1. Ifa usun sia tongeni angangfengen me Jiowa?

LUPWEN Jiowa a fératá aramas, a mochen pwe repwe wiliti chienan chón angang. Inaamwo ika aramas rese unuséch lón ei fansoun, nge chókkewe mi tuppwél ra chúen tongeni angangfengen me Jiowa iteiten rán. Áwewe chék, kich sia “akkangangfengen me Kot” lupwen sia afalafala kapas allimen án Kot we Mwú, me álisi aramas le wiliti néún Jesus chón káé. (1 Kor. 3:5-9, NW) A mmen watte ena feiéch án ewe Chón Fératá mi Unusen Manaman filikichetá le féri eú angang mi fókkun lamot! Nge, ewe angangen afalafal esap chék ina alen ach sipwe angangfengen me Jiowa. Lón ei lesen, sipwe káé ifa usun sia pwal angangfengen me Kot lupwen sia álisi chón ach famili me chón ewe mwichefel, lupwen sia awasélaéchú aramas, lupwen sia álillis lón ekkewe sókkopaten angang ach mwicheich a féri wóón unusen fénúfan, me lupwen sia alapaaló ach angang ngeni Jiowa.​—Kol. 3:23.

2. Pwata a lamot ach sisap alélléfengeni met sia tufichin féri fán iten Jiowa ngeni met ekkóch ra tufichin féri?

² Atun sia káé ei lesen, a lamot ach sipwe chechchemeni pwe kich meinisin sia sókkofesen. Ese léllé ierich, péchékkúlen  inisich, nónnómuch, me tufichich. Ina popun, sisap alélléfengeni met sia tufichin féri fán iten Jiowa ngeni met ekkewe ekkóch ra tufichin féri. Aposel Paulus a erá: “Eman me eman epwe püsin apwüngü an föför. Are a mürina, mürin a tongeni pwapwa ren met a föri, nge esap awewei met i a föri ngeni met eman a föri.”​—Kal. 6:4.

3. Pwata sia tongeni apasa pwe meinisin chókkewe mi túmúnú ar famili ra akkangangfengen me Kot?

³ Jiowa a mochen ach sipwe túmúnú ach famili. Áwewe chék, neman kopwe angang pwe kopwe tongeni ataweei osupwangen óm famili lón pekin aion. Chómmóng ekkewe inelap ra nómwotiw lón imw pwe repwe túmúnú néúr kewe kúkkún. Me lupwen semach kewe me inach rese chúen tongeni túmúnú pwisin iir, iwe a lamot sipwe túmúnúúr. Mi lamot ekkena mettóch. Ewe Paipel a erá: “Nge are eman esap püsin tümwünü aramasan, fokun püsin chon an famili, a amamäsini an lükülük o an föför a ngau seni föförün eman esap souläng.” (1 Tim. 5:8) Ika a chou wisom lón óm famili, neman kese tongeni féri úkúkún met ka mochen féri fán iten Jiowa. Nge kosap lichippúng! Jiowa a pwapwa lupwen ka atufichi óm famili.​—1 Kor. 10:31.

4. Ifa usun ekkewe sam me in ra akkomwa án Kot we Mwú, iwe met a fis lupwen ra féri ena?

⁴ Ekkewe Chón Kraist sam me in ra tongeni angangfengen me Jiowa ren ar ákkálisi néúr kewe ar repwe isetiw met repwe achocho ngeni lón ar angang ngeni Jiowa. Chómmóng sam me in ra fen féri ena. Iwe ren ena, ekiseló mwirin néúr kewe át me nengngin ra filatá le angang ngeni Jiowa full-time, pwal mwo nge lón ekkewe leeni mi towau seni leenier we. Ekkóch ra misineri, ekkóch ra pioneer ikewe mi wor osupwangen chón afalafal ie, me ekkewe ekkóch ra angang lón Bethel. Pwúngún, lupwen ekkewe nau ra nóm towau, resap kon lien tongeni nóm ren semer kewe me iner usun met ra sani. Nge rese ekieki pwisin ar mochen me ra chék apéchékkúla néúr kewe ar repwe sópweló ar angang ngeni Jiowa ese lifilifil ia ra nóm ie. Pwata? Pokiten ra fókkun pwapwa pwe néúr kewe ra akkomwa Jiowa lón manawer. (3 Joh. 4) Chómmóng ekkena sam me in ra meefieni meefien Hana, ewe mi erá pwe a “fang” ngeni Jiowa néún we Samuel. Ra meefi pwe a watte ena feiéch ar repwe angangfengen me Jiowa lón ena napanap.​—1 Sam. 1:28.

