Si Cecil mapainubsanon nga brader nga naghunahuna gyod sa kaayohan sa uban. Ang iyang ehemplo, apil sa akong mama ug sa ubang matinumanong mga igsoon sa kongregasyon, nagpalig-on sa akong “tinguha sa pagbuhat sa mga butang nga gusto” ni Jehova, o sa paghatag sa akong kinamaayohan kaniya. (Filipos 2:13) Mao ni ang estorya sa akong kinabuhi.

 Natawo ko niadtong 1943. Ang akong mga ginikanan nagpuyo sa usa ka uma duol sa siyudad sa Bundaberg, usa ka rehiyon sa Queensland, Australia, diin daghag katubhan. Naandan sa mga tawo nga moadto sa sentro kada Sabado sa gabii aron magtapoktapok. Kas-a niadtong 1939, nailaila sa akong mga ginikanan ang duha ka payunir (bug-os panahong ministro sa mga Saksi ni Jehova) ug nag-estorya sila bahin sa Bibliya. Natandog ang akong mga ginikanan sa ilang nakat-onan, ug sa ngadtongadto nahimo silang mga Saksi ni Jehova. Ingong resulta, kami sa akong ate nga si Jean nagdako sa kamatuoran. Pero makapaguol, si Papa namatay kay nahulog sa hagdanan. Siyete pa akong edad adto ug naguol kaayo ko pagkamatay niya. Pero di ko malimot nga kugihan siya ug maayo mopakatawa. Eksayted kaayo ko nga mabanhaw si Papa ug mas mailhan pa siya!—Buhat 24:15.

 Si Mama buotan ug makataronganon. Kami ni Ate makasulti niya sa among gusto ug dili gusto. Pero kon bahin na ganig prinsipyo sa Bibliya ug pagsimba kang Jehova, lig-on si Mama. Regular ming motambong sa mga tigom, ug limitahan namo ni Ate Jean ang among pagpakig-uban sa mga dili Saksi kon dili tingklase. (1 Corinto 15:33) Dihang hinumdoman nako ni, maapresyar gyod nako ang kalig-on ni Mama.

 Madasigon pod kaayo si Mama sa pagsangyaw, ug pirme siyang mag-vacation pioneer (karon gitawag nga oksilyare payunir). Nahinumdom ko nga regular niyang hatdan ug magasing Bantayanang Torre ug Pagmata! ang kapin sa 50 ka balay. Bisan dihang edaran ug luya na siya, wala gyod moawop ang iyang kadasig nga tabangan ang mga tawo nga interesado sa kamatuoran. Nakita namo ang iyang gugma para sa uban, ilabina para namo nga iyang mga anak, maong gimahal gyod namo siya ug gusto namo siyang sundogon. Niadtong 1958, pag-edad nakog 14, nag-ampo ko kang Jehova nga moalagad ko niya ug nagpabawtismo ko.

 Wala madugay, nabawtismohan pod ang among kakongregasyon nga si Rudolf, nga mga 20 pay edad. Gikan siyag Germany. Kada Sabado sa buntag, sagad sangyawan namo ni Rudolf ang mga tawo nga naglingkod sa ilang sakyanan samtang ang ubang membro sa ilang pamilya naay gipamalit.

 Si Rudolf dasig nga brader, ug hagaron ko niya nga mag-vacation pioneer kon tingbakasyon sa klase. Kas-a, nagkuyog mig unom ka semana sa siyudad sa Gladstone, nga mga 190 kilometros (118 ka milya) amihanan sa Bundaberg. Tungod sa pagtabang ni Rudolf nako ug sa akong kalipay sa pag-vacation pioneer, ganahan ko nga mahimong regular payunir. Pag-edad nakog 16, nakab-ot nako ang akong tumong ug determinado ko nga bug-os panahon nakong alagaran si Jehova sa tibuok nakong kinabuhi.

 Ang una nakong asaynment ingong payunir maoy didto sa Mackay, siyudad sa amihanan sa Bundaberg ug dili ra layo gikan sa Great Barrier Reef. Paglabayg mga usa ka tuig, dihang nag-edad kog 17, natudlo ko ingong espesyal payunir a sa hilit nga lugar sa Australia nga gamay rag nagpuyo. Ang akong partner sa pagpayunir mao si Bennett (Ben) Brickell, usa ka dinihogang brader ug magulang nakog kapin sa 30 ka tuig. b Pribilehiyo gyod nako nga makauban si Brader Brickell, nga nailhan sa kadaghanan ingong maayo kaayo nga payunir!

 Ang among teritoryo sa northwestern Queensland maoy sa Gulf Country—rehiyon sa utlanan sa Gulf of Carpentaria. Niadtong panahona, kami ra ni Kuya Ben ang Saksi niining teritoryo nga gamay rag namuyo. Usahay maabtan mig pipila ka oras nga magbiyahe gikan sa usa ka balay ngadto sa laing balay. Dihang magbiyahe mi, sagad hisgotan ni Kuya Ben ang iyang mga eksperyensiya sa una diha sa ministeryo. Apil sa iyang hisgotan ang pagsangyaw gamit ang mga sound car c panahon sa Gubat sa Kalibotan II, dihang gidili ang buluhaton sa mga Saksi ni Jehova sa Australia.

