Ang mga Saksi ni Jehova kanunayng makadawat ug pagbansay para sa tanang bahin sa ilang kinabuhi ingong mga Kristohanon. Apil ani ang buluhaton nga gisugo ni Jesus sa iyang mga sumusunod—ang pagsangyaw ug pagtudlo bahin sa maayong balita sa Gingharian sa Diyos. (Mateo 24:14; 28:19, 20) Ang maong pagbansay madawat namo sa among mga tigom kada semana ug sa among tinuig nga mga kombensiyon ug asembliya. Ang mga Saksi ni Jehova nga naay mga responsibilidad sa kongregasyon o sa organisasyon makadawat ug dugang pagbansay diha sa espesyal nga mga klase para sa pagtuon sa Bibliya.

Niining artikuloha

•  Unsang pagbansay ang nadawat sa mga Saksi ni Jehova?

•  Mga klase para sa pagtuon sa Bibliya sa mga Saksi ni Jehova

•  Asa gibase ang pagbansay nga nadawat sa mga Saksi?

•  Naa bay bayad ang mga pagbansay sa mga Saksi ni Jehova?

•  Sa unsang paagi nakabenepisyo ang mga Saksi ni Jehova niini nga mga pagbansay?

 Mga tigom sa kongregasyon. Kada semana, naa mi duha ka panagkatigom nga ginahimo sa among mga dapit sa pagsimba nga gitawag ug Kingdom Hall. Ang usa ka tigom sagad himoon sa tungatunga sa semana ug ang lain sa hinapos sa semana. Puwedeng motambong ang tanan ug walay himoong pagpangolektag kuwarta.

•   Tigom sa tungatunga sa semana. Ginabansay mi dinhi kon sa unsang paagi mouswag sa pagbasa, pagpakig-estorya, paghatag ug mga pakigpulong, ug pagsangyaw ug pagpanudlo. Ginahimo ni pinaagig mga pakigpulong, pangutanag tubag, demonstrasyon, ug pagtan-awg mga video. Kini nga pagbansay nakatabang namo nga mahimong mas epektibo sa pagsangyaw ug pagtudlo bahin sa Bibliya niadtong mga gustong mokat-on. Ang tanang motambong sa tigom daghan gyod ug makat-onan niini nga pagbansay. Labaw sa tanan, ang among mga tigom makapalig-on sa among pagtuo sa Diyos ug sa among gugma kaniya ug sa kauban namong mga Saksi.

•   Tigom sa hinapos sa semana. Kini nga tigom naay duha ka bahin. Ang una mao ang binase sa Bibliya nga pakigpulong nga sagad maghisgot ug mga topiko para sa mga dili Saksi nga motambong. Ang ikaduha mao ang pangutanag tubag nga panaghisgot sa usa ka artikulo gikan sa tun-anang edisyon sa Bantayanang Torre. a Kini nga mga artikulo maghisgot ug magpatin-aw sa mga topiko ug prinsipyo sa Bibliya, nga makatabang sa among buluhatong pagsangyaw ug sa among personal nga kinabuhi.

 Mga asembliya ug kombensiyon. Kada tuig, naa mi tulo ka dagkong panagkatigom nga tambongan sa mga Saksi sa daghang kongregasyon. Kining makapalipayng mga okasyon maghisgot ug espesipikong tema nga binase sa Bibliya ug naa ni mga pakigpulong, demonstrasyon, interbiyo, ug video. Sama sa among mga tigom sa kongregasyon, ang among mga asembliya ug kombensiyon makadugang sa among kahibalo bahin sa Bibliya ug makatabang namo nga mahimong mas maayong mga ministro sa maayong balita. Puwede gihapong motambong ang tanan ug wala gihapoy himoong pagpangolektag kuwarta.

 Para sa dugang pagbansay, ang ubang Saksi ni Jehova dapiton nga moeskuwela para sa mas lawom nga pagtuon sa Bibliya. Unsay tawag ani nga mga klase? Unsay katuyoan ug gidugayon sa matag usa ani? Ug kinsay puwedeng moeskuwela?

Pioneer Service School

•   Katuyoan: Pagbansay sa bug-os panahong mga ministro, nga gitawag ug mga payunir, b aron mahimo silang mas epektibo sa buluhatong pagsangyaw ug pagpanudlo. Kini nga klase naay mga pangutanag tubag, demonstrasyon, pakigpulong, ug workshop.

•   Gidugayon: Unom ka adlaw.

•   Mga estudyante: Kadtong nakahuman sa ilang unang tuig ingong mga regular payunir. Ang dugaydugay nang mga payunir nga wala makaeskuwela ani sa milabayng lima ka tuig dapiton pod nga moeskuwelag usab.

School for Kingdom Evangelizers

•   Katuyoan: Paghatag ug espesyal nga pagbansay sa eksperyensiyadong bug-os panahong mga ministro. Ang mga estudyante tabangan nga mahimong mas hanas sa ilang pagsangyaw ug pagpanudlo, ug mas detalyado nilang tun-an ang lainlaing topiko sa Bibliya. Daghan niadtong makahuman ug eskuwela ani ang dapiton nga mag-alagad sa mga lugar diin nanginahanglan ug dugang ministro.

