Panahon sa COVID-19 nga pandemic, gi-adjust sa atong mga igsoon ang ilang paagi sa pagpaambit sa makapahupay nga mensahe sa Bibliya ngadto sa uban. Imbes nga makig-estorya sa mga tawo sa publiko o mamalaybalay, sagad ipaambit nila ang mensahe pinaagig telepono ug mga sulat. a Daghan ang nakaapresyar sa ilang mga paningkamot, ug makita gyod ang panalangin ni Jehova. (Proverbio 16:3, 4) Niay pipila ka eksperyensiya gikan sa usa ka isla nga nasod.

 Sa wala pa ang pandemic, regular nga ginabisita ni Helen ang usa ka batabatang babaye ug gitanyagan niya kinig pagtuon sa Bibliya. Pirmeng mobalibad ang babaye. Pero usa ka adlaw una magsugod ang lockdown sa COVID-19, gihatagan siya ni Helen ug Bibliya ug librong Unsay Gitudlo Kanato sa Bibliya? Panahon sa lockdown, gitanyagan na pod siya ni Helen ug pagtuon sa Bibliya ug gipatin-aw ni Helen nga himoon nila kini pinaagig telepono. Misugot na ang babaye. Giganahan kaayo siya sa ilang mga panaghisgot ug wala madugay gihangyo niya si Helen nga kada adlaw silang mag-Bible study! Pirme na pong motambong ang babaye sa Kristohanong mga tigom pinaagig telepono. Dugang pa, gipadapat na niya ang mga gitudlo sa Bibliya ug ginasulti pod niya sa uban ang iyang mga nakat-onan.

 Ingong bahin sa ilang personal nga ministeryo, ang mga Saksi sa usa ka kongregasyon nagpadalag mga sulat sa mga polis sa ilang komunidad. Sa ilang mga sulat, ilang gipasalamatan ang importanteng serbisyo sa mga polis. Nasorpresa ang mga polis sa ilang nadawat nga mga sulat. Giingnan sa usa ka polis ang ansiyano sa kongregasyon nga si Jefferson, “Abi nakog dili ganahan ang mga Saksi ni Jehova sa mga polis.” Gipatin-aw ni Jefferson nga dili na tinuod. Nalipay kaayo ang mga polis sa positibong mensahe sa mga sulat ug ila kining gibutang sa entrada sa police station. “Basig makatabang ni sa uban nga maghunahunag positibo namo,” miingon ang laing polis.

 Si Edna ug Ednalyn parehong regular payunir. b Kay wala silay Internet sa balay, dili sila makatambong ug tigom sa kongregasyon pinaagig videoconference. Maong gitawgan nila ang ilang dili Saksing silingan ug nangutana kon puwede ba silang mo-connect sa iyang Wi-Fi ug moamot ra sa bayronon. Misugot ang ilang silingan ug giingnan sila nga dili na lang mobayad. Dihang giimbitar siya ni Edna ug Ednalyn nga motambong sa tigom, misugot siya. Karon ang silingan, ang usa sa iyang mga anak, ug duha ka apo nga babaye nag-Bible study na uban sa mga Saksi ug regular na silang nagatambong sa Kristohanong mga tigom.

 Ang lokal nga mga igsoon nangimbitar sa ilang mga silingan, katrabaho, ug sa uban sa public talk nga himoon pinaagig videoconference. Si Ellaine, nga nagtrabaho sa ospital, nagduhaduha sa pag-imbitar sa iyang mga katrabaho. Naghunahuna siya nga ang ubang doktor basig negatibog panglantaw sa mga Saksi. Bisan pa niana, giimbitar gihapon niya pinaagig text ang mga doktor sa ospital. Pero naay magtiayong doktor nga nagduhaduha gyod si Ellaine sa pag-imbitar. Naghunahuna siya bahin niini ug iya kining giampo. Dayon, iyang giimbitar sila pinaagig text. Ang asawa mi-reply: “Gusto nimo nga moapil ko sa inyong relihiyon?” Miingon si Ellaine nga bisag kinsa puwedeng motambong sa tigom, dili lang mga Saksi ni Jehova. Pagkasunod adlaw, nasorpresa si Ellaine kay ang magtiayon mi-connect ug sayo sa tigom! Si Ellaine miingon: “Sa wala pa mahuman ang tigom, nag-text nako ang asawa, ingon siya: ‘First time nakong makatambong ug tigom sa mga Saksi ni Jehova. Nindot man diay. Ganahan ko. Salamat sa pag-imbitar nako.’”

 Giimbitar ni Ellaine sa tigom ang 20 ka doktor ug nalipay kaayo siya kay 16 ang nitambong. Sama kang apostol Pablo, si Ellaine miingon: “Nalipay ko nga ‘nakabaton kog kaisog’ sa pagsulti sa ‘maayong balita sa Diyos’ sa akong mga katrabaho.”—1 Tesalonica 2:2.

 Lisod gyod ang pandemic para sa tanan. Pero ang atong mga igsoon niining nasora ug sa uban pang lugar nagpabiling malipayon ug positibo pinaagi sa paghimo sa ilang maarangan sa paghupay ug pagtabang sa uban.—Buhat 20:35.