Si Jehova Nahibalo Kon Unsaon Pagluwas sa Iyang Katawhan
Si Jehova Nahibalo Kon Unsaon Pagluwas sa Iyang Katawhan
‘Si Jehova nahibalo kon unsaon pagluwas sa katawhan nga may diyosnong pagkamahinalaron gikan sa pagsulay.’—2 PED. 2:9.
NGANONG MAKASALIG KITA:
Nga kontrolado ni Jehova kon kanus-a mahitabo ang mga butang aron matuman ang iyang katuyoan?
Nga gamiton ni Jehova ang iyang gahom sa pagluwas sa iyang katawhan?
Nahibalo gayod si Jehova kon unsay mahitabo panahon sa dakong kasakitan?
1. Unsay mahitabo panahon sa “dakong kasakitan”?
ANG paglaglag sa Diyos sa kalibotan ni Satanas kalit nga mahitabo. (1 Tes. 5:2, 3) Sa “dakong adlaw ni Jehova,” magkagubot ang katawhan. (Sof. 1:14-17) Aduna unyay grabeng kalisdanan ug pag-antos. Panahon kini sa ‘dakong kasakitan nga wala pa mahitabo sukad sa sinugdan sa kalibotan hangtod karon.’—Basaha ang Mateo 24:21, 22.
2, 3. (a) Unsay masinati sa katawhan sa Diyos panahon sa “dakong kasakitan”? (b) Sa unsang paagi molig-on ang atong pagsalig sa buhaton ni Jehova sa umaabot?
2 Dihang hapit nang matapos ang “dakong kasakitan,” ang katawhan sa Diyos atakehon ni “Gog sa yuta sa Magog.” Niini nga pag-atake, ‘usa ka panon sa kasundalohan nga daghan kaayo’ ang mosulong sa katawhan sa Diyos “sama sa mga panganod nga motabon sa yuta.” (Ezeq. 38:2, 14-16) Walay tawhanong organisasyon ang motabang sa katawhan ni Jehova. Kinahanglan silang mosalig sa Diyos alang sa kaluwasan. Unsa kahay ilang reaksiyon dihang atakehon na sila?
3 Kon alagad ka ni Jehova, duna ka bay pagtuo nga si Jehova makaluwas sa iyang katawhan latas sa dakong kasakitan? Si apostol Pedro misulat: ‘Si Jehova nahibalo kon unsaon pagluwas sa katawhan nga may diyosnong pagkamahinalaron gikan sa pagsulay, apan nagtagana sa dili-matarong nga katawhan alang sa adlaw sa paghukom aron pagalaglagon.’ (2 Ped. 2:9) Kon atong palandongon ang mga pagluwas ni Jehova sa iyang katawhan kaniadto, molig-on ang atong pagsalig sa buhaton niya sa umaabot. Atong hisgotan ang tulo ka pananglitan.
NALUWAS SA LUNOP
4. Unsa pay angayng himoon sa dili pa moabot ang Lunop?
4 Una, tagda ang asoy sa Lunop sa adlaw ni Noe. Dunay mga butang nga angayng himoon sa dili pa moabot ang Lunop. Kinahanglang tukoron ang usa ka dakong arka, ug ang mga hayop pasakyon niini. Ang asoy sa Genesis wala mag-ingon nga gihulat una ni Jehova nga matukod ang arka ug dayon midesisyon kon kanus-a ipahinabo ang Lunop, nga daw kinahanglan niyang agdon nga mahuman una ang arka. Hinunoa, bisan sa wala pa niya sugoa si Noe sa pagtukod ug arka, dugay nang gitakda sa Diyos kon kanus-a magsugod ang Lunop. Giunsa nato pagkahibalo niana?
5. Unsay gipahayag ni Jehova sumala sa Genesis 6:3, ug kanus-a kini gipahayag didto sa langit?
5 Gihisgotan sa Bibliya ang desisyon nga gipahayag ni Jehova didto sa langit. Sumala sa Genesis 6:3, siya miingon: “Ang akong espiritu dili molihok nganha sa tawo hangtod sa panahong walay tino sa pagkaagi nga siya usab unod. Busa ang iyang mga adlaw mokabat ug usa ka gatos ug kawhaan ka tuig.” Wala kini magtumong sa kasagarang gitas-on sa kinabuhi sa tawo. Si Jehova nagpahayag kon kanus-a niya hinloan ang yuta sa pagkadaotan. * Sanglit ang Lunop nagsugod sa 2370 W.K.P., mabanabana nato nga gipahayag kini sa Diyos didto sa langit sa 2490 W.K.P. Niadtong tungora, si Noe 480 anyos. (Gen. 7:6) Mga 20 ka tuig sa ulahi, sa 2470 W.K.P., nangatawo ang mga anak ni Noe. (Gen. 5:32) Mga 100 ka tuig na lang ang nahibilin una mosugod ang Lunop, apan wala gihapon ibutyag ni Jehova kang Noe ang iyang linaing papel sa pagluwas sa katawhan. Unsa pa ka dugay ang gipaabot sa Diyos ayha niya sultihan si Noe?
