1. Ni enki eki omuntu ashemerire kukora yaza kombeka enju?

TEKATEKA aha muntu ori kwenda kombeka enju. Namanya enju eyi ari kwenda kombeka. Mbwenu shi natandika kugura ebintu, rero atandika kombeka enju? Ingaha. Atakatandikire, hine ekintu ec’omugasho eki ari kubanza yakora; kubariira eby’okumara eyo nju. Ahabw’enki? Ahabw’okuba naba ari kwenda kumanya yaba ayine esente eziri kubasa kumara kombeka eyo nju. Yabariira ebikoreso ayetonzire, nayija kombeka eyo nju kandi nayimara.

2. Tukuratize ebiri omuri Luka 14:27-30, ni enki eki oshemerire kubanza watekatekaho oyetonzire otakabatizibwe?

² Mbehi rukundo eyi ori kukunda Yehova n’okumusima bikatuma watekateka aha kubatizibwa? Yaba kiri kisyoya, n’iwe noyenda kukora ensharamu nk’eyi omushija ori kwenda kombeka enju. Ahabw’enki turi kugamba basyoya? Reba ecokureberaho ca Yesu ekiri kugambwa omuri Luka 14:27-30. (Hashome.) Yesu akaba ari kugamba ebi omuntu ashemerire kukora kugira ngu abe omwegi weye. Twaba turi kwenda kuba abakurasi beye, tushemerire kwikiriza “byona ebi turabugane”; ebizibu n’okweferereza. (Luka 9:23-26; 12:51-53) Obwe rero waba otakabatizibwe, oshemerire kubanza watekateka aha ki biri kukushaba. Eco nikija kukutegurira kugumizamu ori kuhereza Yehova omu bwesigwa ori Omukristo owabatizibwe.

3. Ni enki eki twaza kushwijuma omuri eki kicweka?

³ Mbwenu shi eki orashashure kugira ngu obe omukurasi wa Yesu obatizibwe, nikikira ebi wasigire? Yego, ni ko kiri! Okubatizibwa nikutuma watandika kubona emigisha eya hati n’ey’omu biro by’omu misho. Reka tushwijume ebibuzo ebyine omugasho aha bikwatirine n’okubatizibwa. Ebyokugarumamu  byawe nibyija kukukwasa kugarukamu eki kibuzo: “Mbehi nyetegwire kubatizibwa?”

4. (a) Okweha Yehova nikimanyisa ki? (b) Nk’oku biri kugambwa omuri Matayo 16:24, okweyanga nikimayisa ki?

⁴ Okweha Yehova nikimayisa ki? Mbere y’okubatizibwa oshemerire kubanza wayeha Yehova. Noyeha Yehova ori kumuhika hihi omu kushaba, omugambira ku waza kumuhereza n’amagara gawe ebiro byona. Wayeha Ruhanga noba ‘wayeyanga.’ (Shoma omuri Matayo 16:24.) Obwo noba waba owa Yehova, kandi ogo ni omugisha gw’amani. (Rom 14:8) Noba wamugambira ku okuruga eryo izoba, oragumizemu kukora ebi ari kwenda omu mwanya g’okukora ebyawe. Okweha Yehova kwawe ni okurahira, ninga okugamba endagano eyi waragana na Ruhanga. Yehova tari kutugema kurahira eyo ndahiro. Konka ku turi kumuraganisa, na we natushaba ngu tugihikirize.—Zab 116:12, 14.

5. Okweha Yehova kwine buha buzare n’okubatizibwa?

⁵ Ni bata oku okweha Yehova kwine obuzare n’okubatizibwa? Tihine ori kumanya obwire obu wayehire Yehova; eco nikiba ahagati yawe na Yehova. Okubatizibwa ko nikubera omu misho ga bona, na munonga omu biterane n’ebiterane ebihango. Wabatizibwa, noba wayereka bona ku wamazire kweha Yehova. * Obwe rero okubatizibwa nikwereka abandi ku ori kukunda Yehova Ruhanga n’omutima gwawe gona, n’amagara gawe gona, n’amani gawe gona, kandi ku ori kwenda kumuhereza ebiro byona.—Mak 12:30.

6-7. Tukuratize ebiri omuri 1 Petero 3:18-22, ni ziha nshonga ibiri eziri kwereka ku oshemerire kubatizibwa?

