Ang Kuwarta ba Makahatag ug Tinuod nga Kalipay?

SI Sonia natawo sa Espanya. Sa dihang siya bata pa, siya tigtambongan sa mga tigom sa mga Saksi ni Jehova uban sa iyang inahan. Apan pagdako niya, siya mibalhin sa London, England, ug nakatrabaho ingong bond broker diha sa industriya sa pagpamuhunan.

Ganahan kaayo si Sonia sa iyang trabaho. Siya dako kaayog kita ug nakahimog dagkong transaksiyon alang sa iyang mga kliyente. Nindot ang iyang trabaho ug siya malamposon. Matag adlaw si Sonia motrabaho ug 18 ka oras, ug usahay matulog lamang siyag mga duha o tulo ka oras. Nakasentro na ang iyang kinabuhi sa iyang trabaho. Apan, kalit lang nga nausab ang kahimtang. Si Sonia naestrok—lagmit tungod sa sobrang kahago. Siya 30 anyos pa lamang niadtong panahona.

Naparalisar ang katunga sa iyang lawas, ug ang mga doktor dili segurado kon makasulti pa ba siya pag-usab. Ang iyang inahan mibiyahe dayon paingon sa England aron atimanon siya. Sa dihang makahimo na si Sonia sa paglakaw, ang iyang inahan miingon kaniya, “Motambong ko sa tigom sa Kingdom Hall, ug kinahanglan nga mouban ka kay dili ta ka mahimong biyaan nga mag-inusara.” Mikuyog si Sonia. Unsay resulta?

“Tinuod gayod ang tanan nakong napaminawan didto. Makapalipay kaayo kadto,” nahinumdom si Sonia. “Akong gidawat ang pagtuon sa Bibliya nga gitanyag sa usa sa mga nag-abiabi kanako sa una nakong pagtambong sa Kingdom Hall. Ang kanhi nakong mga kaubanan wala na mobisita kanako, apan ang akong bag-ong mga higala mahigugmaon ug mabination kaayo kanako.”

Sa ngadto-ngadto, nakasulti na pag-usab si Sonia, ug miuswag ang iyang kahibalo sa Bibliya. Wala ray usa ka tuig, siya nabawtismohan. Daghan sa iyang bag-ong mga higala bug-os-panahong nag-alagad sa Diyos, ug iyang nakita nga sila malipayon kaayo. Gusto ni Sonia nga mahisama kanila. Gusto usab niya nga ihatag kang Jehova ang iyang kinamaayohan. Si Sonia karon bug-os-panahon nang nag-alagad sa Diyos.

Unsay nakat-onan ni Sonia sa iyang kasinatian? “Bisan tuod dako kog kita, pero mabalak-on kaayo ko ug dili malipayon tungod sa tensiyon ug sa kawalay-kasegurohan sa akong trabaho. Akong naamgohan nga ang labing hinungdanong butang sa kinabuhi mao ang pagbaton ug maayong relasyon sa akong langitnong Amahan nga si Jehova. Karon, ako mibatig tinuod nga kalipay.”

“Ang gugma sa salapi maoy gamot sa tanang matang sa makadaot nga mga butang,” misulat si apostol Pablo. “Tungod sa pagpangab-ot niini nga gugma ang pipila nahisalaag gikan sa pagtuo ug nagtusaktusak sa ilang kaugalingon sa daghang kasakitan.” (1 Timoteo 6:10) Napamatud-an gayod ni Sonia nga tinuod kanang mga pulonga.