1. Ahabw’enki turi kwetenga obuhabuzi?

 TWENA nitwetenga obuhabuzi. Obumwe, hine obu turi kuba tushemerire kweshabira obuhabuzi. Obundi bwire, mwenetata nabasa kwija atwereka ku ebi tukozire bitahikire kandi ku biri kubasa kutuma twayefuza. (Gal 6:1) Nambwenu, nitubasa kutunga obuhabuzi twamara kukora enshobi y’amani. Obuhabuzi oku bwakuba buri kona, tushemerire kubuhurira. Eco twakikora nikitugasira kandi nikibasa n’okukiza amagara gitu!—Emi 6:23.

2. Tukuratize ebiri omu Migani 12:15, ahabw’enki tushemerire kuhurira obuhabuzi?

² Ecahandikirwe kikuru nikituhiga “kuhurira ebigambo by’abanyabwenge.” (Emi 22:17) Tihariho omuntu ori kumanya ebintu byona; obwe rero nihaba hariho omuntu ori kutukiza obwenge ninga shi obumanyi. (Shoma omu Migani 12:15.) Obwe rero okuhurikiza obuhabuzi nicereka ngu ori omucurezi. Nicereka ku nitumanya ahu obushoborozi bwitu buri kugarukira; kandi ku nitwetenga obuhabuzi kugira ngu tuhike aha ntego zitu. Omugabe w’omunyabwenge ori kwetwa Solomoni, omwika oguri kwera gukamukwasa yahandika ati: “Ahu abahi b’obwenge bari bingi enama zihikirizibwa.”—Emi 15:22.

3. Ni buha buryo obu turi kutungamu obuhabuzi?

³ Oburyo obumwe obu turi kubasa kutungamu obuhabuzi ni okushoma Bibuli ninga ebitabo byitu. Nitubasa kushomamu ekintu, rero tutekateka aha bi twaba nitukora kituma twahinduramu. (Heb 4:12) Konka nambwenu, omuzehe ninga ondijo mwenetata nabasa kutuha obuhabuzi bw’ekintu eki tushemerire kuhindura. Omuntu ori kutukunda yatuha obuhabuzi obwegamire ahari Bibuli nitwereka ku turi kumusima turi kuhurikiza ebi yatugambira kandi tukabita omu nkora.

4. Tukuratize ebiri omu Muburizi 7:9, ni eha mitwarize eyi tushemerire kwerinda batuha obuhabuzi?

 ⁴ Mazima, nikibasa kutugumira kwikiriza obuhabuzi obu ondijo muntu yatuha. Nikibasa n’okutugwisa kubi. Ahabw’enki? N’obu turi kumanya ngu tituhikirire, nikibasa kutugumira kwikiriza obuhabuzi omuntu yatugambira enshobi eyi tukozire. (Shoma omu Muburizi 7:9.) Nitubasa n’okugezaho kuronda orwekwaso. Nitubasa kwebuza ahari ogo muntu owatuha obuhabuzi ninga shi aha buryo obu yabutuhamu. Nitubasa n’okutandika kumurondaho enshobi turi kutekateka ngu: ‘Oriya yampa obuhabuzi nk’oha? Na we nakora enshobi!’ Twaba tutakunzire obuhabuzi obu yatuha, nitubasa kubwanga, rero tuburondera ahandi hantu ahu turi kubasa kwiha obu turi kwenda kuhurira.

5. Ni enki eki twaza kushwijuma omuri eki kicweka?

⁵ Omuri eki kicweka, twaza kushwijuma ebyokureberaho by’omu Byahandikirwe by’abantu abayangire obuhabuzi n’ababwikirize. Nambwenu, twaza kushwijuma ekiri kubasa kutukwasa kwikiriza obuhabuzi kandi bukatugasira.