⁶ Mbehi oshemerire kubatizibwa? Reba ebigambo ebiri omuri 1 Petero 3:18-22. (Hashome.) Nk’oku obwato bwabire ekihamya ekiri kwereka ku Noa yabire ayine okwikiriza, n’iwe wabatizibwa noba wayoreka ku wayehire Yehova. Konka shi oshemerire kubatizibwa? Yego. Petero akagamba enshonga ahabw’enki oshemerire kukikora. Ey’okubanza: Okubatizibwa ‘nikukukiza.’ Okubatizibwa nikutukiza twayereka ku nitwikiriza Yesu kandi tukikiriza ku yatuferire, ku yazokire akaza omu iguru, kandi ku hati ari “aha rubaju rwa buryo rwa Ruhanga.”

⁷ Enshonga ya kabiri: Okubatizibwa nikutuma wagira ‘omuntuwomunda murungi.’ Twayeha Ruhanga kandi tukabatizibwa, nitugira obunywani bw’omutano na we. Ahabw’okwehana tubyihire aha mutima n’okwikiriza ekitambo, Ruhanga natusasire ebibi byitu. Nikituma twagira omuntuwomunda murungi.

8. Ni eha nshonga y’okubanza eshemerire kutuma wayeha Yehova kandi okabatizibwa?

⁸ Ni eha nshonga y’okubanza eshemerire kutuma wayeha Yehova kandi okabatizibwa? Ahabw’okwega Bibuli oyetonzire, okamanya emitwarize myingi ya Yehova. Ebi wayegire ahari we bikakukora aha mutima kandi byatuma wamukunda munonga. Rukundo eyi ori kukunda Yehova ni yo eshemerire kuba enshonga y’okubanza eri kutuma wayeha Yehova kandi okabatizibwa.

9. Nk’oku biri kugambwa omuri Matayo 28:19, 20 okubatizibwa omu izina rya Tata n’ery’Omwana n’ery’omwika oguri kwera nikimanyisa ki?

⁹ Kandi endijo nshonga eri kutuma washaramu kubatizibwa, ni amazima agu ori kwega omuri Bibuli. Reba eki Yesu yagambire obu yatuhire omurimo g’okuhindura  abantu abegi. (Shoma omuri Matayo 28:19, 20.) Tukuratize ebi Yesu yagambire, abari kubatizibwa nibakikora omu izina rya Tata n’ery’Omwana n’ery’omwika oguri kwera. Eco nikimanyisa ki? Oshemerire kwikiriza n’omutima gwawe gona amazima g’omuri Bibuli agari kukwata ahari Yehova, omwana weye Yesu, n’omwika gweye oguri kwera. Ago mazima gine amani kandi nigabasa kukuhika aha mutima. (Heb 4:12) Reka turebe gamwe omuri go.

10-11. Ni gaha mazima g’omuri Bibuli agu wayegire kandi okikiriza?

¹⁰ Garuza amisho enyima orebe obu watandikire kumanya amazima agari kukwata ahari Tata: Okamanya ku ‘ari kwetwa Yehova,’ ku ni we ‘wenka ori kukira bona’ kandi ku ni we Ruhanga ow’amazima. (Zab 83:18; Isa 37:16) Ni we Muhangi witu, kandi ni we ori kutukiza. (Zab 3:8; 36:9) Akatuha ow’okutucungura ngu atwihe omu kibi n’okufa, kandi akatuha amasiko g’amagara agatahwaho. (Yoh 17:3) Wabatizibwa noba waba Omuhamya wa Yehova. (Isa 43:10-12) Noba waza omu muryango gw’abantu abari kuramya Yehova, abari kwesimira kwetererwa izina rya Ruhanga kandi bakarimanyisa abandi.—Zab 86:12.

¹¹ Mazima ku guri omugisha kushoborocerwa eki Bibuli eri kwegesa ahari Tata! Ku ori kumara kwikiriza ago amazima, omutima gwawe nigutuma wayenda kweha Yehova kandi okabatizibwa.

12-13. Ni gaha mazima agari kukwata ahari Yesu agu wayegire kandi okikiriza?

