Sara * nagira ati: “Ndi omuntu ori kukunda kutina, kandi tindi kweyesiga. Eco nikituma nayehurira kubi naba ndi n’abantu abari kweyesiga munonga. Konka ninyehurira ge naba ndi hamwe n’omuntu ori kutwaza ge kandi omucurezi. Ogo muntu nimbasa kumugambira oku ndi kwehurira, n’ebizibu byona ebi nyine. Abanywani bange barungi bine eyo mitwarize.”

Ebi Sara yagambire nibyereka ku obucurezi buri kutuma abantu batunywana. Nambwenu obucurezi nibuhisa Yehova ekitinisa. Ekigambo ca Ruhanga nikituhabura kiri kugira ngu: ‘Mujware omutima gw’obucurezi.’ (Kol 3:12) Obucurezi ni enki? Ni bata oku Yesu yayerekire obucurezi? Ni bata oku ogo mutwarize guri kubasa kutukwasa kubaho tushemerirwe?

Obucurezi ni omutwarize ogu oshemerire kugira waba ori kwenda ngu oture n’abandi omu businge. Omucurezi natwariza ge abandi, abereka embabazi, aguma ayekikine kandi ayerinda yahika omu mbera eziri kutuma yayehurira kubi.

Obucurezi ni ekimanyiso ekiri kwereka amani g’omu bitekateko n’omu mutima. Ekigambo c’Orugrika ekiri kumanyisa ‘obucurezi’ kikakoresibwa kiri kushoborora embarasi y’omu kibira eyaresirwe omu ka. Eyo mbarasi neguma eyine amani, konka ekamanyizibwa kugira ngu amani gayo egakorese ge. Ni co kimwe, twaba turi abacurezi, tituri kwekwasa okutahikirira kwitu ahobwe nitugumizamu kuretaho obusinge aha gati yitu n’abandi.

Nobasa kutekateka ngu: ‘Nkazarwa ntari omucurezi’. Tutwire omu bantu abatari kwehangana, obwe rero nikibasa kutugumira kwereka omutima g’obucurezi. (Rom 7:19) Ni amazima, nitwetenga amani mingi kugira ngu twereke obucurezi, konka omwika oguri kwera gwa Yehova nigwija kutukwasa kuhika ahari eyo ntego. (Gal 5:22, 23) Ahabw’enki tushemerire kutaho amani kugira ngu twereke obucurezi?

Abantu nibakunda omucurezi. Nka Sara owaba agambirweho ah’iguru, nitukunda kuba n’abantu abari kwecureza. Yesu akatuteraho ecokureberaho aha ku tushemerire kuba abacurezi n’okutwariza ge abandi. (2 Kor 10:1) Abana na bo bakaba bari kumanya ku ari kwenda ngu bamuhike hihi.—Mak 10:13-16.

 Obucurezi nibuturinda kandi burinda abatwetorwire. Twaba turi abacurezi, tituri kurahuka kugubwa kubi. (Enf 16:32) Ebyo nibituma tutayecwera orubanja ahabw’okukora kubi abandi harimu n’abanywani bitu. Obucurezi niburinda abandi ahabw’okuba nibutuma twarinda enyehurira zitu kituma tutakora ebiri kubagwisa kubi.

N’obu Yesu yabire ayine byingi by’okukora, akaba ari omucurezi ahari bona. Abantu bingi omu bwire bweye bakaba baruhire kandi bakaba bari kwetenga kuhumurizibwa. Tekateka oku bahurire bahumurizibwa obu Yesu yabagambire ngu: ‘Mwije ahari inye, ahabw’okuba nintwaza ge, kandi ndi omucurezi omu mutima’!—Mat 11:28, 29.

Ni bata oku turi kubasa kutoreza ecokureberaho ca Yesu c’okuba abacurezi? Nitwega Ekigambo ca Ruhanga kugira ngu tumanye oku Yesu yatwarize abandi kandi tumanya n’oku yabire ari kutereza ebizibu bigumire. Twabugana ebizibu ebiri kugeza obucurezi bwitu, nitutamu amani kugira ngu tutwaze nka Yesu. (1 Pet 2:21) Reba ebintu bishatu ebyakwasize Yesu kuba omucurezi.

Yesu akaba ari omucurezi omu mutima. Yesu akagamba ku yabire ari ‘omucurezi kandi ku ari kutwaza ge.’ (Mat 11:29) Bibuli negambira hamwe eyi mitwarize ibiri ahabw’okuba obucurezi bwinine obuzare n’okutwaza ge. (Efe 4:1-3)

Obucurezi nibutuma tutarahuka kugubwa kubi ahabw’ebi abandi batugambaho. Ni bata oku Yesu yatwarize ku bamugambireho ngu ni “omunyamururu kandi omusinzi”? Emitwarize yeye ekereka ku bari kubiha, kandi akereka ku ‘obwenge buri kusimirwa aha mirimo yabwo.’—Mat 11:19.

Omuntu yakugambaho kubi ahabw’ibara ryawe ry’oruhu, oruganda rwawe, n’ahu wakurire, ahabw’enki otari kutaho amani kugira ngu oyereke obucurezi? Omuzehe w’omuri Afurika y’omu mashuma ori kwetwe Peter akagamba ati: “Omuntu yangambira kubi ninyebuza ngu: ‘Mbehi kuri yaba ari Yesu yaba aratwaze ata?’” Akagumizamu ati: “Ninyega kurinda ekiniga cange.”