5. Ifa usun ka tongeni álisi chón óm we mwichefel? (Ppii ewe sasing lepoputáán ei lesen.)

⁵ Ika ese wor wisom mi chou lón óm we famili, ka tongeni álisi pwiium kewe Chón Kraist mi semmwen are chinnap are mi osupwang ren och mettóch? Are ka tongeni álisi ekkewe chón túmúnúúr? Nengeni ika ié lón óm we mwichefel a osupwangen ena esin álillis. Áwewe chék, neman mi wor emén chienach fefin mi wisen túmúnú seman are inan mi chinnap. Ka tongeni awora fansoun le nóm ren pwe pwiich na epwe tongeni ataweei pwal ekkóch mettóch? Are neman ka tongeni álisi emén ren óm ereni pwe ka tongeni uwei ngeni mwich, ló market, are áámwa emén mi nóm pioing. Lupwen sia féri ekkena, neman sia akkangangfengen me Jiowa pwe epwe pélú án emén iótek.​—Álleani 1 Korint 10:24.

6. Ifa usun sipwe awasélaéchú aramas?

⁶ Chienen Kot kewe chón angang ra sill ren ar awasélaéch. Ewe kapas “awasélaéch” lón ewe Tesin Krik lón Paipel, a wewe ngeni “etiwa chon ekis.” (Ipru 13:2) Sia tongeni álleani lón Paipel ekkewe pwóróus mi áiti ngenikich ifa usun sipwe tongeni pwári ena sókkun féfférun kirekiréch. (Ken. 18:1-5) Sia tongeni me a pwal lamot ach sipwe álisi aramas fansoun meinisin lupwen a suuk ngenikich, ese lifilifil ika iir chón ach “familien chon lükülük” are esap.​—Kal. 6:10.

7. Ikkefa feiéchún óm awasélaéchú ekkewe chón angang ngeni Kot full-time?

⁷ Ka tongeni angangfengen me Jiowa ren óm awasélaéchú ekkewe chón angang ngeni i full-time nge ese wor ia repwe nóm ie? (Álleani 3 Johannes 5, 8.) Lupwen sia féri ena, repwe feiéch me kich sipwe pwal feiéch. Ewe Paipel a apasa pwe ina eú angangen “apöchökülafengenikich.” (Rom 1:11, 12) Nengeni pwóróusen Olaf. Lealúwélún, emén chónemmwen mi wisen sáifetál mi lipich a chuuri an we mwichefel. A osupwangen eú leeni epwe tongeni nónnóm lón, nge ese wor lón ewe mwichefel a tongeni álisi. Olaf a tingorei seman kewe me inan, esap iir Chón Pwáraatá, ika ewe chónemmwen a tongeni nónnóm rer. Ra tipeeú ngeni nge ra ereni Olaf pwe epwe lamot pwe i epwe annut wóón ewe sofa. Ina met Olaf a féri, me ese niamam. A mmen apwapwa unusen ewe wiik án ewe chónemmwen mi wisen sáifetál nóm ren! Iteiten lesossorusich, ra pwáátá me ra pwóróusfengen wóón sókkopaten pwóróus mi ámmeseik atun ar mwéngéén lesossor. Ewe chónemmwen mi wisen sáifetál a fókkun apéchékkúla Olaf, iwe Olaf a filatá an epwe poputá le angang ngeni Jiowa full-time. Iwe, a fen 40 ier iei, Olaf a fen emén misineri lón chómmóng fénú.

8. Pwata a lamot sipwe chúen kirekiréch ngeni aramas inaamwo ika rese pwári kilisou me lepoputáán? Apwóróusa eú pwóróus.

⁸ Sia tongeni pwári tong ngeni ekkewe aramas sise sissileer lón chómmóng napanap, inaamwo ika rese pwári kilisou me lepoputáán. Áwewe chék, emén chienach fefin lón Spein a káé Paipel ngeni Yesica, emén fefin seni Ecuador. Eú rán atun ar káéén Paipel, Yesica a chék kekkechiw. Ina popun pwiich na a eisini ika pwata a kechiw. Yesica a apwóróusa pwe i a fókkun wéúngaw me mwen an feito Spein. Eú rán, ese wor mwéngé a tongeni ngeni néún we nengngin, nge a chék éúnú konik. Yesica a tingor án Kot álillis atun a sótun annuta néún we. Ekiseló mwirin, rúúemén fefin Chón Pwáraatá ra chuuri Yesica me anéúnéú ngeni eú puk. Nge Yesica a song ngeniir, me kamwei ewe puk me apasa: “Itá kan iei ei mwéngé oua mochen upwe ngeni nei ei?” Pwiich kana ra achocho le oururu i, nge Yesica ese aúseling ngeniir. Mwirin, pwiich kana ra likiti eú pasikitin mwéngé ppen asaman na. Iwe ei atun Yesica a káé Paipel, a kechiw  pokiten a mirititi pwe a fen tunaló án Kot pélúweni an iótek. Nge iei, Yesica a tipeppós pwe epwe angang ngeni Jiowa. A ffat pwe kisáseún pwiich kana fefin a sópwéch.​—SalAf. 11:1, 6.

