“DILI ko makahimo sa pagpamalaybalay!” Kanay gibati sa daghang bag-ong estudyante sa Bibliya bahin sa pagsangyaw ngadto sa uban. Apan ang nagsulti niini maoy hanas nga mamumulong ug magtutudlo sa Bibliya nga gitawag ug pilgrim, o nagapanawng ministro.

Daghang magbabasa sa Zion’s Watch Tower nga mibiya sa ilang relihiyon ang nangandoy nga makauban kadtong sama nila nga uhaw sa kamatuoran sa Bibliya. Ang magasin nag-awhag sa mga magbabasa nga pangitaon kadtong sama nilag pagtuo ug magtigom nga regular alang sa pagtuon sa Bibliya. Sugod sa mga 1894, ang Watch Tower Society nagpadalag nagapanawng mga hawas aron duawon ang mga grupo nga mihangyo nga bisitahon. Kining eksperyensiyado ug kugihang mga lalaki, nga sa ulahi gitawag ug mga pilgrim, gipili tungod sa ilang kalumo, kahibalo sa Bibliya, kahanas sa pagpakigpulong ug pagpanudlo, ug pagtuo sa halad lukat. Sagad, usa o duha lang ka adlaw ang duaw. Apan puno kinig mga kalihokan. Daghang Estudyante sa Bibliya ang misangyaw sa unang higayon pinaagi sa pagpanagtag ug mga imbitasyon alang sa pakigpulong sa usa ka pilgrim. Usa ka gabii niana, si Hugo Riemer, nga sa ulahi nahimong membro sa Nagamandong Lawas, nagdiskurso diha sa usa ka eskuylahan. Lapas na sa alas 12:00 sa gabii siya nahuman sa pagtubag sa mga pangutana sa Bibliya. Bisag gikapoy, siya malipayon ug miingon nga nindot kaayo ang maong tigom.

Ang Watch Tower miingon nga ang pangunang katuyoan sa pagduaw sa mga pilgrim mao ang pagpalig-on sa mga magtutuo pinaagi sa pagpahigayon ug mga tigom diha sa ilang mga balay. Manambong ang mga Estudyante sa Bibliya gikan sa palibot nga mga lungsod aron maminaw sa mga pakigpulong ug makigbahin sa pangutanag tubag nga mga sesyon. Human niana, masinati ang Kristohanong pagkamaabiabihon. Sa bata pa si Maude Abbott, nakatambong siyag pakigpulong sa buntag, ug human sa tigom ang tanan nag-alirong diha sa usa ka taas nga lamesa sa lagwerta. “Pagkadaghang pagkaon—hamon, fried chicken, klase-klaseng pan, pie, ug keyk! Nabusog gyod ang tanan, ug pagka-alas dos sa hapon, nagtigom na pod mi alang sa laing pakigpulong.” Apan siya miingon, “Giduka mi pag-ayo.” Ang dugay nang pilgrim nga si Benjamin Barton mipasiaw, ‘Kon ako pang gikaon ang tanang lamiang pagkaon nga gidalit kanako, hagbay ra kong namatay.’ Sa ulahi, may sulat gikan sa hedkuwarter sa Brooklyn nga nagpahinumdom sa maabiabihong mga sister nga “simpleng pagkaon” ug “maayong pahulay” lang ang gikinahanglan sa mga pilgrim.

Hanas kaayo ang mga pilgrim sa pagpanudlo ug sa paggamit ug mga tsart, modelo, o ubang butang aron mahimong makapainteres ang ilang ulohan. Ang mga pakigpulong ni R. H. Barber “dili gyod makalaay.” Inamahan usab ang paagi sa pagsulti ni W. J. Thorn, nga “samag patriarka sa karaang panahon.” Usa ka adlaw niana samtang nagsakay sa Model A Ford, si Shield Toutjian kalit lang misinggit, “Hunong!” Mikanaog dayon siya sa sakyanan, nangibot ug ihalas nga mga bulak, ug gitudloan ang iyang mga kauban bahin sa kalalangan ni Jehova.

 Lisod ang buluhaton sa mga pilgrim, ilabina kon magkaedaran na. Apan alang sa uban, ang kinalisdang pagsulay mao ang kausaban sa ilang buluhaton. Manguna na sila sa pagsangyaw sa balaybalay. Ang Marso 15, 1924 nga Watch Tower miingon nga ang “usa sa pangunang mga buluhaton” sa matuod nga mga Kristohanon “mao ang pagsangyaw sa gingharian. Kini ang katuyoan nga gipadala ang mga pilgrim.”

Ang ubang pilgrim supak sa maong kausaban ug miundang sa ilang asaynment. Ang pipila nagtukod pa ganig kaugalingong relihiyon. Si Robie D. Adkins nahinumdom sa usa ka pilgrim nga maayong mopakigpulong apan nasuko ug mireklamo: “Sa entablado lang ko makamaong mosangyaw. Dili ko makahimo sa pagpamalaybalay!” Si Brader Adkins mipadayon: “Nakita nako siya pag-usab sa 1924 nga kombensiyon sa Columbus, Ohio. Nagtindog siya ilalom sa gamayng kahoy, ug siya lang ang magul-anon didto samtang malipayon kaayo ang libolibo ka igsoon. Wala na nako siya makita pag-usab. Mibiya siya sa organisasyon human niadto.” Sa laing bahin, “daghang malipayong igsoon ang nagdalag mga libro paingon sa ilang mga sakyanan,” nga gusto na kaayong mosangyaw sa balaybalay.—Buh. 20:20, 21.

Daghang pilgrim ang gikulbaan sa pagpamalaybalay, maingon usab ang mga igsoon nga ilang bansayon. Apan maikagon silang nagsangyaw. Ang German ug sinultihan nga pilgrim nga si Maxwell G. Friend (Freschel) misulat bahin sa pagpamalaybalay: “Kini nakadugang sa among kalipay samtang kami nagaduaw.” Ang pilgrim nga si John A. Bohnet miingon usab nga kadaghanan sa mga igsoon kinasingkasing nga misuportar sa pagsangyaw sa Gingharian ug masiboton kaayong namalaybalay.

Latas sa katuigan, maayo kaayog impluwensiya sa mga igsoon ang matinumanong mga pilgrim. “Bisag bata pa ko niadto, nakita nako nga importante ug mapuslanon kaayo ang buluhaton sa mga pilgrim,” matod sa dugay nang Saksi nga si Norman Larson. “Dako kaayo silag natabang sa pag-umol kanako sa hustong paagi.” Hangtod karon, gitabangan sa masakripisyohon ug maunongong mga nagapanawng magtatan-aw ang ilang mga isigkamagtutuo sa pag-ingon, “Makahimo kita sa pagpamalaybalay!”

[Blurb sa panid 32]

Makapalipay kaayo ang pagduaw sa mga pilgrim!

[Hulagway sa panid 31]

Sa listahan ni Benjamin Barton niadtong 1905, mga 170 ka lugar ang iyang adtoon

[Hulagway sa panid 32]

Si Walter J. Thorn maoy minahal nga pilgrim nga gitawag ug Pappy tungod sa iyang inamahan ug samag Kristo nga kinaiya

[Hulagway sa panid 32]

Si J. A. Browne gipadala sa Jamaica sa mga 1902 ingong pilgrim aron palig-onon ug dasigon ang 14 ka gagmayng grupo

[Hulagway sa panid 32]

Tungod sa buluhaton sa mga pilgrim, milig-on ang pagtuo ug panaghiusa sa mga igsoon, ug nasuod sila sa organisasyon