Pahimusli ang Imong Pagkatagsaanon
Pahimusli ang Imong Pagkatagsaanon
“Siya nga makahatag ug luna alang niini magahatag ug luna niini.”—MAT. 19:12.
1, 2. (a) Unsay panglantaw ni Jesus, Pablo, ug sa uban bahin sa pagkatagsaanon? (b) Nganong ang uban tingali dili mag-isip nga gasa ang pagkatagsaanon?
ANG kaminyoon maoy usa sa labing bililhong mga gasa nga gihatag sa Diyos sa tawo. (Prov. 19:14) Apan, daghang Kristohanong tagsaanon usab ang may matagbawong kinabuhi. Si Harold, nga 95-anyos nga ulitawo, miingon: “Bisag malingaw ko kon may mga kauban ug mag-abiabi, dili pod ko magmingaw kon ako mag-inusara. Tingali duna koy gasa sa pagkatagsaanon.”
2 Gani, si Jesu-Kristo ug si apostol Pablo nag-ingon nga ang pagkatagsaanon, sama sa kaminyoon, maoy gasa sa Diyos. (Basaha ang Mateo 19:11, 12; 1 Corinto 7:7.) Apan, dili tanang tagsaanon ang nagtinguha niana. May mga kahimtang nga lisod mangitag angay nga kapikas. O human sa pagkaminyo sa daghang katuigan, ang pipila mag-inusara na sab tungod sa diborsiyo o pagkamatay sa ilang kapikas. Nan, sa unsang diwa nga ang pagkatagsaanon maoy gasa? Ug sa unsang paagi mapahimuslan sa tagsaanong mga Kristohanon ang ilang kahimtang?
Talagsaong Gasa
3. Unsang mga benepisyo ang sagad napahimuslan sa tagsaanong mga Kristohanon?
3 Sagad ang usa ka tagsaanon mas daghag panahon ug mas gawasnon kay sa tawong minyo. (1 Cor. 7:32-35) Kini maoy talagsaong kahigayonan nga mapauswag niya ang iyang ministeryo, mapasangkad ang iyang gugma sa uban, ug mas masuod kang Jehova. Busa, daghang Kristohanon ang nakaamgo sa mga benepisyo niini ug mihukom sa ‘paghatag ug luna alang niini,’ bisag sulod sa mubong panahon. Sa sinugdan, ang uban tingali wala magplano nga magkinabuhing tagsaanon, apan sa dihang nabag-o ang ilang kahimtang, sila mainampoong namalandong niini ug nakaamgo nga madawat ra nila ang ilang kahimtang sa tabang ni Jehova. Busa, sila naghatag ug luna alang sa pagkatagsaanon.—1 Cor. 7:37, 38.
4. Nganong ang mga tagsaanon angayng magmatagbawon diha sa pag-alagad sa Diyos?
4 Ang mga tagsaanon nahibalo nga sila dili kinahanglang magminyo aron sila pabilhan ni Jehova o sa iyang organisasyon. Ang gugma sa Diyos gipakita sa matag usa kanato. (Mat. 10:29-31) Walay makabulag kanato gikan sa gugma sa Diyos. (Roma 8:38, 39) Minyo man o tagsaanon, angay kitang magmatagbawon diha sa pag-alagad sa Diyos.
5. Unsay gikinahanglan aron bug-os mapahimuslan ang pagkatagsaanon?
5 Bisan pa niana, sama sa talento sa musika ug esports, gikinahanglan ang paningkamot aron bug-os mapahimuslan ang gasa sa pagkatagsaanon. Busa, sa unsang paagi ang tagsaanong mga Kristohanon karon—lalaki man o babaye, batan-on o edaran, kadtong wala magminyo kay gusto nila o tungod sa sirkumstansiya—bug-os makapahimulos sa ilang kahimtang? Atong hisgotan ang pipila ka makapadasig nga panig-ingnan sa mga Kristohanon sa unang siglo ug atong tan-awon kon unsay atong makat-onan.
