Sundoga ang Ilang Pagtuo

Siya Nanlimbasog sa Pagbuntog sa Kahadlok ug Pagduhaduha

PANAHON kadto sa kagabhion. Si Pedro nangusog sa pagbugsay, ug samtang siya naglantaw sa unahan may naaninag siyang kahayag sa sidlakan. Timailhan ba kadto nga hapit nang mobanagbanag? Nanghawoy na ang iyang bukobuko ug mga abaga sa pipila ka oras nga pagbinugsay. Ang hangin nga nakagusbat sa iyang buhok, mikusog ug mikusokuso sa Dagat sa Galilea. Gihapak-hapak sa mga balod ang dulong sa sakayan, ug nabasa siya sa pinisik sa tubig. Apan wala siya mohunong sa pagbugsay.

Si Jesus nagpabilin sa lapyahan sa dihang mibiya si Pedro ug ang iyang mga kauban. Nianang adlawa, ilang nakita si Jesus nga nagpakaon sa libolibong mga tawo uban sa pipila lang ka tinapay ug isda. Busa gusto sa mga tawo nga himoong hari si Jesus, apan siya dili gustong malangkit sa politika. Buot niya nga ang iyang mga disipulo dili usab mag-apil-apil sa politika. Si Jesus nagpalayo sa mga tawo, ug iyang gisugo ang iyang mga disipulo sa pagsakay sa sakayan ug sa pag-adto sa tabok samtang siya miadto sa bukid nga nag-inusara aron sa pag-ampo.—Marcos 6:35-45; Juan 6:14, 15.

Ang bulan subang pa kaayo sa dihang ang mga apostoles misugod sa paglawig, ug niining higayona kini talisalop na, apan pipila pa lamang ka kilometros ang ilang nalawig. Tungod sa dinahunog sa hangin ug sa paghapak sa mga balod, lisod ang pag-estoryahanay. Lagmit niadtong tungora si Pedro, nga walay tingog-tingog, lawom kaayog gihunahuna.

Daghan gayod siyag posibleng mahunahunaan! Duha ka tuig na siyang nakig-uban kang Jesus. Bisag daghan na siyag nakat-onan, daghan pa siyag angayng kat-onan. Tungod sa iyang pagpanglimbasog nga mabuntog ang mga babag sama sa pagduhaduha ug kahadlok, siya takos gayong sundogon. Sa unsang paagi ato siyang masundog? Hisgotan nato kini.

“Nakaplagan Namo ang Mesiyas”!

Si Pedro dili gayod malimot sa adlaw nga iyang nahimamat si Jesus nga taga-Nasaret. Ang iyang igsoon nga si Andres maoy unang nagbalita kaniya: “Nakaplagan namo ang Mesiyas.” Sa dihang nadungog ni Pedro kanang mga pulonga, bug-os nga nausab ang iyang kinabuhi.—Juan 1:41.

Si Pedro nagpuyo sa Capernaum, nga usa ka siyudad duol sa Dagat sa Galilea. Siya ug si Andres kasosyo sa mga anak ni Zebedeo nga si Santiago ug Juan sa pagpangisda. Ang kauban ni Pedro sa balay mao ang iyang asawa, ugangang babaye, ug ang iyang igsoon nga si Andres. Aron matagan-an ang panginahanglan sa iyang pamilya, siya kinahanglang magkugi pag-ayo sa pagpangisda. Atong mahanduraw nga sa daghang gabii siya ug ang iyang mga kauban nga nagsakay sa laing sakayan naghago pag-ayo sa pagladlad sa ilang mga pukot ug sa pagbitad niana. Ilang isakay sa sakayan ang bisan unsang isda nga ilang makuha. Mahanduraw usab nato nga sa maadlaw ilang ilainlain ang ilang kuha ug ibaligya kini, ug sila usab magpuna sa ilang mga pukot ug maghinlo niana.

Ang Bibliya nag-ingon nga si Andres maoy tinun-an ni Juan Bawtista. Tino nga si Pedro interesado gayod sa pagpaminaw sa mga taho ni Andres bahin sa mensahe ni Juan. Usa ka adlaw niana, nakita ni Andres nga gitudlo ni Juan si Jesus nga taga-Nasaret nga nag-ingon: “Tan-awa, ang Kordero sa Diyos!” Dihadiha, si Andres nahimong disipulo ni Jesus ug iya dayong gisulti kang Pedro kining makaiikag nga balita: Miabot na ang  Mesiyas! (Juan 1:35-40) Human sa rebelyon sa Eden mga 4,000 ka tuig na ang milabay, si Jehova nga Diyos nagsaad nga adunay usa nga moabot nga magtaganag tinuod nga paglaom alang sa katawhan. (Genesis 3:15) Nahimamat mismo ni Andres ang maong Manluluwas nga mao ang Mesiyas! Si Pedro midalidali usab sa paghimamat kang Jesus.

