1. Ifa án Jiowa pesepes ngenikich?

JIOWA a fókkun aúcheani tong enlet. (Os. 6:6) A pesei ngeni néún kewe chón angang ar repwe pwal fókkun aúcheani. Ach we Kot a pesekich me ren ewe soufós Mika ach sipwe “pwȧrano ach tong ennet.” (Mik. 6:8, Kapasen God.) Nge me mwen ach sipwe tongeni féri ena, a lamot ach sipwe silei met weween tong enlet.

2. Met weween tong enlet?

² Met weween tong enlet? Ena kapas tong enlet a pwá fán 230 lón ewe New World Translation of the Holy Scriptures. Met weween? Ika emén a sile tong enlet, epwe fókkun tongei emén me epwe chék tottongei me tuppwél ngeni me esap likiti. Jiowa a isetiw leenien áppirú mi fókkun múrinné ren an pwáppwári ena sókkun tong enlet. Sipwe káé lón ei lesen, usun án Jiowa pwári tong enlet ngeni aramas. Lón en lesen mwirin, sipwe káé ifa usun kich néún Jiowa kewe chón angang sia tongeni áppirú le pwáppwári tong enlet lefilach.

3. Ifa usun Jiowa a pwári pwisin I ngeni Moses?

³ Ese pwen imwo me mwirin án ekkewe chón Israel towu seni Isip, nge Jiowa a pwári pwisin I ngeni Moses ren an ereni itan we me napanapan kewe. A erá: “Ngang ewe Samol mi Lapalap, ngang ewe Samol mi Lapalap, ngang eman Kot mi eäni ümöümöch me kirikiröch, üa songomang, üa pwal wöün tong [“enlet,” NW] me allükülük. Üa eäni tong ngeni ngeröü o amusala föföringau me pupungau me tipis.” (Eks. 34:6, 7)  Ren ekkena kapas mi achchúngú letipach, Jiowa a ereni Moses usun eú mettóch mi kkóló aúchean lón napanapan we, tong enlet. Ifa?

4-5. (a) Met Jiowa a pwisin apasa usun i? (b) Ikkefa ekkewe kapas eis sipwe pwóróus wóór?

⁴ Jiowa ese chék apasa pwe a eáni tong enlet, nge a pwal erá pwe a eáni “wöün tong [“enlet,” NW].” Ena kapas a mak fán chómmóng lón ewe Paipel. (Ne. 9:17; Kölf. 86:15; 103:8; 145:8) Lón iir meinisin ekkena wokisin, ena itiitin kapas a chék weneiti Jiowa nge ese weneiti aramas. A mmen amwarar pwe fán chómmóng, Jiowa a menlapei lón ewe Paipel napanapan na, tong enlet. Ina popun, sia tongeni kúna pwe a aúcheani ena napanap tong enlet. * Ina popun, King Tafit a erá: “Ai Samol mi Lapalap, om tong ellet a tori ekewe läng . . . Ai Kot, om tong ellet a fokun aüchea. Aramas meinisin ra op fän nürün poum.” (Kölf. 36:5, 7) Sia pwal usun Tafit le unusen aúcheani án Kot tong enlet?

⁵ Ren ach sipwe weweéchúti weween tong enlet, sipwe pwóróusfengen wóón ekkeei ruu kapas eis: Ié kewe Jiowa a pwári tong enlet ngeniir? Me ifa usun án Jiowa pwári tong enlet ngenikich a álisikich?

6. Ié kewe Jiowa a pwári an tong enlet ngeniir?

⁶ Ié kewe Jiowa a pwári an tong enlet ngeniir? Ewe Paipel a erá pwe sia tongeni tongei are aúcheani chómmóng mettóch, áwewe chék ren “minne mi pung,” “tipachem,” “wain me ekkewe sokkun mwongo mi öch.” (Kölf. 37:28, Testament mi Fö; SalF. 12:1; 21:17, KG) Iwe nge sise kan pwári tong enlet ngeni mettóch are pisek, nge sia chék pwári ngeni aramas. Nge Jiowa ese chék pwári an tong enlet ngeni ese lifilifil ié, nge a pwári ngeni chókkewe iir mi fókkun ririéch ngeni. Ach we Kot a tuppwél ngeni chiechian kewe. A awora ngeniir eú ápilúkúlúk mi amwarar me esap fókkun úkútiw le chék tottongeer.

