A mmen elichippúng pwe atun ua teenage, a patapateló ai ririéch ngeni Jiowa. Usun itá chienei kewe chón sukul ra tufichin féri ese lifilifil met ra mochen, me ina met ua pwal mochen. Ua meefi pwe án semei me inei kewe allúk, me án Chón Kraist kewe allúk usun minne mi pwúng me mwáál, ra kon tichik, me án emén angang ngeni Jiowa a mmen áweires. Inaamwo ika ua lúkú pwe Jiowa i wesewesen emén, nge use ririéch ngeni.

Use unusen úkútiw le afalafal, nge ua chék afalafal fán ekkóch. Atun ua fiti ewe angangen afalafal, use kan mmólnetá, ina popun a weires ngeniei ai upwe poputááni ai fós ngeni emén me sópweló ewe pwóróusfengen. Ina popun, ese wokkor nei return visit me chón káé, me use pwapwaiti ewe angangen afalafal, iwe a chék lallapóló ai use sani ewe angangen afalafal. Ua pwisin eisiniei, ‘Ifa usun emén a tongeni féri ei mettóch iteiten wiik, me iteiten maram?’

Atun a 17 ieri, ua fókkun mochen imuló chék wóón ai. Ina popun ua alúkúlúkú piseki kewe, sú seni imwei we, me mwékút ngeni Australia. A fókkun  áweires ngeni semei kewe me inei ai mwékút seniir. Ra lólilen, nge ra ekieki pwe upwe chék sópweló le angang ngeni Jiowa.

E fen kisikisiló ai angang ngeni Jiowa me Australia. Ua poputá le etiwaaló ekkewe mwich. Ua chiechi ngeni ekkewe sáráfé, iir mi usui, le sani le fiti mwich lón eú pwiin, nge lón ewe pwiin mwirin, aua ló ún sakaw me pwérúk lón ekkewe club. Atun ua lesékúrú ekkena atun, ua mirititi pwe ua nóm lón ewe enlet nge pwal lón ei ótót, me use meefi núkúnúkéch lón iir me ruu.

Ina epwe mwirin ruu ier, aua chufengen me emén Chón Kraist fefin ese fen tepereni pwe a efisi ai upwe ekieki nónnómun manawei lón ena atun. Ua nóm lón eú imw fengen me nimmén fépwúl Chón Kraist iir mi lipich, me aua etiwa ewe chónemmwen mi wisen sáifetál me pwúlúwan we itan Tamara, ar repwe nóm rem ren eú wiik. Atun pwúlúwan we a ataweei mettóchun ewe mwichefel, Tamara a nóm rem me fitikem le chék pwapwafengen. Ua sani ena. A fókkun tipemirit me a mecheres ám aupwe chék fós ngeni. A mmen amwarar ai kúna emén mi fókkun péchékkúl lón pekin ngún, nge a pwal apwapwa ai chiechi ngeni.

Tamara a fókkun tinikken. An aúcheani ewe enlet me ewe angangen afalafal, a achchúngú ekkewe ekkóch. A pwapwa le ngeni Jiowa met mi múrinné seni meinisin, lón ai use pwapwa pwe use angang ngeni Jiowa úkúkún ai tufich. An eáni ekiek mi pwúng me enletin pwapwa, a unusen achchúngú manawei. An leenien áppirú a álisiei le mirititi ei pwóróus mi enlet lón Paipel pwe Jiowa a mochen pwe kich meinisin sipwe angang ngeni “fän pwapwa” me fán “kölün pwapwa.”​—Kölf. 100:2.

Ua mochen eáni ewe esin pwapwa Tamara a eáni, nge ren ai upwe eáni ena esin pwapwa, a lamot ai upwe féri watteen siwil. Ese mwittir fis ena, nge ekis me ekis ua poputá le sissiwililó. Ua poputá le mmólnetá fán iten ewe angangen  afalafal me fán ekkóch ua auxiliary pioneer. Ena mettóch a ekisikisaaló ai pireir me a lallapóló ai meefi lúkúlúk. Atun a lallapóló ai nénnéúnéú ewe Paipel lón ai angangen afalafal, a pwal lallapóló ai pwapwaiti ewe angangen afalafal. Mwirin chék ena, ua kan auxiliary pioneer iteiten maram.

Ua poputá le chiechi ngeni pwiich kewe ese lifilifil ieriir, me ra péchékkúl lón ewe enlet. Ar leenien áppirú mi múrinné, a álisiei le ekieki met mi kon aúchea lón manawei me poputá le ákkálleani ewe Paipel iteiten rán. A poputá le lapóló ai sani ewe angangen afalafal, me ló, ló, ló, ua poputá le regular pioneer. Epwe kerán ina lón fitu ier, ai meefi pwapwa me kinamwe ren ai chóni ewe mwichefel.

