1. Ni bata oku abahereza ba Ruhanga batungire amani omu bwire bwa kare?

 EKIGAMBO ca Ruhanga nikikunda kugamba abashija b’abesigwa nk’ababire bine amani. Konka n’ababire bari kubakiza amani ti ko burijo babire bari kuhurira bahamire. Ecokureberaho: Obumwe na bumwe Omugabe Dawudi akaba nahurira ‘agumire nk’omushozi,’ konka obundi bwire akaba ‘naburaburirwa.’ (Zab 30:7) N’obu Samusoni yabire ayine amani mingi munonga ahabw’omwika oguri kwera, akaba ‘nahwamu amani, aba otine mani, nk’abandi bantu.’ (Bar 14:5, 6; 16:17) Abo bashija b’abesigwa bakaba bine amani ahakuba Yehova ni we owabire nagabaha.

2. Ahabw’enki entumwa Pawulo yagambire ku yabire ayine obweremwa n’amani byombi? (2 Abakorinto 12:9, 10)

² Entumwa Pawulo na we akaba namanya ku yabire ari kwetenga amani agari kuruga ahari Yehova. (Shoma omu 2 Bakorinto 12:9, 10.) Kimwe n’itwe twena, Pawulo akaba ayine ebizibu by’oburwire. (Gal 4:13, 14) Hine obu cabire nikimugumira kukora ebihikire. (Rom 7:18, 19) Kandi obumwe akaba nahurira ayemerize omutima, ari n’okubanganisa (2 Kor 1:8, 9) Konka, Pawulo ku yabire nacweka entege, ni bwo obu yabire nagira amani. Bata shi? Yehova akaba nakwasa Pawulo, kituma yagira amani.

3. Ni biha bibuzo ebi twaza kushwijuma omuri eki kicweka?

³ N’itwe Yehova naturaganisa ku arije kutuha amani. (1 Pet 5:10) Konka kugira ngu tutunge ago mani, tushemerire kugira eki twakora. Ecokureberaho: Injini ninga moteri netuma emotoka yagira amani g’okugenda. Konka, omuvugi naba ashemerire kukanda aha muriro kugira emotoka eze hona. Ni co kimwe, Yehova ayetegwire kutuha amani agu turi kwetenga,  konka tushemerire kugira eki twakora kugira ngu gatugasire. Ni enki eki Yehova yatuhire ngu kituhe amani? Kandi shi ni enki eki tushemerire kukora kugira ngu tutunge ago mani? Reka turebe ebyokuragukamu by’ebyo bibuzo turi kushwijuma oku Yehova yahire amani abantu bashatu abari kugambwa omuri Bibuli, ari bo omuhanuzi Yona, Mariya nyina wa Yesu, n’entumwa Pawulo. Nambwenu twaza kureba oku Yehova ari kugumizamu kuha amani abahereza beye omuri obu bwire.

4. Ni bata oku turi kubasa kutunga amani ga Yehova?

⁴ Oburyo bumwe obu turi kubasa kutungamu amani ga Yehova ni okumushaba. Na we natugarukamu ari kutuha ‘amani agari kukira agashangirwe.’ (2 Kor 4:7) Nambwenu nitubasa kutunga amani birabire omu kushoma Ekigambo ceye n’okukitecerezaho. (Zab 86:11) Obutumwa bwa Yehova bw’omuri Bibuli bwine ‘amani.’ (Heb 4:12) Washaba Yehova kandi okashoma Ekigambo ceye, notunga amani g’okwehangana, kuguma oshemerirwe n’okuhikiriza omurimo ogugumire. Reba oku Yehova yagumize omuhanuzi Yona.

5. Ahabw’enki omuhanuzi Yona yabire ari kwetenga amani?

⁵ Omuhanuzi Yona akaba ari kwetenga amani. Akaba yahungire omurimo gugumire ogu Yehova yabire amuhire. Eco kikatuma yayenda kuferwa amagara geye omu muyaga gw’amani kandi yata n’amagara ga bagenzi beye ababire bari na we omu bwato omu kabi. Ku bamunagire omu mizi, akeshanga ahantu aharimu omwirima mwingi ahu yabire atakahikaga, ni okugamba omu nda y’ecenyanja kihango. Notecereza ku Yona yabire ari kwehurira ata? Mbehi akaba natecereza ku yaza kuferamu? Mbehi akaba natecereza ku Yehova yabire amusigireho? Mazima, Yona nabasa kuba yabire ayemerize omutima.

