EKICWEKA C’OKWEGA 25
‘Nyowe nyenka, naza kwesherurira entama zange’
‘Nyowe nyenka, naza kwesherurira entama zange, nziburirize.’—EZEK 34:11.
ECESHONGORO CA 105 ‘Ruhanga ni Rukundo’
EMPINYE *
1. Ni bata oku Yehova ari nk’omukazi ori konsa omwana weye?
MBEHI ‘omukazi nabasa kwebwa omwana weye owu ari konsa?’ Eco ni ekibuzo eki Yehova yaburize omu bwire bw’omuhanuzi Isaaya. Ruhanga akagambira abahereza beye ngu: ‘Nangwa [abakazi] bakabasa kwebwa, konka nyowe tindi kwebwa.’ (Isa 49:15) Yehova takayingana n’omukazi. Konka hanuya ho akegeranisa n’omukazi. Yehova akageranisa enyehurira ezi ari kuba ayinire abahereza beye na rukundo eyi omuzire ari kukunda omwana weye; ahabw’okuba nayenda ngu bamanye ku ari kubakunda munonga. Abakazi bingi nibehurira nk’oku munyanyazi ori kwetwa Jasmin ari kwehurira nagira ngu: “Waba ori konsa omwana wawe nimuba muri hamwe ebiro byona.”
2. Ni bata oku Yehova ari kwehurira yareba omwe omu bahereza beye yaruga omu mazima?
2 Yehova namanya n’omuhereza weye ori kureka kuburira n’okuza omu nterane. Tekateka oku kiri kumushasha kureba abana beye bingi abari kuruga omu mazima * buri mwaka.
3. Ni enki eki Yehova ari kwenda?
3 Abo benetata na banyanyazi abari kuba bafukirire ku bari kugaruka omu kibina, nitushemererwa munonga! Yehova nayenda ngu bagaruke kandi n’itwe ni ko okwe. (1 Pet 2:25) Nitubasa kubayamba bata? Kugira ngu tugarukemu eco kibuzo, tushemerire kubanza twamanya ge enshonga ahabw’enki barekire kwija omu nterane n’okwekwatanisa omu murimo g’okuburira.
AHABW’ENKI ABAMWE BARI KUREKA KUHEREZA YEHOVA?
4. Ni bata oku omurimo gw’ensi guri kubasa kutuma twafukirira omu by’omwika?
4 Abamwe nibata emirimo eyi bari kukora omu mwanya g’okubanza. Mwenetata ori kwetwa Hung, * w’omuri Asia akagira ngu: “Obwire bwange n’amani gange gona nkaba nimbimarira omu murimo gw’ensi. “Nkatekateka omu muringo g’obushema nti kuri mbire nyine esente nyingi, ni bwo nakubasa kuhereza Yehova omu bwijwire. Obwe rero nkaba ninkora amashaha mingi. Nkatandika kuguma ninyosha enterane kuhisa obu nayemerize kwekwatanisa n’ekibina. Sitaane nakoresa ensi kugira ngu ajagaraze abantu rero kituma bayehagura ahari Yehova mpolampola.”
5. Ni bata oku munyanyazi omwe yatwarize obu yabugine ebizibu byingi?
5 Abandi benetata na banyanyazi nibaba bine ebizibu ebiri kutuma bahwa amani. Anne ow’omuri Bungereza oyine abana batanu akagamba ngu: “Omwe omu bana bange akazarwa ayine obumuga kandi ku hahwire obwire omuhara wange akabingwa kandi na mutabani wange akarwara endwara y’omu bwonko. Nkahurira najabirira munonga, rero nayemereza kuza omu nterane n’omu murimo g’okuburira. Nkahika ndi kufukirira omu by’omwika.” Buzima embera ezahikire ahari Anne n’eka yeye n’abandi abine ebizibu nk’ebyo nizishasha!
6. Ni bata oku kwehuzya ebiri kugambwa omu Bakolosai 3:13 biri kubasa kutuma omuhereza wa Yehova yayehagura ah’abandi?
6 Shoma omu Bakolosai 3:13. Abandi bo nibehurira kubi ahahw’okutwarizibwa kubi na benetata na banyanyazi. Entumwa Paulo akagamba ku hine obu turi kubasa kugira eki twafa na mwenetata ninga munyanyazi. Hine n’obu turi kubasa kutwaza omu muringo ogutari go. Twaba tutegendeserize, nikibasa kutuma twakora ekintu kibi. Omuntu yanyiga nikibasa kutuma mpolampola yaruga omu mazima. Tekateka aha cokureberaho ca mwenetata ori kwetwa Pablo w’omuri Amerika y’amashuma. Abantu bakamubeherera banamushinja ku akozire ebintu bibi, byatuma yaferwa omurimo gweye omu kibina. Akatwaza ata? Akagamba ngu: “Kikangwisa kubi, rero nasharamu kureka kwekwatanisa n’ekibina.”
