Barog nga Malig-on ug Likayi ang mga Lit-ag ni Satanas!
Barog nga Malig-on ug Likayi ang mga Lit-ag ni Satanas!
‘Barog nga malig-on batok sa malipatlipatong mga kaugdahan sa Yawa.’—EFE. 6:11.
UNSAON NIMO PAGTUBAG?
Sa unsang paagi ang usa ka alagad ni Jehova makalikay sa lit-ag sa materyalismo?
Unsay makatabang sa minyong mga Kristohanon aron dili mahulog sa gahong sa pagpanapaw?
Unsay mga benepisyo kon dili kita magpadala sa materyalismo ug seksuwal nga imoralidad?
1, 2. (a) Nganong gidumtan ni Satanas ang mga dinihogan ug ang “ubang mga karnero”? (b) Unsang mga lit-ag ni Satanas ang hisgotan niining artikuloha?
SI Satanas nga Yawa walay kaluoy sa mga tawo ug nagdumot sa mga alagad ni Jehova. Gani, siya nakiggubat sa mga dinihogan nga ania pa sa yuta. (Pin. 12:17) Ang maong mga Kristohanon maisogong nanguna sa pagsangyaw sa Gingharian ug nagyagyag kang Satanas ingong magmamando niining kalibotana. Gidumtan usab sa Yawa ang “ubang mga karnero,” kinsa nagpaluyo sa mga dinihogan ug may paglaom nga mabuhi sa walay kataposan. (Juan 10:16) Si Satanas nawad-an na sa maong paglaom mao nga suko kaayo siya. Sa langit man o sa yuta ang atong paglaom, si Satanas dili interesado sa atong kaayohan. Ang iyang tumong mao ang pagbiktima kanato.—1 Ped. 5:8.
2 Aron mahimo niya kana, si Satanas naggamit ug lainlaing lit-ag. Kay iyang ‘gibutaan ang hunahuna’ sa mga dili magtutuo, sila dili modawat sa maayong balita ug dili makakita sa maong mga lit-ag. Apan naningkamot usab siya sa paglit-ag niadtong midawat sa mensahe sa Gingharian. (2 Cor. 4:3, 4) Gipakita sa nag-unang artikulo kon sa unsang paagi atong malikayan ang tulo ka lit-ag ni Satanas: (1) walay pugong nga sinultihan, (2) kahadlok ug pagpit-os, ug (3) sobrang pagkahasol sa konsensiya. Atong hisgotan karon kon sa unsang paagi kita makabarog nga malig-on batok sa duha pa ka lit-ag—ang materyalismo ug ang tentasyon nga manapaw.
MATERYALISMO—ANG LIT-AG NGA MAKATUOK
3, 4. Sa unsang paagi ang kabalaka niining sistema sa mga butang mahimong motultol sa materyalismo?
3 Sa usa sa mga ilustrasyon ni Jesus, iyang gihisgotan ang binhi nga napugas taliwala sa mga sampinit. Iyang gipatin-aw nga ang usa ka tawo tingali modawat sa mensahe sa Gingharian, “apan ang kabalaka niining sistema sa mga butang ug ang malimbongong gahom sa mga bahandi motuok sa pulong, ug siya dili mamunga.” (Mat. 13:22) Oo, ang materyalismo maoy usa ka lit-ag nga gigamit ni Satanas.
4 Dunay duha ka butang nga kon mag-uban makatuok sa pulong. Ang usa mao “ang kabalaka niining sistema sa mga butang.” Niining “makuyaw nga mga panahong lisod sagubangon,” daghan kaayong butang nga makapabalaka kanimo. (2 Tim. 3:1) Tungod sa nagkamahal nga mga palaliton ug kawalay trabaho, nalisdan ka tingali sa pagtagana sa imong mga panginahanglan. Lagmit nabalaka usab ka sa imong kaugmaon ug naghunahuna, ‘Duna pa kaha koy igong kuwarta inigkatigulang nako?’ Tungod niini, ang uban naningkamot nga madato kay nagtuo nga kon daghan silag kuwarta, segurado ang ilang kaugmaon.
5. Sa unsang paagi kita mahimong malimbongan sa “gahom sa bahandi”?
5 Ang laing butang nga gihisgotan ni Jesus mao “ang malimbongong gahom sa mga bahandi.” Kini, uban ang kabalaka, makatuok sa pulong. Ang Bibliya nag-ingon nga “ang salapi usa ka panalipod.” (Eccl. 7:12) Apan dili maalamon ang pagpaningkamot nga madato. Daghan ang nakaamgo nga dihang mas naningkamot sila nga madato, mas nalit-agan sila sa materyalismo. Ang uban naulipon pa gani sa ilang bahandi.—Mat. 6:24.
