1-2. (a) Ni enki eki entumwa ishatu za Yesu zashabirwe kukora, kandi shi ni bata oku zakikozire? (b) Ni enki eki twaza kushwijuma omuri eki kicweka?

BWANYIMA ya pasika y’omu mwaka gwa 32 M.Y., entumwa za Yesu ari zo Petero, Yakobo, na Yohana zikatunga okorekwa okuri kutangaza. Obu babire bari aha rushozi ruringwa, hihi na Herimoni, bakareba Yesu ari kuhinduka. Bibuli negira ngu ‘aha misho geye hakamurinkana nk’izoba, n’ebijwaro byeye byayera nk’omushana.’ (Mat 17:1-4) Okorekwa ku kwagire kuhwa, ezo ntumwa zikahurira iraka rya Ruhanga eriri kugira riti: ‘Ogu ni Omwana wange owu nkunda, owu nyesimira munonga; mumuhurire.’ (Mat 17:5) Ezo ntumwa ishatu za Yesu zikagumizamu kugendera omu muhanda murungi ahabw’okuba zahurire Yesu omu kubaho kwazo. N’itwe nitwenda kutoreza ecokureberaho kirungi cazo.

² Omu kicweka ecabandize eki, tukareba ku kuhurikiza iraka rya Yesu kiri kutwariramu okureka kukora ebintu bimwe. Omuri eki kicweka twaza kurebe ebintu bibiri ebi Yesu yagambire ngu tukore.

3. Tukuratize ebiri omuri Matayo 7:13, 14, ni enki eki Yesu yagambire eki tushemerire kukora?

³ Shoma omuri Matayo 7:13, 14. Yijuka ku Yesu yagambire aha mihanda ibiri, ari yo ‘ogugarami’ n’‘ogufunzire.’ Tihariho ogwa kashatu. Tushemerire kutorana omuhanda ogu turarabemu. Omuhanda ogu turasharemu ni og’omugasho munonga ahabw’okuba nigubasa kutuma twatunga amagara agatahwaho ninga shi tugabura.

4. Shoborora omuhanda ogugarami?

⁴ Tushemerire kugumizamu kwijuka entanisa eri ahagati y’eyo mihanga ibiri. Omuhanda ogugarami gurimu abantu bingi  ahakuba gorobi kugurabamu. Ekiri kushasha, abamwe nibaguma omuri ogo muhanda ahabw’okukuratira abantu bingi abagurimu. Tibari kumanya ku Sitane omuregi ari we ori kuhabura abantu omuri ogo muhanda, kandi ku guri kutwara abantu aha kucwecerera.—1 Kor 6:9, 10; 1 Yoh 5:19.

5. Ni bata oku abamwe batireho amani kugira ngu babone omuhanda ogufunzire kandi bagugenderemu?

⁵ Ogundi muhanda go tiguri kushushana n’ogugarami ahakuba go gufunzire, kandi Yesu akagamba ku abace ari bo abari kugubona. Ahabw’enki? Ekiri kushemeza, omu runyiriri oruri kukurataho, akarabura abakurasi beye kwerinda abahanuzi b’ebishuba. (Mat 7:15) Abantu bingi nibagamba ku hariho amadini mingi munonga, kandi amingi nigagamba ku nigegesa amazima. Abantu bingi bakatamwa n’ebiri kukwata aha madini, catuma abamwe batagezaho kuronda omuhanda oguri kutasya aha magara. Konka ogo muhanda nigubasa kuboneka. Yesu akagamba ati: ‘Ku murahamire aha kigambo cange, nimuba muri abegi bange buzima; kandi muryamanya amazima, n’amazima garyabahindura ab’obusinge.’ (Yoh 8:31, 32) Konka imwe nitubasima munonga ahabw’okuba timurakuratire bingi, ahobwe mukarondesa amazima. Mukatandika kwega Ekigambo ca Ruhanga mutireho omutima kugira ngu mumanye ebi ari kubashaba kandi mwahurikiza enyegesa za Yesu. Nambwenu mukega ku Yehova ari kwenda ngu tureke enyegesa z’amadini g’ebishuba kandi tureke kwekwatanisa omu biro bikuru ebyine obukomoko n’emigenzo y’abapagani. Nambwenu mukamanya ku okukora ebi Yehova ari kutushaba n’okucweka aha mitwarize eri kutuma Yehova atatusima, kiri kubasa kubagumira. (Mat 10:34-36) Nikibasa kuba kitarakorobire kukora empinduka. Konka okatamu amani ahabw’okuba nokunda Tata witu ow’omu iguru kandi noyenda ngu akwikirize. Mazima eco ku nikishemeza Yehova!—Enfu 27:11.