7. Ni enki ekiri kubasa kuhika aha muntu oyine omuntuwomunda ori kumutera?
7 Omuntu owakozire ekibi c’amani, omuntuwomunda namutera ahurira atine mugasho omu misho ga Yehova. N’obu yakuba ayetisize, nabasa kuhurira atahikire kuba omuhereza wa Yehova. Mwenetata ori kweta Francisco ezo mbera zikamuhikaho. Akagamba ngu: “Nkahaburwa ahabw’ekibi c’obushambani eki nabire nkozire. Omu kutandika nkagumizamu ndi kuza omu nterane, konka nkaba nimpurira ntaturize kandi ntine mugasho omu misho ga Yehova. Omuntuwomunda wange akaba nantera, mpurira Yehova ataransasire. Ku hahwireho obwire buce, nkemereza kwekwatanisa n’ekibina. Mbehi noreba ota abantu abari omu mbera ezi twagambaho aha ruguru? Mbehi nohurira wabasasibwa? Konka shi Yehova we ku ari kubareba nayehurira ata?
YEHOVA NAKUNDA ABAHEREZA BEYE
Omurisa w’Omuisraeli akaba nafa munonga aha ntama eyabuzire (Reba paragarafu ya 8-9) *
8. Mbehi Yehova nabasa kwebwa omuhereza weye owamuherizeho? Shoborora.
8 Omuhereza wa Yehova owamuherizeho n’obu yakufukirira akareka kwekwatanisa n’abandi, Yehova takamwebwa; kandi tari kubasa kwebwa omurimo ogu yamukorire. (Heb 6:10) Omuhanuzi Isaaya akatuha ecokureberaho ekiri kutukwasa kumanya oku Yehova ari kufa aha bahereza beye. Akagira ngu: ‘Aryarisa obusyo bwe nk’omurisa, aryakikira abana b’entama ze omu mikono, abatwarire omu kifuba ceye.’ (Isa 40:11) Ni bata oku Yehova ari kwehurira omuhereza weye omwe yareka kumuhereza? Yesu akereka enyehurira za Yehova obu yaburize abegi beye ngu: ‘Nimutekateka muta? Omuntu ku aba ayine entama igana, emwe ahari zo yabura, tasiga ziri makumi mwenda na mwenda, akaza kusherura eyo ebuzire? Kandi ku ayibona, buzimazima nimbagambira nti: Ayishemerererwa okukira ziri makumi mwenda na mwenda ezaba zitabuzire.’—Mat 18:12, 13.
9. Ni bata oku abarisa barungi b’omu bwire bwa Bibuli babire bari kutwariza entama zabo? (Reba ekishushani c’aha kishemeso.)
9 Ahabw’enki turi kubasa kugeranisa Yehova n’omurisa? Ni ahabw’okuba omu bwire bwa Bibuli omurisa akaba nafa aha ntama zeye. Ecokureberaho: Daudi, akarwana n’entare n’edubu kugira ngu arinde obusyo bweye. (1 Sam 17:34, 35) Obwe rero omurisa murungi nafayo yabura entama yeye emwe. (Yoh 10:3, 14) Ogo murisa nasigira abarisa bagenzi beye entama 99 ezisigire rero aza kwerondera yayindi emwe ebuzire. Yesu akakoresa eco cokureberaho ari kwenda kutwegesa ishomo ry’omugasho munonga ari kugira ngu: ‘Ni ko na Tata ori omu iguru atari kwenda omwe ahari aba bato kuhwerecerera.’—Mat 18:14.
