Agostinho w’omuri Buraziri nagira ati: “Nkakurira omu ihanga ryitu kandi tukaba turi abahingi. Tukaba turi abakene. Nkemereza amashomero kugira ngu ndonde omurimo, nyambe ab’omu ka.” Agostinho akega okushoma n’okuhandika ayine emyaka 33 yona. Akagamba ngu: “Ku nayegire okushoma n’okuhandika kikatuma nahurira nyine omugasho kandi natandika kweyesiga.”

Omu myaka 70 Abahamya ba Yehova bakegesa abantu abari kurenga 250,000 okushoma n’okuhandika; Agostinho ni ecokureberaho kimwe kusha. Ahabw’enki Abahamya ba Yehova bari kwegesa abantu okushoma n’okuhandika? Ni bata oku abamwe bagasirwe n’ago mashomero?

Omu myaka ya za 1930 rwagati, Abahamya ba Yehova bakaba nibaburira omu mahanga 115. Kugira ngu abamishonari baburire abantu abari kugamba endimi ezitari zimwe bakaba nibakwata amaraka ga za toku ezihindwire, kandi hine n’ahu babire bari kuhindura obutabo bumwe omu ndimi z’abaturage. N’obu abantu bingi babire nibakunda kwega Bibuli, konka okutamanya kushoma kikaba nikituma abingi babireka.

Ahabw’okuba abantu babire batari kumanya kweshomera Bibuli ahabw’abo, kuta omu nkora emisinge ya Bibuli kikaba nikibagumira. (Yoshua 1:8; Zaaburi 1:2, 3) Nambwenu, bakaba nibabugana ekizibu c’okuhikiriza emirimo yabo omu kibina. Ecokureberaho: Abazire abatari kumanya kushoma kikaba nikibashaba amani agarengire kugira ngu begese abana babo. (Eky’Ebiragiro 6:6, 7) Nambwenu Abahamya abasya ababire batari kumanya kushoma ge, kukoresa Bibuli omu murimo g’okuburira kikaba nikibagumira.

Ahagati y’emyaka ya za 1940 na 1950, mwenetata Nathan H. Knorr na Milton G. Henschel, bamwe omu babire bari kwebembera ekitongo c’Abahamya ba Yehova, bakaza omu mahanga agatari gamwe, kugira ngu batebekanise omurimo g’okuburira. Omu mahanga ahu bashangire hariyo abantu bingi abatari kumanya kushoma n’okuhandika, bakahiga za ofisi kutaho amashomero agari kwegesa abantu kushoma n’okuhandika omu bibina.

Za ofisi zikasindikira ebibina obuhabuzi oburi kugamba oku bari kubasa kwegesa abantu okushoma n’okuhandika. Omu mahanga agamwe, za gavumenti zikaba zakozire obutabo bw’okwegesezamu abantu. Ecokureberaho: Ofisi ya Burazili ekashaba gavumenti obutabo bw’okwegesezamu, rero babwoherereza ebibina. Omu gandi mahanga ho, Abahamya ni bo bayekorire obutabo bw’okwegesezamu abantu okushoma n’okuhandika.

Ago mashomero gakaba gaterirweho abashija n’abakazi, abato n’abakuru. Entego ekaba eri ey’okwegesa abantu okushoma n’okuhandika omu rurimi rwabo, n’obu omu kibina hakuba harimu endimi nyingi.

Ni bata oku ago mashomero gakwasize abantu? Omuhamya w’omuri Mekisiko nagira ati: “Hati nimbasa kushoborokerwa ge Bibuli, kandi ebi nashoma bimpika aha mutima. Okumanya kushoma kikatuma naburira abatahi, kandi hati ninyegesa abantu bingi Bibuli.”

Okwegesa okushoma n’okuhandika bikagasira abantu n’omu zindi mbera hatari okushoborocerwa Bibuli kusha. Isaac w’omuri Burundi nagira ngu: “Okwega okushoma n’okuhandika kikatuma nayega n’amashomo g’obwombeki. Okombeka ni go mwoga gwange, kandi hati ninyebembera abombeki.”

Jesusa w’omuri Peru akatandika kwega kushoma n’okuhandika ayine myaka 49. Nagira ngu: “Nk’omukazi nkaba nshemerire kumanya oku ebintu biri kugura n’oku biri kwetwa. Omu bwire bwa kare eco kikaba kiri ekizibu. Mazima ninsima ahabw’eri shomero eryanyegesize okushoma n’okuhandika, kandi hati ninza kuhahira ab’omu ka yange.”

Abategeki b’amahanga agatari gamwe, bakasima Abahamya ba Yehova ahabw’omurimo g’okwegesa abantu okushoma n’okuhandika. N’omuri obu bwire Abahamya ba Yehova bacayegesa abantu okushoma n’okuhandika, kandi bakaboneza n’oburyo bw’okwegesa. Nambwenu, bakacapa obutabo oburi kurenga miliyoni 224 omu ndimi 720 kugira ngu begese abantu kushoma, kandi bakwase n’abatari kumanya kushoma ge. *