6. Tukuratize ebiri omuri Zaaburi ya 119:9, 10, 45, na 133, ni enki ekiri kubasa kutukwasa kuguma omu muhanda ogufunzire?

⁶ Twaba twatandikire kugendera omu muhanda ogufunzire, ni enki ekiri kubasa kutukwasa kugugumamu? Reba eki cokureberaho. Ebyoma ebikikire aha muhanda nibitanga emotoka ngu etahirima omu ruhanga. Ebyo byoma bikakorwa ngu birinde abavugi batarenga omuhanda; tihine omuvugi w’emotoka ori kubasa kutongana ngu ebyo byoma birimu kumuteganisa. Emisinge ya Yehova eri omuri Bibuli eri nk’ebyo byoma. Eyo misinge yeye netukwasa kuguma omu muhanda ogufunzire.—Shoma omuri Zaaburi ya 119:9, 10, 45, 133.

7. Ni bata oku abacari bato bashemerire kureba omuhanda ogufunzire?

⁷ Imwe abacari bato, mbehi hine obu muri kuhurira emisinge ya Yehova eri kubateganisa? Oko ni ko Sitane ari kwenda ngu mutekateke. Nayenda ngu mute omutima ah’abari kugendera omu muhanda ogugarami, rero mutekateke ngu ebi bari kukora nibituma bashemererwa. Nabasa kukoresa ebi ab’orwingano rwawe bari kukora ah’ishomero n’ebi ori kureba ahari intaneti kugira ngu otekateke ku hine ebi waferirwe. Nayenda ngu otekateke ku emisinge ya Yehova eri kukizibira kushemererwa omu bwijwire. * Konka yijuka eki: Sitane tari kwenda  ngu abari kugendera omu muhanda gweye ogugarami bamanye ahu guri kubatoza. Konka Yehova we akakumanyisa eki akubikire waguma omu muhanda gweye oguri kutoza aha magara.—Zab 37:29; Isa 35:5, 6; 65:21-23.

8. Ni enki eki abacari bato bari kubasa kwegera aha cokureberaho ca Olaf?

⁸ Reba eki ori kubasa kwegera ahari mwenetata ocari muto ori kwetwa Olaf. * Abegi bagenzi beye bakamugema kwekwatanisa omu by’obushambani. Ku yagerizehu kubashobororera ku Abahamya ba Yehova bari kugendera aha misinge ya Bibuli y’eby’emicwe, abahara b’omu ishomero ryeye bakagezaho n’okumushendashenda ngu anyame na bo. Konka Olaf akagumizamu ahamire aha kirungi. Kandi eco ti co kigezo conka eki yabugine. Olaf akagamba ati: “Abegesa bange bakangema ngu nze kwega amashomero makuru ahabw’okuba garije kutuma abantu bampa ekitinisa. Bakangambira ngu kitari eco, tihine eki ndihikaho.” Ni enki ecakwasize Olaf kwehanganira eco  kigezo? Akagamba ati: “Nkaronda abanywani omu kibina. Bakaba bari nk’ab’omu ka yange. Nambwenu nkatandika kweyegesa Bibuli ntireho omutima. Oku nabire ninkizaho kweyegesa, ni ko nabire ninkizaho kwikiriza ku nabwine amazima. Kandi eco kikatuma namaririra kubatizibwa.”

9. Ni enki eki abari kwenda kuguma omu muhanda ogufunzire bashemerire kukora?

⁹ Sitane nayenda ngu oruge omu muhanda oguri kutasya aha magara agatahwaho. Nayenda ngu oze omu muhanda ogugarami, ogurimu abantu bingi kandi oguri kutasya omu kucwecerera. (Mat 7:13) Konka ku turagumizemu kuhurira Yesu, kandi omuhanda ogufunzire tukagureba nk’oburinzi, ni bwo obu turabase kugugumamu. Hati reka turebe ekindi eki Yesu yagambire ngu tukore.

