Hinungdanon ba ang mga Tubag?

“Kamo mahibalo sa kamatuoran, ug ang kamatuoran magpagawas kaninyo.”—JUAN 8:32.

ANG Bibliya naundag kamatuoran nga makapagawas kanato gikan sa makapalibog o makapahisalaag nga mga pagtulon-an bahin kang Jesus. Apan, hinungdanon ba kon unsay atong gituohan bahin niya? Oo. Hinungdanon kana kang Jehova ug kang Jesus. Ug angayng hinungdanon usab kana kanato.

● Nganong hinungdanon kana kang Jehova? Tungod kay “ang Diyos gugma.” (1 Juan 4:8) Buot ni Jehova nga kita mabuhing malipayon sa walay kataposan. Si Jesus miingon: “Gihigugma pag-ayo sa Diyos ang kalibotan [sa katawhan] nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya . . . makabaton ug kinabuhing walay kataposan.” (Juan 3:16) Gipadala sa Diyos ang iyang Anak aron sa paglukat kanato ug sa pagbukas sa kahigayonan nga kita mabuhi sa walay kataposan sa Paraiso sa yuta sumala sa Iyang orihinal nga katuyoan. (Genesis 1:28) Gusto gayod sa Diyos nga ihatag ang gasa nga kinabuhing dayon niadtong nakakat-on sa kamatuoran bahin sa iyang Anak ug milihok uyon niana.—Roma 6:23.

● Nganong hinungdanon kana kang Jesus? Gihigugma usab ni Jesus ang katawhan. Siya nagpakitag nagsakripisyo-sa-kaugalingon nga gugma pinaagi sa kinabubut-ong paghatag sa iyang kinabuhi alang kanato. (Juan 15:13) Nasabtan niya nga pinaagi niana iyang gitagana ang bugtong dalan sa kaluwasan. (Juan 14:6) Angay ba kitang matingala kon buot ni Jesus nga makita nga daghan ang makabenepisyo sa iyang halad lukat? Kanay hinungdan nga gisugo niya ang iyang tinuod nga mga sumusunod sa pagtudlo sa mga tawo sa tibuok kalibotan bahin sa kabubut-on ug katuyoan sa Diyos.—Mateo 24:14; 28:19, 20.

● Nganong angayng hinungdanon usab kana kanato? Handurawa sa makadiyot ang mga butang nga hinungdanon gayod kanimo—ang imong panglawas ug pamilya. Nangandoy ka bag maayong panglawas ug mas maayong kinabuhi alang nimo ug sa imong mga minahal? Si Jehova pinaagi ni Jesus nagtanyag kaninyo sa paglaom nga makabatog hingpit nga panglawas ug walay-kataposang kinabuhi sa usa ka bag-ong kalibotan, nga walay kasakit ug pag-antos. (Salmo 37:11, 29; Pinadayag 21:3, 4) Buot ba nimong mabuhi sa ingon niana nga kahimtang? Kon mao, duna kay angayng buhaton.

Basaha pag-usab ang tekstong gikutlo sa ulohan: “Kamo mahibalo sa kamatuoran, ug ang kamatuoran magpagawas kaninyo.” Ang kamatuoran bahin kang Jesus ug ang iyang papel diha sa katumanan sa katuyoan sa Diyos makapagawas kanato gikan sa kinangil-arang matang sa pagkaulipon—pagkaulipon sa sala ug kamatayon. Apan aron masinati kana, kinahanglang “mahibalo [ka] sa kamatuoran.” Nganong dili mokat-on ug dugang bahin niana ug kon sa unsang paagi ikaw ug ang imong mga minahal makabenepisyo niana? Ang mga Saksi ni Jehova malipayng motabang nimo.