7. Ifa usun Jiowa a pwári an tong ngeni aramas meinisin?

⁷ Jiowa a pwári an tong ngeni aramas meinisin. Iei alon Jesus ngeni emén mwán itan Nikotemus: “Iei usun an Kot tongei fonufan [aramas] pwe a fangelo Noun we Alaemon pwe iteiten aramas meinisin mi luku i esap poutmwalilo, nge epwe kuna manau esemuch.”​—Joh. 3:1, 16, TF; Mat. 5:44, 45.

8-9. (a) Pwata Jiowa a pwári tong enlet ngeni néún kewe chón angang? (b) Met sipwele pwóróusfengen wóón?

 ⁸ Usun met a fen mak me mwan pwe Jiowa a chék pwári an tong enlet ngeni néún kewe chón angang, chókkewe iir mi ririéch ngeni. Sia tongeni kúna ena seni minne King Tafit me ewe soufós Taniel ra apasa. Áwewe chék, Tafit a apasa: “Kopwe sopwela om tong ellet ngeni chokewe mi sileek.” “Än ewe Samol mi Lapalap tong ellet a nom seni me lomlom tori feilfeilachök won chokewe mi niuokusiti i.” Me Taniel a erá: “Samol God . . . ka pwȧrano om we tong ennet ngeni ekkewe ra tongeok o apwonueta met ka era.” (Kölf. 36:10; 103:17; Tan. 9:4, KG) Me ren ekkena wokisin, Jiowa a pwári tong enlet ngeni néún kewe chón angang pokiten ra silei i, niwokkusiti i, tongei i, me apwénúetá an kewe allúk. Jiowa a chék pwári tong enlet ngeni néún kewe aramas, chókkewe iir mi fel ngeni lón enlet.

⁹ Me mwen ach poputá le akkangang ngeni Jiowa, sia fen kúna ewe tong mi pwári ngeni aramas meinisin. (Kölf. 104:14) Iwe nge, pokiten kich chón fel ngeni, sia pwal kúna álilliséchún an pwári ngenikich an tong enlet. Ren enletin, iei met Jiowa a alúkúlúkú ngeni néún kewe chón angang: “Ai tongeok esap tongeni epwe much.” (Ais. 54:10, KG) Ewer, Tafit a pwisin meefi ena. A erá: “Ewe Samol mi Lapalap a aimwüela chokewe mi pwüng fän püsin itan.” (Kölf. 4:3) Met ach sile ena a amwékútúkich le féri? Iei makkeien ewe soumakken kélfel: “Iön mi tipachem epwe iseis ekei mettoch lon lelukan o ekieki usun än ewe Samol mi Lapalap tong ellet.” (Kölf. 107:43) Ena kapasen pesepes mi múrinné a feito seni Jiowa. Iei sipwele pwóróus wóón úlúngát alen án Jiowa pwári an tong enlet me ifa usun ekkena mettóch repwe álisikich atun a pwári an tong enlet ngenikich.

10. Ifa usun sia kúna álillis seni án Kot tong enlet mi nónnóm tori feilfeiló chék? (Kölfel 31:7)

¹⁰ Án Kot tong enlet mi nóm tori feilfeiló chék. Ewe napanap tong enlet, mi nónnóm tori feilfeiló chék a mak fán 26 lón Kölfel 136. Iei met a mak lón wokisin 1: “Oupwe kilisou  ngeni ewe Samol mi Lapalap, pun i a kirikiröch, an tong ellet a nonom tori feilfeilachök.” (Kölf. 136:1) Lón wokisin 2 ngeni 26, a chék ekkenniwili ei kapas “an tong ellet a nonom tori feilfeilachök.” Atun sia álleani ena sópwun, sia mwaar ren án Jiowa pwári an tong enlet lón chómmóng mettóch nge ese afangafang. Ena kapas mi chék ekkenniwil, “an tong ellet a nonom tori feilfeilachök,” a alúkúlúkú ngenikich pwe án Kot tongei néún kewe aramas esap siwil. Ach silei pwe Jiowa esap mwittir úkútiw le tongekich a fókkun apéchékkúlakich. Nge atun a poputá le pwári an tongei emén mi angang ngeni, esap likitaló, ákkáeúin lón fansoun weires. Ifa usun sia kúna álilliséchún? Ach sile pwe Jiowa esap likitikicheló a atoto ngenikich ewe pwapwa me awora ngenikich ewe péchékkúl mi lamot, me likiitú fán ach kewe weires, me sópweló le chék feffetál wóón ewe al mi ale ngeni manaw.​—Álleani Kölfel 31:7.

