Pagkaplag ug Kahayahay Diha sa Espirituwal nga mga Butang

“Isangon diha kaninyo ang akong yugo . . . , ug kamo makakaplag ug kahayahay alang sa inyong mga kalag.”—MAT. 11:29.

1. Unsang kahikayan ang gihimo sa Diyos sa Bukid sa Sinai, ug ngano?

 SA DIHANG ang pakigsaad sa Balaod gisugdan didto sa Bukid sa Sinai, naglakip kadto sa kahikayan sa senemanang Igpapahulay. Pinaagi sa iyang tigpamaba nga si Moises, si Jehova nagsugo sa nasod sa Israel: “Unom ka adlaw imong buhaton ang imong buluhaton; apan sa ikapitong adlaw ikaw mohunong, aron nga ang imong torong baka ug ang imong asno makapahulay ug ang anak sa imong ulipong babaye ug ang langyaw nga pumoluyo makapahayahay.” (Ex. 23:12) Oo, tungod sa pagpakita ni Jehova ug konsiderasyon niadtong nailalom sa Balaod, siya mahigugmaong nagtakda ug usa ka adlaw sa pagpahulay aron ang iyang katawhan “makapahayahay.”

2. Sa unsang paagi ang Israel nakabenepisyo sa pagtuman sa Igpapahulay?

² Ang Igpapahulay ba usa lamang ka adlaw sa pagpahayahay? Dili. Kini maoy hinungdanong bahin sa pagsimba sa mga Israelinhon kang Jehova. Ang pagtuman sa Igpapahulay naghatag ug higayon sa mga ulo sa pamilya sa pagtudlo sa ilang pamilya sa ‘pagsubay sa dalan ni Jehova sa pagbuhat sa pagkamatarong.’ (Gen. 18:19) Naghatag usab kini ug higayon sa pamilya ug mga higala nga palandongon ang mga buhat ni Jehova ug matagamtam ang malipayong panag-ubanay. (Isa. 58:13, 14) Labaw sa tanan, ang Igpapahulay naghulagway sa panahon sa dihang mahitabo ang tinuod nga kahayahay pinaagi sa Usa ka Libo ka Tuig nga Pagmando ni Kristo. (Roma 8:21) Apan komosta man sa atong adlaw? Asa ug sa unsang paagi ang matuod nga mga Kristohanon, kinsa interesado sa mga paagi ni Jehova, makakaplag sa maong kahayahay?

Pagkaplag ug Kahayahay Pinaagi sa Kristohanong Panag-ubanay

3. Sa unsang paagi nagtinabangay ang mga Kristohanon sa unang siglo, ug unsay resulta niana?

³ Si apostol Pablo naghubit sa Kristohanong kongregasyon ingong “usa ka haligi ug tukod sa kamatuoran.” (1 Tim. 3:15) Ang unang mga Kristohanon natabangan gayod pinaagi sa pagdinasigay ug paglig-onay diha sa gugma. (Efe. 4:11, 12, 16) Samtang didto si Pablo sa Efeso, nadasig siya sa pagduaw kaniya sa mga igsoon sa Corinto. Matikdi ang epekto niini kaniya: “Ako nagamaya tungod sa pagkaania ni Estefanas ug ni Fortunato ug ni Acaico,” matod ni Pablo, “kay ilang napalig-on ang akong espiritu.” (1 Cor. 16:17, 18) Sa susama, sa dihang si Tito miadto sa Corinto aron sa pag-alagad sa mga igsoon, si Pablo misulat pag-usab sa kongregasyon: “Ang iyang espiritu napalig-on ninyong tanan.” (2 Cor. 7:13) Karong adlawa usab, ang mga Saksi ni Jehova makakaplag ug tinuod nga kahayahay pinaagi sa makapalig-on nga Kristohanong panag-ubanay.