Pagkatagsaanon Samtang Batan-on
6, 7. (a) Unsang pribilehiyo sa pag-alagad ang nadawat sa upat ka anak babaye ni Felipe? (b) Sa unsang mga paagi gipahimuslan ni Timoteo ang iyang pagkatagsaanon, ug sa unsang paagi siya gipanalanginan?
6 Ang tig-ebanghelyo nga si Felipe may upat ka anak babaye nga ulay nga masiboton usab nga tig-ebanghelyo. (Buh. 21:8, 9) Ang pagpanagna maoy usa sa milagrosong mga gasa sa balaang espiritu, ug gigamit kana sa maong mga dalaga agig katumanan sa Joel 2:28, 29.
7 Si Timoteo maoy usa ka batan-on nga nagpahimulos sa iyang pagkatagsaanon. Sukad sa pagkamasuso, siya gitudloan sa iyang inahang si Eunice ug apohang si Loida sa “balaang mga sinulat.” (2 Tim. 1:5; 3:14, 15) Apan lagmit nahimo lamang silang Kristohanon sa mga 47 K.P. sa unang pagduaw ni Pablo sa Listra, ang ilang yutang natawhan. Duha ka tuig sa ulahi, sa ikaduhang pagduaw ni Pablo, lagmit si Timoteo mga 20 anyos na. Bisag batan-on ug bag-o pa sa kamatuoran, siya dinayeg sa mga ansiyano sa Listra ug Iconio. (Buh. 16:1, 2) Busa gidapit siya ni Pablo nga mahimong kauban sa iyang mga panaw. (1 Tim. 1:18; 4:14) Dili kita makaingon nga si Timoteo wala gyod magminyo. Apan nahibalo kita nga samtang batan-on pa, gidawat niya ang pagdapit ni Pablo, ug siya malipayong nag-alagad ingong tagsaanong misyonaryo ug magtatan-aw sa daghang katuigan.—Filip. 2:20-22.
8. Unsay nakatabang kang Juan Marcos sa pagpangab-ot ug espirituwal nga mga tumong? Unsang mga panalangin ang iyang nadawat?
8 Sa batan-on pa si Juan Marcos, gipahimuslan sab niya ang iyang pagkatagsaanon. Siya, ang iyang inahang si Maria, ug ig-agawng si Bernabe maoy unang mga membro sa kongregasyon sa Jerusalem. Lagmit adunahan ang pamilya ni Marcos kay sila may sulugoon ug balay sa siyudad. (Buh. 12:12, 13) Bisan pa niana ug sa iyang kabatan-on, si Marcos dili mapatuyangon o mahunahunaon lamang sa kaugalingon; ni siya kontento na lamang nga magpamilya ug magkinabuhing haruhay. Ang iyang pagpakig-uban sa mga apostoles samtang batan-on pa lagmit nakadasig niya nga magmisyonaryo. Busa ikag siyang mikuyog kang Pablo ug Bernabe sa ilang unang misyonaryong panaw ug nahimong ilang tig-alagad. (Buh. 13:5) Sa ulahi, siya mikuyog kang Bernabe, ug sa laing panahon, siya nag-alagad uban kang Pedro sa Babilonya. (Buh. 15:39; 1 Ped. 5:13) Wala kita mahibalo kon unsa kadugay si Marcos nagpabiling tagsaanon. Apan naangkon niya ang maayong dungog sa pagkaandam moalagad sa uban ug sa pagkakugihan sa pag-alagad sa Diyos.
9, 10. Unsay mga kahigayonan karon sa tagsaanong mga batan-on sa pagpasangkad sa ilang ministeryo? Paghatag ug pananglitan.
