1-2. Ifa eú mettóch mi fókkun lamot me ren Jiowa, me met a mochen ach sipwe féri?

 FÉFFÉRÚCH ngeni ekkewe ekkóch a fókkun lamot me ren Jiowa. Jises a áiti ngenikich pwe mi lamot ach sipwe tongei chón óruch ussun ach tongei pwisinkich. (Mat. 22:​37-39) A pwal kapachelong lón ena, ach sipwe kirekiréch pwal mwo nge ngeni chókkewe rese fel ngeni Jiowa. Atun sia pwáári ena esin kirekiréch, sia áppirú Jiowa Kot, ewe mi “atétáái an we akkar wóón ekkewe mi ngaw me múrinné me a apúngatiw rán wóón ekkewe mi pwúng me ekkewe rese pwúng.”—Mat. 5:45.

² Inaamwo iká Jiowa a tongei aramas meinisin, nge a kon tongei chókkewe mi álleasochisi i. (Jon 14:21) A mochen sipwe áppirú. Ina popun, a pesekich ach sipwe pwáári pwe sia ‘fókkun tongei’ pwiich kewe. (1 Pit. 4:8; Rom 12:10) Ena esin tong, a léllé ngeni ewe tong sia meefi ngeni aramasach mi áchengicheng me rech are ngeni emén chiechiach sia fókkun tongei.

3. Met a lamot sipwe chemeni ussun ewe mettóch tong?

³ Tong, a ussun efóch irá, a lamot ngeni túmún pwe epwe mámmááritá. Ewe aposel Paul a fénéú ekkewe Chón Kraist ren an ereniir: “Oupwe sópweeló lón ámi tongen pwipwi.” (Ipru 13:1) Jiowa a mochen ach sipwe kan ákkámááraatá ach tong ngeni ekkewe ekkóch. Sipwe káé lón ei lesen pwata a lamot ach sipwe alapaaló ach chiechiéch ngeni chienach kewe Chón Kraist me ifa ussun sipwe sópweeló le féfféri ena.

 POPUN MI LAMOT ACH SIPWE ALAPAALÓ ACH CHIECHIÉCHFENGEN

4. Me ren Kölfel 133:​1, ifa ussun sipwe túmúnú pwe epwe chék sópwósópwoló ach aúcheani ewe tipeeú lefilach me chienach kewe? (Pwal ppii ekkewe sasing.)

⁴ Álleani Kölfel 133:1. Sia tipeeú ngeni án ewe soumakken kélfel erá pwe ach chiechi ngeni chókkewe mi tongei Jiowa, ina och mettóch mi ‘mürina’ me ‘apwapwa.’ Nge iká sise túmúnúéch, a tongeni kúkkúnúló ach aúcheani múrinnéén ach tipeeú lefilach me pwiich kewe ussun chék meefien emén ren och mettóch a fókkun sani nge pokiten a chék kúkkúna iteitan, iwe a pwal chipwang ren. Sia kan kúkkúna chiechiach kewe Chón Kraist iteitan, neman fán fite iteiten wiik. Met sipwe féri pwe epwe chék sópwósópwoló ach aúcheani chienach kana? Ach tong ngeni chienach kana epwe péchékkúleló iká sipwe awora ach fansoun le ekieki úkúúkún aúchean emén me emén iir ngeni ewe mwichefel me pwal ngenikich.

5. Met ekkewe ekkóch ra meefi atun ra kúna ach tongfengen lefilach?

⁵ Ekkóch me lein chókkewe mi kerán fiti eú ach mwiich, ra fókkun ingeló ren ar kúna ewe tong mi pwá lefilach. Ren chék mwo nge ena, ra lúkúlúk pwe ra kúna ewe enlet. Jises a erá: “Ren ei, meinisin repwe silei pwe ámi nei chón káé—iká mi wor tong lefilemi.” (Jon 13:35) Iei pwóróusen Chaithra, emén chón sukulen university mi káé ren emén Chón Pwáraatá Jiowa. A tipeeú ngeni an epwe fiti eú mwichelap. Mwirin an fiti ewe áeúin rán, a ereni ewe mi wisen káé ngeni: “Esap fán eú án semei kewe me inei repwe foropacheei. Nge lón ámi we mwichelap, a wor 52 ra foropacheei lón chék eú rán! Úa meefi pwe  Jiowa a néúnéú néún kewe aramas ar repwe ámmeef ngeniei an tong. Úa mochen chóni ena famili.” Chaithra a feffeitá lón pekin lúkú tori an a papatais lón 2024. Ewer, atun ekkewe mi kerán fiti mwiich ra kúna ach angang mi múrinné me ewe tong sia pwáári lefilach, lape ngeni ina met a amwékútúúr le angang ngeni Jiowa.—Mat. 5:16.