•   Gidugayon: Duha ka bulan.

•   Mga estudyante: Ang mga payunir puwedeng moaplay kon nakab-ot nila ang mga kuwalipikasyon ug naa sila sa kahimtang nga moalagad sa lugar nga naay dakong panginahanglan.

School for Congregation Elders

•   Katuyoan: Pagtabang sa mga ansiyano, o sa mga tigdumala sa kongregasyon, aron mahimo nila ang ilang mga responsibilidad sama sa pagpanudlo ug pag-atiman sa panginahanglan sa kauban nilang mga Saksi. Makatabang pod ni aron mas molawom ang ilang gugma kanila ug ang ilang gugma sa Diyos.—1 Pedro 5:2, 3.

•   Gidugayon: Lima ka adlaw.

•   Mga estudyante: Bag-ong mga ansiyano ug eksperyensiyadong mga ansiyano nga wala makaeskuwela ani nga klase sa milabayng lima ka tuig.

School for Circuit Overseers and Their Wives

•   Katuyoan: Pagbansay sa mga tigdumala sa sirkito c aron mas epektibo nilang mahimo ang ilang mga responsibilidad. (1 Timoteo 5:17) Kini nga klase makatabang pod niining Kristohanong mga ansiyano ug sa ilang mga asawa aron mas molawom ang ilang kahibalo bahin sa Bibliya.

•   Gidugayon: Usa ka bulan.

•   Mga estudyante: Bag-ong mga tigdumala sa sirkito ug ang ilang mga asawa nga nakahuman sa una nilang tuig sa ilang asaynment. Dayon, dapiton sila sa pag-eskuwela pag-usab kada lima ka tuig.

Kingdom Ministry School

•   Katuyoan: Pagtabang sa mga ansiyano ug ministeryal nga mga alagad d nga mahimo ang ilang mga responsibilidad sa kongregasyon samtang ginakonsiderar ang presenteng mga kahimtang ug panginahanglan. (2 Timoteo 3:1) Ang klase himoon kada pipila ka tuig.

•   Gidugayon: Depende sa kahimtang, kasagaran usa ka adlaw.

•   Mga estudyante: Mga tigdumala sa sirkito, mga ansiyano, ug ministeryal nga mga alagad.

Bethel Service School

•   Katuyoan: Pagtabang sa mga membro sa Bethel e nga molampos sa ilang asaynment ug molawom ang ilang gugma sa Diyos ug sa usag usa.

•   Gidugayon: Lima ug tunga ka adlaw.

•   Mga estudyante: Bag-ong mga membro sa Bethel. Ang dugaydugay nang mga membro nga wala makaeskuwela ani nga klase sa milabayng lima ka tuig dapiton pod sa pag-eskuwelag usab.

Watchtower Bible School of Gilead

•   Katuyoan: Pagtabang sa mga estudyante nga mas molawom ang ilang apresasyon sa Pulong sa Diyos ug mapadapat ang ilang nakat-onan. (1 Tesalonica 2:13) Ang matinumanong mga Kristohanon nga nakaeskuwela sa Gilead dako kaayong tabang sa organisasyon ni Jehova ug sa tibuok kalibotang buluhaton nga pagpanudlo bahin sa Bibliya. Ang mga makahuman ug eskuwela ani mahimong iasayn sa bug-os panahong pagsangyaw ug pagpanudlo o kaha sa pag-alagad sa usa ka sangang buhatan sa mga Saksi ni Jehova, sa ila mang nasod o sa laing lugar.

•   Gidugayon: Lima ka bulan.

•   Mga estudyante: Paaplayon sa mga sangang buhatan ang ilang napili nga bug-os panahong mga ministro. Ang klase ginahimo sa Watchtower Educational Center sa Patterson, New York, United States.

School for Branch Committee Members and Their Wives

•   Katuyoan: Pagbansay sa mga membro sa Komite sa Sangang Buhatan f aron epektibo nilang madumala ang mga buluhaton sa ilang sangang buhatan ug ang espirituwal nga kalihokan sa mga Saksi ni Jehova sa ilang nasod o sa mga nasod nga ilang gidumala.

•   Gidugayon: Duha ka bulan.

•   Mga estudyante: Dapiton sa Hedkuwarter sa mga Saksi ni Jehova nga moeskuwela ang napiling mga membro sa Komite sa Sangang Buhatan ug ang ilang mga asawa. Ginahimo ni sa Watchtower Educational Center sa Patterson, New York.

 Ang Bibliya mao gyod ang pangunang libro nga gigamit sa mga Saksi ni Jehova sa ilang mga pagbansay. Nagtuo mi nga ang Bibliya gikan gyod sa Diyos ug nga naa dinhi ang pinakamaayong giya para sa tanang bahin sa kinabuhi sa usa ka Kristohanon.—2 Timoteo 3:16, 17.

 Wala. Libre ang mga klase. Ang mga buluhaton sa mga Saksi ni Jehova gisuportahan pinaagig boluntaryong mga donasyon.—2 Corinto 9:7.