ISHOMO RYA 47
Mbehi oyetegwire kubatizibwa?
Okamanya ebintu byingi ebiri kukwata ahari Yehova birabire omu kwega Bibuli. Kandi okagira n’ebi wahindura kugira ngu obuganise n’ebi wayegire. Konka hine ebintu byingi ebiri kubasa kukuzibira kweha Yehova n’okubatizibwa. Omuri eri ishomo twaza kushwijuma ebintu ebiri kubasa kukuzibira kubatizibwa n’oku ori kubasa kubisingura.
1. Ni biha bintu ebi ori kuba oshemerire kumanya mbere y’okubatizibwa?
Kugira ngu obatizibwe noba oshemerire kubanza ‘wamanyira kimwe amazima.’ (1 Timoseo 2:4) Eco tikiri kumanyisa ku ori kuba oshemerire kubanza wamanya ebyokugarukamu byona by’ebibuzo by’omuri Bibuli kugira ngu obatizibwe. Nangwa n’Omukristo omazire emyaka myingi abatizibwe, naba ashemerire kugumizamu kwega Bibuli. (Abakolosai 1:9, 10) Konka noba oshemerire kubanza washoborokerwa enyegesa z’okubandizaho z’omuri Bibuli. Abazehe b’ekibina nibija kukukwasa kumanya yaba oyine obumanyi oburi kumara.
2. Ni biha bintu ebi oshemerire kukora kugira ngu ohike aha kubatizibwa?
Mbere y’okubatizibwa noba oshemerire ‘kwehana kandi okahinduka.’ (Shoma omu Byakozirwe 3:19.) Eco nikimanyisa kuhurira washasha ahabw’ebibi ebi wakozire, kandi okashaba Yehova embabazi. Nambwenu, noba oshemerire kureka emitwarize mibi omaririra kubaho ori kukora ebi Ruhanga ari kukunda. Kandi noba oshemerire kwekwatanisa n’ekibina ori kwija omu nterane kandi oyekwatanisa omu murimo g’okuburira ori omuburizi otakabatizibwe.
3. Ahabw’enki otashemerire kwikiriza ngu obwoba bukuzibire kweha Yehova n’okubatizibwa?
Abamwe nibatina ku barije kuremwa kukora ebi baraganisize Yehova. Ni amazima noyija kukora enshobi nk’oku cahikire ah’abashija n’abakazi abari kugambwa omuri Bibuli. Konka Yehova tari kushaba abahereza beye kuba abahikirire. (Shoma omuri Zaaburi ya 103:13, 14.) Nashemererwa ku ori kukora cona ekiri kubasika ngu omukorere ebirungi. Kandi naba ayetegwire kukukwasa. Yehova natuhamiza ngu: ‘Tihariho ekintu na kimwe ekiri kubasa kututanisa na rukundo yeye.’—Shoma omu Barooma 8:38, 39.
YEGA BYINGI
Reba oku okumanya ge Yehova n’okwikiriza obuyambi bweye biri kubasa kukukwasa kusingura ebizibu ebiri kukuzibira kubatizibwa.
4. Kizaho kumanya ge Yehova
Ahabw’enki oshemerire kumanya Yehova kugira ngu ohike aha kubatizibwa? Noba oshemerire kumumanya ge kugira ngu omukunde kandi okore ebiri kumushemeza. Zana VIDIYO eri kwereka oku abegi ba Bibuli b’omu nsi yona bari kukikora. Bwanyima, muganire ahari eki kibuzo.
-
Nk’oku wakireba omuri vidiyo, ni enki ecakwasize abantu abari kugambwamu kuhika aha kubatizibwa?
Shoma omu Barooma 12:2, rero muganire ahari ebi bibuzo:
-
Mbehi hine eki ori kubanganisa aha ki Bibuli eri kwegesa ninga aha ku Abahamya ba Yehova bari kwegesa Bibuli?
-
Mbwenu shi caba kiri kisyo, ni enki eki oshemerire kukora?
5. Singura ebizibu ebiri kubasa kukuzibira kubatizibwa
Twasharamu kweha Yehova kandi tukabatizibwa, nitubugana ebizibu byingi. Kugira ngu orebe ecokureberaho, zana VIDIYO, rero muganire ahari ebi bibuzo.