Si Pedro nailhan sa ngalang Simon. Apan sa dihang iyang nahimamat si Jesus, siya giingnan ni Jesus: “‘Ikaw mao si Simon nga anak ni Juan; ikaw pagatawgong Cefas’ (nga kon hubaron Pedro).” (Juan 1:42) Ang ngalang “Cefas” nagkahulogang “bato.” Dayag nga ang gisulti ni Jesus maoy usa ka tagna. Si Jesus nahibalo nang daan nga si Pedro makabatog samag-bato nga mga hiyas nga makapalig-on sa mga Kristohanon. Mao ba usab kanay nakita ni Pedro sa iyang kaugalingon? Daw dili ingon niana. Bisan gani ang pipila karon nga nakabasa sa mga Ebanghelyo walay nakitang samag-bato nga mga hiyas diha kang Pedro, sama sa kalig-on ug pagkakasaligan. Ang ubang tawo moingon pa gani nga siya maduhaduhaon ug maukon-ukonon.

Si Pedro adunay mga kahuyangan, ug nahibalo si Jesus niana. Apan si Jesus, sama sa iyang Amahan nga si Jehova, kanunayng naglantaw sa maayong mga hiyas sa mga tawo. Nakita ni Jesus ang potensiyal ni Pedro, ug iyang gitabangan si Pedro sa pag-ugmad sa iyang maayong mga hiyas. Si Jehova ug ang iyang Anak naglantaw usab sa atong maayong mga hiyas. Usahay dili kita makatuo nga kita adunay maayong mga hiyas. Apan kinahanglan kitang mosalig kang Jehova ug kang Jesus ug atong pamatud-an nga kita andam nga magpabansay ug magpaumol sama ni Pedro.—1 Juan 3:19, 20.

“Ayaw Na Kahadlok”

Si Pedro lagmit miuban kang Jesus diha sa pipila ka panaw aron mosangyaw. Busa lagmit nga iyang nakita ang unang milagro nga gihimo ni Jesus, nga mao ang paghimo sa tubig nga bino diha sa kombira sa kasal sa Cana. Dugang pa, siya nakapaminaw sa kahibulongan ug punog-paglaom nga mensahe ni Jesus bahin sa Gingharian sa Diyos. Bisan pa niana, siya mibiya kang Jesus ug mibalik sa pagpangisda. Apan paglabay sa pipila ka bulan, si Pedro giduaw na usab ni Jesus aron hangyoon nga mouban kaniya sa bug-os panahong pag-alagad.

Si Pedro naguol tungod kay sa tibuok gabii sila walay kuha. Balik-balik nilang giladlad ang ilang pukot, apan sa matag higayon nga ila kining bitaron, kini walay sulod. Segurado gayod nga gigamit ni Pedro ang iyang abilidad ug kamaayong-laki sa pagpangisda, ug misulay sa pagpangita kon diin dunay bagang duot sa mga isda. Sama sa ubang mga mangingisda, diha gayoy mga panahon nga siya nangandoy nga unta ang iyang panan-aw makalahos sa lubog nga tubig aron makita ang mga isda, o unta masugo niya ang mga isda sa pag-adto sa pukot. Siyempre, ang paghunahuna niana nakapasamot lang sa iyang kaguol. Ang iyang pagpangisda dili lingaw-lingaw, kondili mao kadto ang iyang panginabuhi. Siya mibalik sa lapyahan nga walay kuha. Bisan pa niana, kinahanglang hinloan niya ang pukot. Busa siya puliki kaayo sa dihang si Jesus miduol kaniya.

Dihay daghang tawo nga midutdot kang Jesus aron makapaminaw ug maayo. Tungod niana si Jesus misakay sa sakayan ni Pedro ug mihangyo nga ipalayog diyutay ang sakayan gikan sa lapyahan. Sa makusog nga tingog, giwalihan ni Jesus ang mga tawo. Si Pedro naminaw pag-ayo sama sa uban. Dili gayod siya pul-an sa pagpaminaw sa ulohan sa mensahe ni Kristo—ang Gingharian sa Diyos. Dako gayod nga pribilehiyo ang pagtabang kang Kristo sa pagpakaylap sa mensahe sa Gingharian! Apan makatabang kaha siya kang  Kristo sa pagwali niini nga mensahe? Unsa may ilang isuportar sa ilang kaugalingon? Tingali nahunahunaan ni Pedro ang ilang tibuok gabiing pagpangisda nga walay kuha.—Lucas 5:1-3.