Omurisa ow’omuri Israeli ari kufa aha ntama eyabuzire (Reba paragurafu ya 9)
YEHOVA NARONDA ENTAMA YEYE EBUZIRE
10. Tukuratize ebiri kugambwa omuri Ezekieli 34:11-16, ni enki eki Yehova ari kukorera entama yeye eyabuzire?
10 Yehova natukunda twena, otwariremu n’abo abafukirire abarugire omu busyo bweye. Birabire aha muhanuzi Ezekieli, Ruhanga akaraganisa ku ariza kuronda entama yeye ebuzire kandi akayikwasa kugaruka kugira obunywani na we. Kandi akagamba oku ariyireta, nk’oku omu bwire bw’Abaisraeli omurisa yabire ari kukikora. (Shoma omuri Ezekieli 34:11-16.) Ecokubanza, omurisa akaba nakoresa obwire bweye n’amani geye ari kuronda entama yeye. Ku yabire ari kuyibona akaba nayigarura omu busyo. Kandi ku eyo ntama yabire eri kuba ehutire ogo murisa akaba nayifaho omuri rukundo, ari kuyirinda enyamishwa, ayitambira kandi ayiha eby’okurya. Abazehe, ari bo barisa b’“obusyo bwa Ruhanga,” bashemerire kutwaza basyoya bari kuyamba ogwe owarekire kwekwatanisa n’ekibina. (1 Pet 5:2, 3) Abazehe nibamuronda, bamukwasa kugaruka omu kibina, kandi bamwereka rukundo bari kumukwasa kugaruka kugira obunywani na Yehova. *
11. Ni enki eki omurisa murungi ashemerire kuba ari kumanya?
11 Omurisa murungi naba ari kumanya ku entama eri kubasa kubura. Obwe rero entama yaruga omu busyo, omurisa tashemerire kuyitwariza kubi. Yetegereze ecokureberaho eki Yehova yatuterireho ari kukwasa bamwe omu bahereze beye ababire barekire kumuhereza.
12. Ni bata oku Yehova yatwarize Yona?
12 Omuhanuzi Yona akagomera Yehova ari kwanga kuza Nineve. Konka Yehova tararekire Yona. Nk’omurisa murungi, Yehova akamukwasa kandi yamuha amani agari kwetenga kugira ngu ahikirize ogo murimo. (Yon 2:7; 3:1, 2) Bwanyima , Ruhanga akakoresa omwongo kugira ngu akwase Yona kucenga ku omuntu ari ow’omugasho omu misho ga Yehova. (Yon 4:10, 11) Eco nikitwegesa ki? Abazehe tibashemerire kuruha kukwasa abafukirire. Ahobwe, bashemerire kumanya ecatumire eyo ntama yaruga omu busyo. Kandi eyo ntama ku eri kugarukira Yehova, bashemerire kugumizamu kuyereka rukundo kandi bari kuyifaho.
13. Ni enki eki turi kwegera aha ku Yehova yatwarize omuhandiki wa Zaaburi ya 73?
13 Omuhandiki wa Zaaburi ya 73 akahwa amani obu yabire ari kureba ababi babireho ge. Akebuza yaba kukorera Ruhanga harimu amagoba. (Zab 73:12, 13, 16) Yehova akatwaza ata? Yehova taramurebire kubi. Ahobwe Ruhanga akikiriza ngu ebigambo byeye bihandikwe omuri Bibuli. Bwanyima omuhandiki wa Zaaburi akareba ku kugira obunywani na Yehova kiri ec’omugasho kukira ekindi kintu cona omu kubaho kwitu. (Zab 73:23, 24, 26, 28) Eco nikitwegesa ki? Abazehe tibashemerire kurahuka kucwera orubanja omuntu owatandika kwebuza aha migisha y’okuhereza Yehova. Omu mwanya g’okubatwariza kubi, bashemerire kugezaho kumanya enshonga bagamba basyo ninga shi bakatwaza omuri ogo muringo. Nibakoresa Bibuli bari kukwasa ogo mwenetata ninga munyanyazi.
14. Ahabw’enki Elia yabire ari kwetenga obuyambi, kandi shi Yehova akabumuha ata?
14 Omuhanuzi Elia akahunga Omugabekazi Yezebeeli. (1 Bag 19:1-3) Akaba natekateka ku hatariho ondijo muntu ori kuhereza Yehova, kandi akaba ari kwehurira nk’ahu omurimo ogu ari kukorera Yehova gutine mugasho. Eco kikamara Elia amani yayetenga kufa. (1 Bag 19:4, 10) Omu mwanya g’okureba kubi Elia, Yehova akamuhamiza ku atari wenka ku ashemerire kumwesiga kandi ku acayine byingi by’okukora omu murimo gweye. Yehova akahurikiza Elia ayetonzire, yamuha n’ogundi murimo. (1 Bag 19:11-16, 18) Eco nikitwegesa ki? Twena abahereza ba Yehova na munonga abazehe, tushemerire kwereka embabazi entama za Yehova. Entama yaba eri kwehurira ku etine mugasho ninga shi ku Yehova atarayisasire, abazehe nibayihurikiza betonzire yaba eri kubagambira ebiyiri aha mutima byona. Rero bahamiza eyo ntama ku Yehova acayikunda.
