Pasika ya bwanyima ya Yesu ekaba neza kuba ey’omutano. Ahabw’okuba Yesu yabire namanya ku ari hihi kufa, akatebekanisa oku arije kurya pasika n’entumwa zeye kandi akatandikisaho n’omugenzo musya gwa buri mwaka, ni okugamba Obugenyi bwa Mukama bw’omwebazo. Ni yo nshonga yayoherize Petero na Yohana ngu baze kutebekanisa ekishenge. (Luk 22:7-13; reba ekishushani c’aha kishembeso.) Eco n’itwe catwijusya ku tushemerire kwetegura Ekijusyo eki twine aha kiro ca 27 Okwakashatu. Ni amazima, ebibina bikatebekanisa oratange toku, ebigeraniso, n’ebindi. Konka shi, ni enki eki buri omwe ashemerire kukora ngu ayetegure Ekijusyo?

Tegura omutima gwawe. Shoma ebyahandikirwe by’Ekijusyo kandi otecereze aha bi washoma. Puroguramu y’okushoma Bibuli neba eri omu katabo Shwijuma ecahandikirwe burizoba. Nambwenu enyongeza ya B12 omuri Bibuli y’Obuhinduzi bw’ensi ensya, egarukirwemu, erimu ebiri kukiraho. (Nambwenu reba Akatabo k’Omukristo n’omurimo, Okwakana 2020.) Abagizire amaka, nibabasa kubona eby’okweyegesa barebire omu Irangiro ry’ebitabo bya Watch Tower ninga shi omu Kitabo ekiri kukwasa Abahamya ba Yehova kucondoza.

Tumira abandi. Yekwatanise omu bwijwire omuri kampeyini y’okutumira abantu. Tecereza aha bantu abu ori kubasa kutumira, harimu abu waburire, abayegireho Bibuli omu bwire bwa kare, abu muri kumanyana, n’abanyabuzare. Abazehe na bo nibijuka kweta ababurizi abafukirire. Yijuka ngu omuntu yaba atatwire omu kacweka k’owanyu, nabwo nobasa kumweta, ori kureba obwire n’omwanya by’Ekijusyo eby’owabo ahari jw.org, onyiga aha kishenge ca TURI BAHA, otorana “Okwijuka.”

Ni enki ekindi eki turi kubasa kukora ngu twetegure?