Dihang nahuman si Jesus sa pagtudlo sa mga tawo, iyang gisultihan si Pedro: “Balhin kamo ngadto sa lawom, ug ilagak ninyo ang inyong pukot aron makakuha.” Si Pedro punog pagduhaduha. Siya miingon: “Magtutudlo, sa tibuok gabii kami naghago ug wala gayoy nakuha, apan tungod sa imong sulti ilagak ko ang mga pukot.” Tingali wala nay gana si Pedro sa pagladlad sa iyang pukot, ilabina kay niadtong tungora wala nay isda nga makuha! Apan gisunod ni Pedro si Jesus, ug lagmit iyang gisenyasan ang iyang mga kauban sa laing sakayan sa pagsunod kanila.—Lucas 5:4, 5.

Pagliba ni Pedro sa pukot, siya nakamatikod nga bug-at kining bitaron. Siya wala makatuo, ug iya kining gibitad pag-ayo. Wala magdugay, iyang nakita nga daghang isda ang nagkisikisi diha sa pukot! Sa katarantar, siya nagpakitabang sa iyang mga kauban sa laing sakayan. Samtang nagbitad sila, ilang nakita nga dili kini maigo sa usa ka sakayan tungod sa kadaghan sa isda. Ang duha ka sakayan napuno sa mga isda, ug diha pa gihapoy nahibilin nga daghan kaayo—ang duha ka sakayan misugod sa pag-unlod tungod sa kabug-at. Si Pedro nahibulong pag-ayo. Nakasaksi na siya sa gahom ni Jesus kaniadto, apan niining higayona, siya na mismo ang nalangkit! Karon pa siya nakakitag tawo nga makapasulod sa mga isda diha sa pukot! Si Pedro mibatig kahadlok. Siya miluhod sa atubangan ni Jesus ug miingon: “Pahilayo kanako, tungod kay ako tawong makasasala, Ginoo.” Para niya, dili siya takos makig-uban sa Usa nga may awtoridad sa paggamit sa gahom sa Diyos nianang paagiha.—Lucas 5:6-9.

Si Jesus malulotong miingon: “Ayaw na kahadlok. Sukad karon mangisda ka na ug mga tawo nga buhi.” (Lucas 5:10, 11) Dili na kini panahon sa pagduhaduha ug sa pagkahadlok. Walay pasikaranan ang pagduhaduha ni Pedro bahin sa pagpangisda, sa iyang kahadlok tungod sa iyang mga kasaypanan, ug sa iyang pagkawalay-katakos. Si Jesus may dakong buluhaton nga makaapektar sa palaaboton sa katawhan. Siya nag-alagad sa usa ka Diyos nga “magpasaylo sa madagayaon gayod.” (Isaias 55:7) Si Jehova magtagana sa ilang pisikal ug espirituwal nga mga panginahanglan.—Mateo 6:33.

Si Pedro milihok dayon, sama sa gihimo ni Santiago ug Juan. “Gidala nilag balik ang mga sakayan sa mamala, ug gibiyaan ang tanan ug misunod kaniya.” (Lucas 5:11) Si Pedro nagpasundayag ug pagtuo kang Jesus ug sa Usa nga nagpadala kaniya. Kana ang kinamaayohang desisyon nga iyang nahimo. Ang mga Kristohanon  karon nga nagbuntog sa ilang pagduhaduha ug kahadlok sa pag-alagad sa Diyos nagpasundayag usab ug pagtuo. Ang ilang pagsalig kang Jehova dili gayod makawang.—Salmo 22:4, 5.

“Nganong Gidaog Ka Man sa Pagduhaduha?”

Mga duha ka tuig human mahimamat ni Pedro si Jesus, si Pedro namugsay sa unoson nga gabii sa Dagat sa Galilea nga gihisgotan sa sinugdan. Siyempre wala kita mahibalo kon unsay nahinumdoman ni Pedro niadtong tungora. Daghang butang ang lagmit misantop sa iyang hunahuna. Pananglitan, giayo ni Jesus ang ugangang babaye ni Pedro. Si Jesus nagpakigpulong sa Wali sa Bukid. Sa daghang higayon, pinaagi sa iyang pagpanudlo ug sa iyang mga milagro, si Jesus nagpakita nga siya ang Usa nga Pinili ni Jehova, ang Mesiyas. Sa paglabay sa mga bulan, ang mga kahuyangan ni Pedro sama sa iyang tendensiya nga magpadaog sa kahadlok ug pagduhaduha hinay-hinayng nabuntog. Gipili pa gani ni Jesus si Pedro ingong usa sa iyang 12 ka apostoles! Apan kinahanglang buntogon pa ni Pedro ang iyang kahadlok ug pagduhaduha.