9 Daghang batan-on sa kongregasyon karon ang malipayong naggamit usab sa ilang pagkatagsaanon sa pagpasangkad sa ilang pag-alagad. Sama kang Marcos ug Timoteo, nasabtan nila nga tungod sa ilang pagkatagsaanon, sila ‘kanunayng makaalagad sa Ginoo nga walay pagkalinga.’ (1 Cor. 7:35) Dako gayod kini nga bentaha. Daghan ang kahigayonan—pagpayunir, pag-alagad diin dako ang panginahanglan, pagkat-on ug langyawng pinulongan, pagtabang sa pagpanukod ug Kingdom Hall o pasilidad sa sanga, pagtungha sa Ministerial Training School, ug pag-alagad sa Bethel. Kon batan-on ka pa ug dili minyo, gipahimuslan mo ba ang maong mga kahigayonan?
10 Usa ka brader nga ginganlag Mark nagsugod pagpayunir sa dihang siya wala pay 20 anyos. Siya nakatungha sa Ministerial Training School, ug nakaalagad sa lainlaing nasod. Sa paghinumdom sa iyang 25 ka tuig nga bug-os panahong pag-alagad, siya miingon: “Ako naningkamot sa pagdasig sa tanan diha sa kongregasyon, nga nakig-uban kanila sa ministeryo, nagduaw aron palig-onon sila, nagdapit kanila sa balay alang sa pagpangaon, ug naghikay pa ganig makapalig-ong mga tapoktapok. Kining tanan nakahatag kanakog dakong kalipay.” Ingon sa gipakita sa komento ni Mark, may labaw nga kalipay sa paghatag, ug diha sa bug-os panahong pag-alagad adunay daghang kahigayonan sa paghatag sa uban. (Buh. 20:35) Bisan unsay imong mga hilig, katakos, o kasinatian, adunay daghang buluhaton sa Ginoo alang sa mga batan-on karon.—1 Cor. 15:58.
11. Unsay kaayohan sa dili pagdalidalig minyo?
11 Bisag ang kadaghanang batan-on gustong magminyo, may daghang rason nga dili magdalidali. Si Pablo nagdasig sa mga batan-on sa paghulat hangtod molapas sila sa ‘buswak sa pagkabatan-on,’ diin kusganon kaayo ang seksuwal nga tinguha. (1 Cor. 7:36) Gikinahanglan ang taas nga panahon sa pag-ila sa imong kaugalingon ug sa pagbatog kasinatian sa kinabuhi nga makatabang sa pagpilig angay nga kapikas. Ang panaad sa kaminyoon maoy seryosong desisyon, nga angayng mohangtod sa tibuok kinabuhi.—Eccl. 5:2-5.
Pagkatagsaanon Panahon sa Pagkatigulang
12. (a) Sa unsang paagi nasagubang sa biyudang si Ana ang iyang nausab nga kahimtang? (b) Unsang pribilehiyo ang iyang nadawat?
12 Si Ana, nga gihisgotan sa Ebanghelyo ni Lucas, lagmit naguol pag-ayo pagkamatay sa iyang bana human sa pito lang ka tuig nga kaminyoon. Wala kita mahibalo kon may anak ba sila o kon siya ba naghunahuna nga magminyo pag-usab. Apan ang Bibliya nag-ingon nga sa nag-edad siyag 84, siya biyuda gihapon. Kita makaingon usab nga si Ana nagpahimulos sa iyang nausab nga kahimtang aron mas masuod kang Jehova kay siya “wala gayod mopalta sa templo, nga nagahatag ug sagradong pag-alagad adlaw ug gabii uban ang mga pagpuasa ug mga pangamuyo.” (Luc. 2:36, 37) Busa giuna niya sa iyang kinabuhi ang espirituwal nga mga butang. Kana nagkinahanglag determinasyon ug paningkamot, apan siya gipanalanginan gayod. Nakapribilehiyo siya sa pagkakita sa batang si Jesus, ug iyang gisangyawan ang uban bahin sa kagawasan nga hapit nang ipahinabo sa Mesiyas.—Luc. 2:38.
13. (a) Unsay nagpakita nga si Dorcas suod sa kongregasyon? (b) Sa unsang paagi gigantihan ang pagkamaayo ug pagkamaluloton ni Dorcas?