6. Ifa ussun ach chiechiéch ngeni chienach kewe Chón Kraist a tongeni túmúnúkich?

⁶ Ach chiechiéch ngeni chienach kewe Chón Kraist a tongeni eú minen túmún ngenikich. Iei met Paul a ereni chienan kewe Chón Kraist: “Oupwe sópweeló le apéchékkúlafengenikemi iteiten rán, . . . pwe esap wor emén me leimi epwe tipeférealó ren otuputupun manamanen tipis.” (Ipru 3:13) Iká sia fókkun letipechou me ussun a weires ngenikich ach sipwe sópweeló le féri met mi múrinné, eli Jiowa epwe amwékútú emén chienach an epwe esilla met a fis ngenikich me awora ngenikich ewe álillis sia osupwangan. (Kölf. 73:​2, 17, 23) Ena esin álillis a fókkun múrinné ngenikich.

7. Met ririfengenin tong me tipeeú? (Kolose 3:​13, 14)

⁷ Sia chóni eú kúmiin aramas mi achocho le pwáári tong lefiler, ina popun sia kúna chómmóng feiéch. (1 Jon 4:11) Áwewe chék, tong a amwékútúkich ach sipwe ‘sópweeló le engilófengen lefilach,’ me ena a álisaatá ach tipeeúfengen lefilach. (Álleani Kolose 3:​13, 14; Efi. 4:​2-6) Ina minne, lón ach kewe mwiich sia eáni ewe esin pwapwa ese pwá lein ekkewe pwal ekkóch kúmiin aramas wóón fénúfan.

PWÁÁRI SÚFÉL LEFILEMI

8. Ifa ussun Jiowa a álisikich ach sipwe tipeeúfengen me chienach kewe?

⁸ Inaamwo iká sise unuséch, nge a wor tipeeú lefilach me chienach kewe wóón unusen fénúfan pokiten chék Jiowa. (1 Kor. 12:25) Ewe Paipel a apasa pwe sia ‘fen káit me ren Kot ach sipwe tongfengen.’ (1 Tes. 4:9) Weween pwe Jiowa a néúnéú ewe Paipel le erenikich met mi wesewesen lamot sipwe féri pwe sipwe ririéchfengen lefilach. Sia tongeni “káit me ren Kot” ren ach etittinaéchú met a eáni káit me apwénúretá. (Ipru 4:12; Jem. 1:25) Ina wesewesen met ekkewe Chón Pwáraatá Jiowa ra achocho le féri.

9. Met sia káé seni Rom 12:​9-13 ussun ach sipwe pwáári súfél lefilach?

⁹ Ifa ussun án Kot we Kapas a asukula ngenikich ach sipwe ririéchfengen lefilach? Ekieki alon Paul ei ussun ena mettóch mi mak lón Rom 12:​9-13. (Álleani.) Nengeni pwe a erá “oupwe akkomw le pwáraatá súfél lefilemi.” Met weween ena? Mi lamot sipwe akkomw mwékút le pwáári ‘tong’ ngeni ekkewe ekkóch lón sókkopaten mettóch, áwewe chék ren ach omusaaló tipisiir, awasélaéchúúr, me fangafangéch ngeniir. (Efi. 4:32) Kosap witi án ekkewe ekkóch repwe akkomw chiechiéch ngonuk. Ka tongeni akkomw mwékút le chiechi ngeniir. Iká ka féri ena, kopwe kúna pwúngún met Jises a eáni pwon atun a apasa: “A watte pwapwaan fang lap seni angei.”—Féf. 20:35.

