EKICWEKA C’OKWEGA 5
‘Omutwe g’omushija ni Kristo’
‘Omutwe g’omushija ni Kristo.’—1 KOR 11:3.
ECESHONGORO CA 12 Yehova Ruhanga, Orikukirayo
EMPINYE *
1. Ni biha bintu ebiri kubasa kutegeka oburyo obu omushija ari kutwarizamu omukazi weye n’abana beye?
IWE notekateka ngu ekigambo “obwebembezi” nikimanyisa ki? Abashija abamwe nibikiriza omucwe gw’ahu batwire kutegeka oku baratwarize abakazi babo n’abana babo. Reba eki omunyanyazi w’omuri Buraya, ori kwetwa Yanita yagambire, nagira ati: “Ahu ntwire abakazi nibarebwa nk’ab’ahaasi munonga kandi nk’abakozi b’omu ka.” Kandi mwenetata ori kwetwa Luke otwire omuri Amerika akagamba ati: “Abashija abamwe nibegesa abana babo ku abakazi batashemerire kuhurirwa, kandi ku ebi bari kugamba bitine mugasho.” Konka Yehova tari kwenda ngu abashija batwarize abakazi basyoya. (Geranisa n’ebiri omuri Mako 7:13.) Mbwenu shi ni bata oku omushija ari kubasa kwega kuba omwebembezi w’eka murungi?
2. Ni enki eki omwebembezi w’eka ashemerire kumanya kandi ahabw’enki?
2 Kugira ngu omushija abe omwebembezi w’eka murungi, ashemerire kubanza yamanya eki Yehova ari kumushaba. Nambwenu ashemerire kumanya enshonga ahabw’enki Yehova yatireho obwebembezi, kandi na munonga amanye oku ari kubasa kutoreza ecokureberaho eki Yehova na Yesu babaterireho. Ahabw’enki omushija ashemerire kumanya ebyo bintu? Ni ahabw’okuba Yehova akaha abebembezi b’eka obushoborozi kandi nayenda ngu babukorese ge.—Luk 12:48b.
OBWEBEMBEZI NI ENKI?
3. Ebigambo ebiri omu 1 Bakorinso 11:3 nibitwegesa ki aha bwebembezi?
3 Shoma omu 1 Bakorinso 11:3. Oru runyiriri nirwereka oburyo obu Yehova yatebekanisizemu eka yeye y’omu iguru n’ey’omu nsi. Obwebembezi nibutwariramu ebintu bibiri, ni okugamba, obushoborozi n’obujunanizibwa. Yehova ni we mutwe ninga shi Owobushoborozi bwona kandi abana beye harimu ba marayika n’abantu, bona abineho obujunanizibwa. (Rom 14:10; Efe 3:14, 15) Yehova akaha Yesu obushoborozi bw’okwebembera ekibina, konka oku Yesu ari kututwariza Yehova nabimubuza. (1 Kor 15:27) Nambwenu Yehova akaha omushija obushoborozi bw’okwebembera omukazi n’abana beye, konka oku omushija ari kubatwariza Yehova na Yesu nibabimubuza.—1 Pet 3:7.
4. Ni buha bushoborozi obu Yehova na Yesu bine?
4 Ahabw’okuba Yehova ari omwebembezi w’eka yeye ey’omu iguru n’ey’omu nsi, ayine obushoborozi bw’okuteraho abana beye ebiragiro aha ku bashemerire kutwaza, kandi areba ngu babyorobera. (Isa 33:22) Nambwenu ahabw’okuba Yesu ari omwebembezi w’ekibina, ayine obushoborozi bw’okutaho ebiragiro kandi areba ngu twabyorobera.—Gal 6:2; Kol 1:18-20.
5. Ni buha bushoborozi obu omwebembezi w’eka ayine, kandi shi ni biha bintu ebi atari kubasa kukora?
5 Nka Yehova na Yesu, omushija ayine obushoborozi bw’okuteraho eka yeye ebiragiro. (Rom 7:2; Efe 6:4) Konka obushoborozi bweye bwine obugarukiro. Ecokureberaho: Ebiragiro byeye bishemerire kuba byegamire aha Kigambo ca Ruhanga. (Enf 3:5, 6) Kandi omwebembezi w’eka tayine obushoborozi bw’okuteraho ebiragiro abatari ab’omu ka yeye.(Rom 14:4) Nambwenu batabani beye na bahara beye ku bari kukura bakaruga omu ka, nibagumizamu kumuha ekitinisa konka naba atacari omwebembezi wabo.—Mat 19:5.