Mwirin eú ier, aua chufengen me Alex, emén mi kirekiréch me enletin tongei Jiowa me aúcheani ewe angangen afalafal. I emén chónálillisin mwichefel me a fen pioneer ren wonu ier. Alex a pwal fen álillis ikewe mi osupwangen chón afalafal ie lón Malawi. Me ikena ie, a kan chiechi ngeni ekkewe misineri iir leenien áppirú fán itan me pesei an epwe sópweló le akakkomwa an angang ngeni Jiowa lón manawan.

Lón ewe 2003, ám me Alex aua pwúpwúlú me aua chék sópweló le angang ngeni Jiowa full-time tori iei. Aua káé chómmóng lesen mi amwarar, me Jiowa a fen efeiéchúkem lón sókkopaten napanap.

Lón ewe 2009, aua ketiw le misineri Timor-Leste, eú kúkkún fénú lón Indonesia archipelago. Aua máirú, pwapwa, me ekis niwokkus. Mwirin nimu maram, aua wareiti Dili, iolapen ena fénú we.

A fókkun sókkóló manawem me lóóm seni manawem ikeei ie. A lamot ám aupwe eérenaaló eú mineféén eéreni, fós, mwéngé, me nónnómun  aramas. Lón ewe angang afalafal, aua kúkkúna aramas mi fókkun osupwang, rese sukul, me ewe mwú a mmen nemenemengaw ngeniir. Me aua kúna chómmóng mi chúen riáfféú ren maun me féfférún akkachofesá. *

A mmen amwarar ewe angangen afalafal! Áwewe chék, aua chufengen me emén nengngin mi letipechou 13 ierin, itan Maria. * Inan we a máló fitu ier a ló, me ese kan kúkkúna seman we. Maria ese silei met a mochen féri lón manawan. Ua chemeni ewe atun a kechiw atun a áwewe ngeniei meefian. Iwe nge use weweiti met a erá, pokiten usaamwo kon sile an fós. Ua iótek ngeni Jiowa, me ua tingor an epwe álisiei le apéchékkúla, iwe ua poputá le álleani ngeni wokisin repwe apéchékkúla. Mwirin fitu ier, ua kúna ifa usun ewe enlet a siwili ekiekin, napanapen, me unusen manawen Maria. A papatais, me iei a wisen káé ngeni aramas. Lón ei fansoun, Maria a chóni eú watteen famili lón pekin ngún me a meefi tongan.

Jiowa a ekkefeiéchú ewe angang lón Timor-Leste. Inaamwo ika lape ngeni ekkewe chón afalafal ra papatais lón ekkewe 10 ier ra ló, nge chómmóng me leir ra pioneer, chónálillisin mwichefel, are mwán mi ásimaw. Pwal ekkóch ra álillis lón ewe ofesin chiyakúún pwóróus me álillis le chiyakúúni ekkewe mwéngé lón pekin ngún lón ar fós. A fókkun apwapwa ngeniei ai rong ar kél lón ekkewe mwich, ai kúna wópwapwaar, me ai kúna feffeitáár lón pekin ngún.

Wisem lón Timor-Leste a sókkóló seni manawem lón Australia, nge a mmen apwapwa manawem. Fán ekkóch aua fiti efóch kúkkúnún bus mi tep chón fiti, fengen me oser iik mi pwás me chómmóng iasai seni market. Lón ekkóch rán, aua káé ngeni emén lón eú kúkkún imw mi fókkun rar nge mi chék pwúl lón me chukó ra chék ssáfetál únúkúm. Inaamwo ika a ina usun, nge fán chómmóng ua ekieki, ‘A mmen amwarar ei!’

Atun ua lesékúrú me lóóm, ua fókkun kilisou ngeni semei kewe me inei mi fókkun achocho le áiti ngeniei alen Jiowa me ra álisiei, pwal mwo nge atun a apwangapwangoló ai riri ngeni Jiowa. Minne Än Salomon Fos 22:6 a apasa, a enlet lón manawei. Semei kewe me inei ra pwapwa rem me Alex me ra pwapwa pwe Jiowa a néúnéú ám. Seni 2016, aua álillis lón ewe angangen sáifetál le chuuri ekkewe mwichefel lón ewe Australasia keangen ofesilap leenien afalafal.

Usun a weires ai upwe lúkú pwe ua piin ekieki pwe a mmen áweires ewe angangen afalafal. Iei ua fókkun sani ewe angangen afalafal! Ua mirititi pwe ese lifilifil met epwe fis lón manawach, nge pwapwa mi enlet a feito seni ach angang ngeni Jiowa ren unusen manawach. Ren enletin, a mmen fókkun apwapwa manawei lón ekkewe 18 ier ám angangfengen me Alex lón ám angang ngeni Jiowa. Iei ua kerán weweiti pwúngún alon Tafit ewe soumakken kélfel ei ngeni Jiowa: “Chokewe meinisin mi anomu ar apilükülük womw repwe meseik, repwe köl fän pwapwa fansoun meinisin . . . chokewe mi echenuk, . . . repwe ingemwareituk.”​—Kölf. 5:11.