6. Ni enki eki turi kwegera aha ku Omugabe Rehobowamu yatwarize ku yahibwe obuhabuzi?

⁶ Reba ecokureberaho ca Rehobowamu. Ku yabire omugabe wa Isirayeli, abantu bakija hine eki bari kwenda kumushaba. Bakamushaba ngu abatubize aha mirimo eri kurusya eyi ishe Solomoni yabire nabakoresa. Rehobowamu akakora ekintu kirungi yabuza abashija bakuru b’Abisirayeli oku ashemeririre kugarukamu abo bantu. Abo bashija bakamugarukamu ngu yakora eki abo bantu bamushaba nibija kumushagika omuri byona. (1 Bag 12:3-7) Konka obwo buhabuzi tiburashemize Rehobowamu catuma yaza kubuza abashija ababire bakuzire na we. Abo bashija nibabasa kuba babire bari omu myaka ya za 40; obwe rero hine ebintu byingi ebi babire bari kumanya. (2 Bus 12:13) Konka, bakaha Rehobowamu obuhabuzi obugwire. Bakamugambira ngu ayongere abantu endijo mirimo eri kurusya. (1 Bag 12:8-11) Ahakuba Rehobuwamu yatungire obuhabuzi bubiri oburi kutana, akaba ashemerire kushaba Yehova kugira ngu amukwase kukora ensharamu ndungi. Omu mwanya gw’eco, akasharamu kwikiriza obuhabuzi obu yakunzire yahurikiza abashija bato. Engaruka zikahika ahari Rehobowamu n’aha baturage ba Isirayeli bona. Ni co kimwe, hine obu obuhabuzi obu turi kutunga buri kuba butari obu turi kwenda kuhurira. Konka nabwe, bwaba bwegamire aha Kigambo ca Ruhanga tushemerire kubwikiriza.

7. Ecokureberaho c’Omugabe Uziya nikitwegesa ki?

⁷ Omugabe Uziya akanga obuhabuzi. Akataha omuri hekalu ya Yehova ahu abatambi babire ari bo bikirizibwe kuzayo bonka, rero yayosya obubani. Abatambi ba Yehova bakamugambira ngu: “Ti omurimo gwawe Uziya, koterera Yehova obubani! Kureka abatambi ni bo abashemerire koterera obubani.” Ni bata oku Uziya yatwarize? Kuri yayecurerize akahurira obwo buhabuzi kandi akahika ari kuruga omuri hekalu, Yehova akaba ari kubasa kumusaasira. Omu mwanya gw’eco, “Uziya akagira ekiniga.” Ahabw’enki yayangire obwo buhabuzi? Nabasa kuba yatekatekire ngu obu ari omugabe nabasa kukora cona eki ari kwenda. Konka Yehova we ti ko oku yabire nabireba. Ahabw’okuba Uziya yayetungwire, akarwara ebibembe, “kandi yaguma arwire ebibembe okuhisya izoba eri yaferireho.” (2 Bus 26:16-21) Ecokureberaho ca Uziya nikitwegesa ngu abu twakuba turi bo bona,  twayanga obuhabuzi obwegamire ahari Bibuli Yehova tarije kutwikiriza.

8. Ni bata oku Yobu yayakirire obuhabuzi obu yahibwe?

⁸ Ekiri kutana n’ebyo byokureberaho ebiri kurabura, omuri Bibuli harimu ebindi byokureberaho by’abahibwe omugisha ahabw’okwikiriza obuhabuzi. Reka turebe ecokureberaho ca Yobu. N’obu yabire natina Ruhanga akaba atahikirire. Ahabw’okugezibwa munonga akatandika kureba ebintu omu buryo obutahikire. Eco kikatuma yatunga obuhabuzi obutarabire aha rubaju, obu Elihu na Yehova bamuhire. Yobu akabwakira ata? Akecureza, yayikiriza obwo buhabuzi. Akagamba ati: “Nkagamba ebi ntari kushoborocerwa. Ni co ndi kwetamira nketisiza omu mucucu n’omu iju.” Yehova akaha Yobu emigisha ahabw’okuba omucurezi.—Yob 42:3-6, 12-17.

9. Ni bata oku Musa yatuterireho ecokureberaho kirungi omu bikwatirine n’okwakira obuhabuzi?

⁹ Musa na we ni ecokureberaho kirungi omu bantu abayakirire obuhabuzi bwanyima y’okukora ekibi c’amani. Izoba rimwe, akitwa ekiniga catuma atahisa Ruhanga ekitinisa. Eco kikatuma Musa atahebwa omugisha g’okutaha omu ihanga eryaraganisibwe. (Kub 20:1-13) Musa ku yayerekire ku nashasha ahabw’eyo nsharamu, Yehova akamugambira ati: “Recera aho otagaruka kungambira ahari eco kigambo.” (Bir 3:23-27) Musa taranyigire. Ahobwe akikiriza eyo nsharamu, kandi Yehova yaguma kumukoresa omu kwebembera Abisirayeli. (Bir 4:1) Yobu na Musa ni ebyokureberaho birungi by’okutoreza omu kwikiriza obuhabuzi. Yobu akahindura oku yabire nareba ebintu kandi tarayeshoborwire. Musa akikiriza obuhabuzi obu Yehova yamuhire ari kuguma ari omwesigwa n’obu bwanyima yayizire kuferwa omurimo g’omuhendo ogu yabire ayine.

