Mga Magbabasa Nangutana . . .

Laay ba ang Kinabuhing Walay Kataposan sa Paraiso?

▪ Ang Bibliya naghatag kanatog paglaom nga mabuhing walay kataposan sa Paraiso sa yuta. (Salmo 37:29; Lucas 23:43) Laay ba unya ang kinabuhing walay kataposan sa usa ka hingpit nga yuta?

Maayo kana nga pangutana. Nakaplagan sa mga tigdukiduki nga tungod sa pirmeng kalaay ang usa mahimong mabalak-on, magul-anon, ug arisgado. Kadtong walay katuyoan sa kinabuhi o gitak-an na sa ilang inadlawng rutina mahimong laayon. Ang kinabuhi ba niadtong magpuyo sa Paraiso walay katuyoan? Pul-an ka ba sa inadlawng rutina nianang panahona?

Una, palandonga nga si Jehova nga Diyos, ang Awtor sa Bibliya, mao ang nagtanyag kanatog kinabuhing walay kataposan. (Juan 3:16; 2 Timoteo 3:16) Ang gugma maoy pangunang hiyas sa Diyos. (1 Juan 4:8) Si Jehova nahigugma pag-ayo kanato ug naghatag sa tanang maayong butang nga ato karong gipahimuslan.—Santiago 1:17.

Nasayod ang atong Maglalalang nga aron ta magmalipayon, kinahanglang dunay katuyoan ang atong buluhaton. (Salmo 139:14-16; Ecclesiastes 3:12) Sa Paraiso, dili nato hunahunaon nga kita samag walay hinungdang piyesa diha sa dako kaayong makina. Ang atong buluhaton makabenepisyo mismo kanato ug niadtong atong gihigugma. (Isaias 65:22-24) Kon duna kay makapainteres, makapahinam ug kanunayng buluhaton, laayon ka ba?

Hunahunaa usab nga dili tugotan ni Jehova nga Diyos nga si bisan kinsa lang ang makapuyo sa Paraiso. Kadto lamang nagasundog sa iyang Anak nga si Jesus mao ang iyang hatagag gasang kinabuhing walay kataposan. (Juan 17:3) Sa dinhi pa sa yuta, gikalipay ni Jesus ang pagbuhat sa kabubut-on sa iyang Amahan. Pinaagi sa pulong ug panig-ingnan, iyang gitudlo sa iyang mga sumusunod nga ang malungtarong kalipay nagsumikad sa paghatag kay sa pagdawat. (Buhat 20:35) Sa gipasig-uli nga Paraiso, ang tanan magkinabuhi sa duha ka dagkong sugo—ang paghigugma sa Diyos ug sa silingan. (Mateo 22:36-40) Handurawang napalibotan ka sa mga tawong dili hakog ug tinuod nga nahigugma kanimo ug sa ilang buluhaton! Sa imong hunahuna, laayon ka bang makig-uban kanila?

Unsa pay laing mapahimuslan sa Paraiso? Matag adlaw, duna tay makat-onang bag-ong butang bahin sa atong Maglalalang. Ang mga tigdukiduki nakadiskobre nag daghang katingalahang butang bahin sa kalalangan ni Jehova. (Roma 1:20) Apan, sa pagkatinuod, hapaw ra kaayo kini nga kahibalo. Linibo ka tuig kanhi, gipamalandong sa matinumanong si Job ang iyang nahibaloan sa kalalangan sa Diyos, ug ang iyang konklusyon mapadapat gihapon karon. Siya miingon: “Kini maoy kadaplinan lamang sa iyang [Diyos] mga dalan, ug hunghong ra ang atong nadungog bahin kaniya! Apan bahin sa iyang gamhanan nga dalugdog kinsa ba ang makasabot?”—Job 26:14.

Bisag unsa pa ka taas unya ang atong kinabuhi, dili gayod nato matugkad ang tanan bahin kang Jehova ug sa iyang mga buhat. Ang Bibliya nag-ingon nga gibutang sa Diyos sa atong kasingkasing ang tinguha nga mabuhing walay kataposan. Apan kini usab nag-ingon nga kita “dili makatugkad sa buhat nga nahimo sa matuod nga Diyos sukad sa sinugdan hangtod sa kataposan.” (Ecclesiastes 3:10, 11) Nan, laayon ka ba unya sa pagkakat-on ug bag-ong mga butang bahin sa imong Maglalalang?

Bisan gani karon, kadtong puliking nakig-ambit sa buluhaton nga makabenepisyo sa uban ug makahatag ug kahimayaan sa Diyos panagsa rang laayon. Kita makatino nga kon kita kanunayng puliki sa pagbuhat sa samang buluhaton, dili gayod kita laayon—bisag mabuhi ta hangtod sa hangtod.

[Picture Credit Lines sa panid 27]

Yuta: Image Science and Analysis Laboratory, NASA-Johnson Space Center; Galaksiya: The Hubble Heritage Team (AURA/STScI/NASA)