Lupwen ka nóm ren emén mi letipeta ren málóón emén attongean, ka fen meefi pwe usun ese wor met ka tongeni féri epwe álisi? Fán ekkóch sipwe tongeni meefi pwe sise kon lien silei met sipwe apasa are féri, ina popun sia chék fanafaneló. Nge mi wor mettóch sia tongeni féri pwe sipwe álilliséch ngeniir.

Fán chómmóng, a chék lamot ngeniir ach sipwe nónnóm rer me apasa och chék kapas, áwewe chék, “Ua fituk lón óm letipeta.” Lón eérenien chómmóng fénú, ach foropacher are kamwéch péúr a pwáraatá pwe sia áfánniir. Ika ewe mi letipeta a mochen fós, kopwe aúseling ngeni fán tong. Nge lap seni meinisin, álisi ewe famili mi letipeta neman ren óm féri och ar angang resaamwo tongeni ataweei, áwewe chék ren kuk mwéngé, nikiniki semirit, are álisiir lón akkóten ewe felin mi má ika ina met ra mochen. Ekkena esin féffér a tongeni fen watte aúchear lap seni ach kapas.

Neman mwirin och fansoun, kopwe mochen fós usun ewe mi máló, eli kopwe menlapei ekkóch napanapan kewe mi múrinné are ekkóch mettóch mi fis ngeni mi apwapwa. Ena esin fósfengen mi pwal tongeni apwapwaai ewe mi letipeta. Áwewe chék, iei alon Pam, pwúlúwan we itan Ian a má seni wonu ier a ló: “Fán ekkóch aramas ra apwóróusa ngeniei minne Ian a féri mi múrinné use fen silei usun, me ena mettóch a apwapwaai letipei.”

Me ren ekkóch sou káé, chómmóng mi letipeta ra kúna watteen álillis lepoputáán nge mwirin, chiechier kewe ra ménúkiireló pokiten ra pwal tawengaw lón pwisin manawer. Ina minne, akkóta pwe kopwe kan chuuri, mak ngeni, are kéri chiechiom we mi letipeta mwirin málóón attongean we. * Chómmóng chókkewe mi letipeta ra fókkun aúcheani ena mettóch mi ekinamweer lón ar meefi letipeta lón fansoun langattam.

Nengeni pwóróusen emén fin Japan itan Kaori, i a chúúpwúl ren málóón inan we, nge mwirin 15 maram pwiin we watte a pwal máló. Kilisou pwe chiechian kewe ra tuppwél ngeni me ákkálisi. Emén itan Ritsuko, mi watte ierin seni Kaori a ereni Kaori pwe a mochen an epwe chiechian. Iei met Kaori a apasa: “Ren enletin, use pwapwa usun ena. Use mochen emén epwe siwili mama, pwal me rei ese wor emén mi tongeni siwili mama. Iwe nge, pokiten féfféréchún Mama Ritsuko ngeniei, ua poputá le pacheéch ngeni. Iteiten wiik, aua mwin le afalafal, me mwin le ló mwich. A etiwaei ám aupwe ún tea, uwouto enei mwéngé, me fán chómmóng a mak ngeniei taropwe. Án Mama Ritsuko ákkeáni ekiek mi múrinné, a fókkun kkúú letipei.”

A fen engol me ruu ier a ló seni ewe atun inen Kaori we a má, me ikenái iir me pwúlúwan we ra áeá watteen fansoun le fiti ewe angangen afalafala ewe kapas allim. Kaori a erá: “Mama Ritsuko a chúen pwáraatá an tong ngeniei. Lupwen ua liwiniti pwúkún leeniei we, iteitan ua ló chuuri Mama Ritsuko me pwapwaiti ám chiechifengen.”

Poli pwal i emén mi kúna feiéch seni án aramas sópwósópwóló le ákkálisi. I emén Chón Pwáraatá Jiowa lón Saipros. Pwúlúwen Poli we itan Sozos, i emén Chón Kraist mi kirekiréch me a isetiw leenien áppirú mi múrinné usun emén chón túmúnú ewe mwichefel. I a kan etiwa ngeni imwer we ekkewe nau mi máásen me ekkewe fefin mi má seniir pwúlúwer pwe repwe mwéngéfengen me chiechifengen. (James 1:27) Mi eletipechou pún lupwen Sozos a 53 ierin, a máló ren och semmwen lón tupwuan. Poli a erá: “A péút seniei pwúlúwei we mi tuppwél, a fen 33 ierin ám pwúpwúlú.”

Mwirin peiaselóón Sozos, Poli me néún we kúkkúnúlóón át 15 ierin itan Daniel ra mwékút ngeni Canada. Me ikena ie, ra poputá le fiti eú mwichefelin Chón Pwáraatá Jiowa. Poli a apasa: “Pwiich kewe lón ai ei mineféén mwichefel rese fókkun silei usun pwóróusen manawem me lóóm me nónnómum mi áweires. Nge ena mettóch ese eppeti ar repwe chiechi ngenikem me oururukem ren ar kapas mi kirekiréch  me álilliséch. A ifa me aúchean ena álillis, ákkáeúin lón ena atun mi fókkun lamot ngeni nei we át seman we! Chókkewe mi emmweni ewe mwichefel ra pwáraatá ar fókkun áfánni Daniel. A wor emén leir a ákkáeúin fókkun túmúnú Daniel pwe epwe chék fiti me pwapwaiti ar chiechifengen are play wóón pwoor me ekkewe ekkóch.” Iei, Poli me Daniel ra fókkun pwapwa me feffeitá.

Pwúngún pwe a wor chómmóng alen ach sipwe tongeni álilliséch ngeni chókkewe mi letipeta me oururuur. Ewe Paipel a pwal oururukich ren eú ápilúkúlúk mi ámmeseik fán iten mwachkkan.