei seni lekúkkúni. Semei we a kan nisássáw me a fókkun sani le állea. Ua sani mak me ua mochen pwe upwe wiliti emén chón mak simpúng ika ua watte.

Eli atun a 12 ieri, emén chienen semei we chón angang itan Rodolphe Soucy me chienan we ra etto rem lón imwem we. Iir me rúúemén iir Chón Pwáraatá Jiowa. Use kon sissilei usun ekkewe Chón Pwáraatá Jiowa me use kon mochen silei usun ar lamalam. Nge ua ingeitiir ren ar néúnéúéchú ewe Paipel fán kirekiréch le pélúweni ám kewe kapas eis. Semei kewe me inei ra pwal ingeló, iwe aua mut ngeniir ar repwe káé ngenikem ewe Paipel.

Lón ena fansoun, ua fiti eú high school sukulen Katolik. Fán ekkóch, ua pwóppwóróus ngeni chienei kewe chón sukul usun minne ua káé atun ám káéén Paipel. Ló, ló, ló, ekkewe sense, iir patere, ra silei. Rese fen néúnéú ewe Paipel le pwáraatá mwáállin minne ua apasa, nge emén leir a fen tipi ngeniei mwen mesen unusen ewe class pwe ngang emén chón ú ngeni mwú! Inaamwo ika ena mettóch a efisi watteen ai aúrek, nge a álisiei pún a affata ngeniei pwe áitien ena sukul lón pekin lamalam ese tipeeú ngeni met ewe Paipel a erá. Ua mirititi pwe ese éch ai fiti ena sukul. Semei kewe me inei ra mut ngeniei ai upwe mwékút ngeni pwal eú sukul.

Ua sópweló le káé Paipel, nge a weires ngeniei ai upwe feffeitá pún ua niw le fiti ewe angangen afalafal imw me imw. A fókkun péchékkúl ewe lamalamen Katolik me a fókkun ú ngeni ám angangen afalafal. Maurice Duplessis, ewe sounemenemen Quebec, a fókkun chiechi ngeni néúwisin ewe lamalamen Katolik. A tipeeú  ngeni ekkewe kúmiin aramas mi efitikokooi Chón Pwáraatá Jiowa me pwal mwo nge awater. A lamot ngenikem watteen pwora le afalafal lón ena fansoun.

Emén chienach mi sochungio seni ewe etiuen classin Sukulen Gilead itan John Rae a álisiei le pworacho ngeni ai niwokkus. John a fókkun lipwákéch, nge a pwal mosonoson, tipetekison, me a mecheres ngeni aramas ar repwe chiechi ngeni. Lape ngeni, ese apwúngúei, nge an leenien áppirú a áiti ngeniei chómmóng lesen. A weires ngeni John an epwe fós lón fósun France, iwe aua kan mwin le afalafal me ua álisi le fós. Ai chiechi ngeni John a álisiei le tipepwora me wiliti emén Chón Pwáraatá Jiowa. Ua papatais lón May 26, 1951, engol ier mwirin ai kerán fós ngeni Chón Pwáraatá Jiowa.

Lape ngeni chón ám we kúkkúnún mwichefel lón Quebec City iir pioneer. Ar leenien áppirú mi múrinné a amwékútúei le pwal pioneer. Lón ena fansoun, atun ám afalafal imw me imw, aua kan chék néúnéú ewe Paipel. Pokiten ause néúnéú puk, a lamot aupwe lipwákéch lón ám néúnéú ewe Paipel. Ina minne ua achocho le chechchemeni ekkewe wokisin seni Paipel epwe álisiei le peni ewe enlet. Iwe nge, chómmóng rese fókkun mochen álleani ewe Paipel ika ese ketiw me ren ewe lamalamen Katolik.

Lón ewe ier 1952 ua pwúlúweni Simone Patry, emén chón ena leeni mi tuppwél ngeni Kot. Aua mwékút ngeni Montreal, me kis seni eú ier mwirin, aua feiéch ren ám néúni emén nengngin, itan Lise. Inaamwo ika ua kaúló le pioneer ekiseló mwen ám pwúpwúlú, nge ám me Simone aua achocho le ámecheresi manawem pwe ám we famili epwe tongeni unusen álisatá angangen ewe mwichefel.

Lón ekkewe engol ier mwirin ena, use kon ekiekin achocho le alapaaló ai angangen afalafal. Iwe nge, lón ewe ier 1962, atun ua fiti ewe Sukul fán iten Mwán mi Ásimaw lón Bethel Canada úkúkún eú maram, aua nómfengen lón eú ruumw me emén mwán itan Camille Ouellette. Ua fókkun ingeiti án Camille tinikken le afalafal, nge ákkáeúin pokiten i mi famili. Lón ena atun, usun ese fókkun wor emén sam are in lón Quebec epwe pioneer nge pwal túttúmúnú néún. Nge ina met Camille a ekiekin féri. Atun ám nónnómfengen, a apéchékkúla ngeniei ai upwe pwal ekieki nónnómui. Mwirin chék fitu maram, ua mirititi pwe ua pwal tongeni pioneersefál. Ekkóch ra ekieki pwe ese éch, nge ua chék féri me ua lúkúlúk pwe  Jiowa epwe asopwéchú ai achocho le alapaaló ai angangen afalafal.

