Lisod ang kahimtang ni bisan kinsa nga alerdyik sa mga pahumot. Dili kalikayan nga makapanimaho silag pahumot diha sa ilang adlaw-adlawng pagpakiglabot sa uban. Bisan pa niana, ang pipila nangutana kon posible bang mohangyo nga ang mga igsoon dili mogamit ug pahumot o cologne panahon sa mga tigom, asembliya, ug mga kombensiyon.

Siyempre, walay Kristohanon ang tinuyong mohimog usa ka butang nga makapalisod sa uban sa pagtambong sa mga tigom. Gikinahanglan natong tanan ang pagdasig nga gitagana diha sa atong mga tigom. (Heb. 10:24, 25) Busa, si bisan kinsa nga may grabeng alerdyi sa pahumot nga tungod niana dili na siya makatambong sa tigom mahimong makighisgot niini uban sa mga ansiyano. Dili haom ni Kasulatanhon nga maghimog mga lagda bahin sa paggamit ug pahumot, apan ang mga ansiyano mahimong makahatag ug impormasyon aron masabtan sa mga igsoon ang suliran nga giatubang sa uban. Depende sa kahimtang, mahimong makadesisyon ang mga ansiyano nga hisgotan ang napatik nang impormasyon panahon sa Tigom sa Pag-alagad diha sa lokal nga mga panginahanglan, o mohimog pahibalo bahin niana sa mataktikanhong paagi. * Apan, ang mga ansiyano dili magbalikbalik sa pagpahibalo niana. Sa atong mga tigom, kanunayng may bag-ong mga interesado ug mga bisita nga wala mahibalo sa maong problema, ug gusto natong bation nila nga sila giabiabi. Walay usa ang angayng mobati nga gilikayan siya tungod lang kay siya nagpahumot.

Kon naglungtad kini nga problema ug itugot sa kahimtang sa kongregasyon, mahimong hikayon sa lawas sa mga ansiyano nga palingkoron kadtong alerdyik sa mga pahumot diha sa usa ka dapit sa Kingdom Hall nga bulag sa kadaghanan. Pananglitan, duna tingaliy conference room diin sila makalingkod ug makapaminaw sa mga tigom. Kon dili gihapon masulbad ang problema ug ang pipila nag-antos gihapon, mahimong irekord sa kongregasyon ang mga tigom alang kanila o hikayon nga makapaminaw sila sa tigom didto sa ilang balay pinaagig telepono, sama sa gihimo alang sa uban nga dili makagawas sa ilang balay tungod sa sakit.

Maylabot niini, kinahanglan usab kitang magpakitag linaing konsiderasyon dihang motambong ug mga regional convention. Sanglit kadaghanan sa mga kombensiyon ipahigayon diha sa mga lugar nga may air-condition, ug sagad dili posible nga makagahin ug usa ka dapit nga para lamang niadtong alerdyik sa mga pahumot, maoy pagpakitag gugma kon atong limitahan ang atong paggamit ug isog nga pahumot niini nga mga okasyon. Hinunoa, dili kini angayng himoon nga lagda alang sa mga tigom sa kongregasyon, ug dili kini angayng sabton nga ingon.

Samtang kita nagkinabuhi niini nga sistema sa mga butang, kitang tanan mag-antos sa sangpotanan sa napanunod nga pagkadili-hingpit. Apan atong gipabilhan ang mga paningkamot sa uban sa paghupay sa atong pag-antos. Nagkinahanglan tingalig sakripisyo alang sa uban nga dili mogamit ug pahumot o cologne aron dili malisdan ang usa ka igsoon sa pagtambong sa mga tigom. Bisan pa niana, ang gugma mahimong magtukmod kanato sa pagbuhat niana.

Si Poncio Pilato nailhan sa mga magbabasa sa Bibliya tungod sa iyang papel sa paghusay ug pagpapatay kang Jesus. (Mat. 27:1, 2, 24-26) Apan, ang iyang ngalan makita usab sa daghang beses diha sa ubang makasaysayanhong rekord. Sumala sa The Anchor Bible Dictionary, ang payl sa makasaysayanhong sekular nga mga reperensiya bahin kaniya “mas daghan ug mas detalyado kay sa ubang Romanong gobernador sa Judea.”

Ang ngalan ni Pilato mas subsob nga makita sa mga sinulat sa Hudiyong historyano nga si Josephus, kinsa nag-asoy sa tulo ka espesipikong hitabo bahin sa mga problemang nasinati ni Pilato samtang nagmando sa Judea. Ang ikaupat nga hitabo gidugang sa Hudiyong historyano nga si Philo. Gipamatud-an sa Romanong magsusulat nga si Tacitus, kinsa nagrekord sa kasaysayan sa mga emperador sa Roma, nga si Poncio Pilato nagsugo nga ipapatay si Jesus panahon sa pagmando ni Tiberio.

Sa 1961, nakaplagan sa mga arkeologong nagtrabaho sa karaan nga Romanhong teatro sa Cesarea, Israel, ang usa ka papan nga bato diin klarong makita ang ngalan ni Pilato sa Latin nga pinulongan. Ang inskripsiyon (nga gipakita dinhi) maoy tipik lang sa orihinal nga kinulit. Gituohan nila nga ang kompletong inskripsiyon nag-ingon: “Alang sa halangdong mga diyos (kini) nga Tiberieum gidedikar ni Poncio Pilato, Gobernador sa Judea.” Ang tinukod nga gitumong dinhi lagmit usa ka templo nga nagpasidungog sa Romanong emperador nga si Tiberio.

Sa “Mga Pangutana Gikan sa mga Magbabasa” nga gipatik sa Hulyo 15, 2002, nga gula sa Ang Bantayanang Torre, gihisgotan nga angayng magpandong ang usa ka sister kon siya magdumalag pagtuon sa Bibliya diin presente ang usa ka lalaking magmamantala, bawtismado man kini o dili. Gipakita sa dugang pagsusi niini nga haom ang paghimog diyutayng kausaban bahin niini nga lagda.

Kon bawtismado ang lalaking magmamantala nga miuban sa sister dihang siya nagdumalag regular nga pagtuon sa Bibliya, buot gayod niyang magpandong. Sa ingon, iyang gipakita nga siya nagtahod sa kahikayan ni Jehova sa pagkaulo diha sa kongregasyon kay gibuhat niya ang usa ka buluhaton nga maoy responsabilidad sa usa ka brader. (1 Cor. 11:5, 6, 10) Apan makahangyo ang sister sa kauban niyang brader nga maoy magdumala sa pagtuon kon siya kuwalipikado ug makahimo niana.

Sa laing bahin, kon ang kauban sa sister sa pagdumalag pagtuon sa Bibliya dili-bawtismado nga magmamantalang lalaki kinsa dili niya bana, ang Kasulatan wala ra mag-obligar kaniya nga magpandong. Apan bisan sa maong mga sirkumstansiya, ang pipila ka sister makahukom nga magpandong tungod sa ilang konsensiya.