¹² Okehurira ota ku wamanyire amazima agari kukwata aha Mwana? Yesu ni omuntu wa kabiri w’omugasho omu nsi n’omu iguru. Ni we mujuni witu. Akikiriza kufa ahabw’ebibi byitu. Twayereka omu bikorwa ku nitwikiriza ekitambo, nitusasirwa ebibi byitu, tugira obunywani burungi na Yehova kandi tugira n’amasiko g’amagara agatahwaho. (Yoh 3:16) Yesu ni Omutambi Mukuru witu. Nayenda ngu tugasirwe n’ekitambo kandi tugire obunywani burungi na Ruhanga. (Heb 4:15; 7:24, 25) Ahabw’okuba ari we Mugabe w’Obukama bwa Ruhanga, nayija kumukoresa ayeze izina ryeye, ayiheho ebibi, kandi atume twatunga emigisha etari kuhwaho omuri paradiso. (Mat 6:9, 10; Kush 11:15) Yesu ni we ecokureberaho kitu. (1 Pet 2:21) Akatwereka oku tushemerire kubaho turi kukora ebi Ruhanga ari kukunda.—Yoh 4:34.

¹³ Wayikiriza ebi Bibuli eri kwegesa aha bikwatirine na Yesu, noyija kukunda Omwana wa Ruhanga. Eyo rukundo netuma wayenda kubaho ori kukora ebi Yehova ari kwenda, nka Yesu. Kandi eco nikija kutuma wayenda kweha Yehova kandi okabatizibwa.

14-15. Ni gaha mazima agari kukwata aha mwika oguri kwera agu wayegire kandi okikiriza?

¹⁴ Ni enki eki watekatekire ku wamazire kwega aga mazima agari kukwata aha mwika oguri kwera? Omwika oguri kwera ti omuntu, ahobwe ni amani ga Ruhanga. Yehova akakoresa omwika gweye oguri kwera omu kuhandikisa Bibuli, kandi nigutukwasa kushoborocerwa ebi turi kwega n’okubita omu bikorwa. (Yoh 14:26; 2 Pet 1:21) Yehova nakoresa omwika gweye, rero atuha ‘amani agari kukirira kimwe’ agandi gona. (2 Kor 4:7) Omwika nigutuha amani g’okuburira obutumwa burungi, kwehanganira ebizibu, n’okusingura ebigezo. Nigutukwasa kwereka ebyana by’omwika oguri kwera. (Gal 5:22) Ruhanga naha omwika gweye oguri kwera abantu bona abari kumwesiga kandi bakagumushaba.—Luk 11:13.

¹⁵ Kumanya ku abahereza ba Yehova bari kushaba omwika oguri kwera gukabakwasa  omu kumuhereza, ku nikihumuriza! Wayikiriza amazima agari kukwata aha mwika oguri kwera, noyija kuhurira wayenda kweha Yehova kandi obatizibwe.

16. Ni enki eki wayega omu bi twamara kushwijuma?

¹⁶ Washaramu kweha Yehova kandi okabatizibwa noba watera entambwe y’omugasho omu kubaho kwawe. Nk’oku twamara kwega, noyija kugira eki washashura; harimu ebizibu n’okweferereza. Konka emigisha eyi orije kutunga nekirira kimwe byona ebi orije kweferereza. Okubatizibwa nikukukiza, kandi nikutuma wagira omuntuwomunda murungi omu misho ga Ruhanga. Rukundo eyi ori kukunda Yehova ni yo eshemerire kutuma wayenda kweha Yehova kandi okabatizibwa. Oshemerire kwikiriza n’omutima gwawe gona amazima agu wayegire ahari Tata, Omwana n’omwika oguri kwera. Mbwenu shi obu twamara kushwijuma ebyo bintu byona, ni bata oku ori kubasa kugarukamu eki kibuzo: “Mbehi nyetegwire kubatizibwa?”