6. Kanus-a gisugo ni Jehova si Noe sa pagtukod sa arka?
6 Dayag nga si Jehova naghulat ug mga dekada una gibutyag kang Noe kon unsay Iyang buhaton. Nganong makaingon kita niana? Ang Bibliya nag-ingon nga dagko ug minyo na ang mga anak ni Noe dihang gisugo siya sa Diyos sa pagtukod sa arka. Si Jehova miingon kaniya: “Himoon ko ang akong pakigsaad uban kanimo; ug ikaw kinahanglang mosulod sa arka, ikaw ug ang imong mga anak nga lalaki ug ang imong asawa ug ang mga asawa sa imong mga anak nga lalaki uban kanimo.” (Gen. 6:9-18) Busa sa dihang gisugo si Noe sa pagtukod sa arka, lagmit 40 o 50 ka tuig na lang ang nabilin una pa ang Lunop.
7. (a) Sa unsang paagi si Noe ug ang iyang pamilya nagpasundayag ug pagtuo? (b) Kanus-a lang gisultihan sa Diyos si Noe kon kanus-a magsugod ang Lunop?
7 Samtang gitukod ang arka, si Noe ug ang iyang pamilya lagmit naghunahuna kon sa unsang paagi tumanon sa Diyos ang iyang katuyoan ug kon kanus-a magsugod ang Lunop. Bisag wala sila mahibalo sa tanang detalye, sila padayong nagtukod sa arka. Ang Bibliya nag-ingon: “Gibuhat ni Noe ang sumala sa tanan nga gisugo sa Diyos kaniya. Gibuhat niya ang ingon gayod.” (Gen. 6:22) Sa kataposan, gisultihan ni Jehova si Noe nga pito na lang ka adlaw ug magsugod na ang Lunop. Igong panahon lang kini para kang Noe ug sa iyang pamilya sa pagpasulod sa mga hayop ngadto sa arka. Busa dihang mibundak na ang ulan “sa ikaunom ka gatos ka tuig sa kinabuhi ni Noe, sa ikaduha nga bulan, sa ikanapulog-pito ka adlaw sa bulan,” andam na ang tanan.—Gen. 7:1-5, 11.
8. Sa unsang paagi ang asoy sa Lunop nagpalig-on sa atong pagsalig nga si Jehova nahibalo kon kanus-a luwason ang iyang katawhan?
8 Ang asoy sa Lunop nagpamatuod sa katakos ni Jehova dili lang ingong Tigtakda sa Panahon kondili ingong Manluluwas usab. Samtang nagkaduol ang kataposan niining sistema sa mga butang, makaseguro kita nga ang tanang katuyoan ni Jehova matuman gayod sa eksaktong ‘adlaw ug takna’ nga iyang gitakda.—Mat. 24:36; basaha ang Habacuc 2:3.
GILUWAS DIHA SA PULANG DAGAT
9, 10. Giunsa paggamit ni Jehova ang iyang katawhan sa paglit-ag sa kasundalohan sa Ehipto?
9 Atong nakat-onan sa asoy sa Lunop nga kontrolado ni Jehova kon kanus-a mahitabo ang mga butang aron matuman ang iyang katuyoan. Ang ikaduhang pananglitan nga atong tagdon nagpasiugda sa laing rason nga kita makasalig kang Jehova sa pagluwas sa iyang katawhan: Gamiton niya ang iyang dakong gahom aron matuman gayod ang iyang kabubut-on. Si Jehova wala sukad mapakyas sa pagluwas sa iyang katawhan. Gamiton pa gani niya usahay ang iyang katawhan sa paglit-ag sa iyang mga kaaway. Kanay iyang gihimo dihang gipagawas niya ang mga Israelinhon sa pagkaulipon sa Ehipto.
10 Mga tulo ka milyong Israelinhon ang nanggawas sa Ehipto. Gisugo ni Jehova si Moises sa pagpanguna kanila sa usa ka ruta nga hunahunaon ni Paraon nga nasaag sila. (Basaha ang Exodo 14:1-4.) Busa gigukod ni Paraon ug sa iyang kasundalohan ang mga Israelinhon ug gitanggong sila sa Pulang Dagat. Daw wala na silay kaikyasan. (Ex. 14:5-10) Apan sa pagkatinuod wala mameligro ang mga Israelinhon. Ngano? Kay luwason sila ni Jehova.
