Gibati sa uban nga usik lang sa panahon ang pag-ampo ug walay mamati niini. Ang uban nag-ampo pero para nila, wala sila tubaga. Gihanduraw sa usa ka ateyista kon unsay hitsura sa Diyos ug dayon miampo: “Padungga ko bisag hunghong lang.” Apan siya miingon nga ang Diyos “nagpakahilom.”

Pero, gipasaligan ta sa Bibliya nga duna gyoy Diyos ug mamati siya sa mga pag-ampo. Nasulat sa Bibliya kini nga pamulong alang sa usa ka katawhan kaniadto: “Siya [ang Diyos] sa walay pakyas magpakitag pabor kanimo sa tingog sa imong pagtuaw; inigkadungog gayod niya niini siya sa tinuod motubag kanimo.” (Isaias 30:19) Matod sab sa lain pang teksto: “Ang pag-ampo sa mga matul-id makapahimuot kaniya.”—Proverbio 15:8.

Mabasa sab sa Bibliya ang mga pag-ampo nga gidungog. Usa ka teksto naghisgot nga si Jesus naghimog “mga pangaliya . . . ngadto sa Usa nga arang makaluwas kaniya” ug “gidungog siya nga may pag-uyon.” (Hebreohanon 5:7) Ang ubang pananglitan anaa sa Daniel 9:21 ug 2 Cronicas 7:1.

Apan nganong gibati sa uban nga wala tubaga ang ilang pag-ampo? Aron dunggon, kinahanglang moampo lang ta kang Jehova, * ang Diyos sa Bibliya, ug dili sa bisan unsang diyos o sa mga katigulangan. Gusto sab sa Diyos nga kita ‘mangayo sumala sa iyang kabubut-on’—sa mga butang nga iyang giuyonan. Kon kana ang atong paagi sa pag-ampo, gipasaligan ta sa Diyos nga “siya magpatalinghog kanato.” (1 Juan 5:14) Busa, aron dunggon ang atong mga pag-ampo, kinahanglang makaila ta sa Diyos sa Bibliya ug mahibalo sa iyang kabubut-on.

Gituohan sa daghan nga ang pag-ampo dili lang kay kalihokan sa pagsimba, kondili ang Diyos maminaw gyod ug motubag sa mga pag-ampo. Si Isaac nga taga-Kenya miingon: “Miampo ko nga tabangan kong masabtan ang Bibliya. Sa wa madugay, dihay miduol nako ug gitanyagan ko sa tabang nga akong gikinahanglan.” Gusto ni Hilda, nga taga-Pilipinas, nga moundang ug panigarilyo. Kay kadaghan na siya mapakyas, misugyot ang iyang bana, “Unsa kahag moampo ka sa Diyos para sa tabang?” Gisunod niya ang tambag ug miingon: “Dili ko makatuo sa paagi sa Iyang pagtabang nako. Kalit nga nawad-an kog gana nga manigarilyo. Nakaundang ra gyod ko.”

Gusto kaha sa Diyos nga tabangan ka sa imong mga panginahanglan nga uyon sa iyang kabubut-on?