Kanus-a Moabot ang Gingharian sa Diyos?
Kanus-a Moabot ang Gingharian sa Diyos?
“GINOO, ipasig-uli mo ba ang gingharian sa Israel niining panahona?” (Buhat 1:6) Ang mga apostoles naghinamhinam nga mahibalo kon kanus-a tukoron ni Jesus ang iyang Gingharian. Karon, mga 2,000 ka tuig na ang milabay, ang mga tawo naghinamhinam gihapon nga mahibalo kon kanus-a moabot ang Gingharian sa Diyos.
Sanglit Gingharian man ang tema sa pagsangyaw ni Jesus, maghunahuna ka tingali nga iyang gitubag kanang maong pangutana. Husto ka! Gitubag niya kana pinaagi sa paghisgot sa usa ka espesipikong yugto sa panahon nga gitawag niya ug iyang “presensiya.” (Mateo 24:37) Kanang maong presensiya dakog kalambigitan sa pagkatukod sa Mesiyanikong Gingharian. Unsa man kini nga presensiya? Hisgotan nato ang upat ka kamatuoran nga gipadayag sa Bibliya bahin sa presensiya ni Kristo.
1. Ang presensiya ni Kristo magsugod paglabay sa taas nga panahon human sa iyang kamatayon. Si Jesus naghatag ug ilustrasyon diin iyang gitandi ang iyang kaugalingon sa usa ka tawo nga “mipanaw ngadto sa usa ka layong yuta aron makahupot ug harianong gahom.” (Lucas 19:12) Sa unsang paagi natuman kanang matagnaong ilustrasyon? Buweno, si Jesus namatay ug gibanhaw; dayon siya mipanaw ngadto sa “layong yuta,” o sa langit. Sumala sa gitagna ni Jesus diha sa susamang ilustrasyon, siya maghari paglabay sa “hataas nga panahon.”—Mateo 25:19.
Paglabay sa daghang katuigan human mokayab si Jesus sa langit, si apostol Pablo misulat: “Kining tawhana [si Jesus] mihalad ug usa ka halad alang sa mga sala hangtod sa kahangtoran ug milingkod sa tuong kamot sa Diyos, nga sukad niadto nagpaabot hangtod nga ibutang ang iyang mga kaaway ingon nga tumbanan sa iyang mga tiil.” (Hebreohanon 10:12, 13) Busa, pag-abot ni Jesus sa langit, naghulat usa siya ug hataas nga panahon. Siya nagpaabot hangtod nga gipalingkod siya ni Jehova nga Diyos ingong Hari sa dugay nang gisaad nga Mesiyanikong Gingharian. Nianang panahona nagsugod ang presensiya ni Kristo. Makita ba sa mga tawo kining kulbahinam nga hitabo?
2. Ang presensiya dili makita sa literal nga mga mata. Hinumdomi nga gihisgotan ni Jesus ang ilhanan sa iyang presensiya. (Mateo 24:3) Kon makita sa mga tawo ang iyang presensiya, magkinahanglan pa ba ug ilhanan? Sa pag-ilustrar: Handurawa nga nagbiyahe ka paingon sa dagat. Tingali makakita ka ug mga karatula, o ilhanan, diha sa dalan nga motultol kanimo sa imong adtoan, apan sa dihang atua ka na sa baybayon, nga nagbarog diha sa lapyahan ug nag-atubang sa halapad nga kadagatan, magdahom ka pa ba nga makakita ug karatula nga gisulatan ug “Dagat”? Siyempre dili na! Nagkinahanglan pa ba diay ug karatula nga imo na man kanang nakita?
Gihubit ni Jesus ang ilhanan sa iyang presensiya, dili aron ipadayag ang mga butang nga makita sa tawo, kondili aron masabtan nila ang usa ka panghitabo didto sa langit. Busa, si Jesus miingon: “Ang gingharian sa Diyos dili moabot uban ang talagsaong pagkadayag.” (Lucas 17:20) Nan, sa unsang paagi masabtan niadtong anaa sa yuta nga nagsugod na ang presensiya ni Kristo?
3. Ang presensiya ni Jesus mailhan pinaagi sa grabeng suliran dinhi sa yuta. Si Jesus miingon nga ang iyang presensiya ingong Hari sa langit mailhan dinhi sa yuta pinaagi sa mga gubat, gutom, linog, kamatay, ug pagkamalapason. (Mateo 24:7-12; Lucas 21:10, 11) Unsay nakaingon niining tanan? Ang Bibliya nagpatin-aw nga si Satanas, “ang magmamando niining kalibotana,” napungot pag-ayo tungod kay siya nahibalo nga hamubo na lamang ang iyang panahon sukad sa pagsugod sa presensiya ni Kristo ingong Hari. (Juan 12:31; Pinadayag 12:9, 12) Sa atong panahon, daghan kaayong pamatuod nga nagpaila sa kapungot ni Satanas ug sa presensiya ni Kristo. Kini nga pamatuod dayag kaayo sa tibuok kalibotan sa gilapdon nga dili hitupngan ilabina sukad sa 1914, nga giila sa mga historyano ingong tuig diin nahitabo ang dakong kausaban sa kasaysayan.