10. Ifa ussun sia tongeni chófó lón ach pwáári ‘súfél lefilach’? (Pwal ppii ewe sasing.)

¹⁰ Mwirin chék án Paul erenikich ach sipwe akkomw mwékút le pwáári súfél lefilach, a pwal pesekich ach ‘sipwe chófó, sisap chipwang.’ Emén mi chófó a tinikken me achocho le angang. Atun a wor eú angang a kewis ngeni, a féri. Iei met Än Salomon Fos 3:​27, 28 a pese ngenikich: “Kopwe eäni kirikiröch ngeni aramas mi osupwang, lupwen ka tufich ngeni.” Ina minne, atun sia kúna emén mi osupwang, sia féri met sia tongeni féri pwe sipwe álisi. Sise akkachopwa le féri, are ekieki pwe ekkewe ekkóch repwe wisen féri.—1 Jon 3:​17, 18.

11. Met a tongeni álisikich pwe sipwe chiechiéchfengen?

 ¹¹ Pwal eú alen ach sipwe pwáári súfél lefilach me chienach kewe, ina ach mwittir omusaaló tipisiir atun ra asongakich. Efisus 4:26 a apasa: “Ousap amwéchú ámi song tori tuputiwen ewe akkar.” Pwata? Wokisin 27 a erá pwe iká sia féri ena, ‘sia mut ngeni ewe Tefil an epwe etipetipakich.’ Jiowa a erenikich fán chómmóng ach sipwe omusaaló tipisin emén me emén kich. Kolose 3:13 a pesekich ach sipwe “sópweeló le . . . unusen omusaaló tipisin emén me emén.” Ach omusaaló tipisin ekkewe ekkóch, ina eú mettóch mi fókkun múrinné sipwe féri pwe sipwe chiechiéch ngeniir. Iká sia féri ena, sia álisaatá ‘túmúnún ewe tipeeú mi pop seni ewe ngún mi fel, fiti ewe kinamwe mi pinúkúfengenikich.’ (Efi. 4:3) A ffat pwe ach omusaaló tipisin ekkewe ekkóch a fókkun álisaatá ach tipeeúfengen me kinamwefengen.

12. Ifa ussun Jiowa a álisikich ach sipwe omusaaló tipis?

¹² Mi pwúng pwe eli epwe weires ach sipwe omusaaló tipisin chókkewe mi ámeteki letipach. Nge sia tongeni sópwéch ren álillisin án Kot we manaman. Mwirin án Paipel pesekich ach sipwe ‘tongfengen lefilach ussun chék chón lón eú famili’ me ach sipwe “chófó,” a pwal apasa: “Oupwe mut ngeni ewe ngún mi fel an epwe efisi ámi tinikken.” Weween pwe án Kot we ngún mi fel a tongeni amwékútúkich ach sipwe fókkun achocho me mwasangasang. (Rom 12:11) Iwe, án Kot manaman a tongeni álisikich le pwáári tong me unusen omusaaló tipisin aramas. Ina minne, sia tingormaw ngeni Jiowa an epwe álisikich.—Luk 11:13.

“ESAP WOR KINIKINFESEN LEFILEMI”

13. Met a tongeni efisi kinikinfesen lefilach?

¹³ Ewe mwichefel a masou ren “sókkun aramas meinisin” mi sókkopat nónnómun manawer. (1 Tim. 2:​3, 4) Pokiten ena, iwe emén me emén kich mi sókkóló ach kefil wóón úfach me foutach, met sókkun álillisin pioing sia etiwa, are met sókkun minen apwapwa me kunou sia filaatá. Iká sise túmúnúéch, ekkena mettóch ra tongeni efisi kinikinfesen lefilach. (Rom 14:4; 1 Kor. 1:10) Pokiten Kot a fen áiti ngenikich ach sipwe tongfengen, a lamot sipwe túmúnúéch pwe sisap péchéú le  ekieki pwe ach kewe kefil ra kon múrinné seni án ekkewe ekkóch.—Fil. 2:3.

