Among mga Magbabasa Nangutana

Tinuod ba nga ang Masusong si Jesus Giduaw sa Tulo ka Hari?

Sa mga dapit sa Habagatang Amerika, Sidlakang Uropa, ug Asia ilado kaayo ang asoy bahin sa tulo ka hari, o maalamong mga tawo, nga nagdalag mahalong mga gasa alang kang Jesus sa dihang siya natawo. Tinuod ba kini nga asoy? Nahiuyon ba kini sa giingon sa Bibliya? Atong tan-awon.

Ang Ebanghelyo ni Mateo ug Lucas nagrekord sa pagkahimugso ni Jesus. Kini nga mga asoy nagpakita nga ang mga magbalantay sa karnero gikan sa haduol nga kapatagan mao lamang ang miduaw kang Jesus sa dihang siya natawo. Ang giingong mga hari, o maalamong mga tawo, sa pagkatinuod maoy mga astrologo, dili mga hari, ug wala hisgoti kon pila sila ka buok. Sa dihang miduaw ang mga astrologo, si Jesus dili na masuso kondili usa na ka bata, ug wala na sa pasungan apan didto na sa usa ka balay. Ang ilang pagduaw nakapameligro pa gani sa kinabuhi ni Jesus!

Matikdi pag-ayo ang asoy ni Lucas bahin sa pagkahimugso ni Jesus, ug imong mabasa nga kini nag-ingon: “May mga magbalantay . . . nga nagpuyo sa gawas ug nagpadayon sa pagbantay sa ilang mga panon sa kahayopan sa kagabhion. Ug sa kalit ang manulonda ni Jehova mitindog sa duol nila, ug . . . miingon kanila: ‘. . . Makaplagan ninyo ang usa ka masuso nga giputos sa mga bakbak ug nagahigda sa usa ka pasungan.’ . . . Ug sila nagdali sa pag-adto ug nakaplagan si Maria maingon man si Jose, ug ang masuso nga naghigda sa pasungan.”—Lucas 2:8-16.

Si Jose, Maria, ug ang mga magbalantay mao lamang ang kauban sa masusong si Jesus. Wala nay laing gihisgotan si Lucas.

Karon susiha ang asoy sa Mateo 2:1-11 gikan sa King James nga Bibliya: “Karon sa dihang si Jesus natawo sa Betlehem sa Judea sa mga adlaw ni Herodes nga hari, tan-awa, dihay maalamong mga tawo gikan sa sidlakan nga miadto sa Jerusalem.” Unya sila gipaadto ni Herodes sa Betlehem, ug ang asoy nagpadayon, “Sa dihang sila misulod sa balay, ilang nakita ang bata uban ni Maria nga iyang inahan.”

Matikdi nga ang asoy naghisgot lamang ug “maalamong mga tawo,” dili “tulo ka maalamong mga tawo.” Gikan sa sidlakan, sila miadto sa Jerusalem una pa moadto sa siyudad sa Betlehem nga maoy natawhan ni Jesus. Sa kataposan, sa dihang sila nakaabot na sa Betlehem, ang “bata” nga si Jesus wala na sa pasungan apan anaa na sa usa ka balay.

Dugang pa, ang terminong “maalamong mga tawo” diha sa King James nga Bibliya gihubad sa ubang mga Bibliya ingong “mga Mago” o “mga astrologo.” Sumala sa basahong A Handbook on the Gospel of Matthew, ang ekspresyon nga “maalamong mga tawo” maoy hubad sa “Gregong nombre nga sa orihinal nagtumong sa Persianhong mga saserdote nga batid sa astrolohiya.” Ug ang The Expanded Vine’s Expository Dictionary of New Testament Words naghubit nianang pulonga ingong salamangkero, barangan, ug espiritista.

Kaylap gihapon karon ang astrolohiya ug salamangka, apan ang Bibliya nagpasidaan batok niini. (Isaias 47:13-15) Kini maoy mga buhat sa espiritismo nga gikasilagan ni Jehova nga Diyos. (Deuteronomio 18:10-12) Kanay hinungdan nga walay manulonda sa Diyos nga nagpahibalo sa pagkahimugso ni Jesus ngadto sa mga astrologo. Apan pinaagig damgo gikan sa Diyos, ang mga astrologo gipasidan-an nga dili mobalik ngadto sa daotang hari nga si Herodes, kay siya naglaraw sa pagpatay kang Jesus. Busa “namauli sila sa ilang dapit pinaagi sa laing agianan.”—Mateo 2:11-16.

Magtudlo ba ang matuod nga mga Kristohanon ug tinumotumong asoy nga nagtuis sa kamatuoran bahin sa pagkahimugso ni Jesus? Dayag nga dili gayod.