9, 10. (a) Ikkefa ekkóch alen án ekkewe chón Israel repwe tongeni álillis? (b) Ifa usun pwiich kewe mwán ra tongeni álillis lón ewe mwichefel lón ei fansoun?

⁹ Me lóóm, a suuk ngeni chón Israel sókkopaten alen ar repwe tongeni álillis. (Eks. 36:2; 1 Kron. 29:5; Ne. 11:2) Lón ei fansoun, a pwal suuk ngonuk chómmóng atun ka tongeni fangóló óm fansoun, pisekum, me tufichum pwe kopwe álisi pwiium kewe Chón Kraist. Ika ka féri ena, kopwe fókkun pwapwa me Jiowa epwe efeiéchuk.

¹⁰ Ewe Paipel a pesei ekkewe mwán lón ewe mwichefel ar repwe angangfengen me Jiowa ren ar eáni ewe wis chónálillisin mwichefel are mwán mi ásimaw. (1 Tim. 3:1, 8, 9; 1 Pet. 5:2, 3) Chókkana ra féri ena ra álilliséch ngeni ekkewe ekkóch lón sókkopaten napanap me pwal lón pekin lúkú. (Föf. 6:1-4) Ekkewe mwán mi ásimaw ra fen tingoreok óm kopwe álillis lón túmúnún ewe Leenien Mwich, túmúnún ekkewe puk, ekkewe mappún leenien afalafal, wisen attendant, are pwal ekkóch mettóch? Pwiich kewe mi álillis lón ekkena mettóch ra erá pwe ra fókkun pwapwaiti ewe angang.

11. Ifa usun emén fefin Chón Kraist a kúna feiéch seni an álillis lón angangen kaú?

¹¹ Fán chómmóng, chókkewe mi álillis lón angangen kaú ra kúnékún minefé chiener. Emén chienach fefin itan Margie a fen fiti ewe angangen kaúún Leenien Mwich ren úkúkún 18 ier. Lón ekkena angang, a kan fókkun áfánni chienach kewe fépwúl me a ákkáitiir. A erá pwe lón ekkena atun a fókkun  éch án ekkewe chón angang repwe apéchékkúlafengenniir. (Rom 1:12) Ren enletin, lupwen a kúna weires lón manawan, chiechian kewe seni ekkena angangen kaú ra apéchékkúla i. Ka fen awora álillis lón eú angangen kaú? Ka tongeni álillis inaamwo ika kese sipeéch lón och angang.

12. Ifa usun ka tongeni álillis mwirin eú feiengaw watte?

¹² Sia pwal tongeni angangfengen me Jiowa ra ach álisi pwiich kewe mwirin feiengaw watte ren choweán taifun, chechchechin fénú me metakkan. Áwewe chék, sia tongeni awora monien asor. (Joh. 13:34, 35; Föf. 11:27-30) Sia pwal tongeni álillis lón angangen elimelim are fférsefálin mettóch mi ta ren eú feiengaw watte. Chienach we fefin seni Poland itan Gabriela a fókkun ta imwan we ren eú pummong, nge a fókkun pwapwa le kúna án pwiich kewe seni pwal ekkóch mwichefel mi kkan ngeni etto álisi. Lupwen a ekieki met a fis ngeni, a erá pwe ese lólilen ren meinisin pisekin kewe a péútúló, nge a chék nefotofot wóón met a winneni. A erá: “Met a fis ngeniei a alúkúlúkúei pwe ai chóni ewe mwichefelin Chón Kraist a eú feiéch mi kkóló aúchean me pwal ina populapen ai pwapwa.” Chómmóng mi angei álillis mwirin eú feiengaw watte ra pwal eáni ena esin memmeef. Me chókkewe mi angangfengen me Jiowa pwe repwe álisi pwiich kana, ra fókkun meefi pwapwa me menemenéch.​—Álleani Föför 20:35; 2 Korint 9:6, 7.