Lón 1964, ám me Simone aua kefilitá pwe aupwe special pioneer lón Quebec City, ewe ia ua uputiw ie, me aua pioneer lón ena leeni ren fite ier. Lón ena fansoun, ese kon áweires ewe angangen afalafal, nge a chúen wor chókkewe mi ú ngenikem.

Mwirin leolowasen eú Ammól, ua ares me Sainte-Marie, eú kúkkún sóópw mi kkan ngeni Quebec City. Emén polis a uweiei ngeni ewe polis station me kalapuseei pokiten ua afalafal imw me imw nge ese wor nei taropween mumutá. Mwirin, ra aútáei mwen mesen emén soukapwúng mi eniweniw itan Baillargeon. A eisiniei ié upwe néúni lawyer. Lupwen ua féúni iten Glen How, * emén Chón Pwáraatá Jiowa nge i emén lawyer mi iteféúló, iwe a niwokkus me erá: “Ékéle! Kan aapw!” Chómmóng ra silei usun án Glen How sipeéch le túmúnú ekkewe Chón Pwáraatá Jiowa lón kapwúng lón ena fansoun. Ekiseló mwirin, a chék kóturuló ai we case.

Pokiten chómmóng ra ú ngenikem lón Quebec, a weires ám aupwe kúnékún leenien mwich mi fich. Ám we kúkkún mwichefel aua chék mwich lón eú kúkkún garage ese wor minen epwichipwich lón. Ren ám aupwe mwaren epwichikkarakem atun patapat, chón ewe mwichefel ra kan pwisin uwei eú ar minen epwichipwich. Fán chómmóng aua chék mómmóót me ararakem únúkkún ena minen epwichipwich ren fite awa me mwen poputáán ewe mwich pwe aupwe pwóróusfengen usun pwóróusem mi apéchékkúl.

Ua mmen pwapwa le kúna uwaéchún ewe angangen afalafal lón ekkewe ier. Mwen ewe ier 1970, a chék wor fitu kúkkúnún mwichefel lón kinikinin Quebec City, Côte-Nord, me Gaspé Peninsula. Nge iei a wor chómmóng pwiich kewe lón ekkena leeni, me a wor ar kewe Leenien Mwich mi múrinné.

Ám me Simone aua ketiw le fiti ewe angangen sáifetál le chuuri ekkewe mwichefel lón ewe 1970. Mwirin, lón ewe ier 1973, ua kefilitá pwe upwe district overseer, iwe ám me pwúlúwei we aua wisen chuuri ekkewe kúmiin mwichefel. Lón ekkena fansoun, ua káé chómmóng seni ekkewe mwán mi lipwákéch, áwewe chék ren Laurier Saumur * me David Splane, * nge iir me rúúemén ra wisen sáifetál. Mwirin eú me eú mwichelap, ám me David aua kan pwóróusfengen wóón ifa usun aupwe ámúrinnééló ám angangen asukul. Ua chechchemeni eú atun David a ereniei: “Léonce, ua sani óm we sáingoon afalafal. Mi éch, nge ika ngang en, upwe fen kinietiw ena úkúkún pwóróus lón úlúngát afalafal!” Ua kon achommonga ekkewe pwóróus lón ai kewe afalafal. A lamot upwe káé le amwocha met ua erá.

Wisen ekkewe district overseer ar repwe apéchékkúla ekkewe chónemmwen mi wisen sáifetál.  Iwe nge, chómmóng ekkewe chón afalafal lón Quebec ra sissileei. Ra kan mochen upwe fitiir le afalafal lupwen ua chuuri ar we mwichefel. Inaamwo ika ua sani le fitiir le afalafal, nge use annafa ai fansoun ngeni ewe chónemmwen mi wisen sáifetál. Lón eú atun, emén chónemmwen mi wisen sáifetál mi tong a áchema ngeniei usun wisei, me a erá: “Mi éch óm awora óm fansoun ngeni chón ewe mwichefel, nge kosap ménúki pwe ei wiik kopwe chuuriei. A pwal lamot ngeniei óm kopwe apéchékkúlaei!” Ena kapasen áchem mi fiti tong a álisiei le itepék me rúúepek.

Lón ewe ier 1976, a weiweitá och mettóch mi fókkun échúúpwúl. A úri pwúlúwei we mi áchengicheng Simone eú semmwen mi chou me a máló. I emén chienei mi fókkun múrinné pokiten an tipemecheres le fangóló pwisin an kinamwe fán iten Jiowa. Ai fiffiti ewe angangen afalafal a wesewesen álisiei le likiitú ngeni ai pwosiiti, me ua kilisou ngeni Jiowa ren an álillis mi fiti tong lón ena atun. Mwirin ena, ua pwúlúweni Carolyn Elliott, emén pioneer mi eáni fósun Merika. A etto Quebec ren an epwe afalafal ikewe ie mi wor osupwangen chón afalafal ie. A mecheres án aramas repwe chiechi ngeni Carolyn me a fókkun áfánni aramas, ákkáeúin chókkewe mi nisássáw are tipitipingaw. A fókkun álilliséch ngeniei lón an fitiei lón ewe angangen sáifetál.