11, 12. (a) Sa unsang paagi gitabangan ni Jehova ang mga Israelinhon, ug unsay resulta? (b) Unsay gitudlo niini kanato bahin kang Jehova?
11 “Ang haligi nga panganod” nga naggiya sa mga Israelinhon mibalhin sa ilang luyo mao nga nababagan ang kasundalohan ni Paraon. Nagpahinabo kinig kangitngit sa mga Ehiptohanon, apan naghatag kinig kahayag sa mga Israelinhon bisan sa kagabhion. (Basaha ang Exodo 14:19, 20.) Dayon gitunga ni Jehova ang dagat pinaagi sa kusog nga hanging timog, nga naghimo sa salog sa dagat nga mamalang yuta. Dakong panahon ang gigugol niini kay ang asoy nag-ingon nga ang hangin mihuyop “sa tibuok gabii” ug human niana “ang mga anak sa Israel milatas sa taliwala sa dagat sa mamalang yuta.” Ang kasundalohan ni Paraon nagsakayg mga karong iggugubat samtang ang mga Israelinhon naglakaw lang. Apan imposible silang maapsan sa mga Ehiptohanon kay si Jehova nakig-away alang sa Israel. “Iyang gipaguliyang ang kampo sa mga Ehiptohanon. Ug iyang gipanangtang ang mga ligid sa ilang mga karo mao nga naglisod sila pagpadagan niini.”—Ex. 14:21-25.
12 Sa nakatabok na ang mga Israelinhon, gisugo ni Jehova si Moises: “Ituy-od ang imong kamot sa ibabaw sa dagat, aron mobalik ang mga tubig ibabaw sa mga Ehiptohanon, sa ilang mga karo nga iggugubat ug sa ilang mga sundalong mangangabayo.” Moikyas unta ang mga sundalo sa nagbul-og nga tubig, apan “gibanlod ni Jehova ang mga Ehiptohanon ngadto sa taliwala sa dagat.” Sila dili na makaikyas. “Walay bisan usa kanila ang nahibilin.” (Ex. 14:26-28) Busa gipakita ni Jehova nga siya may gahom sa pagluwas sa iyang katawhan sa bisan unsang situwasyon.
NAKAIKYAS SA KALAGLAGAN SA JERUSALEM
13. Unsang mga instruksiyon ang gihatag ni Jesus, ug unsa tingali ang gihunahuna sa iyang mga sumusunod?
13 Ang ikatulong pananglitan nga atong tagdon mao ang pag-atake sa Romanong kasundalohan sa Jerusalem. Gipasiugda niini nga si Jehova nahibalo kon sa unsang paagi eksaktong mahitabo ang mga butang aron matuman ang iyang katuyoan. Pinaagi ni Jesus, si Jehova naghatag ug mga instruksiyon aron maluwas ang mga Kristohanon nga nagpuyo sa Jerusalem ug Judea una malaglag ang siyudad sa 70 K.P. Si Jesus miingon: “Inigkakita ninyo sa dulumtanang butang nga magpahinabog kalaglagan, ingon sa gisulti ni Daniel nga manalagna, nga nagabarog diha sa usa ka balaang dapit, . . . nan silang anaa sa Judea pakalagiwa ngadto sa kabukiran.” (Mat. 24:15, 16) Apan sa unsang paagi mailhan sa mga sumusunod ni Jesus nga nagakatuman na kini nga tagna?
14. Sa unsang paagi nahimong tin-aw ang kahulogan sa mga instruksiyon ni Jesus?
14 Nahimong tin-aw ang kahulogan sa giingon ni Jesus tungod sa sunodsunod nga mga panghitabo. Sa 66 K.P., ang Romanong kasundalohan ubos ni Cestius Gallus miabot sa Jerusalem aron taposon ang pagrebelde sa mga Hudiyo. Dihang ang mga rebelde, nga nailhang mga Zealot, nanago sa kuta sa templo, ang Romanong mga sundalo misugod sa paglumpag sa paril niini. Nasabtan sa alistong mga Kristohanon ang kahulogan niini: Ang kasundalohan sa Roma nga nagdalag mga bandera mao ang “dulumtanang butang” nga nagbarog sa “usa ka balaang dapit.” Panahon na alang sa mga sumusunod ni Jesus nga ‘mokalagiw ngadto sa kabukiran.’ Apan unsaon nila paggawas sa siyudad nga gilikosan man kini sa mga kaaway? Dunay wala damhang mahitabo.