6, 7. (a) Sa unsang paagi ka posibleng malit-agan sa materyalismo diha sa trabahoan? (b) Unsay angayng konsiderahon sa usa ka Kristohanon kon hangyoon siyang mag-obertaym?
6 Ang tinguha nga madato mahimong magsugod nga dili mamatikdan. Pananglitan, giduol ka sa imong amo ug miingon siya: “Naa koy maayong balita! Nakakuhag dakong kontrata ang atong kompaniya. Kinahanglan ka nang mag-obertaym pirme sulod sa pipila ka bulan. Pero pasaligan ti ka nga di gyod ka magmahay sa imong kitaon.” Unsay imong buhaton? Siyempre, kinahanglan nimong tagan-an ang imong pamilya sa materyal, apan dili lang kana ang imong responsabilidad. (1 Tim. 5:8) Duna pay ubang butang nga angay nimong konsiderahon. Unsa ka subsob kang mag-obertaym? Makabalda ba kini sa imong espirituwal nga mga kalihokan, lakip na sa mga tigom ug pamilyahanong pagsimba?
7 Sa dili ka pa modesisyon, hunahunaa kon unsay labing importante kanimo—ang imong kitaon o ang imong relasyon kang Jehova? Unahon ba nimo ang pagpangitag daghang kuwarta imbes ang intereses sa Gingharian? Unsa kahay epekto sa materyalismo kanimo kon mapasagdan nimo ang imong espirituwalidad ug sa imong pamilya? Kon nameligro ang imong espirituwalidad karon, sa unsang paagi ka makabarog nga malig-on ug dili matuok sa materyalismo?—Basaha ang 1 Timoteo 6:9, 10.
8. Unsang mga panig-ingnan sa Bibliya ang makatabang nato sa pagsusi sa atong pagkinabuhi?
8 Aron dili ka matuok sa materyalismo, susiha ang imong pagkinabuhi matag karon ug unya. Dili gayod nato gustong mahisama kang Esau, nga wala magpabili sa espirituwal nga mga butang! (Gen. 25:34; Heb. 12:16) Ug seguradong dili nato gustong mahisama sa datong tawo nga giawhag ni Jesus sa pagbaligya sa tanan niyang kabtangan, sa paghatag sa iyang salapi ngadto sa mga kabos, ug sa pagsunod Kaniya. Imbes buhaton kana, “siya milakaw nga naguol, kay siya naghupot man ug daghang kabtangan.” (Mat. 19:15-22) Kay nalit-agan sa iyang bahandi, nawala kaniya ang dakong pribilehiyo nga mahimong sumusunod sa labing bantogang tawo nga nabuhi sukad! Pagbantay nga dili mawala kanimo ang pribilehiyo ingong tinun-an ni Jesu-Kristo.
9, 10. Sumala sa Bibliya, unsay angay natong panglantaw sa materyal nga mga butang?
9 Aron dili sobrang mabalaka sa materyal nga mga butang, sunda ang tambag ni Jesus: “Ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ Kay kining tanan mao ang mga butang nga maikagong ginapangagpas sa mga nasod. Kay ang inyong langitnong Amahan nahibalo nga gikinahanglan ninyo kining tanang butanga.”—Mat. 6:31, 32; Luc. 21:34, 35.
10 Kon dili nato gustong mabiktima sa malimbongong gahom sa bahandi, atong sundogon ang tinamdan sa magsusulat sa Bibliya nga si Agur, kinsa miingon: “Ayaw ako himoang sobra ka kabos o sobra ka dato. Hatagi lang ko sa akong gikinahanglan.” (Prov. 30:8, Contemporary English Version) Nahibalo si Agur nga importante ang salapi aron mabuhi, apan nahibalo usab siya sa malimbongong gahom sa bahandi. Hinumdomi nga ang mga kabalaka niining sistemaha ug ang malimbongong gahom sa bahandi makadaot sa atong espirituwalidad. Kon sobra kitang mabalaka sa materyal, basig mawad-an na kitag panahon, kusog, o tinguha sa pag-una sa intereses sa Gingharian. Busa, angay kitang mag-amping nga dili mabitik sa lit-ag ni Satanas nga materyalismo.—Basaha ang Hebreohanon 13:5.
PAGPANAPAW—SAMAG GITABONAN NGA GAHONG
11, 12. Sa unsang paagi ang usa ka Kristohanon mahimong makapanapaw diha sa iyang trabahoan?