10. (a) Ebiri omu Migani 4:10-13 nibyereka bita omugasho g’okwikiriza obuhabuzi? (b) Ni bata oku abantu bamwe bayakirire obuhabuzi?

¹⁰ Nikija kutugasira twagumizamu kutoreza ecokureberaho c’abo bashija b’abesigwa nka Yobu na Musa. (Shoma omu Migani 4:10-13.) Abingi omuri benetata na banyanyazi ni co eki bari kukora. Yetegereze ebi mwenetata otwire omuri Kongo Kinshasa ori kwetwa Emmanuel yagambire aha buhabuzi obu yahibwe. Akagamba ati: “Benetata abakuzire omu by’omwika b’omu kibina cange, bakareba obunywani bwange na Yehova buri kugenda buri kusisikara, rero bagezaho kunkwasa. Nkata omu nkora obuhabuzi obu bampire kandi eco kikandinda ebizibu byingi.” * Omupayoniya otwire omuri Kanada ori kwetwa Megan, akagamba aha bikwatirine n’obuhabuzi ari kugira ngu: “N’obu burijo atari byo ebi nabire ndi kwenda kuhurira, nkaba ninshanga ari byo ebi nabire ndi kwetenga kuhurira.” Kandi mwenetata otwire omuri Croatia, ori kwetwa Marko akagamba ati: “N’obu naferirwe omurimo gwange omu kibina, ninshanga obuhabuzi obu nahibwe ari bwo bwankwasaze kushuba kugira obunywani burungi na Yehova.”

11. Ni enki eki mwenetata Karl Klein yarebire aha bikwatirine n’okwikiriza obuhabuzi?

¹¹ Ondijo muntu owagasirwe n’okwikiriza obuhabuzi, ni mwenetata Karl Klein, owabire ari omu Kakiko k’Abarisa. Omu nkuru y’ebyamubireho, mwenetata Klein akagamba oku yayakirire obuhabuzi obu yahibwe na mwenetata Joseph F. Rutherford. Akagamba ku mwenetata Rutherford owabire ari munywani weye wa hihi yamuhire obuhabuzi bw’amani. Mwenetata Klein akagamba ku omu kubanza atarayakirire ge obwo buhabuzi. Akagamba ati: “Aha rindi izoba mwenetata Rutherford ku yandebire,  akanyakura ashemerirwe ati, ‘Oryaho Karl!’ Konka ahabw’okuba nabire ncayine ekiniga, tindamugarukiremu. Na we akangambira ati, ‘Karl, oyetonde! Sitani akukwasire!’ Akagarukamu mwenetata Rutherford ku yabire atacamwinire ekiniga. Konka ahabw’okuba mwenetata Rutherford yabire ari kumanya ku acamwinire ekiniga, akahika ari kumugambira ati, ‘ni kirungi. Konka oyetonde. Ahakuba Sitane akwine.’ Mwenetata Rutherford akaba ahikire! Twanyigira mwenetata ahabw’okutugambira ekintu eki ayinire obugabe bw’okukigamba, nituba twaha Sitane omwanya.” * (Efe 4:25-27) Mwenetata Klein akikiriza obuhabuzi bwa mwenetata Rutherford, kandi eco kikatuma obunywani bwabo bwakizaho kuguma.

12. Ni bata oku obucurezi buri kubasa kutukwasa kwikiriza obuhabuzi (Zaburi ya 141:5)

¹² Ni enki ekiri kubasa kutukwasa kuguma kwikiriza obuhabuzi? Tushemerire kuba abacurezi turi kwijuka ku tutahikirire kandi ku hine obu turi kubasa kukora ebintu by’obushema. Nk’oku tukirebire, Yobu akaba ayine emitekatecere egwire. Konka bwanyima akahindura emitekatecere yeye kandi Yehova yamuha emigisha. Ahabw’enki? Ni ahabw’okuba Yobu yabire ari omucurezi. Akereka ku ari omucurezi ari kwikiriza obuhabuzi obu Elihu yamuhire, n’obu Elihu yabire ari omwana ahari we. (Yob 32:6, 7) Obucurezi nibwija kutuma n’itwe twayikiriza obuhabuzi n’obu twakuba tutabukunzire ninga obutuhire ari muto ahari itwe. Omuzehe w’omuri Kanada akagamba ati: “N’obu tutari kubasa kwereba nk’oku abandi bari kutureba, ni bata oku turi kubasa kutunguka hatagizire owatuha obuhabuzi?” Ni oha omuri itwe otari kwenda ngu atunguke omu kwereka ebyana by’omwika n’omu kukora omurimo g’okuburira?—Shoma omuri Zaburi ya 141:5.