Yesu akaba namanya obweremwa bw’abantu. Abegi ba Yesu bakaba nibenda kukora ebihikire, konka hine obu obweremwa bwabire buri kubaremesa kubikora. Ecokureberaho: Omu kiro eki Yesu yaferireho, Petero, Yakobo, na Yohaana bakaremwa kuguma nibareba. Yesu akereka ku yabire ari kumanya obweremwa bwabo ari kugira ati: ‘Omutima go nigukunda, konka omubiri niguremwa.’ (Mat 26:40, 41) Ahabw’okuba Yesu yabire ari kumanya ku abegi beye batahikirire, tarabarebire kubi.

Omunyanyazi ori kwetwa Mandy akaba nakunda kureba ebibi omu bandi, konka hati nagezaho kutoreza Yesu ari kuba omucurezi. Nagamba ngu: “Ninyehuza okutahikirira kw’abandi rero mbarebamu ebirungi, mbareba nk’oku Yehova ari kubareba.” Mbehi oku Yesu yabire ari kureba obweremwa bw’abegi beye, tikiri kutukwasa n’itwe kutwariza ge abandi?

Yesu akaba nata ebintu byona omu mikono ya Ruhanga. Obu Yesu yabire ari omu nsi akehenganira embera mbi ezamuhikireho. Bakamuhakanisa, bamujoga, kandi bamubonabonesa. N’obu bamukozire ebyo byona, akaguma ari omucerezi kandi ari kutwaza ge ahabw’okuba ‘akehayo ahari Ogo ocwa emanja z’amazima.’ (1 Pet 2:23) Yesu akaba namanya ku Ishe ow’omu iguru yabire aramukwase kwehangana kandi ku yabire arihana abari kumutwariza kubi omu bwire obuhikire.

Twagira ekiniga tukafa munonga aha ku turi kutwarizibwa kubi nikiba corobi kuhika turi kukora ekintu kibi. Ni yo nshonga ebyahandikirwe biri kutwijusya obuhabuzi oburi kugira ngu: ‘Ahakuba ekiniga c’omuntu tikikora by’okuhikirira kwa Ruhanga.’ (Yak 1:20) Twagira ekiniga, okutahikirira nikubasa kutuma twakora ekintu kibi.

Omunyanyazi ori kwetwa Cathy w’omuri Jamani akaba natekateka ati: ‘Waba otari kubasa kwetonganira, tihariho ori kukikukorera.’ Konka ku yayegire kutoreza Yehova, emitwarize yeye ekahinduka. Akagamba ati: “Burijo tinshemerire kweshoborora. Ahakuba nimanya ku byona ebi Yehova ari kukora bihikire, nanye  nimba nyetegwire kutwaza ge.” Yaba oyine omuze g’okutekateka aha bibi ebi abandi bakukorire, kutoreza ecokureberaho ca Yesu c’okwesiga Yehova biryakukwasa kutwariza ge abandi.

Yesu akatwereka ku obucurezi buri kutuma omuntu yatunga okushemererwa. Akagira ngu: ‘Bine omugisha abacurezi’. (Mat 5:5) Yetegereze oku obucurezi buri kubasa kutukwasa omuri ezi mbera.

Obucurezi nibutuma abatasine bayerinda ebizibu omu ka. Mwenetata ori kwetwa Robert ow’omuri Austraria akagira ngu: “Nkaba ninkira kugambira omukazi wange kubi ntari kubimanya. Konka wagamba ebigambo tico kiri kutuma ebintu byaterera. Kikanshasha munonga ku namanyire ngu ndi kumutwariza kubi.”

‘Ahabw’okuba twena turi kushobya omuri byingi,’ twagamba tutabandize kutekateka nikibasa kuretaho ebizibu omu ka. (Yak 3:2) Omu mbera nk’ezo, obucurezi nibukukwasa kwehangana kandi turinda orurimi rwitu.—Enf 17:27.

Robert akataho amani kugira ngu agume aturize n’okugira omucwe g’okwerinda. Ni enki ecarugiremu? Akagumizamu ati: “Hati ku turi kuremwa kwikirizana, nimuhurikiza ge, ngezaho kugamba na we omu bucurezi, kandi nyerinda ku ebi ndi kwenda byaza omu mwanya g’okubanza. Obunywani obu nyine n’omukazi wange bukakizaho kuhama.”

Obucurezi nibutukwasa kutura ge n’abandi. Abantu abari kurahuka kugubwa kubi tibari kukunda kugira abanywani bingi. Konka obucurezi, nibutukwasa ‘kurinda omurunga g’obusinge.’ (Efe 4:2, 3) Cathy, owu tugambireho, akagira ngu: ‘Obucurezi bukatuma nahikana n’abandi n’obu hine abu kiri kubasa kuguma kutura na bo.”

Obucurezi nibureta obusinge bw’omu mutima. Bibuli neyoreka ku ‘obwenge oburi kuruga omu iguru’ buri obw’obucurezi n’obw’obusinge. (Yak 3:13, 17) Omucurezi naba ayine ‘omutima oguturize.’ (Enf 14:30) Martin, owatireho amani kugira ngu ayereke omucwe g’obucurezi, akagira ngu: “Hati ninyikiriza ebitekateko by’abandi, nibanyehisa kandi nyine obusinge bw’omutima n’okushemererwa.”

Buzima tushemerire kutaho amani kugira ngu tukizeho kugira omutwarize g’obucurezi. Mwenetata omwe akagira ngu: “Obumwe hine obu ndi kuhurira nyine ekiniga.” Yehova, ori kutuhiga koreka obucurezi, nayija kutukwasa omuri ezo mbera zitorobi. (Isa 41:10; 1 Tim 6:11) Aryatukwasa ‘tuheze kubonabonesibwa’; kandi ‘aryatugumya.’ (1 Pet 5:10) Nk’entumwa Paulo, n’itwe nitubasa kwereka ‘obucurezi n’okutwaza ge’ nka Kristo.​—2 Kor 10:1.