 Human sa tibuok adlaw nga pagsangyaw, iplastar namo ang among katulgan nianang gabhiona sa usa ka lugar duol sa kalsada. d Aron makaluto mig panihapon, mangahoy mi ug magdaob. Ang akong higdaanan maoy morag trapal nga di mabasa, dayon naa koy habol ug unlan. Nahinumdom pa ko kon unsa ka dako ang akong apresasyon kang Jehova samtang klaro nakong makita ang kalangitan nga napunog mga bituon kay wala may mga suga sa palibot.

 Niining hilit nga lugar, delikado kon magub-an kag sakyanan. Dihay higayon nga naputlan mig ehe sa sakyanan. Init ang panahon adtong adlawa, ug gamay na lang ang among tubig. Aron mailisan ni, misakay si Kuya Ben sa milabay nga sakyanan paingon sa lungsod sa Cloncurry. Tulo ka adlaw nako siyang gihulat. Naay pipila ka sakyanan nga molabay matag adlaw, ug hatagan ko sa buotang mga drayber ug tubig. Naa poy mihatag nakog daan na nga libro. Ingon siya, “Basaha ni migo, basin makatabang ni nimo.” Nasorpresa ko, kay bisag dili gikan sa atong organisasyon ang libro, naghisgot ni bahin sa eksperyensiya sa mga Saksi ni Jehova diha sa mga kampo diin sila gipriso ug gipugos sa pagpatrabaho sa Nazi!

 Halos usa ka tuig ming nag-uban ni Kuya Ben sa pagpayunir. Ang kataposan niyang giingon nako sa wala pa mi magbulag maoy, “Padayon baya Dong ha.” Ang debosyon ug kadasig ni Kuya Ben nakatabang nako nga mahimong mas determinado nga magpabilin sa bug-os panahong pag-alagad.

 Human sa pipila ka tuig nga pagpayunir sa hilit nga lugar, gidapit ko nga mahimong tigdumala sa sirkito. Sa ato pa, makig-uban kog mga usa ka semana sa matag kongregasyon ug isolated group sa usa ka sirkito. Sulod sa daghan nang katuigan, nakaalagad ko sa upat ka sirkito. Apil ani ang mga kongregasyon sa Queensland ug New South Wales. Dayon pagka-1971, nakapribilehiyo ko sa pagtambong sa ika-51 nga klase sa Gilead, tunghaan sa mga Saksi ni Jehova nga naa sa New York. Ang lima ka bulan nga pagpokus sa pagtuon sa Bibliya ug ang makapadasig nga panag-ubanay kauban sa akong mga classmate ug instruktor nakatabang nako nga maandam sa akong sunod nga asaynment—ang pagkahimong misyonaryo sa Taiwan.

 Siyam mi sa among klase nga giasayn sa Taiwan, apil si Ian Brown, nga taga-New Zealand. Siya ang nahimo nakong partner. Halos wala gyod mi nahibaloan bahin sa Taiwan. Wala gani mi kahibalo kon asa ni dapita kon wala mi mitan-aw sa mapa.

 Lahi gyod kaayo ang hilit nga lugar sa Queensland ug ang Taiwan! Una sa tanan, lisod kaayo ang ilang pinulongan—Chinese. Taudtaod pod nga wala koy masabtan sa mga tigom sa kongregasyon, diin ta makakuhag dakong espirituwal nga pagdasig. Unya dili pod mi magkasinabot sa mga igsoon. Kini nga situwasyon nakatabang nga makita namo ni Ian kon unsa ka importante ang pagbansay sa Gilead ug ang daghang butang nga among nakat-onan sa klase. Kana, uban ang regular nga pagtuon sa Bibliya ug kinasingkasing nga pag-ampo, nakatabang namo nga molahutay. Bisag dili kaayo mi magkasinabot sa mga igsoon, nadasig gyod mi sa ilang gugma para namo ug para kang Jehova.

 Pag-abot sa Taiwan, ang tanang misyonaryo gitudloag Chinese. Ang nagtudlo namo maoy sister nga taga-Australia nga si Kathleen Logan, e nga mi-graduate sa ika-25 nga klase sa Gilead. Nagpokus gyod mi sa pagkat-on sa pinulongan. Ug sumala sa giingon kanamo, gigamit dayon namo ang among nakat-onan. Sa among unang adlaw sa ministeryo, nag-memorize mi ni Ian ug mubong presentasyon. Sa nagpaingon na mi sa teritoryo, nag-estorya mi kon kinsay unang mosangyaw. Kay magulang man ko niya, ako siyang giingnan nga siyay una. Ang tagbalay maoy Chinese nga lalaki nga respetadog barog. Naminaw siya pag-ayo samtang gisagolsagol ni Ian ang Chinese ug English. Dayon gipangutana mi niya kon unsay among tuyo, ug nakurat gyod mi kay maayo kaayo siya mo-English! Taudtaod pod ming nag-estorya, ug sa kataposan sa among panag-estorya, iya ming gidasig nga di moundang sa pagkat-og Chinese. Ang iyang gisulti nakadasig namo nga ‘mopadayon,’ sumala pa sa pirmeng isulti ni Kuya Ben.