10. Tukuratize ebiri omuri Matayo 5:23, 24, ni enki eki Yesu yagambire eki tushemerire kukora?

¹⁰ Shoma omuri Matayo 5:23, 24. Yesu akagambira Abayudaya ababire bamuhurikize ekintu ecabire kiri ec’omugasho munonga omu kubaho kwabo. Tecereza omuntu owabire ari ahari hekalu ayetegwire kuha omutambi itungo ryeye eri yabire ayetegwire kutamba. Ku yabire nayijukira aho ku ayine ekizibu na mwenishe, akaba ashemerire kusiga eryo itungo ‘agenda.’ Ahabw’enki? Mbwenu shi ni kiha kintu ecabire kiri kikuru okukira okutambira Yehova ekitambo? Yesu akakigamba atari kushereka nagira ati: ‘Obanze ogarukane na [mugenzi wawe].’

11. Shoborora oku Yakobo yatiremu amani ngu areteho obusinge na mwenishe Esawu.

¹¹ Nitubasa kwega amashomo g’omugasho aha bikwatirine n’okugarukana n’abandi, twashwijuma ebyabireho omu kubaho kwa shwenkuru Yakobo. Hahwire hihi emyaka 20 arugire omu ihanga eri yazarirwemu, Ruhanga akakoresa marayika, yamuragira ngu agarukeyo. (Kut 31:11, 13, 38) Konka hakaba hariho ekizibu. Mukuru weye, Esawu, akaba yagerizeho kumwita. (Kut 27:41) Yakobo akaba ‘atinire munonga kandi ashobirwe,’ ahabw’okutekateka ngu mukuru weye acamubikire enzika. (Kut 32:7) Ni enki eki Yakobo yakozire ngu areteho obusinge ahagati yeye na mwenishe? Ec’okubanza: Akeshengereza Yehova omu kushaba yabimugambira. Eca kabiri: Akoherereza Esawu ebiconco. (Kut 32:9-15) Bwanyima, Yakobo ku yabwine mwenishe amisho aha gandi, akahika namuha ekitinisa. Akafukamira Esawu atari omurundi gumwe ninga ibiri kusha, ahobwe akamufukamira emirundi mushanju. Ahakuba Yakobo yabire ari omucurezi kandi akereka mwenishe ekitinisa, bakagarukana omu businge—Kut 33:3, 4.

12. Ni enki eki turi kwegera aha cokureberaho ca Yakobo?

¹² Nitwegera ishomo aha ku Yakobo yayetegwire kuza kubugana na mwenishe n’eki yakozire ari kuza kumubugana. Yakobo akecureza yashaba Yehova obuyambi. Bwanyima akata omu bikorwa ebi yashabire omu shara ari kugira eki yakora kugira ngu agarukane na mwenishe nk’oku ari kubasa. Ku babugine, Yakobo taratongine na Esawu ngu barebe owabire ari omu nshobi. Yakobo akaba ayine entego y’okugarukana na mwenishe. Ni bata oku turi kubasa kutoreza ecokureberaho ca Yakobo?

13-14. Ni enki eki tushemerire kukora twashasha Omukristo mugenzi witu?

¹³ Ahabw’okuba turi omu muhanda oguri kutasya aha magara, nitwenda kugugumamu turi kuretaho obusinge na benetata. (Rom 12:18) Ni enki eki tushemerire kukora twamanya ku twashasha Omukristo  mugenzi witu? Nk’oku Yakobo yakikozire, tushemerire kweshengereza Yehova turi kumushaba. Nitubasa kumugambira ngu atukwase kugarukana na mwenetata.

¹⁴ Nambwenu tushemerire kukwata obwire tukeshwijuma. Nitubasa kwebuza ngu: ‘Mbehi nyetegwire kwetaho enshobe zona, kwecureza nkashaba embabazi, n’okuretaho obusinge? Ni bata oku Yehova na Yesu barije kwehurira ku ndabe ow’okubanza omu kuretaho obusinge ahagati yange na mwenetata ninga munyanyazi?’ Ebi turayegarukemu nibibasa kutukwasa kuhurikiza Yesu kandi bitume twayecureza, tushange Omukristo mugenzi witu twine entego y’okuretaho obusinge. Twakora tusyoya, nituba twakuratiza ecokureberaho ca Yakobo.