AHABW’ENKI YEHOVA YATIREHO OBWEBEMBEZI?
6. Ahabw’enki Yehova yatireho obwebembezi?
6 Yehova akataho obwebembezi ahabw’okuba nakunda eka yeye. Ni ekiconco eki yatuhire. Obwebembezi nibutuma eka ya Yehova yabamu obusinge n’obutebekana. (1 Kor 14:33, 40) Eka ya Yehova ebire etine omwebembezi, tekaba erimu obusinge n’okushemererwa. Ecokureberaho: Titukaamanyire oshemerire kukora ensharamu y’aha muheru n’oshemerire kukuratira akamanya ku byatebwa omu nkora.
7. Tukuratize ebiri omu Baefeso 5:25, 28, ni bata oku Yehova ari kwenda ngu abashija batwarize abakazi babo?
7 Mbwenu shi yaba obwebembezi obu Ruhanga yatireho buri burungi, ahabw’enki abashija abingi bari kutwariza kubi abakazi babo? Ni ahabw’okuba abashija bingi nibehuza emisinge ya Yehova y’eby’amaka basharamu kutegekwa n’omucwe gw’ahu batwire. Nambwenu nibatwariza kubi abakazi babo kugira ngu behurire ku bari abashija. Ecokureberaho: Omushija nabasa kutwariza kubi omukazi weye kugira ngu ayehiise ekitinisa ninga shi ngu ayereke abandi ku ari “omushija nyamushija.” Nabasa kutekateka ngu tari kubasa kugema omukazi weye kumukunda, konka amugema kumutina. Kandi nabasa kukoresa obwo bwoba kugira ngu amutegeke eki ari kwenda cona. * Eyo mitekatecere n’ebyo bikorwa nibituma abakazi bataha abashija babo ekitinisa, kandi Yehova tari kubyenda.—Shoma omu Baefeso 5:25, 28.
NI BATA OKU OMUSHIJA ARI KUBASA KWEGA KUBA OMWEBEMBEZI W’EKA MURUNGI?
8. Ni bata omushija ari kubasa kwega kuba omwebembezi w’eka murungi?
8 Omushija nabasa kwega oku ari kubasa kuba omwebembezi w’eka murungi yatoreza oburyo obu Yehova na Yesu bari kwebemberamu. Reba emitwarize ibiri eyi Yehova na Yesu bari kwereka kandi oyetegereze oku omwebembezi w’eka ari kubasa kwereka eyo mitwarize omu buryo obu ari kutwarizamu omukazi weye n’abana beye.
9. Ni bata oku Yehova ari kwereka obucurezi?
9 Obucurezi. Yehova ni omunyabwenge kukira abantu bona; konka nahurikiza ebitekateko by’abahereza beye. (Kut 18:23, 24, 32) Akikiririza abu ari kukiza obushoborozi kugamba oku bari kutekateka. (1 Bag 22:19-22) Yehova ni omuntu ohikirire, konka tari kutushaba kukora ebi tutari kubasa. Ahobwe nakwasa abantu abatahikirire abari kumuhereza kugira eki bahikaho. (Zab 113:6, 7) Bibuli negamba ku Yehova ari omuyambi. (Zab 27:9; Heb 13:6) Omugabe Dawudi akaba namanya ku yabire ari kubasa kuhikiriza omurimo gw’amani ogu yabire ahibwe ahabw’obucurezi bwa Yehova.—2 Sam 22:36.
10. Ni bata oku Yesu yabire nayoreka obucurezi?
10 Reba ecokureberaho ca Yesu. N’obu yabire ari Mukama kandi ari omwegesa w’abegi beye, akaboza ebigere. Ni eha nshonga eyatumire Yehova yayikiriza ngu eyo nkuru ehandikwe omuri Bibuli? Hatariho okubanganisa akaba ari kwenda ngu ahereze buri omwe, harimu n’abebembezi b’eka, ecokureberaho c’okutoreza. Yesu wenyine akagamba ati: ‘Ahakuba nabaha ecokureberaho, ngu n’imwe mukore nk’oku nabakorera.’ (Yoh 13:12-17) N’obu Yesu yabire ayine obushoborozi akaba atari kwenda ngu bamuhereze. Ahobwe akaba nahereza abandi.—Mat 20:28.