11. Me ren Kölfel 86:5, met a amwékútú Jiowa le omusaaló tipis?

¹¹ Án Jiowa tong enlet a amwékútú le omusaaló tipis. Atun Jiowa a kúna án emén mi féri eú tipis aier, me likitaló an féfférún tipis, an tong enlet a amwékútú le omusaaló tipisin. Iei met Tafit ewe soumakken kélfel a apasa usun Jiowa: “Esap föri ngenikich ükükün ach tipis, esap pwal liwini ngenikich ükükün ach föföringau.” (Kölf. 103:8-11) Tafit a silei úkúkún mengiringirin me letipechoun emén ika mwelien letipan a aosukosuka. Nge a pwal silei pwe Jiowa a “kirikiröch o amusala tipis.” Met a amwékútú Jiowa le omusaaló tipis? Pélúwan a mak lón Kölfel 86:5. (Álleani.) Ewer, usun chék met Tafit a eáni iótek pwe Jiowa a omusaaló tipis pokiten a fókkun lapalap an tong enlet ngeni chókkewe iir mi tingorei an epwe omusereló.

12-13. Met epwe álisikich ika sia meefi mengiringir me letipechou ren met ekkewe sia mwáálliló wóór me lóóm?

¹² Atun sia féri eú tipis, ese wor ngawen ach sipwe meefi mengiringir ren, me a pwal mwo nge fen éch ach meefi ena. Ena mettóch a tongeni amwékútúkich le aier me áwena féfférúch. Nge ekkóch néún Kot kewe chón angang, ra kokotiw fán ar mengiringir pokiten met ekkewe ra mwáálliló wóór me  lóóm. Ra chúen ekieki pwe Jiowa esap fókkun omusereló inaamwo ika ra fen tingorei an epwe omusereló me ra úkútiw le féfféri minne mi ngaw. Ika ka pwal eáni ena esin memmeef, iwe óm silei usun án Kot tipemecheres le pwári an tong enlet ngeni néún kewe chón angang, epwe álisuk.

¹³ Ifa usun sia kúna álilliséchún? Inaamwo ika sia kan mwámmwáálliló, nge sia tongeni pwapwa le angang ngeni Jiowa ren eú mwelien letip mi kinamwe. A tufich ena pokiten “chaan Jesus Nöün we a limetikich seni ach tipis meinisin.” (1 Joh. 1:7) Atun ka lichippúng ren ekkóch óm kewe mwáál, kopwe chemeni pwe Jiowa a fókkun mochen omusakoló ika ka aier. Nengeni usun án Tafit eriri tong enlet ngeni omusaaló tipis. A makkeei: “Usun ekewe läng ra tekia seni fanüfan, iei usun an we tong ellet a tekia ngeni chokewe mi niuokusiti i. Pun usun meserän a toau seni epilen, iei usun a atoauala ach pupungau senikich.” (Kölf. 103:11, 12) Ewer, Jiowa a tipemecheres le “müttir le amusala tipis.”​—Ais. 55:7.

14. Ifa usun Tafit a áweweei napanapen án Jiowa túmúnúkich ren an tong enlet?

¹⁴ Án Kot tong enlet a awora túmún lón pekin ngún. Iei met Tafit a erá lón an iótek ngeni Jiowa: “En mi ai leenien op, ka tumunuochuei seni riaffou; ka chok pwellifetaliei ren minne upwe ngaselo ren. . . . Tong enlet a chok pwellifetalei ir ekkewe mi luku ewe SAMOL.” (Kölf. 32: 7, 10, TF) Ekkewe ttit lón fansoun lóóm mi pwellieló eú telinimw ra kan túmúnú ekkewe aramas seni chón oputer. Án Jiowa tong enlet a usun eú ttit mi túmúnúkich seni ese lifilifil met epwe tongeni atai ach riri ngeni. Pwal och, án Jiowa tong enlet a amwékútú le panikicheto ngeni i.​—Jer. 31:3.

