▪ Nakakita ka na bag belen o mga drama bahin sa tulo ka hari, o maalamong mga lalaki, nga miduaw sa bag-ong natawong si Jesus diha sa pasongan? Sumala sa sugilanon, gigamit sa Diyos ang usa ka bituon aron giyahan sila ngadto sa kuwadra sa Betlehem. Daghan kaayong bata ang nakasag-ulo pa gani sa ngalan niadtong tulo ka hari—si Melchor, Gaspar, ug Baltasar. Apan, kini bang popular nga sugilanon nahiuyon sa giingon sa Bibliya? Wala. May mga rason kon nganong dili kini tukma.

Una, kinsa man ang maong mga lalaki? Sa orihinal nga Gregong pinulongan, ang Bibliya wala magtawag kanila nga hari o maalamong mga lalaki. Sila maoy mga mago, o mga astrologo. Dayag nga sila nagbatasan sa paganong pagpanagna nga gibase sa mga bituon. Ang Bibliya wala magbutyag sa ngalan ni sa gidaghanon sa maong mga bisita.

Ikaduha, kanus-a miduaw ang maong mga lalaki? Dili sa panahon nga masuso pa si Jesus ug anaa sa pasongan. Giunsa man nato pagkahibalo niana? Ang magsusulat sa Ebanghelyo nga si Mateo miingon: “Sa misulod sila sa balay nakita nila ang bata uban kang Maria nga inahan niini.” (Mateo 2:11) Matikdi nga si Jesus dili na masuso nianang panahona. Si Maria ug Jose wala na magpuyo sa kuwadra kondili diha na sa balay.

Ikatulo, kinsay nagpadala sa maong “bituon” aron mogiya sa mga astrologo? Ang mga lider sa relihiyon karon sagad nagtudlo nga ang Diyos maoy nagpadala niana. Tinuod ba kana? Hinumdomi, ang “bituon” wala una magtultol sa mga astrologo ngadto sa Betlehem. Hinunoa, nagtultol kini kanila ngadto kang Haring Herodes sa Jerusalem. Ilang gibutyag sa masinahon ug gamhanang mamumuno ang bahin kang Jesus ug gihatagan pa gani siyag bug-at nga rason nga magdumot sa bata kinsa mahimong “hari sa mga Hudiyo.” (Mateo 2:2) Sa kamalinglahon, giingnan sila ni Herodes nga itaho kaniya ang eksaktong nahimutangan sa bata, kay buot sab kono niya kining pasidunggan. Dayon gitultolan sa “bituon” ang mga astrologo ngadto kang Jose ug Maria. Busa ang gihimo sa mga astrologo moresulta unta sa kamatayon sa bata kon wala pa mangilabot ang Diyos. Maayo gani kay nangilabot gyod siya. Sa kasuko ni Herodes nga wala mobalik kaniya ang mga astrologo, iyang gimando nga patyon ang tanang batang lalaki nga dos anyos paubos diha sa Betlehem ug sa palibot niana.—Mateo 2:16.

Sa ulahi, si Jehova nagtawag kang Jesus nga “akong Anak, ang hinigugma, nga akong giuyonan.” (Mateo 3:17) Tagda kini: Ang mao bang mahigugmaon ug matarong nga Amahan mopilig paganong mga astrologo—mga nagabuhat ug espiritismo, butang nga gidili sa iyang Balaod—ingong iyang mga mensahero? (Deuteronomio 18:10) Mogamit kaha siyag bituon sa pagtultol kanila ngadto sa labing peligroso ug gamhanang mamumuno, nga magdalag mensahe nga seguradong makapasina ug makapasuko kang Herodes? Gamiton kaha sa Diyos ang mao gihapong bituon ug mga astrologo aron ibutyag ang nahimutangan sa iyang anak nga walay mahimo nianang panahona?

Sa pag-ilustrar: Usa ka maayong komander ang nagpadala sa iyang kinamaayohang sundalo sa usa ka peligrosong misyon ngadto sa teritoryo sa kaaway. Ibutyag ba niya sa kaaway kon asa ang maong sundalo? Dili gayod! Sa susama, si Jehova nagpadala sa iyang Anak dinhi sa peligrosong kalibotan. Ibutyag ba Niya sa daotan nga Haring Herodes ang nahimutangan sa Iyang anak nga walay mahimo niadtong panahona? Dili gayod!

Nan, kinsa may nagpadala sa “bituon,” o samag bituon nga butang? Aw, kinsa bay gusto gayod nga makita ang batang si Jesus nga mamatay, aron dili siya modako ug matuman ang iyang misyon sa yuta? Kinsa bay naningkamot sa pagpahisalaag sa mga tawo ug sa pagpasiugdag kabakakan, kapintas, ug pagpamatay? Gipaila mismo ni Jesus kon kinsa ang “bakakon ug ang amahan sa bakak,” ang usa nga “mamumuno sa iyang pagsugod”—si Satanas nga Yawa.—Juan 8:44.