15, 16. (a) Unsang espesipikong instruksiyon ang gihatag ni Jesus, ug nganong kinahanglang sundon kini sa iyang mga sumusunod? (b) Sa unsa nagdepende ang atong kaluwasan?
15 Wala damha, si Cestius Gallus ug ang iyang mga sundalo miatras ug mibiya sa Jerusalem. Gigukod sila sa mga Zealot. Kay wala na ang naggubatay nga mga grupo, ang mga sumusunod ni Jesus makahigayon na sa pagkalagiw. Espesipiko silang giinstruksiyonan ni Jesus nga biyaan ang ilang mga kabtangan ug mobiya dayon sa siyudad. (Basaha ang Mateo 24:17, 18.) Kinahanglan ba gyod silang mobiya dayon? Oo, kay sa pipila lang ka adlaw namalik ang mga Zealot ug gipugos ang mga molupyo sa Jerusalem ug Judea sa pag-anib kanila. Migrabe ang kagubot sa siyudad kay daghang partido sa mga Hudiyo ang nag-ilogay sa gahom. Misamot ka lisod ang pagbiya sa Jerusalem. Dihang namalik ang mga Romano sa 70 K.P., imposible nang makagawas sa siyudad. (Luc. 19:43) Ang tanang nagpabilin sa Jerusalem dili na makaikyas! Apan ang mga Kristohanon nga misunod sa mga instruksiyon ni Jesus nga mokalagiw sa kabukiran naluwas. Ila mismong nakita nga si Jehova nahibalo kon unsaon pagluwas sa iyang katawhan. Unsay atong makat-onan niini?
16 Panahon sa dakong kasakitan, kinahanglang sundon sa mga Kristohanon ang mga instruksiyon gikan sa Pulong sa Diyos ug sa organisasyon. Pananglitan, ang sugo ni Jesus nga ‘mokalagiw ngadto sa kabukiran’ mapadapat karon. Kon sa unsang paagi kita “mokalagiw,” wala pa kita masayod. * Apan makaseguro kita nga ipatin-aw ni Jehova ang kahulogan sa maong instruksiyon sa eksaktong panahon. Ang atong kaluwasan nagdepende sa atong pagkamasinugtanon. Busa pangutan-a ang kaugalingon: ‘Masinugtanon ba ko sa mga instruksiyon nga gihatag ni Jehova sa iyang katawhan karon? Nagasunod ba ko dayon, o nagduhaduha pa?’—Sant. 3:17.
GIPALIG-ON ALANG SA UMAABOT
17. Unsay gibutyag sa tagna ni Habacuc bahin sa pag-atake ni Gog sa katawhan sa Diyos?
17 Balikan nato karon ang pag-atake ni Gog nga atong gihisgotan sa sinugdan. Sa susamang tagna, si Habacuc miingon: “Ako nakadungog, ug ang akong tiyan naukay; ang akong mga ngabil nangurog tungod sa tingog; ang pagkadunot misulod sa akong kabukogan; ug sa akong kahimtang ako nasamok, aron sa hilom ako maghulat sa adlaw sa kasakit, sa iyang [Diyos] pag-adto sa katawhan [kaaway nga kasundalohan], aron sa pagsulong kanila.” (Hab. 3:16) Sa pagkadungog lang ni Habacuc nga atakehon ang katawhan sa Diyos, misakit ang iyang tiyan, nangurog ang iyang mga ngabil, ug nawad-an siyag kusog. Apan mapailobon siyang naghulat dakong adlaw ni Jehova. Tingali mahadlok usab kita dihang moatake na kanato si Gog ug ang iyang kasundalohan. Apan sama kang Habacuc, makasalig kita nga luwason ni Jehova ang iyang katawhan.—Hab. 3:18, 19.
18. (a) Nganong dili kita angayng mahadlok dihang atakehon na kita sa mga kaaway? (b) Unsay atong hisgotan sa sunod artikulo?
18 Ang tulo ka pananglitan nga atong gihisgotan nagpamatuod nga si Jehova nahibalo gayod kon unsaon pagluwas sa iyang katawhan. Imposibleng mapakyas ang iyang katuyoan; segurado ang iyang kadaogan. Apan aron makaduyog kita sa dakong kadaogan ni Jehova, kinahanglan kitang magmatinumanon hangtod sa kataposan. Sa unsang paagi kita gitabangan ni Jehova karon nga magpabiling matinumanon? Ato kanang hisgotan sa sunod artikulo.
[Mga footnote]
^ par. 16 Tan-awa ang Bantayanang Torre, Mayo 1, 1999, panid 19.
[Mga Pangutana sa Pagtuon]
[Hulagway sa panid 24]
Nameligro ba gayod ang mga Israelinhon gikan sa kasundalohan ni Paraon?