13. Ni bata oku tushemerire kureba obuhabuzi obu twahebwa?

¹³ Reba obuhabuzi nk’oburi kukwereka ku Ruhanga ari kukukunda. Yehova natwendeza ebirungi. (Emi 4:20-22) Ku ari kutuhabura akoresize Ekigambo ceye, ebitabo ebyegamire ahari Bibuli, ninga Omukristo mugenzi witu naba ari kutwereka ku ari kutukunda. Omu Baheburayo 12:9, 10 nihagamba ngu: “Konka we natuhana ngu tugasirwe.”

14. Ni enki eki tushemerire kutaho omutima twahebwa obuhabuzi?

¹⁴ Ta omutima aha buhabuzi, omu mwanya g’okuta omutima aha ku wabuhebwa. Obumwe hine obu turi kuhurira ku twahebwa obuhabuzi omu muringo mubi. Ni amazima omuntu owatuha obuhabuzi nakora cona ekiri kubasika ngu tubase kubwikiriza omu  buryo bworobi. * (Gal 6:1) Konka yaba ari itwe abari kuhaburwa, nituba tushemerire kuta omutima aha buhabuzi n’obu twakuba turi kutekateka ku hine obundi buryo burungi obu twaba turabuhebwemu. Nitubasa kwebuza ngu: ‘Ni obu ntakunda oburyo obu yabungambiramu, obu buhabuzi ni amazima? Mbehi tindi kubasa kwehuzya okutahikirira kweye nkikiriza obuhabuzi obu yampa?’ Nikija kuba kiri ec’obwenge twakora ekiri kubasika ngu twikirize obuhabuzi bwona obu twahebwa.—Emi 15:31.

15. Ahabw’enki tushemerire kushaba obuhabuzi?

¹⁵ Bibuli netuhiga kushaba obuhabuzi. Omu Migani 13:10 nihagira ngu: “Obwenge bugirwa abari kwikiriza kuhaburwa.” Eco ni mazima! Omuntu ori kweshabira obuhabuzi atari kutegereza ngu abandi babumuhe natunguka juba omu by’omwika. Obwe rero ba ni iwe owabanza kweshabira obuhabuzi.

16. Ni ziha mbera ezi turi kubasa kushabamu obuhabuzi?

¹⁶ Ni ryari obu turi kubasa kushaba Abakristo bagenzi bitu obuhabuzi? Reba zimwe omu mbera ezi turi kubasa kubushabamu. (1) Omunyanyazi yagenda kuburira n’omuburizi omanyirire kandi bwanyima yamushaba obuhabuzi bw’oku ari kubasa kukizaho kwegesa ge. (2) Omunyanyazi ocari wenka yayenda kugura ebijwaro, rero yashaba omunyanyazi okuzire ngu amukwase kusharamu ge ebi aragure. (3) Mwenetata yaza kuhayo toku yeye y’okubanza. Yashaba mwenetata omanyirire ngu amuhurikize yaba ari kwemanyiza toku yeye kugira ngu amugambire ebi ari kubasa kuhindura. Nangwa na mwenetata omazire emyaka myingi ari kuhereza za toku nabasa kushaba abandi abamanyirire, rero bamuha obuhabuzi obu ari kubasa kuta omu nkora.

17. Ni bata oku turi kubasa kugasirwa twayikiriza obuhabuzi?

¹⁷ Omu bwire oburi omu misho, twena nitwija kuhebwa obuhabuzi. Ebyo byakubaho, oshemerire kwijuka ebintu ebi twayega. Guma oyecureze. Ote omutima aha buhabuzi omu mwanya g’okuguta aha ku wabuhebwa. Kandi ote omu nkora obuhabuzi obu wahebwa. Tihine n’omwe omuri itwe owazirwe ayine obwenge. Konka twaguma “kuhurira enama tukikiriza okuhaburwa,” Ekigambo ca Ruhanga nikituraganisa ku turije “kugira obwenge.”—Emi 19:20.