15. Ifa usun án Jiowa tong enlet a usun eú leenien túmún?

¹⁵ Tafit a pwal áeá eú áwewe mi áweweei ifa usun án Kot túmúnú néún kewe aramas. A makkeei: “Kot, mi ai imwen maun, ewe Kot mi pwar ngeniei ewe tong enlet.” Tafit a pwal erá usun Jiowa: “I ai Kot mi tongeei [“lón enlet,” NW] me imwei imwen maun, ai lenien op mi pöchökül me ai Chon Amanau, i a epeti seniei feiengau.” (Kölf. 59:17, TF; 144:2) Pwata Tafit a aléllééi án Jiowa tong enlet ngeni eú leenien op me eú imwen maun? Ese lifilifil ia sia nóm ie wóón ei fénúfan, nge ika sia angang ngeni Jiowa, iwe i epwe awora ngenikich ewe túmún mi lamot mi túmúnú ach we riri ngeni i mi aúchea. A pwal mak ena esin kapasen alúkúlúk lón Kölfel 91. Iei alon ewe mi makkeei ena kélfel: “En ai lenien op me imwei imwen maun, en ai Kot üa apilükülükuk.” (Kölf. 91:1-3, 9, 14) Moses a pwal eáni ena esin áwewe usun eú leenien op. (Kölf. 90:1) Me mwen án Moses we epwele máló, a fós usun ei áwewe mi múrinné. A makkeei: “Ewe Kot mi nom lon fansoun esemüch om lenien op, a iseni fomw pöün mi nom tori feilfeilachök.” (Tut. 33:27) Met ena itiitin kapas “a iseni fomw pöün mi nom tori feilfeilachök” a áiti ngenikich usun Jiowa?

16. Ifa usun Jiowa a álisikich? (Kölfel 136:23)

¹⁶ Atun sia eáni Jiowa Leenien Op, sia meefi núkúnúkéch. Nge fán ekkóch eli sia meefi lichippúng me a weires ach sipwe likiitú. Lón ekkena atun met Jiowa epwe féri ngenikich? (Álleani Kölfel 136:23.) Epwe iseni péún fach, amwéchúkichetá, me álisikich le fetál sefál. (Kölf. 28:9; 94:18) Ifa usun sia kúna álilliséchún? Sia silei pwe sia tongeni chék lúllúkúlúk wóón Kot. Ena mettóch epwe álisikich lón ekkeei ruu mettóch. Áeúin, ese lifilifil ia sia nóm ie, sia silei pwe Jiowa epwe chék  túttúmúnúkich. Oruuan, Semach na mi tong lón láng a unusen chúngúkich.

17. Met sia tongeni lúkúlúkú pokiten án Kot tong enlet? (Kölfel 33:18-22)

¹⁷ Usun met sia fen káé pwe atun sia kúna sóssót, sia tongeni lúkúlúk pwe Jiowa epwe awora ngenikich ewe álillis mi lamot pwe sipwe chék tuttuppwél ngeni. (2 Kor. 4:7-9) Iei alon ewe soufós Jeremaia: “Än ewe Samol mi Lapalap tong ellet esap fokun ükütiu, an ümöümöch esap fokun wesila.” (KölK. 3:22) Sia tongeni lúkúlúk pwe án Jiowa tong enlet epwe nónnóm rech usun met ei ewe soumakken kélfel a alúkúlúkú ngenikich: “Ewe Samol mi Lapalap a mamasa chokewe mi niuokusiti, pwal chokewe mi apilükülüküni an tong ellet.”​—Álleani Kölfel 33:18-22.

18-19. (a) Met a lamot ach sipwe chechchemeni? (b) Met sipwe káé lón en lesen mwirin?

¹⁸ Met a lamot ach sipwe chechchemeni? Me mwen ach poputá le angang ngeni Jiowa, sia fen kúna ewe tong a pwári ngeni aramas meinisin. Iwe nge pokiten sia fel ngeni, iwe, sia pwal kúna álillis seni an we tong enlet. Án Jiowa tong enlet a amwékútú an epwe túmúnúkich. Epwe chék nónnóm rech me epwe apwénúetá an kewe pwon mi amwarar fán itach. A mochen ach sipwe sópwéch. (Kölf. 46:1, 2, 7) Ina popun, ese lifilifil met sóssót sipwe kúna, nge Jiowa epwe ngenikich ewe péchékkúl mi lamot pwe sipwe chék tuttuppwél ngeni.

¹⁹ Sia fen kúna usun án Jiowa pwári an tong enlet ngeni néún chón angang. Ina minne a mochen ach sipwe pwal pwárfengeni tong enlet lefilach. Ifa usun sipwe tongeni féri ena? Sipwe káé lón en lesen mwirin usun ena pwóróus mi lamot.