11 Aron makadakop ug kusgang mananap, ang mga mangangayam magkalot ug gahong, o lungag, sa lugar nga pirmeng agian niini. Sagad ilang tabonag mga kahoykahoy ug yuta ang gahong aron dili kini mamatikdan. Susama niana ang labing malamposong lit-ag nga gigamit ni Satanas—ang imoralidad. (Prov. 22:14; 23:27) Daghang Kristohanon nahulog sa maong gahong kay wala nila likayi ang mga situwasyon nga dali silang makahimog imoralidad. Ang pipila ka minyong Kristohanon nakapanapaw human makaugmad ug dili hustong romantikong relasyon sa uban.
12 Ang dili hustong romantikong relasyon mahimong magsugod diha sa imong trabahoan. Gani sumala sa usa ka pagtuon, sobra sa katunga sa mga babaye ug halos 3 sa 4 ka lalaki nga nakapanapaw ang nakigrelasyon sa ilang kauban sa trabaho. Duna ka bay kauban sa trabaho nga dili nimo samag sekso? Kon duna, suod ba mo kaayo? Nagbutang ka bag mga limitasyon aron dili mahimong romantiko ang inyong relasyon? Pananglitan, basin ang usa ka sister kanunayng makig-estorya sa iyang katrabaho nga lalaki. Dihang magkasuod na sila, isulti na tingali sa sister kaniya ang mga problema nila sa iyang bana. Sa laing kahimtang, basin ang usa ka brader makigsuod sa usa ka babaye diha sa iyang trabahoan ug maghunahuna: “Gipabilhan niya ang akong opinyon ug maminaw gyod siya kon makig-estorya ko. Importante ko sa iya. Maayo untag ingon ani akong asawa!” Nakita ba nimo kon sa unsang paagi ang mga Kristohanon nga anaa sa maong mga situwasyon nameligrong makapanapaw?
13. Sa unsang paagi mahimong magsugod ang dili hustong romantikong relasyon sulod sa kongregasyon?
13 Ang dili hustong romantikong relasyon mahimong magsugod usab sulod sa kongregasyon. Tagda ang nahitabo sa magtiayong si Daniel ug Sarah, * nga mga regular payunir. Miingon si Daniel nga siya “usa ka ansiyano nga dili mobalibad.” Modawat siya sa tanang pribilehiyo nga ihatag kaniya. Duna usab siyay lima ka Bible study nga mga lalaki, ug ang tulo kanila nabawtismohan. Kining bag-ong mga brader nagkinahanglan pag dugang pagdasig. Kay puliki man kaayo si Daniel sa kongregasyon, si Sarah ang modasig kanila. Wala madugay, kini ang kanunayng mahitabo: Dihang may problema ang mga Bible study kanhi ni Daniel, si Sarah ang motabang kanila. Dihang si Sarah magkinahanglan ug atensiyon, sila ang mohatag niana. Kini nga situwasyon nahimong peligrosong lit-ag. Si Daniel miingon: “Tungod sa daghang bulan nga ang akong asawa nagtabang sa uban, siya usab nagkinahanglag espirituwal ug emosyonal nga pagdasig. Apan ako siyang napasagdan, ug dili maayo ang resulta niini. Nakapanapaw ang akong asawa sa usa sa akong mga Bible study kanhi. Puliki kaayo ko sa akong mga pribilehiyo mao nga wala ko makabantay nga naluya na diay siya sa espirituwal.” Sa unsang paagi nimo malikayan ang maong trahedya?
14, 15. Unsay makatabang sa minyong mga Kristohanon aron dili makapanapaw?
14 Aron dili makapanapaw, hunahunaa kon unsay kahulogan sa inyong panumpa ingong magtiayon. Si Jesus miingon: “Kon unsay gihiusa pagyugo sa Diyos ayaw ipabulag ni bisan kinsang tawo.” (Mat. 19:6) Ayawg hunahunaa nga ang imong mga pribilehiyo sa kongregasyon mas importante kay sa imong kapikas. Kon dili mo pirmeng mag-uban tungod sa dili kaayo importanteng mga buluhaton, timailhan kini nga may diperensiya ang inyong kaminyoon ug basin matental ka sa pagpanapaw.
15 Kon ikaw usa ka ansiyano, angay nimong atimanon ang kongregasyon kay si apostol Pablo misulat: “Bantayi ninyo ang panon sa Diyos nga ubos sa inyong pag-atiman, dili nga pinugos, kondili kinabubut-on; ni tungod sa gugma sa kinitaan pinaagig limbong, apan maikagon.” (1 Ped. 5:2) Ayaw gayod pasagdi ang mga igsoon sa kongregasyon. Apan ayaw pod hutda ang imong panahon alang niini, nga masakripisyo na ang imong papel ingong bana. Walay kapuslanan ang imong pagtabang sa mga igsoon kon imong mapasagdan ang imong asawa. Kana magpameligro sa inyong kaminyoon. Si Daniel miingon, “Dili maayo nga sobrang mapuliki sa kongregasyon, nga mapasagdan na hinuon ang imong pamilya.”