15. Ni bata oku okukuratiza omusinge oguri omu Baefeso 4:2, 3 kiri kutukwasa kuretaho obusinge na mwenetata?

¹⁵ Tekateka ecabire kirabeho kuri Yakobo yayerekire omutima g’okwetungura yaza kubugana na mwenishe! Nihabasa kuba habire hararugemu ebindi. Twashanga mwenetata ngu tureteho obusinge na we, tushemerire kukikora twecurerize. (Shoma omu Baefeso 4:2, 3.) Omu Nfumu 18:19 nihagira ngu: ‘Okugarukana na mwenesho ogwisibwe kubi kugumire okukira okwata orurembo rw’amani, kandi entongane nk’ezo zigumire okukira ebihongorezo by’ekigo.’ Okwecureza tukashaba embabazi nikibasa kutukwasa kutaha omu rurembo rw’amani.

16. Ni enki eki tushemerire kubanza kutekatekaho, kandi shi ahabw’enki?

¹⁶ Nambwenu nituba tushemerire kubanza twatekateka aha bi turagambire mwenetata n’oku turabimugambire. Obwe rero twamara ebyo byona, tushemerire kuhika owu tushashire twine entego y’okumwihamu obusaasi omu mutima. Nabasa kuhika ari kutugambira kubi. N’itwe nibibasa kutuma twayitwa ekiniga ninga shi tugezaho kweshoborora; konka shi eco nikibasa kutuma habaho obusinge? Ingaha mazima. Yijuka ku ekikuru ari okuretaho obusinge atari okugezaho kumanya ori omu nshobe ninga ohikire.—1 Kor 6:7.

17. Ni enki eki ori kubasa kwegera aha cokureberaho ca Gilbert?

¹⁷ Mwenetata ori kwetwa Gilbert akataho amani kugira ngu areteho obusinge n’abandi. Akagamba ati: “Nkaba nyine ebizibu bigumire n’omwe omu b’omu ka yange. Nkamara emyaka eri kurenga ibiri ndi kutamu amani kugira ngu tugambane kurungi kandi nturize, ndi kwenda kugarura  obunywani ahagati yitu .” Ni enki ekindi eki Gilbert yakozire? Akagamba ati: “Mbere y’okugamba, nkaba nimbanza nashaba kandi ntebekanisa ebitekateko, kugira ngu ntamugarukamu kubi yangambira ekintu ekiri kunshasha. Nkaba nshemerire kutura nyetegwire kusaasira. Nkega ku ntashemerire kwega kwerwanaho, kandi nkashoborocerwa ku omurimo gwange gwabire guri og’okuretaho obusinge kusha.” Ni enki ecarugiremu? Gilbert nagira ati: “Hati nyine obusinge bw’omu mutima ahakuba nyine obunywani burungi n’ab’omu ka yange bona.”

18-19. Ni enki eki tushemerire kukora twaba tushashire omuntu, kandi ahabw’enki?

¹⁸ Ni enki eki oshemerire kukora wamanya ku oshashire Omukristo mugenzi wawe? Kuratiza obuhabuzi bwa Yesu bw’okuretaho obusinge. Guma ogambire Yehova ebizibu ebi oyine, kandi oyesige omwika oguri kwera kugira ngu gukukwase kuretaho obusinge. Ku orakikore basyoya, noyija kutunga okushemererwa, kandi noba ori kwereka ku nohurikiza Yesu.—Mat 5:9.

¹⁹ Nitushemererwa munonga ahakuba Yehova ari kutuha obuhabuzi akoresize ‘omutwe gw’[ekibina],’ ni okugamba Yesu Kristo. (Efe 5:23) Nimureke tumaririre kumuhurikiza nk’oku entumwa Petero, Yakobo, na Yohana bakikozire. (Mat 17:5) Twamara kushwijuma oku Omukristo ari kuretaho obusinge na mugenzi weye owu yashasha. Ku turayobere obwo buhabuzi kandi tukaguma omu muhanda ogufunzire oguri kutasya aha magara, nitwija kutunga emigisha hati n’omu biro eby’omu misho.