17. Ni ziha ntambwe eziri kubasa kukuhisya aha kubatizibwa?

¹⁷ Yaba washanga oyetegwire kubatizibwa, obwe hariho n’entambwe nyingi ezi wamazire kutera kugira ngu ogire obunywani burungi na Yehova. * Ahabw’okuba ori kwega Bibuli n’Abahamya, okamanya ebiri kukwata ahari Yehova na Yesu. Okagira okwikiriza. (Heb 11:6) Hati noyesigira kimwe ebiraganiso bya Yehova ebiri omuri Bibuli, kandi noyikiriza otari kubanganisa ku ekitambo ca Yesu kiri kukukiza ekibi n’orufu. Okehana ebicumuro byawe; okashasha munonga ahabw’ebibi ebi wakozire, kandi okashaba Yehova ngu akusasire. Okahinduka; okareka emitwarize mibi ya kare kandi hati okatandika kubaho ori kukora ebi Ruhanga ari kukunda. (Byak 3:19) Oyine ekihika c’okugambira abandi ebi ori kwikiriza. Okijuza ebiri kushabwa, waba omuburizi otakabatizibwe, kandi watandika kuburira n’ekibina. (Mat 24:14) Yehova nakusima ahabw’okutera ezo ntambwe. Hati oyine okushemererwa kwingi omu mutima.—Enf 27:11.

18. Ni enki ekindi eki oshemerire kukora otakabatizibwe?

¹⁸ Otakabatizibwe, hine ebindi bintu ebi oshemerire kukora. Nk’oku twamara kwega, oshemerire kweha Ruhanga. Muhike hihi omu kushaba, omuraganise ku orije kubaho ori kukora ebi ari kukunda. (1 Pet 4:2) Bwanyima, ogambire omuzehe mukuru ku ori kwenda kubatizibwa. Nayija kushaba abandi bazehe ngu baganireho n’iwe. Nyabura we otahurira oyine obwoba bw’okubugana na bo. Abo benetata nibakumanya ge kandi nibakukunda. Nibija kuganira n’iwe aha nyegesa za Bibuli  ez’okubandizaho ezi wayegire. Nibaba bari kwenda kureba yaba ori kumanya ezo nyegesa kandi ku ori kumanya omugasho g’okweha Yehova, okabatizibwa. Bashanga oyetegwire, nibija kukugambira yaba ori kubasa kubatizibwa omu kiterane ekiri kukurataho.

19-20. Ni enki eki oshemerire kukora na bwanyima y’okubatizibwa, kandi nobasa kukikora ota?

¹⁹ Wamara kubatizibwa, ni enki eki oshemerire kukora? * Yijuka ku okweha Yehova eri endahiro kandi Yehova naba ari kwenda ngu oyije kuhikiriza eco kiraganiso. Obwe rero bwanyima y’okubatizibwa, oshemerire kuguma ori kwijuka okweha Yehova kwawe. Ni bata oku ori kubasa kukikora?

²⁰ Guma hihi n’ekibina eki orimu. Obu ori Omuristo obatizibwe, ori omu kibina ca benetata omu nsi yona. (1 Pet 2:17) Abo ni benetata na banyanyazi omu buryo bw’omwika. Ku oragumizemu kuza omu nterane burijo, noyija kukizaho kubakunda. Shoma Ekigambo ca Ruhanga kandi okitekatekeho burizoba. (Zab 1:1, 2) Wamara kushoma Bibuli, okwate obwire otekateke munonga aha bi wamara kushoma. Eco nikija kutuma byakuhika aha mutima. Guma oshabe. (Mat 26:41) Eshara zawe nizija kutuma wahika hihi ya Yehova. ‘Guma obanze osherure Obukama bwa Ruhanga.’ (Mat 6:33) Nobasa kukikora ori kuta omu mwanya g’okubanza omurimo g’okuburira omu kubaho kwawe. Wahugira omu murimo g’okuburira, noyija kuguma oyine okwikiriza kuhamire, kandi nikija kutuma wakwasa abandi kwija omu muhanda gw’amagara agatahwaho.—1 Tim 4:16.

21. Ni biha bintu birungi ebi orije kutunga ku oribatizibwa?

²¹ Eyi nsharamu y’okweha Yehova kandi okabatizibwa ni yo nsharamu eri kukira ezindi zona ezi warakozire. Ni amazima hariho byingi ebi orije kweferereza? Yego! Ebizibu byona ebi orije kubugana omuri eyi nsi ni eby’‘akanya kace.’ (2 Kor. 4:17) Konka okubatizibwa kwawe nikwija kutuma wabaho oshemerirwe hati kandi otunge “amagara aga buzima” omu biro by’omu misho. (1 Tim 6:19) Obwe rero nyaburawe, bitekatekeho oyetonzire kandi oshabe aha c’okugarukamu cawe c’ekibuzo, “Mbehi nyetegwire kubatizibwa?”