ISHOMO RYA 53

Torana oburyo bw’okweshemeza oburi kushemeza Yehova

ZAANA

Yehova ni “Ruhanga ori kushemererwa.” (1 Timoseo 1:11) Nayenda ngu tushemerererwe amagara. Ku turi kukwata obwire bw’okuhumura, nikimushemeza. Omuri eri shomo twaza kureba oku turi kubasa kukwata obwire bwitu bw’ekihumuro tukashemererwa kandi tukamarwa, kandi ekiri kukira byona tukashemeza Yehova.

1. Ni enki eki tushemerire kwijuka twaba turi kutorana eby’okweshemeza?

Ni enki eki ori kukunda kukora waba ori omu kahumuro? Abamwe nibakoresa obwire bwabo bw’ekihumuro bari kushoma ebitabo, bari kuhurikiza omuziki, bari kureba za tivi ninga shi bari kukoresa intaneti. Abandi bo nibeshemeza bari na banywani ba bo, bari kutemba enshozi, bari koga omu mizi ninga shi bari kuzana emizano ya za vidiyo. Emizano yona eyi twakuba turi kukunda tushemerire kureba yaba eri “kusimwa Mukama.” (Abaefeso 5:10) Ni ec’omugasho kubimanya ahakuba eby’okweshemeza byingi ebi abantu bari kukunda nibiba birimu ebikorwa ebi Yehova ari kwanga ecokureberaho nk’obwitani, obushambani n’ebikorwa by’obufumu. (Shoma omuri Zaaburi ya 11:5.) Ni enki ekirije kutukwasa kusharamu ge oburyo burungi bw’okweshemeza?

Ku turatorane abanywani barungi, nibabasa kutukwasa kugira emitakatecere mirungi n’okusharamu ge eby’okweshemeza. Nk’oku tukirebire omu ishomo eribandize eri, ‘omuntu ori kugenda n’abanyabwenge na we nahinduka omunyabwenge.’ Konka twaba turi kumara obwire n’abantu abatari kugendera aha misinge ya Yehova “turyakizira.”—Enfumu 13:20.

2. Ahabw’enki kiri ec’omugasho munonga kutekateka aha bwire obu turi kumara turi kweshemeza?

N’obu twakuba turi kukoresa oburyo burungi turi kweshemeza, nituba tushemerire kwetonda kugira ngu tutabimaramu obwire buringwa munonga. Eco twakikora nikibasa kutuma twabura obwire bw’okukora ebintu by’omugasho. Bibuli netuhiga ‘kutafisa busha omwanya gwitu.’—Shoma omu Baefeso 5:15, 16.

YEGA BYINGI

Manya oku ori kubasa kukora ensharamu ndungi aha bikwatirine n’eby’okweshemeza.

3. Yerinde oburyo bubi bw’okweshemeza

Ahabw’enki tushemerire kwetonda twaba turi kusharamu eby’okweshemeza? Zana VIDIYO, rero muganire ahari ebi bibuzo.

VIDIYO: Ni eha mizano eyi ndi kubasa kusharamu? (4:39)

Ni nkahe ahu omuzano gwa za rurara g’omuri Roma ya kare guri kubuganira n’emizano y’omuri obu bwire?
Nk’oku wakireba omuri vidiyo, ni enki eki Danny yamanyire aha bikwatirine n’emizano?

Shoma omu Barooma 12:9, rero muganire ahari eki kibuzo:

Ni bata oku oru runyiriri ruri kubasa kukukwasa waza kusharamu emizano?

Ni biha bintu ebi Yehova ari kwanga? Shoma omu Nfumu 6:16, 17 n’omu Bagalatia 5:19-21. Ku muramare kushoma buri runyiriri muganire ahari eki kibuzo:

Ni biha bintu ebyagambwa omuri oru runyiriri ebiri kukira kurebeka omu mizano y’omuri obu bwire?

Ni bata oku ori kubasa kutorana ge emizano

Yebuze ngu:

Ni enki? Mbehi ogu muzano gurimu ebi Yehova ari kwanga?
Ryari? Mbehi ogu muzano nigutwara obwire obu ndi kuba nshemerire kukoramu ebintu by’omugasho?
Ni oha? Mbehi ogu muzano nigutuma nakoringana n’abantu abatari kukunda Yehova?

Nitukora ekiri kubasika cona ngu twerinde ekiri kubasa kutugwisa omu kabi. Ni yo nshonga turi kuba tushemerire kukora ekiri kubasika cona ngu twerinde oburyo bw’okweshemeza oburi kubasa kutushisha.

4. Koresa ge obwire bwawe

Zana VIDIYO, rero muganire ahari eki kibuzo.

VIDIYO: Ni bata oku ori kukoresa obwire bwawe? (2:45)

N’obu mwenetata atazana emizano mibi, ni bata oku obwire obu yamara ari kweshemeza buri kubasa kumugiraho engaruka?

Shoma omu Bafilipi 1:10, rero muganire ahari eki kibuzo:

Ni bata oku oru runyiriri ruri kutukwasa kusharamu obwire obu turi kumara omu kweshemeza?

5. Torana oburyo burungi bw’okweshemeza

N’obu oburyo bumwe bw’okweshemeza butari kushemeza Yehova, hariho oburyo bwingi oburi kumushemeza. Shoma omu Mubuurizi 8:15 n’omu Bafilipi 4:8, rero muganire ahari eki kibuzo:

Ni buha buryo burungi bw’okweshemeza obu ori kukunda?

Yehova nayenda ngu tweshemeze omu buryo obuhikire

ABANTU ABAMWE NIBAGAMBA NGU: “Tihariho akabi akari omu kureba emizano erimu obwitani, obushambani n’ebikorwa by’obufumu ahabw’okuba nyowe tindi kubasa kubikora.”