Ika-126 nga Graduwasyon sa Gilead

Kon sa Unsang Paagi Mahimong Malamposong Misyonaryo

ANG mga Saksi ni Jehova malipayong nagtigom sa Watchtower Educational Center sa Patterson, New York, alang sa usa ka linaing okasyon. Niadtong Marso 14, 2009, adlawng Sabado, migraduwar ang mga estudyante sa ika-126 nga klase sa Watchtower Bible School of Gilead. Sila ipadala ngadto sa 22 ka nasod aron isangyaw ang maayong balita sa Gingharian sa Diyos.—Mateo 24:14.

Ang mga estudyante natudloan pag-ayo sulod sa lima ka bulan nga kurso sa pagtuon sa Bibliya nga gidisenyo aron sila magmalamposon ingong Kristohanong mga misyonaryo. Ang adlaw sa graduwasyon mao ang kataposang higayon nga ang tibuok klase makapaminaw ug maalamong mga tambag aron makab-ot ang maong tumong.

Ang Tunghaang Gilead nagsugod sa pagbansay ug mga misyonaryo niadtong 1943, miingon si Anthony Morris, nga membro sa Nagamandong Lawas sa mga Saksi ni Jehova, ug tsirman sa programa sa graduwasyon. Sukad niadto, ang mga migraduwar sa Gilead dakog nahimo diha sa tibuok-kalibotang buluhaton sa pagsangyaw.

Ang mamumulong miingon nga bisag gibiaybiay sa mga eskriba ug mga Pariseo ang mga apostoles ingong “mga tawong dili edukado ug ordinaryo,” ang maong mga magsusupak miila nga ang kaisog sa mga apostoles sa pagsangyaw maoy resulta sa pagtudlo ni Jesus kanila. (Buhat 4:13) Tungod sa pagbansay nga nadawat sa mga estudyante, sila nahimong maisogon sa pagsangyaw.

Si Robert Ciranko, nga katabang sa Komite sa Pagsulat sa Nagamandong Lawas, nagpakigpulong sa ulohang, “Ayawg Tan-aw sa Panggawas nga Panagway.” Siya miingon nga sa dili madugay ang mga estudyante makahimamat ug mga tawo nga lahi kaayog kultura ug kinaiya. Apan, ang pagsangyaw kanila dili mahimong problema kon huptan sa mga estudyante ang tinamdan ni Jehova. Ang literal nga kahulogan sa orihinal nga mga pulong sa Buhat 10:34 nagpasabot nga ang Diyos dili motan-aw sa panggawas nga panagway. “Ang Diyos dili mapihigon.” (Buhat 10:35) “Pinaagi sa paghupot sa tinamdan sa Diyos ug sa paglantaw sa tanang tawo diha sa inyong teritoryo ingong umaabot nga mga alagad sa Diyos, kamo magmalamposon ingong mga misyonaryo,” miingon si Brader Ciranko.

“Kamo Nasangkapan Gayod Aron Magmalamposon”

“Para sa ubang tawo, ang kamelyo maot ug hitsura,” mao ang introduksiyon ni Samuel Herd, nga membro sa Nagamandong Lawas, “apan kini nasangkapan aron mabuhi sa desyerto.” Sa susama, ang bag-ong mga misyonaryo nasangkapan gayod aron magmalamposon diha sa ilang mga teritoryo. Adunay lima ka butang nga makatabang kanila.

1. Gugma kang Jehova. (Mateo 22:37, 38) Napamatud-an na sa mga estudyante nga sila determinado gayod sa pag-alagad kang Jehova.

2. Kahibalo sa Pulong sa Diyos. Ang kamelyo magtipig ug pagkaon diha sa bugdo sa buko-buko niini. Apan, kini dili magsalig sa pondo niini nga pagkaon, kondili mokaon gihapon kon dunay makaon. Sa susama, ang mga misyonaryo dili lang magsalig sa impormasyon nga ilang nakat-onan sa Tunghaang Gilead, apan angayng padayong magtuon sa Bibliya.

3. Gugma alang sa mga tawo. (Mateo 22:39) Ang mga estudyante mibatig kaluoy sa mga tawo.

4. Pagkaandam nga moalagad. (Salmo 110:3) Kon maluya ang usa ka misyonaryo, si Jehova magpalig-on kaniya.—Isaias 40:29.

5. Kabaskog. Sama nga ang kamelyo mokarga sa usa ka magpapanaw latas sa desyerto, ang usa ka misyonaryo “mokarga” o motabang sa usa ka Kristohanon nga adunay problema sa espirituwal. Kana nagkinahanglan ug kusog, apan ang mga  misyonaryo makahimo gayod niana tungod sa ilang kabaskog.

Ubang mga Bahin sa Programa

Ang almendras maoy usa sa maayong mga gasa nga gipadala ni Jacob ngadto sa magmamando sa Ehipto, miingon si Michael Burnett, nga usa ka instruktor sa Gilead. (Genesis 43:11) Ang pipila lamang ka almendras makatagana nag igong sustansiya. Samtang nagtungha ang mga estudyante, sila nakapahimulos sa daghang espirituwal nga mga almendras. Ang pipila sa mga leksiyon nga angay nilang balonon mao ang pagkakontento sa mga tagana ni Jehova ug ang paghigugma sa ilang bag-ong teritoryo.