16, 17. (a) Diha sa trabahoan, unsay maayong himoon sa minyong Kristohanon aron ipakita nga dili siya interesadong makigrelasyon sa uban? (b) Paghatag ug pananglitan gikan sa atong mga magasin nga makatabang sa mga Kristohanon sa paglikay sa pagpanapaw.
16 Ang Bantayanang Torre ug Pagmata! dunay daghang maayong tambag nga makatabang sa minyong mga Kristohanon sa paglikay sa lit-ag sa pagpanapaw. Pananglitan, ang Septiyembre 15, 2006 nga Bantayanang Torre nagpasidaan labot sa mga situwasyon sa trabahoan ug sa ubang dapit nga magpasuod kanimo sa kaatbang nga sekso. Pananglitan, ang pag-obertaym kauban sa kaatbang nga sekso mahimong motultol sa tentasyon. Ingong minyo, kinahanglang madayag sa imong sinultihan ug panggawi nga dili ka interesadong makigrelasyon sa uban. Ayaw pagbirigbirig o pagsinina ug seksi aron dili ka makakuhag atensiyon. Ang pagbutang ug mga letrato sa imong kapikas ug mga anak diha sa trabahoan magpahinumdom kanimo ug sa uban nga importante kanimo ang imong pamilya. Magmadeterminado nga dili gayod mopakitag interes o mokonsentir sa pagbirigbirig sa uban.
17 Ang artikulong “Pagkamaunongon sa Kaminyoon—Unsa Gayoy Kahulogan Niini?” sa Abril 2009 nga Pagmata! nagpasidaan batok sa paghanduraw ug seksuwal nga relasyon sa dili nimo kapikas. Gipasiugda sa artikulo nga ang maong paghanduraw mas makaaghat sa usa sa pagpanapaw. (Sant. 1:14, 15) Kon minyo ka, maayong repasohon nimo ug sa imong kapikas ang maong mga impormasyon matag karon ug unya. Si Jehova ang Tagmugna sa kaminyoon, ug kini balaan. Paneguroa nga duna moy panahon sa imong kapikas nga maghisgot bahin sa inyong kaminyoon. Kini magpakita nga inyong gipabilhan ang mga butang nga balaan.—Gen. 2:21-24.
18, 19. (a) Unsay daotang mga resulta sa pagpanapaw? (b) Unsay mga benepisyo kon ang usa magmaunongon sa iyang kapikas?
18 Kon matental ka nga makigrelasyon sa dili nimo kapikas, hunahunaa ang daotang resulta niini. (Prov. 7:22, 23; Gal. 6:7) Kadtong nakahimog imoralidad wala makapahimuot kang Jehova, ug nakapasakit sa ilang kapikas ug sa ilang kaugalingon. (Basaha ang Malaquias 2:13, 14.) Hunahunaa usab ang mga benepisyo nga imong mabatonan kon magpabilin kang hinlo sa panggawi. Duna kay paglaom nga mabuhi sa walay kataposan, magmalipayon ang imong kinabuhi karon, ug hinlo ang imong konsensiya.—Basaha ang Proverbio 3:1, 2.
19 Ang salmista miawit: ‘Ang dagayang pakigdait iya niadtong nahigugma sa balaod sa Diyos, ug alang kanila walay kapandolan.’ (Sal. 119:165) Busa higugmaa ang kamatuoran, ug ‘pagbantay pag-ayo nga ang imong paglakaw dili ingon sa dili-maalamon kondili ingon sa maalamon nga mga tawo.’ (Efe. 5:15, 16) Si Satanas naggamit ug daghang lit-ag aron mabitik ang matuod nga mga magsisimba. Apan gihatagan kita ni Jehova sa tanan natong gikinahanglan aron kita “makabarog nga malig-on” ug makapanalipod sa atong kaugalingon batok sa mga lit-ag ni Satanas.—Efe. 6:11, 16.
[Footnote]
^ par. 13 Ang mga ngalan giilisan.
[Mga Pangutana sa Pagtuon]
[Hulagway sa panid 26]
Ang materyalismo makatuok sa espirituwalidad. Ayaw tugoting mahitabo kini kanimo
[Hulagway sa panid 29]
Ang pagbirigbirig—o pagkonsentir niini—mahimong motultol sa pagpanapaw
