PWÓRÓUS LÚKÚNPÉÉN | PWATA SIPWE WENECHAR?
Wenechar mi Chúen Lamot lón Ei Fansoun?
Me Japan, Hitoshi a angang lón ofesin accounting lón eú kompeni mi kan álisi aramas le kútta angang. Atun iir me néún we meilap ra etittina pwóróusen monien ar we kompeni, ewe meilap a ereni Hitoshi pwe epwe mwaken lón an we repot. Hitoshi a ereni pwe miritin letipan ese kinamwe an epwe tunosolá. Iwe, néún we meilap a eniwa Hitoshi pwe epwe atowu. Iwe, a atowu.
Lón ekkewe maram mwirin, Hitoshi a letipengaw pún ese chúen kúnékún an angang. Áwewe chék, lón eú interview fán iten angang, Hitoshi a apasa pwe esap tongeni féri angangen tunosolá. Ewe chón interview a erá: “Óm ekiek mi sókkóló!” Chiechien me familien Hitoshi ra pesei pwe epwe kamwéchúnnúk wóón ewe napanap wenechar, iwe nge Hitoshi a poputá le tipemwaramwar. Áwewe chék, a erá: “Ngang ua ekieki ika mi fen éch ai upwe wenechar pokiten ai lúkú.”
Pwóróusen Hitoshi eú áchchem mi alólilen pwe esap meinisin ra aúcheani ewe napanap wenechar. Ren enletin, neman ekkóch ra ekieki pwe ena napanap eú eppet, ákkáeúin lón pekin business. Iei alon emén fefin chón angang lón South Africa: “Ua nóm lein ekkewe aramas rese wenechar, me fán ekkóch a watte ewe etipetip pwe upwe pwal usur.”
Chofona ewe mi fókkun terú ikenái, a eú kinikinin tunosolá. Fite ier lóóm, Robert S. Feldman emén tokter lón University of Massachusetts Amherst a kúna lón an káé pwe 60 persentin ekkewe a watte ieriir ra fen chofona lón chék fitu minich ra pwóppwóróusfengen. Iei alon Feldman: “A mmen ámáirú pwe ám ause ekieki pwe kapas chofona a eú kinikinin manawen aramas.” A mmen fen umwes pwe chómmóng ra oput emén epwe chofona ngeniir nge pwisin iir ra chofona.
Pwata kapas chofona, solá me pwal ekkóch napanapen tunosolá ra mmen terú ikenái? Ifa usun tunosolá a kkúú chón fénúfan? Nge met mi kon lamot seni ekkena, esap ach sipwe silei ifa usun sipwe túmúnúkich seni ekkewe angangen tunosolá?