Si Mark Noumair, nga instruktor usab sa Gilead, nagsaysay nga ang Pulong sa Diyos samag ‘puntil sa kaalam.’ (Job 28:18) Kinahanglan nga atong buksan ang puntil, nga mao ang Bibliya, ug ipadapat ang mensahe niini. Kon ang dapit nga alagaran sa mga misyonaryo lahi sa ilang gidahom, kinahanglan nilang hinumdoman ang panig-ingnan ni apostol Pablo. Ang mga disipulo ni Jesus nagpadala kaniya ngadto sa iyang kaugalingong dapit sulod sa siyam ka tuig. Inay mangatarongan si apostol Pablo nga siya angayng ipadala sa laing dapit tungod kay siya ‘usa ka pinili,’ siya nagkugi pag-ayo bisan diin siya gipadala. (Buhat 9:15, 28-30) Ang pagsunod sa desisyon ni Jehova dili kanunayng sayon. Ang laing pananglitan mao si Jonatan. Sa dihang gipili ni Jehova si David nga mahimong hari, siya misuportar kang David.

Sa bahin nga “Ang mga Alagad sa Diyos Nagsulti nga Maisogon,” gipasundayag sa mga estudyante ang ilang mga kasinatian sa pagsangyaw panahon sa ilang pagtungha. Daghan kanila ang nakasugod ug mga pagtuon sa Bibliya. Gisundan kini sa bahin nga, “Giandam sa Organisasyon ni Jehova,” diin giinterbiyo ang tulo ka dugay nang mga misyonaryo. Ang matag usa kanila misaysay kon sa unsang paagi sila gibansay sa pagpakigkooperar sa organisasyon sa Diyos.

“Magmalipayon Ingong mga Misyonaryo”

Si Gerrit Lösch, nga membro usab sa Nagamandong Lawas, nagpresentar sa labing hinungdanong bahin sa programa nga nag-ulohang, “Magmalipayon Ingong mga Misyonaryo.” Daghang kalihokan ang giisip nga “makalingaw,” apan kini wala makahatag ug tinuod nga kalipay, siya miingon. (Proverbio 14:13; Ecclesiastes 2:10, 11) Ang pagbuhat sa kabubut-on sa Diyos maoy tinubdan sa tinuod nga kalipay, bisan kon ang pagbuhat niana dili kanunayng sayon. Ang pagtungha sa Gilead nagkinahanglag dakong sakripisyo apan kini naghatag ug dakong katagbawan.

Adunay pipila ka butang nga nakaamot sa kalipay sa tinuod nga mga Kristohanon. Sila nagsimba sa malipayong Diyos. (Salmo 33:12; 1 Timoteo 1:11) Sila nagpuyo sa usa ka espirituwal nga paraiso, ug ang Bibliya nagsaad nga sa dili madugay ang yuta mahimong usa ka literal nga paraiso. Ilang nasabtan kon unsay katuyoan sa kinabuhi, nga mao ang pag-alagad ug pagdayeg kang Jehova. Dugang pa, sila gihigugma ni Jehova ug ni Jesus.

Ang mamumulong midugang, “Kamo mahimong malipayong mga misyonaryo kon kamo magmakontento.” Ang paghigugma sa uban ug ang paghigugma nila kanato, maoy laing sangkap sa kalipay. Busa taboni ang mga kasaypanan sa uban inay padak-on kana. Paghimog maayo ngadto sa uban, tabangi ang mga maluyahon, ipaambit ang inyong nindot nga mga kasinatian. (Salmo 41:1, 2; Buhat 20:35) Ang kalipay makaplagan pinaagi sa paggugol ug panahon diha sa pagsangyaw nga buluhaton.—Lucas 11:28.

Si Brader Lösch mihinapos, “Panglakaw kamo  ingong malipayong mga misyonaryo, nga magmakasaranganon sa paglingawlingaw ug maghatag ug bug-os nga pagtagad sa pagdayeg sa atong malipayong Diyos nga si Jehova, ug sa pagtabang sa uban nga magmalipayon.”

Human mabasa ang mga pangomosta gikan sa lainlaing kayutaan, gitunol ni Anthony Morris ang mga diploma ngadto sa mga estudyante. Dayon, ang usa sa mga estudyante sa ika-126 nga klase mibasa sa ilang sulat alang sa Nagamandong Lawas. Sa maong sulat, ilang gipahayag ang ilang apresasyon sa pagtungha sa Gilead.

Ang tsirman naghisgot diha sa iyang panghinapos nga mga pulong nga ang ‘mga lutahan ug ang mga ugat sa lutahan’ nga naghiusa sa lawas ikatandi sa mga pamaagi ug kahikayan nga gigamit sa “matinumanon ug maalamong ulipon” sa pagtaganag espirituwal nga pagkaon ug direksiyon ngadto sa katawhan ni Jehova. (Colosas 2:18, 19; Mateo 24:45) Kon ang mga graduwado sa Gilead bug-os nga mokooperar sa tinudlong mga hawas sa Diyos, sila magmalamposon gayod sa pagtuman sa bug-os sa ilang ministeryo.—2 Timoteo 4:5.

[Kahon sa panid 30]

ESTADISTIKA SA KLASE

Gidaghanon sa mga nasod nga gihawasan: 6

Gidaghanon sa mga nasod nga gipadalhan: 22

Gidaghanon sa mga estudyante: 56

Gidaghanon sa mga minyo: 28

Aberids nga edad: 32.8

Aberids nga katuigan sa kamatuoran: 17.9

Aberids nga katuigan sa bug-os-panahong pag-alagad: 13.5

MGA NASOD NGA GIPADALHAN

Ang mga estudyante nga migraduwar giasayn ngadto sa Benin, Bolivia, Bulgaria, Burkina Faso, Cameroon, Costa Rica, Ghana, Guatemala, Honduras, Kenya, Liberia, Madagascar, Mozambique, Nicaragua, Panama, Paraguay, Peru, Romania, Sierra Leone, South Africa, Togo, ug Uganda.

[Hulagway sa panid 31]

Ika-126 nga Klase sa Watchtower Bible School of Gilead

Ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.