13 Usa ka babaye nga ginganlag Dorcas, o Tabitha, ang nagpuyo sa Jope, usa ka karaang dunggoanang siyudad sa amihanan-kasadpan sa Jerusalem. Kay ang Bibliya wala maghisgot nga siya may bana, lagmit siya dili minyo niadtong tungora. Si Dorcas “daghag maayong mga buhat ug mga gasa sa kaluoy.” Siya naghimog daghang besti para sa kabos nga mga biyuda ug sa uban, ug tungod niana siya gimahal nila pag-ayo. Busa sa dihang siya kalit nga nasakit ug namatay, ang tibuok kongregasyon nagpatawag kang Pedro ug naghangyo kaniya sa pagbanhaw kang Dorcas. Kay mikuyanap sa tibuok Jope ang balita nga siya nabanhaw, daghan ang nahimong magtutuo. (Buh. 9:36-42) Tungod sa iyang talagsaong kalulot, lagmit si Dorcas nakatabang sa pipila kanila.
14. Unsay nagtukmod sa tagsaanong mga Kristohanon nga mas makigsuod kang Jehova?
14 Sama kang Ana ug Dorcas, daghan sa kongregasyon karon ang nagkinabuhing tagsaanon sa ilang pagkatigulang. Ang pipila tingali wala makakitag angay nga kapikas. Ang uban gidiborsiyohan o nabalo. Sanglit walay kapikas nga kasuginlan, ang tagsaanong mga Kristohanon sagad mas mosalig kang Jehova. (Prov. 16:3) Si Silvia, usa ka tagsaanon nga nag-alagad sa Bethel sa kapig 38 ka tuig, nag-isip niini nga panalangin. “Usahay kapoyon ko nga ako pirme ang tigdasig,” siya miangkon. “Maghunahuna ko, ‘Kinsay modasig nako?’” Apan siya midugang: “Ang akong pagsalig nga si Jehova mas nahibalo sa akong gikinahanglan nakatabang kanako nga mas masuod kaniya. Ug kanunay kong nadawat ang pagdasig, usahay sa makapahingangha nga paagi.” Sa dihang kita mas masuod kang Jehova, siya kanunayng mosanong sa labing mahigugmaon ug makapalig-ong paagi.
15. Sa unsang paagi ‘mapasangkad’ sa dili-minyong mga Kristohanon ang ilang gugma?
15 Ang pagkatagsaanon mohatag ug linaing kahigayonan sa ‘pagpasangkad’ sa gugma. (Basaha ang 2 Corinto 6:11-13.) Si Jolene, usa ka dalaga nga nagpayunir sa 34 na ka tuig, miingon: “Naningkamot ko nga masuod sa tanan, dili lamang sa akong mga kaedad. Ang pagkatagsaanon maoy dakong kahigayonan nga makaalagad kang Jehova, sa pamilya, sa isigkamagtutuo, ug sa silingan. Samtang nagkaedaran ko, mas nalipay ko sa akong pagkatagsaanon.” Ang mga edaran, masakiton, nag-inusarang ginikanan, batan-on, ug uban pa sa kongregasyon mapasalamaton gayod sa mahigugmaong pagpaluyo sa tagsaanong mga igsoon kanila. Sa pagkatinuod, kita malipay sa dihang magpakita kitag gugma sa uban. ‘Mapasangkad’ ba usab nimo ang imong gugma sa uban?
Nagpabiling Tagsaanon sa Tibuok Kinabuhi
16. (a) Nganong wala man magminyo si Jesus? (b) Sa unsang paagi gipahimuslan ni Pablo ang iyang pagkatagsaanon?
16 Si Jesus wala magminyo; kinahanglan siyang mangandam ug magtuman sa ministeryo nga gihatag kaniya. Siya kanunay nga nagbiyahe, nagbuhat gikan sa sayong kabuntagon hangtod sa lawom nga kagabhion, ug sa ulahi naghalad sa iyang kinabuhi. Ang pagkatagsaanon nakatabang kaniya sa pagtuman niana. Si apostol Pablo mibiyahe ug linibo ka kilometros ug nakasinatig daghang kalisdanan diha sa ministeryo. (2 Cor. 11:23-27) Bisag minyo tingali siya sa nangagi, si Pablo midesisyon nga magpabiling tagsaanon human siya itudlo nga apostol. (1 Cor. 7:7, 8; 9:5) Alang sa ministeryo, gidasig ni Jesus ug Pablo ang uban sa pagsundog sa ilang ehemplo. Apan, wala nila ibaod nga dili magminyo ang mga ministro.—1 Tim. 4:1-3.
