ISHOMO RYA 11

Oku ori kubasa kugasirwa na Bibuli

ZAANA

Mbehi waragire kukora kintu, konka okahurira kigumire? Kugira ngu kibase kukorobera, nobasa kuguma ori kukoraho kacekace. Ni co kimwe n’okushoma Bibuli. Nobasa kwebuza ngu, ‘obwe shi nintandikira nkahe?’ Omuri eri ishomo, twaza kureba ebintu ebiri kubasa kukukwasa kukunda kushoma Bibuli n’okugeyegesa.

1. Ahabw’enki tushemerire kushoma Bibuli burizoba?

Omuntu ori kushoma Bibuli ninga shi ‘ebiragiro bya [Yehova]’ burizoba, natunga okushemererwa kandi agira eki yahikaho. (Shoma omuri Zaaburi ya 1:1-3.) Tandika kushoma ori kumara edakika nce buri izoba. Oku ori kukizaho kwemanyiza Ekigambo ca Ruhanga, ni ko ori kukizaho kukunda kukishoma.

2. Ni enki ekirije kukukwasa kugasirwa n’okushoma Bibuli?

Kugira ngu kushoma Bibuli kitugasire, tushemerire kuhumuramu, tubanza kutekateka aha bi turi kushoma. Tushemerire kushoma Bibuli kandi ‘tukatekateka’ aha bi twashoma. (Yoshua 1:8) Ku orabe ori kushoma Bibuli, ogume oyebuze ngu: ‘Ebi nashoma nibinyegesa ki ahari Yehova Ruhanga? Ni bata oku ndi kubasa kubita omu nkora omu kubaho kwange? Ni bata oku ndi kubasa kukoresa ezi nyiriri omu kukwasa abandi?’

3. Ni bata oku ori kubasa kuronda obwire bw’okushoma Bibuli?

Mbehi nikikugumira kutunga obwire bw’okushoma Bibuli? Abingi omuri itwe ni ko turi. Gezaho kukoresa ge obwire bwawe. (Abaefeso 5:16) Eco nobasa kukikora ori kutaho obwire bw’okushoma Bibuli buri izoba. Abamwe nibashoma Bibuli omu kasheshe karekare. Abandi bakasharamu kugishoma omu kahumuro ka camushana. Kandi abandi bo nibagishoma nyekiro batakanyamire. Mbwenu shi iwe obwire oburi kukubonerera ni buha?

YEGA BYINGI

Yega ebi ori kubasa kukora kugira ngu kushoma Bibuli bikizeho kukushemeza. Reba oku ori kubasa kutebekanisa ge kugira ngu ebi ori kushoma omuri Bibuli bibase kukugasira.

Nk’oku turi kubasa kwega kurya ebyokurya ebitari kushushana, ni ko turi kubasa n’okwega kushoma Bibuli

4. Yega oku ori kubasa kushemerererwa kushoma Bibuli

Kutandika kushoma Bibuli ticorobi. Konka, nitubasa kugira ‘ecetengo’ c’okukikora nk’oku omuntu ari kwega kurya ebyokurya bisya ebi atamanyirire. Shoma omuri 1 Petero 2:2, rero muganire ahari eki kibuzo:

Mbehi nomanya ngu ku oragumizemu kushoma Bibuli burizoba noyija kuhika aho okunde kugishoma?

Zana VIDIYO orebe oku abantu bamwe batandikire kushoma Bibuli kikabashemeza. Bwanyima muganire ahari ebi bibuzo.

VIDIYO: Eminyeto eri kwega kukunda Ekigambo ca Ruhanga (5:33)

Omuri vidiyo, ni biha bizibu ebi abacari abato basingwire?
Ni enki ecabakwasize kuhamira aha ntego yabo y’okushoma Bibuli?
Ni enki eki bakozire kugira ngu bakunde kushoma Bibuli?

Ebirakukwase kutandika kushoma Bibuli:

Ronda Bibuli eri kwesigwa kandi eri kukoresa orurimi rworobi. Koresa Bibuli y’obuhinduzi bw’ensi ensya yaba eriho omu rurimi rwawe.
Tandika ori kushoma ebicweka ebiri kukushemeza munonga. Kugira ngu obone obuhabuzi, reba akashanduku akari kugira ngu, “Tandika kushoma Bibuli.”
Handika ebi ori kushoma. Koresa akashanduku akari kugira ngu, “Handika ebi ori kushoma” akari omuri eki kitabo.
Koresa JW Library.^® Nobasa kushomeraho Bibuli ninga shi ohurikiza amaraka gayo okoresize esimu ninga ekindi kikoreso c’obwenge.
Koresa Appendix eri omuri Bibuli y’obuhinduzi bw’ensi ensya. Harimu za mapu, obushanduku, n’ebigambo ebishoborwirwe ebiri kubasa kutuma kushoma Bibuli byakunurira.

5. Tebekanisa ebi ori kwega

Shoma omuri Zaaburi ya 119:34, rero muganire ahari eki kibuzo:

Ahabw’enki kiri ec’omugasho kushaba mbere y’okushoma Bibuli ninga shi kutebekanisa ebi ori kuza kwega?

Ni biha bintu ebirakukwase kugasirwa n’ebi orayege omu ishomo? Waba ori kutebekanisa ebi orayege, gezaho kukora ebi bintu:

Shoma paragurafu z’omu ishomo.
Ronda ebyahandikirwe omuri Bibuli obishome, kandi ogezeho kureba oku biri kubugana n’ebiri omu ishomo.
Ta akarongo aha nshonga nkuru ninga shi aha c’okugarukamu c’ekibuzo; eco nikikukwasa waba ori kushwijuma ishomo n’omwegesa wawe wa Bibuli.

Waba nokimanya?

Abahamya ba Yehova bakakoresa Bibuli nyingi ezitari kushushana. Konka, nitukunda munonga Bibuli y’obuhinduzi bw’ensi ensya bw’ebyahandikirwe ebiri kwera ahakuba ehikire, eyorobi, kandi nekoresa izina rya Ruhanga.—Reba enkuru y’ahari intaneti eri kugira ngu, “Mbehi Abahamya ba Yehova bine Bibuli eyabo?”

ABANTU ABAMWE NIBAGAMBA NGU: “Okwega Bibuli ni omurimo gugumire. Tinyine obwire n’amani g’okuyega.”

Iwe nokitekatekaho enki?

EMPINYE

Kugira ngu ogasirwe n’ebi ori kwega omuri Bibuli, taho obwire bw’okugishoma, oshabe Ruhanga akukwase kushoborocerwa ebi ori kushoma kandi otebekanise buri kuza kwega.