4. Sa unsang paagi ang mga tigom sa kongregasyon makahatag kanatog kahayahay?

⁴ Segurado nga ang mga tigom sa kongregasyon nakahatag kanimog dakong kalipay. Diha niana adunay “pagdinasigay . . . pinaagi sa pagtuo sa tagsatagsa.” (Roma 1:12) Ang atong mga igsoon sa pagtuo dili mga kaila lamang. Sila maoy tinuod nga mga higala, mga tawo nga atong gimahal ug gitahod. Kita malipay ug mahupayan pag-ayo pinaagi sa regular nga pagpakig-uban kanila sa mga tigom.—Filem. 7.

5. Sa unsang paagi ang mga kombensiyon ug asembliya makahatag kanatog kahayahay?

 ⁵ Ang laing tinubdan sa kahayahay mao ang atong tinuig nga mga kombensiyon ug asembliya. Gawas pa sa pagtaganag nagahatag-ug-kinabuhi nga tubig sa kamatuoran gikan sa Pulong sa Diyos, kining dagkong panagkatigom naghatag kanatog kahigayonan sa ‘pagpasangkad’ diha sa atong panag-ubanay. (2 Cor. 6:12, 13) Apan unsa na man kon kita maulawon ug malisdan sa pagduol sa mga tawo? Ang usa ka paagi nga masinati nato ang atong mga igsoon mao ang pagboluntaryo panahon sa kombensiyon. Human moboluntaryo panahon sa usa ka internasyonal nga kombensiyon, usa ka sister ang miingon: “Gawas sa akong pamilya ug pipila ka higala, wala kaayo koy kaila didto. Apan sa dihang mitabang ko sa pagpanglimpiyo, nakahimamat kog daghang igsoon! Makapalipay kaayo kadto!”

6. Unsa ang usa ka paagi nga kita makakaplag ug kahayahay samtang nagbakasyon?

⁶ Ang mga Israelinhon tig-adtoan sa Jerusalem aron sa pagtambong sa tulo ka pista nga gihimo matag tuig. (Ex. 34:23) Sagad biyaan nila ang ilang kaumahan ug baligyaanan ug magbaktas sila sulod sa daghang adlaw diha sa abogon nga kadalanan. Bisan pa niana, inig-abot nila sa templo mobati silag “dakong pagmaya” samtang ilang makita ang nanambong didto nga “nagdayeg kang Jehova.” (2 Cron. 30:21) Nasinati usab sa daghang alagad ni Jehova karon nga ang pag-adto sa Bethel uban sa ilang pamilya miresulta sa dakong pagmaya. Mahimo ba usab ninyong ilakip sa inyong bakasyon ingong pamilya ang pagduaw sa Bethel?

7. (a) Sa unsang paagi ang mga salosalo mahimong mapuslanon? (b) Unsay atong buhaton aron mahimo kining halandomon ug makapalig-on?

⁷ Ang mga salosalo uban sa pamilya ug mga higala makapadasig usab. Ang maalamong hari nga si Solomon nag-ingon: “Wala nay laing mas maayo alang sa tawo kay sa mokaon siya ug moinom ug himoon niya ang iyang kalag nga makapahimulos ug maayo sa iyang kahago.” (Eccl. 2:24) Ang mga salosalo dili lamang makapahayahay kondili makapalig-on usab sa atong gugma sa mga igsoon samtang ato silang masinati pag-ayo. Aron mahimong halandomon ug makapalig-on  ang maong okasyon, labing maayo nga himoon ang mga salosalo sa ginagmayng grupo ug paneguroon nga maayo kining pagkadumala, ilabina kon dunay idalit nga ilimnon.

Ang Ministeryo Makahatag ug Kahayahay

8, 9. (a) Itandi ang mensahe ni Jesus nianang sa mga eskriba ug Pariseo. (b) Sa unsang paagi kita makabenepisyo sa pagpaambit sa kamatuoran sa Bibliya?