17. Sa unsang paagi ang uban karon nagsundog kang Jesus ug Pablo? Nganong makatino kita nga si Jehova nagpabili niadtong naghimo sa maong mga sakripisyo?
17 Ang uban usab karon nagpabiling tagsaanon aron mas mapauswag ang ilang ministeryo. Si Harold, nga gihisgotan ganina, nag-alagad nag kapin sa 56 ka tuig sa Bethel. “Sa napulo ka tuig nako sa Bethel,” siya miingon, “akong nakita nga daghang magtiayon ang mibiya sa Bethel tungod sa sakit o kinahanglang atimanon ang tigulang nga ginikanan. Ang akong mga ginikanan patay na. Apan gusto ko kaayo sa Bethel mao nga wala ko magminyo kay basin mawala kana nga pribilehiyo.” Sa susama, katuigan kanhi, ang dugay nang payunir nga si Margaret miingon: “Tungod kay ako puliki kaayo sa pagpayunir, wala na ko magminyo. Ako hinuong gigamit ang akong panahon ingong tagsaanon sa ministeryo, ug kini nakahatag kanakog dakong kalipay.” Si Jehova dili gayod malimot niadtong naghimog susamang mga sakripisyo alang sa matuod nga pagsimba.—Basaha ang Isaias 56:4, 5.
Pahimusli ang Imong Kahimtang
18. Sa unsang paagi ang uban makadasig ug makapaluyo sa tagsaanong mga igsoon?
18 Ang tanang tagsaanon nga naghimo sa ilang maarangan sa pag-alagad kang Jehova takos nga hatagag tim-os nga komendasyon ug pagdasig. Atong giapresyar ang ilang maayong mga hiyas ug gipasalamatan ang tanan nilang nahimo sa kongregasyon. Dili gayod sila mobatig kamingaw kon kita mahimong tinuod nilang espirituwal nga “mga igsoong lalaki o mga igsoong babaye o inahan o amahan o mga anak.”—Basaha ang Marcos 10:28-30.
19. Unsay imong mahimo aron mapahimuslan ang imong pagkatagsaanon?
19 Kon ikaw tagsaanon kay kana maoy imong gusto o kaha tungod sa sirkumstansiya, hinaot kining Kasulatanhon ug modernong mga panig-ingnan magpasalig kanimo nga imong matagamtam ang malipayon ug mabungahong kinabuhi. May mga gasa nga maikagong gidahom, samtang ang uban wala gayod damha. Ang pipila ka gasa maapresyar dayon, samtang ang uban dugay pa. Busa, kana nagdepende sa atong tinamdan. Unsay imong mahimo aron mapahimuslan ang imong pagkatagsaanon? Pakigsuod kang Jehova, magmapuliki diha sa buluhaton sa Ginoo, ug magpasangkad sa imong gugma sa uban. Sama sa kaminyoon, ang pagkatagsaanon mahimong magantihon kon ato kining isipon sumala sa panglantaw sa Diyos ug pahimuslan kining maong gasa.
Nahinumdom Ka Ba?
• Sa unsang mga paagi ang pagkatagsaanon usa ka gasa?
• Sa unsang paagi ang pagkatagsaanon usa ka panalangin samtang batan-on?
• Unsay mga kahigayonan sa mga tagsaanon aron mas masuod kang Jehova ug makapasangkad sa ilang gugma?
[Mga Pangutana sa Pagtuon]
[Mga hulagway sa panid 18]
Gipahimuslan mo ba ang mga kahigayonan sa pag-alagad sa Diyos?