Lón January 1978, ua wisen senseen ewe áeúin Sukulen Pioneer mi fis lón Quebec. Ua fókkun pireir pún usaamwo fiti ena sukul me usaamwo pwal kúkkúna ewe puken sukul, usun chék ekkewe chón sukul. Ua kilisou pún chómmóng ekkewe chón sukul iir pioneer mi lipwákéch. Inaamwo ika ngang ua wisen sense, nge ua káé chómmóng mettóch seniir!

Mwirin, pwal chék lón ewe 1978, a fis ewe Mwichelapen Aramas Seni Sókkopaten Fénú itelapan “Victorious Faith” lón Montreal, lón ewe kúranto itan Olympic Stadium. Esaamwo fán eú epwe iei úkúkún chómmóngun chón fiti ám kewe mwichelap lón Quebec, a wor lap seni 80,000  chón fiti. Ua álillis lón ewe pekin mi wisen fós ngeni ekkewe chón ffér news. Ua fós ngeni chómmóng chón mak simpúng me chón angangen news me ua fókkun pwapwa lupwen ua kúna chómmóng mettóch mi múrinné ra erá usúm. Kapachelapen ekkewe broadcast wóón TV me reitio mi weneiti ám we mwichelap a lap seni 20 awa, me a wor fitepúkú pwóróus lón ekkewe simpúng ra katowu. A fókkun chéú pwóróusen ekkewe Chón Pwáraatá!

Seni chék ewe atun ua papatais, ua fiti ewe angangen afalafal Quebec, ikewe aramas ra kan eáni fósun France ie. Nge a wor eú watteen siwil lón manawei lón ewe ier 1996, pún ewe mwicheich a tiinieiló ngeni lón kinikinin Toronto pwe upwe afalafal ngeni chókkewe mi eáni fósun Merika. Ua meefi pwe use tufich ngeni ena angang, me ua niwokkus le eáni afalafal pún ua lipwákingaw lón fósun Merika. A lamot ngeniei ai upwe ikkiótek me alapaaló ai lúkúlúk wóón Jiowa.

Iei, atun ua kan ekieki usun ekkena ruu ier mi múrinné ua álillis lón kinikinin Toronto, ua tongeni enletin erá pwe ua pwapwaiti ena fansoun. Carolyn a álisiei fán mosonottam le angéchúló lón fósun Merika, me pwiich kewe ra fókkun kirekiréch me apéchékkúlaei. Aua mwittir chiechi ngeni chómmóng aramas ikena ie.

Me lúkún ekkewe mettóch upwe ammólnatá me mwen ekkewe mwichelap lón weekend, ua kan soun afalafal eú awa imw me imw lekuniolun Enimu. Neman ekkóch repwe ekieki, ‘Pwata a fiti afalafal mwen ewe mwichelap lón weekend nge epwele fen chómmóng an angang?’ Nge ua kúna pwe a apéchékkúlaei ai pwóppwóróus ngeni aramas lón ewe angangen afalafal. Tori iei, ewe angangen afalafal a apwapwaei.

Lón ewe 1998, ewe mwicheich a ewisa ngenikem me Carolyn ám aupwe special pioneer lón Montreal. Ren fite ier, ua kan wisen akkóta angangen afalafal ikewe aramas ra soun nóm ie, me ua kan fós ngeni ekkewe chón ffér news pwe upwe álillis le áwena sókkun ekiek mi mwáál aramas ra eáni usun Chón Pwáraatá Jiowa. Iei, ám me Carolyn aua pwapwaiti ám afalafal ngeni ekkewe chón ekis mi kerán mwékút ngeni Canada nge ra fókkun mochen káé ewe Paipel.

Atun ua ekieki ekkewe 68 ier ua angang ngeni Jiowa, ua meefi pwe a fókkun efeiéchúei. Ewe mettóch mi kon apwapwa me rei ina ai poputá le pwapwaiti ewe angangen afalafal me álisi chómmóng ar repwe silei ewe enlet. Lise me pwúlúwan we ra ámááraatá néúr kewe, nge mwirin, ra poputá le pioneer. A apwapwa me rei ai kúna tinikkenin lón ewe angangen afalafal. Ua ákkáeúin kilisou ren chienei kewe Chón Kraist mi álisiei ren ar leenien áppirú me kapasen fén mi múrinné, pún ra álisiei le ásimawóló me túmúnú sókkopaten angang fán iten Kot. Ua kúna pwe a chék tufich ach sipwe tuppwél lón ach angang ika sia lúkúlúk wóón án Jiowa we ngún mi fel mi manaman. (Kölf. 51:11) Ua chék kikkilisou ngeni Jiowa ren an mut ngeniei ai upwe kúna feiéchún ai mwareiti itan we!—Kölf. 54:6.