OKU TURI KUBASA KUTWARIZA ENTAMA YA RUHANGA EYABUZIRE
15. Tukuratize ebiri omuri Yohaana 6:39, ni bata oku Yesu ari kureba entama z’Ishe?
15 Yehova nayenda ngu turebe tuta entama yeye eyabuzire? Yesu akatuha ecokureberaho kirungi. Akaba namanya ku entama za Yehova ziri ezomuhendo omu misho ga Ruhanga; obwe rero Yesu akakora cona ekiri kubasika ngu akwase ‘entama z’oruganda rwa Israeli ezabuzire’ kugarukira Yehova. (Mat 15:24; Luk 19:9, 10) Nk’omurisa murungi, Yesu akakora ekiri kubasika cona kugira ngu arinde entama za Yehova hatagira eyabura.—Shoma omuri Yohaana 6:39.
16-17. Abazehe bashemerire kutwaza bata baba bari kukwasa omuntu ofukirire? (Reba akashanduku akari kugira ngu “ Entama eyabuzire neyehurira eta?”)
16 Entumwa Paulo akahiga abazehe b’omu kibina c’omuri Efeso kutoreza ecokureberaho ca Yesu. Ari kubagambira ngu: Mushemerire ‘kuhwera abatine mani, n’okwijuka ebigambo ebi Mukama witu Yesu yagambire nagira ati: Okugaba kuhisa omugisha okukira okuhebwa.’ (Byak 20:17, 35) Eco cahandikirwe catwereka ku abazehe bine omurimo g’omugasho og’okufa aha bahereza ba Yehova. Omuzehe ori kwetwa Salvador w’omuri Sipeyini akagira ngu: “Ku ndi kutekateka aha ku Yehova ari kufa aha ntama yeye ebuzire, nikituma nakora cona ekiri kubasika ngu mbayambe. Nk’omurisa nketegereza ku Yehova ari kwenda ngu mbafeho.”
17 Abantu abu twashwijuma omuri eki kicweka babire barekire kwekwatanisa n’ekibina bakayambwa rero bagarakira Yehova. Omuri obu bwire, abingi na bo abafukirire nibenda kugaruka omu kibina. Omu kicweka ekirikurataho turyashwijuma eki turi kubasa kukora ngu tubayambe kugarukira Yehova.
ECESHONGORO CA 139 Yereebe omu Nsi Ensya
^ par. 5 Ahabw’enki abahereza ba Yehova abamazire emyaka bari abesigwa bari kubasa kuruga omu kibina? Konka shi Ruhanga yabareba nayehurira ata? Eki kicweka caza kutuha ebyokugarukamu by’ebyo bibuzo. Nambwenu nikija kutwereka oku Yehova yakwasize abamwe b’omu bwire bwa Bibuli ababire bafukirire.
^ par. 2 EKIGAMBO EKISHOBORWIRWE: Omuburizi owafukirire ni omazire amezi mukaga ninga shi erikurenga atari kuhayo ripoti y’omurimo g’okuburira n’okuhindura abantu abegi. Ogo ofukirire naba acari mwenetata ninga shi munyanyazi, obwe rero nituba tucamukunda.
^ par. 4 Amazina gamwe gakahindurwa.
^ par. 10 Ekicweka ekirikurataho turyashwijuma oku abazehe bari kubasa kukuratiza ezo ntambwe.
^ par. 60 EBISHUSHANI: Tekateka aha bikwatirine n’entama ebuzire; omurisa w’Omuisraeli akaba naza kuyironda, kandi ayikwasa kugaruka omu busyo. Abazehe na bo omuri obu bwire niko bari kukikora.
^ par. 64 EBISHUSHANI: Omunyanyazi owafukirire ategerize basi kandi ari kutekateka kureka kwekwatanisa n’ekibina, ari kureba abahamya babiri bari kuburira omu misho ga bona.