Omwebembezi w’eka nabasa kwereka ku ari omucurezi kandi ku nakunda ab’omu ka yeye, ari kukora emirimo y’omu ka, kandi ari kufa aha b’omu ka yeye omu by’omwika (Reba paragurafu ya 11, 13)
11. Ni enki eki omwebembezi w’eka ari kubasa kwegera aha bucurezi bwa Yehova na Yesu?
11 Eki biri kutwegesa. Omwebembezi w’eka nabasa kwereka obucurezi omu buryo bwingi. Ecokureberaho: Tari kushaba omukazi weye n’abana beye ngu bakore ebi batari kubasa. Nahurikiza ebitekateko by’ab’eka yeye n’obu bakuba batari kwikiriza ebyeye. Marley, otwire omuri Amerika akagamba ati: “Nyowe n’omushija wange hine obu turi kuba tutari kwikirizana aha bintu bimwe. Konka nimpurira ndi ow’omugasho ahari we kandi nampa ekitinisa, ahakuba nabanza yanshaba ekitekateko cange rero akishwijuma ayetonzire atakakozire ensharamu.” Nambwenu omushija w’omucurezi naba ayetegwire kukora emirimo y’omu ka, n’obu omu kacweka k’owabo bakuba bari kugireba nk’ey’abakazi. Konka eco nicetenga obumanzi! Ahabw’enki? Omunyanyazi ori kwetwa Rachel akagamba ati: “Omushija yakwasa omukazi weye koza amasuwani ninga shi kuboneza omu ka, abatahi n’abanyabuzare nibebuza yaba ari ‘omushija nyamushija.’ Nibatekateka ngu omukazi namutegeka.” Caba kiri kisyoya omu kacweka aku otwiremu, yijuka ku Yesu yayogize ebigere by’entumwa zeye, n’obu abantu babire nibagureba nk’omurimo gw’abagaragwa. Omwebembezi w’eka murungi, tari kwerondera ebirungi, ahobwe nabirondera omukazi weye n’abana beye. Oyihireho omutwarize g’obucurezi, ni guha mutwarize ogundi ogu omwebembezi w’eka murungi ashemerire kugira?
12. Rukundo eyi Yehova na Yesu bari kutukunda netuma bakora ki?
12 Rukundo. Byona ebi Yehova ari kukora nabikora aha bwa rukundo. (1 Yoh 4:7, 8) Rukundo yeye netuma yatufaho omu by’omwika akoresize ekigambo ceye Bibuli n’ekitongore ceye. Natufaho omu nyehurira ari kutuhamiza ku natukunda munonga. Kandi shi ebi turi kwetenga by’omubiri? Yehova ‘natuha byona atari kubaririra, ngu tubishemerererwe.’ (1 Tim 6:17) Twakora enshobi natuhabura, konka agumizamu kutukunda. Ahabw’okuba Yehova ari kutukunda akatuha ekitambo. Kandi Yesu na we ahabw’okutukunda munonga, akahayo amagara geye aha bwitu. (Yoh 3:16; 15:13) Tihariho ekintu na kimwe ekiri kubasa kuremesa Yehova na Yesu kukunda abari kubesiga.—Yoh 13:1; Rom 8:35, 38, 39.
13. Ahabw’enki kiri ec’omugasho omwebembezi w’eka kukunda ab’omu ka yeye? (Nambwenu reba akashanduku akari kugira ngu: “ Omushija otahize juba nabasa kukora ki ngu omukazi weye amuhe ekitinisa?”)