6. Tukuratize ebiri omuri Yona 2:1, 2, 7, ni enki ecagumize Yona obu yabire ari omu nda y’ecenyanja?

⁶ Ni enki eki Yona yakozire kugira ngu atunge amani obu yabire ari omuri ogo mwanya gwa hare kandi ari kuhurira ari wenka? Ni okushaba. (Shoma omuri Yona 2:1, 2, 7.) N’obu yabire yashobize Yehova, akaba nayesiga ku yabire arahurire eshara eyi yamushabire omu bucurezi kandi ari kwehana. Nambwenu Yona akatecereza aha Byahandikirwe. Ahabw’enki turi kubasa kugamba basyoya? Eshara yeye eri omuri Yona ekicweka ca 2, nekoresa ebigambo nk’ebiri omuri Zaburi. (Ecokureberaho, geranisa Yona 2:2, 5 na Zaburi 69:1; 86:7.) Hatariho okubanganisa, Yona akaba namanya ebyo byahandikirwe. Kandi ku yabitecerizeho ari omuri ezo mbera zigumire, akesiga ku Yehova yabire aramukwase. Bwanyima, Yona ku yagarukire aha butaka, akaba ayetegwire kwikiriza ogundi murimo ogu yabire arahebwe, kandi akaguhikiriza.—Yon 2:10–3:4.

7-8. Ni bata oku mwenetata omwe w’omuri Tayiwani yatungire amani omu bwire bw’ebigezo?

⁷ Ecokureberaho ca Yona nikitukwasa twaba turi kuraba omu bigezo bitari bimwe na bimwe. Ecokureberaho: Mwenetata ori kwetwa Zhiming, w’omuri Tayiwani, nashasha munonga ahabw’oburwire. b Nambwenu ab’omu ka yeye nibamukorera ebikorwa by’obusharizi ahakuba ari Omuhamya wa Yehova. Konka natunga amani ga Yehova birabire omu kushaba n’okweyegesa. Akagamba ati: “Obumwe ku ndi kubugana ebizibu, nimpurira nyemerize omutima kituma naremwa n’okweyegesa.” Konka tari kucweka entege. Akagamba ati: “Nimbanza nashaba Yehova, bwanyima  nta hedifone omu matu, rero mpurikiza ebyeshongoro by’Obukama. Hine n’obu ndi kubyeshongora omu iraka rice okuhisya obu ndahurire natuza. Bwanyima ntandika kweyegesa.”

⁸ Okweyegesa Bibuli bikagumya Zhiming omu buryo oburi kutangaza. Ecokureberaho: Obu babire bamara kumushemeza, dokita akamugambira ku yabire atine eshagama, kandi ku yabire ashemerire kuyiterwa. Omu kiro ecabandize okushemezibwa kwa Zhiming, akashoma ebiri kukwata aha munyanyazi owu babire babuganisize oburwire. Ogo munyanyazi akaba ayine eshagama nce kukiza eyeye, konka, tarikirize kuterwa eshagama kandi akaba nayesiga ku arakire. Eyo nkuru ekagumya Zhiming yaguma ari omwesigwa.

9. Ni enki eki ori kubasa kukora, ekigezo cakucwa entege? (Nambwenu reba ekushishani.)

⁹ Mbehi waba ori omu kigezo, hine obu ori kwemereza omutima munonga ohurira n’okushaba byakurema? Ninga shi hine obu ori kuhurira waremwa n’okweyegesa? Guma oyijuke ku Yehova ari kumanya ge embera ezi ori kurabamu. Obwe rero, washaba eshara ngufu, nobasa kwesiga ku arije kukuha eki ori kwetenga. (Efe 3:20) Waba oyine obusaasi bw’aha mubiri ninga obw’omu nyehurira, nobasa kugezaho kuhurikiza Bibuli n’ebitabo byitu ebikwasirwe amaraka. Nambwenu nobasa kuhurikiza ebyeshogoro byitu ninga oreba vidiyo z’aha rubuga rwa jw.org. Washaba Yehova kandi okacondoza omu bikoreso by’omwika ebi yatuhire, nakugumya.

10. Ni bata oku benetata na banyanyazi bari kubasa kutugumya?

¹⁰ Yehova nakoresa benetata na banyanyazi omu kutuha amani. Nibabasa ‘kutuhumuriza’ twaba turi kuraba omu kigezo ninga shi turi kukora omurimo gugumire. (Kol 4:10, 11) Nitwetenga abanywani ‘omu bihikirizi.’ (Emi 17:17) Twahurira tucwekire entege, Abakristo bagenzi bitu nibabasa kutukwasa aha by’omubiri, omu nyehurira n’omu by’omwika. Reba oku Mariya nyina wa Yesu yatungire amani birabire aha bandi.