 Apil sa among teritoryo ang dakong bahin sa kaulohang siyudad, ang Taipei. Kadaghanan sa mga tawo didto wala pa makadungog sa mensahe sa Gingharian kay gamay ra man kaayo ang Saksi didto adtong panahona. Pero wala ni makapugong namo. Hinuon, gisugdan namo ni Ian ang madasigong pagsangyaw didto. Niadtong panahona, sagad ginatos ka magasin ang among matanyag kada bulan. Ang uban midawat tingali sa mga magasin kay gusto lang nilang mahibaloan kon kinsa mi ug kon unsay among tuyo. Pero gihimo gihapon namo ang among kinamaayohan sa pagsabwag ug mga binhi sa kamatuoran, ug masaligon mi nga ang uban niini motubo diha sa madinawaton ug kasingkasing nga mga tawo.

 Niadtong panahona, nahimo nakong higala ang usa ka Taiwanese nga sister nga si Wen-hwa. Nahigugma siya sa kamatuoran ug gusto niyang tabangan ang mga tawo nga makabenepisyo sa mensahe sa Bibliya sama niya. Tungod niini, gitabangan niya ang daghang misyonaryo, apil ko, nga mouswag sa pagkat-og Chinese. Nahigugma ko niining maayo kaayo nga sister, ug naminyo mi niadtong 1974.

 Gitabangan ni Wen-hwa ang mga misyonaryo nga mahimong mas epektibo sa ministeryo. Pananglitan, iya ming gitabangan nga makakat-on sa pinulongan pinaagi sa pagpasabot kanamo sa mga kostumbre ug panghunahuna sa mga Taiwanese. Ug gitabangan mi niya sa pag-adjust sa among mga presentasyon diha sa teritoryo, nga kadaghanan nila mga Budhista ug Taoista. Komon pod ang pagsimba sa katigulangan, ug daghan ang wala pa makabasag Bibliya o wala pa gani makakita niini. Maong gipokus namo ang among mga presentasyon bahin sa Maglalalang—nga Jehova ang iyang ngalan ug kon nganong makaseguro ta nga naglungtad siya. Pananglitan, kon naay mag-uuma o mangingisda nga moingon “Nagdepende mi sa langit para sa pagkaon,” moingon mig: “Kinsa man ang nagtagana sa tanang pagkaon? Dili ba ang Labing Gamhanang Diyos, nga naghimo sa tanang butang ug kinsa angay natong simbahon?”

 Paglabay sa panahon, gigantihan ra ang among mga paningkamot. Ang binhi sa kamatuoran napugas diha sa daghang maayog kasingkasing. Ang uban niini nga mga Bible study naningkamot sa pagbiya sa bakak nga mga pagtulon-an nga dugay kaayo nilang gituohan ug sa mga kostumbre nga dili makapalipay kang Jehova. Pero sa tabang sa mga misyonaryo ug sa lokal nga mga igsoon, milampos sila, ug ang ilang kinabuhi miuswag pag-ayo. (Juan 8:32) Daghang brader sa ulahi ang natudlo ingong ansiyano ug ministeryal nga alagad, ug daghan pod sa mga igsoon ang misulod sa bug-os panahong pag-alagad, apil na ang pag-alagad sa lokal nga sangang buhatan, o Bethel.

 Sugod niadtong 1976, nakapribilehiyo ko sa pag-alagad sa Taiwan Branch Committee samtang nag-alagad gihapon ko ingong misyonaryo sa field. Pagka-1981, kami ni Wen-hwa gidapit sa Bethel, diin padayon kong nag-alagad sa branch committee sa daghang tuig. Kapin nag 60 ka tuig sukad nga misulod ko sa bug-os panahong pag-alagad. Kapig 50 ka tuig niana maoy sa Taiwan, ug halos 50 ka tuig uban sa akong pinanggang asawa. Ang akong higala ug kanhing partner sa pagkamisyonaryo nga si Ian Brown nagpabilin dinhi sa bug-os panahong pag-alagad hangtod sa iyang kamatayon niadtong 2013.

 Naningkamot mi ni Wen-hwa nga magpabiling busy sa among buluhaton sa Bethel, sa among Chinese nga kongregasyon, ug sa ministeryo. Nagpasalamat gyod mi kang Jehova niining bililhon nga mga pribilehiyo. Gipalig-on niya ang akong tinguha sa pag-alagad kaniya sa tibuok kasingkasing sa bata pa ko, ug padayon na niyang gihimo para nako ug kang Wen-hwa karon nga tigulang na mi.