SA 1886, usa ka gatos ka librong Millennial Dawn, Volume I gikan sa Bible House sa Allegheny, Pennsylvania, U.S.A., ang gipadala sa Chicago, Illinois. Gidahom ni Charles Taze Russell nga mapanagtag ang bag-ong libro diha sa mga bookstore. Usa sa kinadak-ang mga kompaniya sa Amerika nga tigbalig-yag mga libro bahin sa relihiyon ang miangkat sa Millennial Dawn. Apan paglabayg duha ka semana, gibalik nila kini sa Bible House.

Dihay taho nga nasuko pag-ayo ang usa ka iladong ebanghelisador pagkakita niya sa Millennial Dawn nga gidispley uban sa iyang mga basahon. Kon dili kono kuhaon ang mga Dawn diha sa estante, kuhaon niya ug sa iyang iladong ebanghelisador nga mga higala ang ilang mga basahon ug makignegosyo sa laing kompaniya. Napugos ang tigbaligya sa pag-uli sa mga Dawn. Dugang pa, kining mga libroha gianunsiyo na diha sa mga mantalaan. Apan giseguro sa mga magsusupak nga makanselar ang mga kontrata sa pag-anunsiyo. Nan, sa unsang paagi makaabot kining bag-ong publikasyon ngadto sa mga nangita sa kamatuoran?

Ang mga colporteur mao ang solusyon. * Sa 1881, ang Zion’s Watch Tower nanawagan ug 1,000 ka magwawali nga bug-os panahong managtag ug mga literatura sa Bibliya. Bisag pipila lang ka gatos ang mga colporteur, sila nagsabwag ug mga binhi sa kamatuoran ngadto sa lagyong mga dapit pinaagig mga basahon. Pagka-1897 duolag usa ka milyong Dawn ang napanagtag, nga kadaghanan pinaagi sa mga colporteur. Para sa ilang materyal nga panginahanglan, kontento na sila sa gamayng kantidad nga ilang madawat sa matag libro o suskrisyon sa Watch Tower nga ilang mapahimutang.

Kinsa kining maisogong mga colporteur? Ang pipila mga batan-on pa, ang uban mga edaran na. Daghan ang tagsaanon o mga minyo nga walay anak, ug ubay-ubayng pamilya usab ang nag-colporteur. Ang mga regular colporteur naggugol ug daghang oras sa kanataran, ug ang mga auxiliary colporteur usa o duha lang ka oras kada adlaw. Tungod sa panglawas o kahimtang, dili tanan ang maka-colporteur. Apan sa usa ka kombensiyon sa 1906, gidasig kadtong makaarang nga “sila dili kinahanglang daghag nakat-onan, o abilidaran, o maayong manulti.”

Halos sa matag kontinente, may ordinaryong mga tawo nga nakahimog talagsaong kalamposan. Gibanabana sa usa ka brader nga nakapanagtag siyag  15,000 ka libro. Apan siya miingon, “Wala ko mag-colporteur aron mamaligyag libro kondili aron magpamatuod bahin kang Jehova ug sa iyang kamatuoran.” Bisan asa sila moadto, motubo ang mga binhi sa kamatuoran ug modaghan ang mga grupo sa mga Estudyante sa Bibliya.

Gitamay sa mga lider sa relihiyon ang mga colporteur ingong tigbaligyag libro. Ang 1892 nga Watch Tower mikomento: “Pipila lang ang miila kanila ingong tinuod nga mga alagad sa Ginoo, o nakadayeg sa ilang pagkamapaubsanon ug pagsakripisyo nga nakita sa Ginoo diha kanila.” Dili gyod sayon ang kinabuhi sa mga colporteur. Lig-ong mga sapatos ug bisikleta ang ilang gikinahanglan. Kon kulang ang kuwarta, pabayloan nilag pagkaon ang mga libro. Human sa tibuok adlaw sa kanataran, ang gikapoy apan malipayong mga magwawali mouli sa ilang mga tolda ug giabangang mga kuwarto. Dayon gihimo ang Colporteur Wagon aron makadaginot ug oras ug salapi. *

Sukad sa kombensiyon sa Chicago sa 1893, gilakip sa programa ang linaing mga sesyon para sa mga colporteur. Kini dunay pagbayloayg makapadasig nga mga eksperyensiya. Naghisgot usab kinig mga teknik sa pagsangyaw ug praktikal nga mga sugyot. Si Brader Russell kas-a miawhag sa kugihang mga magwawali nga mokaog daghan sa pamahaw, moinom ug gatas sa tingmeryenda, ug mag-ice cream soda kon init ang panahon.

Ang mga colporteur nga mangitag partner sa pagsangyaw magbutang ug yellow nga ribon. Ang bag-ong mga colporteur ipartner sa mga hanas na. Gikinahanglan gayod ang maong pagbansay. Gani, dihay colporteur nga gikulbaan sa pagtanyag sa mga libro ug miingon, “Dili man ka gusto ani no?” Maayo na lang kay gusto ang tagbalay ug sa ulahi nahimong magtutuo.

Usa ka brader ang naghunahuna, ‘Magpabilin ba ko sa akong dakog-kita nga trabaho ug modonar ug $1,000 (U.S.) kada tuig, o mag-colporteur ko?’ Siya giingnan nga pabilhan ra sa Ginoo ang bisan hain niana. Apan kon gamiton niya ang iyang panahon alang sa Ginoo, mas daghang panalangin ang iyang madawat. Para kang Mary Hinds, ang pag-colporteur mao “ang labing maayong paagi nga makatabang sa mas daghang tawo.” Ang maulawong sister nga si Alberta Crosby miingon, “Nagkadako ang akong gugma sa Colporteur nga buluhaton matag adlaw.”

Karong adlawa, daghang kaliwat niadtong masibotong mga colporteur, lakip ang daghan nilang mga anak sa espirituwal, ang padayong nagsunod sa ilang mga lakang. Kon wala pay colporteur o payunir sa inyong pamilya, paningkamoting dunay usa nga makapayunir kaninyo. Matag adlaw, magkadako usab ang inyong gugma sa bug-os panahong pag-alagad.

[Mga footnote]

[Blurb sa panid 32]

“Sila dili kinahanglang daghag nakat-onan, o abilidaran, o maayong manulti”

[Hulagway sa panid 31]

Ang colporteur nga si A. W. Osei sa Ghana, mga 1930

[Mga hulagway sa panid 32]

Ibabaw: Ang colporteur nga si Edith Keen ug Gertrude Morris sa England, mga 1918; ubos: Si Stanley Cossaboom ug Henry Nonkes sa Amerika, tupad sa mga karton sa napanagtag nga mga libro