13 Eki biri kutwegesa. Byona ebi omwebembezi w’eka ari kukora ashemerire kubikora aha bwa rukundo. Ahabw’enki kiri ec’omugasho? Entumwa Yohaana nakigarukamu ati: ‘Otakunda mugenzi weye ninga shi ab’eka yeye tabasa kukunda Ruhanga owu atakarebaga.’(1 Yoh 4:11, 20) Obwe rero, omushija ori kukunda ab’omu ka yeye kandi ari kwenda kutoreza Yehova na Yesu nabaha ebi bari kwetenga eby’omwika, eby’omu nyehurira n’eby’omubiri. (1 Tim 5:8) Namanyiza abana beye kandi abahana. Nambwenu nagumizamu kwega kukora ensharamu eziri kuhisa Yehova ekitinisa kandi zikatuma ab’omu ka yeye babaho bashemerirwe. Reka tushwijume buri kimwe omuri ebyo bintu, kandi turebe oku omwebembezi w’eka ari kubasa kutoreza Yehova na Yesu.
EKI OMWEBEMBEZI W’EKA ASHEMERIRE KUKORA
14. Ni bata oku omwebembezi w’eka ari kufa aha ka yeye omu by’omwika?
14 Okwegesa ab’omu ka yeye eby’omwika. Yesu akoreka ku natoreza ishe, ahakuba akaba nayenda kukwasa abakurasi beye kugumizamu kugira okwikiriza kugumire. (Mat 5:3, 6; Mak 6:34) Ni co kimwe, omwebembezi w’eka ashemerire kufa aha bi ab’omu ka yeye bari kwetenga omu by’omwika. (Bir 6:6-9) Eco nakikora ari kuhamya ngu we n’ab’omu ka yeye bashoma kandi bayega Ekigambo ca Ruhanga, baza omu nterane, baza omu murimo g’okuburira, kandi bagumya obunywani bwabo na Yehova.
15. Ni buha buryo bumwe obu omwebembezi w’eka ari kubasa kwerekamu ku nafa aha nyehurira z’ab’omu ka yeye?
15 Okufa aha nyehurira z’ab’omu ka yeye. Yehova akereka ku nakunda Yesu omu misho g’abandi bantu. (Mat 3:17) Yesu akaba nakunda kwereka ku nakunda abakurasi beye omu bigambo n’omu bikorwa. Kandi na bo bakaba nibamwereka ku nibamukunda. (Yoh 15:9, 12, 13; 21:16) Omwebembezi w’eka nabasa kwereka omukazi weye n’abana beye ku ari kubakunda omu bikorwa, ari kwega na bo Bibuli. Nambwenu ashemerire kubagambira ku nabakunda kandi ku ni ab’omuhendo ahari we kandi caba kiri kwetengesa abasime hariho n’abandi bantu.—Enf 31:28, 29.
Kugira ngu omwebembezi w’eka ashemeze Yehova, ashemerire kuha ab’omu ka yeye eby’omubiri ebi bari kwetenga (Reba paragurafu ya 16)
16. Ni enki ekindi eki omwebembezi w’eka ashemerire kukora, kandi ni enki eki ashemerire kwerinda?
16 Okuha ab’omu ka yeye eby’omubiri. Yehova akaba naha Abisirayeli ebi babire bari kwetenga eby’omubiri, n’obu yabire nabahana ahabw’okumugomera. (Bir 2:7; 29:5) Nambwenu natuhereza ebi turi kwetenga eby’omubiri omuri obu bwire. (Mat 6:31-33; 7:11) Yesu na we akaba narisa ababire nibamukuratira. (Mat 14:17-20) Nambwenu akaba natambira abarwire. (Mat 4:24) Kugira ngu omwebembezi w’eka ashemeze Yehova ashemerire kuha ab’omu ka yeye ebi bari kwetenga eby’omubiri. Konka ashemerire kuringaniza. Tashemerire kumara obwire bwingi ari omu mirimo y’okubisaho eka yeye, ngu kitume yayebwa kubareberera omu by’omwika n’omuby’enyehurira.
17. Ni bata oku Yehova na Yesu bari kutumanyiza kandi bakatuhana?
17 Okubamanyiza. Yehova natumanyiza kandi atuhana ahabw’okutwendeza ebirungi. (Heb 12:7-9) Yesu natoreza Ishe ari kumanyiza abu ari kwebembera omu muringo gwa rukundo. (Yoh 15:14, 15) Obuhabuzi bweye ni obw’amani, konka nambwenu ayereka embabazi. (Mat 20:24-28) Namanya ge ku tutahikirire kandi ku nitukora enshobi burijo.—Mat 26:41.