11. Ahabw’enki Mariya yabire ari kwetenga amani?

 ¹¹ Mariya akaba ari kwetenga amani. Tecereza oku yayehurire obu marayika Gaburiyeli yamuhire omurimo gugumire munonga. Akaba atakagizire omushija, konka akaba aragire enda. Akaba atakareragaho omwana oweye, konka hati akaba yaza kurera omwana owabire arije kuba Mesiya. Nambwenu yebuze oku yabire arije kushobororera Yosefu owu babire batakanyamanagaho ku ayine enda!—Luk 1:26-33.

12. Tukuratize ebiri omuri Luka 1:39-45, ni bata oku Mariya yatungire amani?

¹² Ni bata oku Mariya yatungire amani g’okuhikiriza ogo murimo gugumire ogwabire gutashangirwe? Akarondera obuyambi aha bandi. Ecokureberaho: Akabuza Gaburiyeli ngu amugambire ebindi bintu ebiri kukwata ahari ogo murimo. (Luk 1:34) Bwanyima y’obwire buce, akatambura yaruga ‘omu nsi y’emishozi’ ya Buyudaya yaza kutayayira omunyabuzare weye Elizabeti. Eco kikarugamu ebirungi. Elizabeti akasima Mariya kandi Yehova akamuhumecera ngu agambire Mariya obuhanuzi oburi kuhumuriza oburi kukwata aha mwana wa Mariya owabire atakazirwe. (Shoma omuri Luka 1:39-45.) Mariya akagamba ku Yehova yabire ‘ayorekire amani n’omukono gweye.’ (Luk 1:46-51) Yehova akagumya Mariya, birabire ahari Gaburiyeli na Elizabeti.

13. Ni bata oku omunyanyazi w’omuri Boliviya yagasirwe n’obuyambi bw’Abakristo bagenzi beye?

¹³ N’iwe nobasa kutunga amani birabire aha Bakristo bagenzi bawe. Omunyanyazi ori kwetwa Dasuri w’omuri Boliviya, akaba nayetenga ago mani. Ishe ku yarwire endwara mbi munonga kandi bakamutwara ah’irwariro, Dasuri akaguma ari kumufaho. (1 Tim 5:4) Eco kikaba kitorobi. Akagamba ati: “Hine obwire obu nabire ndi kuhurira ntari kubasa kuboneka.” Mbehi akashaba obuyambi? Omu kubanza tarabushabire. Akashoborora ati: “Nkaba ntari kwenda kurusya benetata. Nkatecereza ngu ‘Yehova ni we oshemerire kumpa obuyambi obu ndi kwetenga.’ Konka bwanyima nkija kureba ku kwetarura abandi cabire kiri kwereka ku ndi kwenda kwegura ebizibu byange nyenka.” (Emi 18:1) Dasuri akasharamu kuhandikira bamwe omuri banywani beye ari kubashobororera embera ezi arimu. Akagamba ati: “Tindi kubasa kushoborora oku Abakristo bagenzi bange bangarwiremu amani. Bakaturetera ebyokurya ah’irwariro kandi batuhumuriza bakoresize enyiriri z’omuri Bibuli. Mazima nikitushemeza munonga kumanya ku tutari twenka. Turi omu muryango muhango gwa Yehova ogurimu abantu abetegwire kutukwata omukono, kurira n’itwe, n’okutukwasa omu bibuzo ebi turi kubugana.”

14. Ahabw’enki tushemerire kwikiriza obuyambi bw’abazehe?

¹⁴ Yehova nakoresa abazehe omu kutuha amani geye. Ni ebiconco ebi ari kukoresa omu kutugumya n’okutuhumuriza. (Isa 32:1, 2) Obwe rero wahurira oyemerize omutima, ogume obigambire abazehe. Bakuha obuyambi, ogume obwakire. Yehova nabakoresa ari kukugumya.

15. Ni gaha masiko agu Abakristo bona bari kwesimira?

¹⁵ Amasiko gitu agegamire aha Bibuli nigatuha amani. (Rom 4:3, 18-20) Itwe Abakristo twine amasiko g’omuhendo g’okubaho ebiro byona, yakuba twine amasiko g’okutura omu nsi eriba yahindukire paradiso ninga shi omu Bukama bw’omu iguru. Amasiko gitu nigatuha amani g’okwehanganira ebigezo,  n’okukora emirimo etari emwe n’emwe omu kibina. (1 Tes 1:3) Ago masiko ni go agahire entumwa Pawulo amani.