-
Nk’oku wakireba omuri vidiyo, nibiha bizibu ebi Narangerel yabugine ebyabire biri kubasa kumuzibira kuhereza Yehova?
-
Ni bata oku rukundo eyi ari kukunda Yehova yamukwasize kusingura ebyo bizibu?
Shoma omu Nfumu 29:25 n’omuri 2 Timoseo 1:7, rero muganire ahari eki kibuzo:
-
Ni enki ekiri kutuma twagira obumanzi bw’okusingura ebizibu?
6. Yesige ku Yehova arije kukukwasa
Yehova nayija kukukwasa kukora ebiri kumushemeza. Zana VIDIYO, rero muganire ahari ebi bibuzo.
-
Nk’oku wakireba omuri vidiyo, ni enki ecatumire omwegi wa Bibuli yatina kubatizibwa?
-
Ni enki eki yayegire kikatuma yagira amani g’okwesiga Yehova?
Shoma omuri Isaaya 41:10, 13, rero muganire ahari ebi kibuzo:
-
Ahabw’enki oshemerire kwesiga otari kubanganisa ku ori kubasa kuhikiriza ebi waraganisize Yehova obu wabire ori kumweha?
7. Yereka ku nosima Yehova aha bwa rukundo eyi ari kukukunda
Oku ori kukizaho kutekateka aha ku Yehova ari kukukunda, ni ko ori kukizaho kuhurira wayenda kumusima, kandi ni ko ori kuhurira wayenda kumuhereza ebiro byona. Shoma omuri Zaaburi ya 40:5, rero muganire ahari eki kibuzo:
-
Ni eha migisha eyi Yehova yakuhire eshemerire kutuma wamusima?
Omuhanuzi Yeremiya akaba nakunda Yehova n’Ekigambo ceye, kandi akaba nayereka ku nasima abyihire aha mutima ahabw’okwetererwa izina rya Yehova. Akagamba ati: ‘Ebigambo byawe bikaboneka, nabirya, byambera okushemererwa, n’okunanuka k’omu mutima; ahabw’okuba ninyetererwa izina ryawe, [Yehova] Ruhanga.’ (Yeremia 15:16) Garukamu ebi bibuzo:
-
Ahabw’enki guri omugisha gw’amani kwetwa Omuhamya wa Yehova?
-
Mbehi noyenda kubatizibwa ngu obe Omuhamya wa Yehova?
-
Mbwenu shi hariho ekintu ekiri kubasa kukuzibira kubatizibwa?
-
Ni enki eki ori kutekateka eki oshemerire kukora kugira ngu ohike aha ntego y’okubatizibwa?
ABANTU ABAMWE NIBAGAMBA NGU: “Nintina kubatizibwa ahabw’okuba nintekateka ku ntari kubasa kuhikiriza ebi naraganisize Ruhanga.”
-
Mbehi n’iwe noyehurira basyoya?
EMPINYE
Yehova nabasa kukukwasa kusingura ebizibu byona ebiri kubasa kukuzibira kubatizibwa.
Wayege ki?
-
Mbehi noba oshemerire kugira obumanyi oburi kwingana ki kugira ngu obatizibwe?
-
Ni ziha mpinduka ezi oshemerire kukora kugira ngu ohike aha kubatizibwa?
-
Ahabw’enki otashemerire kwikiriza ngu obwoba bukuzibire kubatizibwa?
CONDOZA
Shwijuma eki oshemerire kukora kugira ngu ohike aha ntego yawe y’okubatizibwa.
“Mbehi oyetegwire kubatizibwa?” (Omunara g’Omurinzi, Okwakashatu 2020)
Reba oku ori kubasa kusingura ebizibu by’amani ebiri kubasa kukuzibira kubatizibwa.
“Ekiri kunzibira kubatizibwa ni enki?” (Omunara g’Omurinzi, Okwakashatu 2019)
Reba oku omushija omwe yabasize kusingura ebizibu ebyabire biri kumuzibira kubatizibwa.
Omu kubanza omushija ori kwetwa Ataa akaba ari kutina kubatizibwa. Reba acatumire yabatizibwa.