14. Met a lamot ach sipwe achocho le féfféri, me pwata?

¹⁴ Sia pwal tongeni túmúnú an esap wor kinikinfesen lón ewe mwichefel iká sipwe achocho le apéchékkúla me aúfichietá chienach kewe fansoun meinisin. (1 Tes. 5:11) Kukkuto chék, chómmóng chókkewe rese chúen akkapwénúetá wiser wisen Chón Kraist are chókkewe mi katowu seni mwichefel ra liwinsefál. Sia etiwaéchúúr fán tong! (2 Kor. 2:8) Nengeni met a fis ngeni emén chienach fefin mi kerán fiti mwiich mwirin an ese chúen akkapwénúetá wisan úkúúkún engol ier. A apasa, “Meinisin ra emelimel ngeniei me kapwong ngeniei.” (Féf. 3:19) Ifa ussun ekkena féfférún kirekiréch a amwékútú neminna? A erá, “A ámmeef ngeniei pwe Jiowa a álisiei ái úpwe meefi pwapwasefál.” Iká sipwe achocho le aúfichietá chienach kewe, Kraist a tongeni néúnéú kich le apéchékkúla chókkewe “mi angang weires me uwochou.”—Mat. 11:​28, 29.

15. Ifa pwal eú alen ach sipwe álisaatá ewe tipeeú lefilach? (Pwal ppii ewe sasing.)

¹⁵ Minne sia apasa, ina pwal eú alen ach sipwe álisaatá ewe tipeeú lefilach. Hiop 12:​11, a erá: “Ifa usun, sap än ewe seling angang pwe epwe alefila lefilen kapas mürina me kapas ingau, usun chök ewe chönaw a alefila lefilen nennen mongö mi anö me mongö mi ngau?” Emén mi angéch kuk a kan soun neni kukuan mwéngé pwe epwe silei iká mi anné mwen epwe amwéngééni ekkewe ekkóch, iwe pwal ina ussun kich, mi  éch sipwe pwal ekiekiéchú met sipwe apasa me mwen sipwe apasawu. (Kölf. 141:3) Sia kan achocho le túmúnú met sipwe apasa pwe epwe aúfichietá me apéchékkúla “chókkewe mi rongorong.”—Efi. 4:29.

16. Ié kewe repwe ákkáeúin achocho le apéchékkúla ekkewe ekkóch ren ar kapas?

¹⁶ Ekkewe mwán mi pwúpwúlú me ekkewe sam me in, iir ákkáeúin repwe túmúnúéch pwe ar kapas epwe eú minen apéchékkúl. (Kol. 3:​19, 21; Tait. 2:4) Ekkewe mwán mi ásimaw repwe pwal apéchékkúla me aúfichietá néún Jiowa kewe siip. (Ais. 32:​1, 2; Kal. 6:1) Paipel a apasa pwe a fókkun múrinné eú kapas emén a apasa lón ewe fansoun mi fich.—SalF. 15:23.

ACH TONG ‘EPWE PWÁ LÓN MINNE SIA FÉRI ME EPWE ENLET’

17. Met sia tongeni féri pwe sipwe enletin tongei chienach kewe?

¹⁷ Ewe aposel Jon a pesekich pwe ach ‘tong esap chék pwá lón minne sia apasa, nge epwe pwá lón minne sia féri me epwe enlet.’ (1 Jon 3:18) Sia mochen pwe sipwe enletin tongei chienach kewe. Ifa ussun sia tongeni féri ena? Lapólóón ach fansoun chiechi ngeni chienach kewe, pwal ina lapólóón ach chiechiéch ngeniir me apéchékkúlaló ach tongfengen lefilach. Ina minne, kopwe awora fansoun le chiechi ngeniir, áwewe chék lón ach mwiich me lón ach angangen afalafal. Awora óm fansoun le ló chuuri ekkewe ekkóch. Iká sia féri ekkena mettóch, sia pwáári pwe ‘sia fen káit me ren Kot ach sipwe tongfengen.’ (1 Tes. 4:9) Iwe, sipwe kan kúkkúna úkúúkún “mürinan me apwapwan, lupwen pwipwi ra nonomfengen fän tipeeu.”—Kölf. 133:1.