Sa ikaupat nga yugto sa pagbantay nianang gabhiona, o mga oras tali sa alas tres sa kaadlawon ug sa pagbanagbanag, si Pedro mihunong sa pagbugsay ug mitul-id sa paglingkod. Sa unahan, iyang nakita nga dihay naglihok! Kadto ba maoy pinisik sa mga balod nga nahayagan sa bulan? Dili, tungod kay kini nagbarog. Usa ka tawo ang iyang nakita! Ang maong tawo naglakaw ibabaw sa tubig, ug siya nagpaingon kanila! Kahibudnganan kaayo kadto, ug sila nangahadlok. Ang tawo miingon: “Magmaisogon, ako kini; ayaw kamo kahadlok.” Si Jesus diay kadto!—Mateo 14:25-28.

Si Pedro mitubag: “Ginoo, kon ikaw man, paanhaa ako kanimo sa ibabaw sa tubig.” Ang iyang reaksiyon nagpakita nga wala siya mahadlok. Kay nahingangha niining talagsaong milagro, naningkamot siya nga mapalig-on pa ang iyang pagtuo. Gusto niya nga malangkit sa nagakahitabo. Sa kamaluloton, gikamay ni Jesus si Pedro. Si Pedro midalidalig kawas sa sakayan ug mitamak sa balorong dagat. Handurawa kon unsay gibati ni Pedro sa dihang wala siya maunlod! Tingali nahibulong gayod siya samtang naglakaw paingon kang Jesus. Apan kalit lang nga nawala ang iyang kaisog.—Mateo 14:29.

Kinahanglang isentro ni Pedro ang iyang pagtagad kang Jesus. Pinaagi sa gahom ni Jehova, gipalakaw ni Jesus si Pedro ibabaw sa tubig. Ug gibuhat kana ni Jesus tungod sa pagtuo ni Pedro kaniya. Apan nalinga si Pedro. Atong mabasa: “Sa pagkakita sa unos, siya nahadlok.” Iyang nakita ang mga balod nga naglamba-lamba sa sakayan ug ang mga pinisik sa tubig mao nga siya nahadlok. Lagmit nga misantop sa iyang hunahuna  nga basin maunlod siya ug malumos. Misamot ang iyang kahadlok, ug mihuyang ang iyang pagtuo. Ang tawo nga gipakasamag bato tungod sa iyang potensiyal sa kalig-on mihinay-hinayg kaunlod samag bato tungod kay mihuyang ang iyang pagtuo. Si Pedro maayong molangoy, apan siya wala nay pagsalig bisan sa iyang katakos. Siya misinggit: “Ginoo, luwasa ako!” Gihawiran ni Jesus ang iyang kamot, ug gibira siya. Samtang sila anaa pa sa ibabaw sa tubig, gipasiugda ni Jesus kang Pedro kining hinungdanong leksiyon: “Ikaw nga diyutay ug pagtuo, nganong gidaog ka man sa pagduhaduha?”—Mateo 14:30, 31.

‘Gidaog sa pagduhaduha’—haom gayod ang maong mga pulong! Ang pagduhaduha makapahinabog grabeng kadaot. Kon kita magpadaog niini, kini makapahuyang sa atong pagtuo ug makadaot sa atong relasyon sa Diyos. Kinahanglang buntogon nato kini! Sa unsang paagi? Pinaagi sa pagsentro sa atong pagtagad kang Jehova ug kang Jesus, sa ilang mga nahimo kaniadto, ginahimo karon, ug pagahimoon sa umaabot ngadto sa mga tawo nga nahigugma kanila. Kana magpalig-on sa atong pagtuo. Kon atong isentro ang atong hunahuna sa mga butang nga makapahadlok ug makapaluya kanato, o sa mga butang nga makapalinga kanato gikan kang Jehova ug sa iyang Anak, mohuyang ang atong pagtuo.

Samtang si Pedro misunod kang Jesus balik sa sakayan, nakita ni Pedro nga mihunong ang bagyo. Mikalma ang Dagat sa Galilea. Si Pedro miduyog sa ubang mga disipulo sa pagpahayag, “Sa pagkatinuod ikaw mao ang Anak sa Diyos.” (Mateo 14:33) Sa mibanagbanag ang kabuntagon diha sa lanaw, ang kasingkasing ni Pedro natugob sa pasalamat. Iyang nakat-onan nga dili niya angayng tugotan ang kahadlok ug pagduhaduha nga makababag sa iyang relasyon kang Jehova ug kang Jesus. Oo, daghan pa siyag angayng bag-ohon sa iyang kaugalingon aron mahimong lig-on nga Kristohanon nga samag bato, nga napanglantaw nang daan ni Jesus diha kaniya. Apan siya determinado nga magpadayon sa pag-uswag. Ingon ba usab niana ang imong determinasyon? Segurado gayod nga giisip nimo nga takos sundogon ang pagtuo ni Pedro.

[Hulagway sa panid 22, 23]

Nakita ni Jesus ang potensiyal niining mapainubsanong mangingisda

[Hulagway sa panid 23]

“Ako tawong makasasala, Ginoo”

[Hulagway sa panid 24, 25]

“Sa pagkakita sa unos, siya nahadlok”