⁸ Si Jesus masiboton sa ministeryo, ug gidasig niya ang iyang mga tinun-an sa pagsundog kaniya. Dayag kini sa iyang gipamulong: “Dako ang alanihon, apan diyutay ra ang mga mamumuo. Busa, pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.” (Mat. 9:37, 38) Ang mensahe nga gitudlo ni Jesus nakahatag gayod ug kahayahay; kadto maoy “maayong balita.” (Mat. 4:23; 24:14) Lahi kaayo kini sa mabug-at nga mga lagda nga gipatuman sa mga Pariseo.—Basaha ang Mateo 23:4, 23, 24.

⁹ Sa dihang atong ipaambit sa uban ang mensahe sa Gingharian, kita naghatag kanilag espirituwal nga kahayahay ug, sa samang higayon, nagtisok sa bililhong kamatuoran sa Bibliya sa atong hunahuna ug kasingkasing. Haom ang gisulti sa salmista: “Dayega ninyo si Jah, kay maayo ang pag-awit ug mga pagdayeg sa atong Diyos; kay kini makapahimuot.” (Sal. 147:1) Mapauswag ba nimo ang kalipay nga imong bation sa pagdayeg kang Jehova ngadto sa imong mga silingan?

10. Ang ato bang kalamposan diha sa ministeryo nagdepende sa positibong pagsanong sa mga tawo sa atong mensahe? Ipatin-aw.

¹⁰ Tinuod nga diha sa pipila ka teritoryo ang mga tawo mas daling mosanong sa maayong balita. (Basaha ang Buhat 18:1, 5-8.) Kon ikaw nagpuyo sa dapit nga wala kaayoy mosanong sa mensahe sa Gingharian, paningkamoti nga masentro ang imong pagtagad sa maayong butang nga imong nahimo diha sa ministeryo. Hinumdomi nga dili makawang ang imong padayong paningkamot sa pagmantala sa ngalan ni Jehova. (1 Cor. 15:58) Gawas pa, ang atong kalamposan diha sa ministeryo wala magdepende sa reaksiyon sa mga tawo sa maayong balita. Makasalig kita nga tinoon ni Jehova nga ang matarong-ug-kasingkasing nga mga tawo mahatagag kahigayonan nga makadungog sa mensahe sa Gingharian.—Juan 6:44.

Ang Pamilyahanong Pagsimba Makahatag ug Kahayahay

11. Unsang responsibilidad ang gihatag ni Jehova sa mga ginikanan, ug sa unsang paagi nila matuman kana?

¹¹ Responsibilidad sa mga ginikanan nga mahinadlokon sa Diyos ang pagtudlo sa ilang mga anak bahin kang Jehova ug sa iyang mga paagi. (Deut. 11:18, 19) Kon ikaw usa ka ginikanan, duna ka bay eskedyul sa pagtudlo sa imong mga anak bahin sa atong mahigugmaon nga langitnong Amahan? Aron matabangan ka sa pagtuman niining hinungdanong responsibilidad ug sa pag-atiman sa panginahanglan sa imong pamilya, si Jehova nagtagana ug abundang makapahimsog nga espirituwal nga pagkaon pinaagi sa mga libro, magasin, video, ug mga audio recording.

12, 13. (a) Sa unsang paagi makabenepisyo ang mga pamilya sa gabii sa Pamilyahanong Pagsimba? (b) Sa unsang paagi maseguro sa mga ginikanan nga ang ilang pamilyahanong pagsimba makahatag ug kahayahay?

¹² Dugang pa, ang matinumanon ug maalamong ulipon naghimog kahikayan alang sa Pamilyahanong Pagsimba sa gabii. Usa kini ka gabii nga gigahin matag semana alang sa pagtuon sa pamilya sa Bibliya. Daghan ang nag-ingon nga ang maong kahikayan naghiusa kanila ug nagpalig-on sa ilang gugma sa usag usa ug kang Jehova. Apan sa unsang paagi maseguro sa mga ginikanan nga ang ilang pamilyahanong pagsimba makahatag ug espirituwal nga kahayahay?