13. Ifa usun sipwe apéchékkúlaló ach tong fán iten Jiowa lupwen sia awora álillis? Apwóróusa eú pwóróus.

¹³ Emén chienach fefin itan Stephanie me pwal ekkóch chón afalafal lón leenian we ra angangfengen me Kot ren ar álisi ekkewe Chón Pwáraatá mi sú ngeni Merika pokiten maun lón pwúkún fénúer. Ra álisi ekkena choisá le kúnékún imwer me pisekin imw. A erá: “A chúng letipem le kúna ar pwapwa me ar kilisou ren ewe tong pwiir kewe Chón Kraist ra pwári ngeniir. Me ren ekkena famili pwe ám ewe aua álisiir, nge ren enletin, fen iir ra fen fókkun álisikem. Ar tong, tipeeúfengen, lúkú me ar lúkúlúk wóón Jiowa, a wesewesen apéchékkúlatá pwisin ám tong ngeni Jiowa, me a alóllóólaaló ám aúcheani ekkewe feiéch meinisin aua angei seni an we mwicheich.”

14, 15. (a) Ifa ewe ekiek ewe soufós Aisea a eáni? (b) Ifa usun ekkewe Chón Kraist ra tongeni áppirú Aisea?

¹⁴ Ka mochen pwe ámi angangfengen me Jiowa epwe pwal lapóló? Kopwe tipemecheres le mwékút ngeni eú leeni mi wor  osupwangen chón afalafal ie? Pwúngún pwe sap minne mi lamot sipwe ló towau ren ach sipwe pwári pwe sia kisáseú. Nge mi wor ekkóch pwiich kewe mi tufichin féri ena. Ra eáni ewe ekiek usun ewe soufós Aisea. Lupwen Jiowa a eis “Iö üpwe tini, nge iö epwe ach chon künö?” Aisea a erá: “Ngang üa mochen, kopwe tiniei.” (Ais. 6:8) Mi wor óm tufich me mochen álisi án Jiowa we mwicheich? Ifa usun ka tongeni álillis?

¹⁵ Iei met Jesus a apasa usun ewe angangen afalafal me álisi aramas le wiliti néún chón káé: “Ewe räs a fokun watte, nge ekewe chon angangen räs ra chokükün. Iei mine oupwe tüngorei ewe Samolun räs pwe epwe tinala chon angang pwe repwe angang ngeni ewe räs.” (Mat. 9:37, 38) Ka tongeni pioneer lón eú leeni mi wor osupwangen chón afalafal ie? Are ka tongeni álisi pwal emén le féri ena? Chómmóng pwiich kewe ra meefi pwe ar pioneer ikewe ia mi wor osupwangen chón afalafal ie, ina ewe al mi fókkun múrinné ar repwe pwáraatá ar tong ngeni Kot me chón órur. Ka tongeni ekieki pwal ekkóch alen óm kopwe alapaaló óm angang ngeni Kot? Ika ka féri ena, kopwe fókkun pwapwa.

16, 17. Ikkefa ekkóch alen ach sipwe tongeni alapaaló ach angang ngeni Jiowa?

¹⁶ Ka mochen angang lón Bethel are álillis lón angangen kaú, ese lifilifil ika eú rán are fitu rán iteiten wiik, are ren och fansoun mi kaúk? Án Jiowa we mwicheich a kan osupwangen pwiich kewe mi tipemecheres le angang ese lifilifil ia mi wor osupwang ie, me repwe féri ese lifilifil angang ra ereniir le féri, inaamwo ika ra fen sipeéch lón pwal eú sókkun angang. Jiowa a aúcheani meinisin mi tipemecheres le pennúkú met a nóm rer, me awora álillis ia chék mi wor osupwang ie.​—Kölf. 110:3.

¹⁷ Ka mochen kopwe pwal angei káit pwe kopwe tongeni alapaaló óm angang ngeni Jiowa? Neman epwe tongeni fich ngonuk óm kopwe fiti ewe Sukulen Chón Afalafala ewe Mwú. Lón ena sukul, pwiich kewe mi ásimaw, iir chón angang ngeni Jiowa full-time ra káit pwe án Jiowa mwicheich a pwal tongeni néúnéú iir le alapaaló ar angang. Mi lamot chókkewe mi fiti ena sukul repwe tipemecheres le álillis ese lifilifil ia ewe mwicheich epwe tiiniireló ie. Ka mochen alapaaló óm angang ngeni Jiowa lón ena napanap?​—1 Kor. 9:23.

18. Ikkefa feiéchún ach akkangangfengen me Jiowa iteiten rán?

¹⁸ Pokiten kich néún Jiowa kewe aramas, kich mi kisáseú, múrinné, kirekiréch me tongei aramas. Sia tongei aramas fansoun meinisin. Ena mettóch a atoto ngenikich pwapwa me kinamwe. (Kal. 5:22, 23) Ese lifilifil ifa nónnómum, nge kopwe pwapwa ika kopwe áppirú án Jiowa kisáseú me ika kopwe emén me lein chienen Jiowa kewe chón angang mi aúchea!​—SalF. 3:9, 10.