16. Ahabw’enki entumwa Pawulo yabire ari kwetenga amani?

¹⁶ Pawulo akaba ari kwetenga amani. Omu baruha eyi yahandikire Abakorinto, akegeranisa n’orwabya orutagumire. Akaba ‘akubirwe embaju zona,’ ‘ashobirwe,’ ‘ari kuhiganisibwa,’ kandi ‘atirwe ahaasi.’ Amagara geye gakaba gari omu kabi. (2 Kor 4:8-10) Pawulo akahandika ebyo bigambo omu bwire bw’orugendo rweye rwa kashatu rw’obumishonari. Bwanyima y’okuhandika ebyo bigambo, akabugana ebizibu byingi ebiri kukiraho. Akakorerwa ebikorwa by’obugomi, yasibwa kandi n’obwato bwamwatikiraho.

17. Tukuratize ebiri omu 2 Bakorinto 4:16-18, ni enki ecahire Pawulo amani g’okwehanganira ebigezo?

¹⁷ Pawulo akatunga amani g’okwehangana ari kuta omutima aha masiko geye. (Shoma omu 2 Bakorinto 4:16-18.) Akagambira Abakorinto ku n’obu omubiri gweye ‘gwakufa,’ yabire atarije kuhwa amani. Pawulo akaguma atire omutima aha biro byeye eby’omu misho. Akaba nareba amasiko geye g’okwija kuba omu iguru nk’‘ekitinisa kingi munonga ekitahwaho,’ kituma yayehanganira ebizibu byona ebi yabire narabamu. Pawulo akaguma natecereza aha masiko geye, catuma yahurira ‘yahindurwa musya obwire bwona.’

18. Ni bata oku amasiko gari kugumya Tihomir n’ab’eka yeye?

¹⁸ Mwenetata w’omuri Buligariya ori kwetwa Tihomir, na we amasiko geye nigamuha amani. Hahwa emyaka mice murumuna weye ori kwetwa Zdravko afire aha bwa butandu. Bwanyima y’obwo bwire, Tihomir akaba nahurira ayine obusaasi bwingi. Kugira ngu we n’eka yeye behangane nibatecereza oku okuzoka kurije kuba kuri. Akashoborora ati: “Nituganirira hamwe ahu turije kubuganira na Zdravko, ebyokurya ebi turije kumutegurira, abu turije kweta aha mbaga y’okumwakira, n’ebi turije kumugambira aha byabireho omu biro eby’emperu.” Tihomir  akagamba ku kuta omutima aha masiko gabo kiri kubagumya we n’eka yeye bakehangana kandi bakaguma bategerize n’ekihika obwire obu Yehova arije kuzoreraho murumuna weye.

19. Ni enki eki ori kubasa kukora kugira ngu ogumye amasiko gawe? (Nambwenu reba ekishushani.)

¹⁹ Ni bata oku ori kubasa kugumya amasiko gawe? Ecokureberaho: Yaba oyine amasiko g’okutura omu nsi, guma oshome eki Bibuli eri kugamba ahari paradiso kandi obitecerezeho. (Isa 25:8; 32:16-18) Guma otecereze oku amagara garije kuba gari omu nsi ensya. Guma oyerebe ori omu nsi ensya. Ni oha owu ori kureba? Ni gaha maraka agu ori kuhurira? Ni bata oku ori kwehurira? Kugira ngu okizeho kutecereza oku ensi ensya erije kuba eri, guma orebe ebishushani ebiri omu bitabo byitu ebiri kwereka paradiso ninga shi orebe za vidiyo z’omuziki, nk’eri kugira ngu Ensi ensya eri kwija, Ensi ensya eri hihi, n’ekiri kugira ngu Tekateka aha bwire. Ku turagume kutecereza aha masiko gitu g’ebiro eby’omu misho, ebizibu byitu nibyija kuba ‘eby’obwire buce.’ (2 Kor 4:17) Birabire aha masiko agu Yehova ari kutuha, nitwija kugira amani.

20. Ni bata oku turi kubasa kutunga amani n’obu twakuhurira tucwekire entege?

²⁰ N’omu bwire obu turi kuhurira tucwekire entege, ‘ahabw’amani ga Ruhanga turyarwana mashija.’ (Zab 108:13) Yehova akatuha byona ebi turi kwetenga kugira ngu tutunge amani. Obwe rero waba ori kwetenga amani g’okuhikiriza omurimo omu kibina, kwehanganira ekigezo, ninga kuguma oshemerirwe, ogume ohike hihi ya Yehova birabire omu kushaba kandi omurondereho obuhabuzi birabire omu kweyegesa Bibuli. Guma oyikirize obuyambi bwa benetata na banyanyazi. Guma okwate akire otecereze aha masiko gawe g’ebiro eby’omu misho. Ebyo bibyija kutuma ‘wagumibwa n’obushoborozi bwona, nk’amani g’ekitinisa ca [Ruhanga] oku gari, obone kwehangana omuri byona n’okutaruha, oyine okushemererwa.’—Kol 1:11.