¹³ Ang Pamilyahanong Pagsimba kinahanglang dili laay ug sobra ka seryoso. Kon buot hunahunaon, kita nagsimba sa “malipayong Diyos,” ug gusto niya nga kita magmalipayon sa atong pagsimba. (1 Tim. 1:11; Filip. 4:4) Ang paggahin ug usa ka gabii alang sa paghisgot sa bililhong kamatuoran sa Bibliya maoy usa gayod ka panalangin. Ang mga ginikanan makapailin-ilin sa ilang paagi sa pagtudlo, nga gamiton ang ilang imahinasyon ug pagkamamugnaon. Pananglitan, gihatagag higayon sa usa ka pamilya ang ilang diyes-anyos nga anak, si Brandon, sa pagsaysay sa  ulohang “Nganong Gitawag man si Satanas ug Bitin Diha sa Bibliya?” Nakapatugaw kini kang Brandon kay ganahan siyag mga bitin, ug nahigawad siya nga gilangkit kini kang Satanas. Ang ubang pamilya magbasa o magdrama ug usa ka panghitabo sa Bibliya diin ang matag membro dunay papel nga dulaon. Kini nga mga paagi sa pagtudlo dili lamang makalingaw kondili maghatag usab ug higayon sa inyong mga anak nga makapakig-ambit, aron matisok sa ilang kasingkasing ang mga prinsipyo sa Bibliya. a

Likayi ang mga Butang nga Makapaluya

14, 15. (a) Nganong misamot man ang kapit-os ug kawalay-kasegurohan sa kataposang mga adlaw? (b) Unsang dugang mga kapit-os ang mahimong atubangon nato?

¹⁴ Ang kapit-os ug kawalay-kasegurohan misamot pa sa kataposang mga adlaw niining daotang sistema sa mga butang. Milyonmilyon ang walay trabaho ug nagkalisodlisod. Bisan kadtong dunay trabaho sagad mobati nga ang ilang suweldo sama rag gisulod sa buslot nga bulsa, nga gamay na lag ikahatag nga kaayohan sa ilang pamilya. (Itandi ang Haggeo 1:4-6.) Ang mga politiko ug ubang mga lider daw walay mahimo sa ilang panglimbasog nga mawala ang terorismo ug ubang pagkadaotan. Daghan ang nahigawad tungod sa ilang kasaypanan.—Sal. 38:4.

¹⁵ Ang matuod nga mga Kristohanon makasinati usab ug mga problema ug pagpit-os nga gipahinabo sa sistema sa mga butang ni Satanas. (1 Juan 5:19) Sa pipila ka kahimtang, ang mga tinun-an ni Kristo mahimong mag-atubang ug dugang mga kapit-os samtang naningkamot sila sa pagpabiling matinumanon kang Jehova. “Kon sila naglutos kanako, sila magalutos usab kaninyo,” miingon si Jesus. (Juan 15:20) Apan, bisan pag ‘kita ginalutos,’ kita “wala biyai sa bug-os.” (2 Cor. 4:9) Nganong ingon man niana?

16. Unsay makatabang kanato sa pagpabiling malipayon?

¹⁶ Si Jesus miingon: “Umari kanako, kamong tanang nabudlayan ug nabug-atan, ug ako magapalagsik kaninyo.” (Mat. 11:28) Pinaagi sa pagpakitag bug-os nga pagtuo sa halad lukat ni Kristo, atong gitugyan ang atong kaugalingon kang Jehova. Niining paagiha, atong mabatonan ang “gahom nga labaw sa kasarangan.” (2 Cor. 4:7) “Ang magtatabang,” ang balaang espiritu sa Diyos, magpalig-on gayod sa atong pagtuo aron kita makalahutay sa mga pagsulay ug kasakit nga atong maagoman ug makapabiling malipayon.—Juan 14:26; Sant. 1:2-4.

17, 18. (a) Unsang espiritu ang angay natong likayan? (b) Unsay mahimong moresulta kon himoon natong panguna sa atong kinabuhi ang mga kalingawan?