Morag daotan kanang balitaa, apan ang tinuod dili kana daotan. Ilhanan kana nga ang Mesiyanikong Gingharian nagmando na karon sa langit. Sa dili madugay, ang maong kagamhanan magmando na sa tibuok yuta. Apan, sa unsang paagi mahibalo ang mga tawo bahin sa Gingharian aron magpasakop sila sa pagmando niana?
4. Ang presensiya ni Jesus mailhan pinaagi sa tibuok-yuta nga pagsangyaw. Si Jesus miingon nga ang iyang presensiya mahisama sa “mga adlaw ni Noe.” a (Mateo 24:37-39) Si Noe dili lamang magtutukod ug arka; siya ‘magwawali usab sa pagkamatarong.’ (2 Pedro 2:5) Nagpasidaan si Noe nga hapit nang ipahamtang ang paghukom sa Diyos. Si Jesus miingon nga ang iyang mga sumusunod sa yuta magpasidaan usab sa mga tawo panahon sa iyang presensiya. Siya nagtagna: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”—Mateo 24:14.
Sa ato nang nasabtan sa nag-unang artikulo, laglagon sa Gingharian sa Diyos ang tanang kagamhanan sa kalibotan. Ang buluhatong pagsangyaw magpasidaan sa mga tawo nga kining langitnong kagamhanan molihok na sa dili madugay, nga maghatag sa tanan ug kahigayonan nga makaikyas sa nagsingabot nga kalaglagan ug mahimong mga sakop nianang maong Gingharian. Nan, ang hinungdanong pangutana mao, Unsa may imong buhaton?
Ang Gingharian ba sa Diyos Usa ka Maayong Balita Alang Kanimo?
Ang mensahe nga gisangyaw ni Jesus naghatag ug kahibulongan kaayong paglaom. Human sa rebelyon nga nahitabo didto sa Eden libolibo ka tuig kanhi, katuyoan ni Jehova nga Diyos nga magtukod ug usa ka kagamhanan nga magtul-id sa mga butang ug magpasig-uli sa matinumanong katawhan ngadto sa kahimtang nga gusto sa Diyos nga ilang matagamtam sukad pa sa sinugdan—kinabuhing walay kataposan sa paraiso dinhi sa yuta. Aduna pa bay mas makapalipay kay sa pagkahibalo nga kining dugay nang gisaad nga kagamhanan nagmando na karon sa langit? Kini dili usa ka butang nga lisod sabton o anaa lamang sa kasingkasing. Tinuod gayod kini!
Sa pagkakaron, ang tinudlong Hari sa Diyos nagmando na taliwala sa iyang mga kaaway. (Salmo 110:2) Niining daotan nga kalibotan nga nahimulag sa Diyos, ang Mesiyas nagtuman sa kabubut-on sa iyang Amahan sa pagpangita sa tanan nga gustong mahibalo kon kinsa gayod ang Diyos ug simbahon siya “sa espiritu ug sa kamatuoran.” (Juan 4:24) Ang paglaom nga mabuhi sa walay kataposan ilalom sa Gingharian sa Diyos bukas sa tanan bisan unsay ilang rasa, panuigon, ug kahimtang sa kinabuhi. (Buhat 10:34, 35) Kami nag-awhag kanimo sa pagpahimulos sa kahibulongang kahigayonan nga gitanyag kanimo. Ayaw paglangan sa pagtuon bahin sa Gingharian sa Diyos aron ikaw mabuhi nga malipayon sa walay kataposan ilalom sa matarong nga pagmando niana!—1 Juan 2:17.
[Footnote]
a Ang gipamulong ni Jesus motabang sa pagtul-id sa sayop nga pagsabot nga mitungha tungod sa sayop nga paghubad sa pulong “presensiya” diha sa ubang mga bersiyon sa Bibliya. Ang ubang mga bersiyon naghubad niana nga “pag-anhi,” “pag-abot,” o “pagbalik,” nga nagpasabot ug mubo ra nga panahon. Apan, matikdi nga wala itandi ni Jesus ang iyang presensiya sa Lunop sa adlaw ni Noe, nga usa lamang ka panghitabo, kondili sa “mga adlaw ni Noe,” nga usa ka yugto sa panahon. Sama niana, ang presensiya ni Kristo maoy yugto sa panahon diin ang mga tawo puliki kaayo sa adlaw-adlaw nga mga kalihokan nga dili na sila magpakabana sa pasidaan.
[Mga hulagway sa panid 8, 9]
Ang daotang mga balita nga atong madungog adlaw-adlaw nagpamatuod nga hapit nang moabot ang maayong mga butang
[Credit Line]
Antiaircraft gun: U.S. Army photo