18. Ni enki eki omwebembezi w’eka murungi ari kuba namanya?
18 Omwebembezi w’eka ori kutoreza Yehova na Yesu, tari kwisa omwaga omukazi weye ninga shi abana beye. (Kol 3:19) Ahobwe nakuratiza omusinge oguri omu Bagalatia 6:1, abahabura n’‘omutima g’obucurezi’ ari kwijuka ku na we atahikirire. Nka Yesu, namanya ku oburyo burungi bw’okwegesa ari okubaha ecokureberaho.—1 Pet 2:21.
19-20. Ni bata oku omwebembezi w’eka ari kubasa kutoreza Yehova na Yesu yaza kukora ensharamu?
19 Okukora ensharamu ezitarimu okwekunda. Yehova nakora ensharamu eziri kugasira abandi. Ecokureberaho: Akahanga amagara kugira ngu tugashemerererwe kandi ti habw’amagoba geye. Tihine owamugemire kuhayo omwana weye ahabw’ebicumuro byitu. Akakikora ayekundire kugira ngu kibe ni itwe abu cagasira. (Rom 15:3) Yesu na we akakora ensharamu ezabire nizigasira abandi. Ecokureberaho: Obu yabire aruhire, akehuza kuruhuka kugira ngu ayegese omutwe muhango gw’abantu.—Mak 6:31-34.
20 Omwebembezi w’eka murungi namanya ku kukorera eka yeye ensharamu ndungi kigumire, kandi ku kiri ec’omugasho munonga. Nagezaho kwerinda kukora ensharamu agendire aha ku ari kureba ebintu. Omu mwanya gw’eco nayikiriza ngu Yehova amwegese kukora ensharamu ndungi. * (Enf 2:6, 7) Eco nikituma atatekateka aha bimwinire omugasho kusha, ahobwe natekateka aha byinire omugasho abandi.—Fil 2:4.
21. Ni enki eki turije kushwijuma omu kicweka ekiri kukurataho?
21 Yehova akaha abebembezi b’eka omurimo gugumire, kandi nayija kubabuza oku bagukozire. Konka omushija ku ari kugezaho kutoreza ecokureberaho ca Yehova na Yesu naba omwebembezi w’eka murungi. Kandi omukazi ku arakore ebi ari kushabwa omu ka, nebamu okushemererwa. Ni bata oku omukazi ashemerire kureba omwebembezi weye, kandi ni biha bizibu ebi ari kubugana? Ekicweka ekiri kukuraho kiryagarukamu ebyo bibuzo.
ECESHONGORO CA 16 Himbisa Ya Ahakuba Atooraine Omwana We
^ par. 5 Omushija ku ari kutasya naba omwebembezi w’eka. Omuri eki kicweka, twaza kushwijuma eki obwebembezi kiri kumanyisa, ahabw’enki Yehova yabutireho, n’eki abashija n’abakazi bari kubasa kwegera aha cokureberaho eki Yehova na Yesu babaterireho. Omu kicweka ca kabiri omuri ebi bicweka ebikuratine, nitwija kushwijuma eki turi kwegera aha cokureberaho ca Yehova na Yesu n’aha bindi byokureberaho by’omuri Bibuli. Kandi omu kicweka ca kashatu nitwija kwega aha bwebembezi bw’omu kibina.
^ par. 7 Emitekatecere y’oku omushija ari kwikirizibwa kutwariza kubi omukazi weye, harimu n’okumutwariza kubi aha mubiri, nibikunda n’okurebeka omuri za filimu, omu mizano n’omu bitabo. Nambwenu omucwe gw’ahu tutwire, na go nigubasa kutuma abantu batekateka ku kitagwire omushija kutwariza kubi omukazi weye.
^ par. 20 Waba ori kwenda kumanya byingi aha kukora ensharamu ndungi, reba ekicweka ekine omutwe oguri kugira ngu, “Kora ensharamu eziri kuhisa Ruhanga ekitinisa,” omu Munara g’Omurinzi gw’aha kiro ca 15 Okwakana, 2011, p. 13-17.