¹⁷ Ang matuod nga mga Kristohanon karon kinahanglang magbantay nga dili maimpluwensiyahan niining kalibotan nga nabuang sa kalingawan. (Basaha ang Efeso 2:2-5.) Kay kon dili, mahimong malit-agan kita sa ‘tinguha sa unod ug sa tinguha sa mga mata ug sa mapagawalong pagpasundayag sa mga kahinguhaan sa kinabuhi sa usa.’ (1 Juan 2:16) O kaha maghunahuna kita nga ang pagpadaog sa mga tinguha sa unod makahatag ug kahayahay. (Roma 8:6) Pananglitan, ang pipila midangop sa pag-abuso sa droga ug alkoholikong ilimnon, pornograpiya, peligrosong mga esport, o lainlaing gidili nga mga buhat sa tuyo nga mobati silag kahinam. Gigamit ni Satanas ang iyang “malipatlipatong kaugdahan” sa pagpahisalaag sa mga tawo pinaagi sa paghatag kanilag dili tinuod nga matang sa kahayahay.—Efe. 6:11.

¹⁸ Tinuod, walay daotan sa pagkaon, pag-inom, ug pagpakigbahin sa maayong matang sa kalingawan  kon himoon kini sa kasarangang paagi. Bisan pa niana, dili nato tugotan nga mahimo kanang panguna sa atong kinabuhi. Gikinahanglan ang pagkatimbang ug pagpugong-sa-kaugalingon, ilabina tungod sa panahon diin kita nagkinabuhi. Ang personal nga mga pangagpas makapaluya kanato ug sa ngadtongadto kita mahimong “dili aktibo o dili-mabungahon labot sa tukmang kahibalo sa atong Ginoong Jesu-Kristo.”—2 Ped. 1:8.

19, 20. Sa unsang paagi makaplagan ang tinuod nga kahayahay?

¹⁹ Kon atong ipahiuyon ang atong panghunahuna sa mga lagda ni Jehova, atong maila nga ang bisan unsang kalingawan nga gitanyag niining kalibotana maoy temporaryo lamang. Naamgohan kana ni Moises, ug mao man usab kita. (Heb. 11:25) Sa pagkatinuod, ang tinuod nga kahayahay, ang matang nga maghatag ug dulot, dumalayon nga kalipay ug katagbawan, mabatonan lamang pinaagi sa pagbuhat sa kabubut-on sa atong langitnong Amahan.—Mat. 5:6.

²⁰ Hinaot nga magpadayon kita sa pagkaplag ug kahayahay diha sa espirituwal nga mga butang. Pinaagi sa pagbuhat niana, atong ‘gisalikway ang pagkadili-diyosnon ug kalibotanong mga tinguha samtang kita nagpaabot sa makalilipay nga paglaom ug sa mahimayaong pagpadayag sa dakong Diyos ug sa atong Manluluwas, si Kristo Jesus.’ (Tito 2:12, 13) Busa magmadeterminado kita sa pagpabilin ilalom sa yugo ni Jesus pinaagi sa pagpasakop sa iyang awtoridad ug pagtultol. Sa pagbuhat niana, atong makaplagan ang tinuod nga kalipay ug kahayahay!

[Footnote]

Unsay Imong Tubag?

• Sa unsang paagi makakaplag ug kahayahay karon ang katawhan ni Jehova?

• Sa unsang paagi ang ministeryo makahatag kanatog kahayahay ug sa atong kaestorya?

• Unsay mahimo sa mga ulo sa pamilya aron maseguro nga ang ilang pamilyahanong pagsimba makahatag ug kahayahay?

• Unsang mga butanga ang makapaluya kanato sa espirituwal?

[Mga Pangutana sa Pagtuon]

[Mga hulagway sa panid 26]

Pinaagi sa pagsangon sa yugo ni Jesus, atong makaplagan ang daghang tinubdan sa kahayahay