Ang Pagmando ni Satanas Seguradong Mapakyas
Ang Pagmando ni Satanas Seguradong Mapakyas
“Dili gayod maayo ang sangpotan sa tawong daotan.”—ECCL. 8:13.
1. Nganong makapahupay nga balita ang umaabot nga paghukom sa mga daotan?
SA DILI madugay ang mga daotan pagahukman. Sila kinahanglang manubag sa ilang nahimo. (Prov. 5:22; Eccl. 8:12, 13) Makapahupay kana nga balita, ilabina alang niadtong nahigugma sa pagkamatarong ug nakaagom sa inhustisya ug pagdaogdaog sa kamot sa mga daotan. Ang pangunang hukman mao ang amahan sa pagkadaotan, si Satanas nga Yawa.—Juan 8:44.
2. Nganong gikinahanglan ang panahon sa paghusay sa isyu nga gipatungha sa Eden?
2 Didto si Eden, si Satanas, nga taas kaayog paglantaw sa kaugalingon, naghaylo sa mga tawo sa pagsalikway sa pagmando ni Jehova. Tungod niana, ang atong unang ginikanan miduyog kang Satanas sa paghagit sa katungod ni Jehova sa pagmando ug sila nahimong mga makasasala. (Roma 5:12-14) Siyempre, nahibalo si Jehova kon unsay sangpotan sa ilang pagkadili-matinahoron ug pagkarebelyoso. Apan, kanang dili-malikayang sangpotanan kinahanglang makita sa tanang intelihenteng linalang. Busa, gikinahanglan ang panahon sa paghusay sa isyu ug sa paghatag ug lig-ong pamatuod nga ang mga rebelde nasayop gayod.
3. Unsay atong tinamdan sa tawhanong mga kagamhanan?
3 Sanglit gisalikway man sa mga tawo ang pagdumala ni Jehova, kinahanglan silang magtukod ug ilang matang sa pagmando. Sa pagsulat ni apostol Pablo sa mga isigkamagtutuo sa Roma, iyang gitawag ang tawhanong mga kagamhanan ingong “labaw nga mga awtoridad.” Sa iyang adlaw, ang labaw nga mga awtoridad sa panguna mao ang kagamhanan sa Roma ilalom ni Emperador Nero, kinsa nagmando niadtong 54-68 K.P. Miingon si Pablo nga ang maong labaw nga mga awtoridad “napahimutang sa ilang relatibong mga posisyon pinaagi sa Diyos.” (Basaha ang Roma 13:1, 2.) Nagpasabot ba kana nga gipasiugda ni Pablo nga labaw ang pagmando sa tawo kay sa iya sa Diyos? Wala gayod. Hinunoa, siya nag-ingon lamang nga samtang gitugotan ni Jehova ang tawhanong pagmando, ang mga Kristohanon angayng motahod “sa kahikayan sa Diyos” ug magpasakop sa maong mga magmamando.
Dalan nga Motultol sa Katalagman
4. Ipatin-aw kon nganong ang pagmando sa tawo dili gayod molampos.
4 Bisan pa niana, ang pagmando sa tawo nga ubos sa impluwensiya ni Satanas tinong mapakyas. Ngano? Ang usa ka rason mao nga kana wala ipasukad sa kaalam sa Diyos. Si Jehova lamang ang nakabaton ug hingpit nga kaalam. Busa, siya lamang ang makahatag ug kasaligang giya kon unsang matanga sa pagmando ang magmalamposon. (Jer. 8:9; Roma 16:27) Dili sama sa mga tawo, nga sagad makakat-on pinaagi sa pag-eksperimento, si Jehova nahibalo gayod kon unsa ang labing maayong buhaton. Ang bisan unsang matang sa pagmando nga dili mosunod sa iyang giya dili gayod molampos. Bisag pinasukad lamang niini nga rason—dili na ilakip ang daotang motibo—ang pagmando ni Satanas pinaagi sa mga tawo seguradong mapakyas.
5, 6. Unsay dayag nga nagtukmod kang Satanas sa pagsupak kang Jehova?
5 Ang maalamong tawo sagad dili mosugod sa usa ka proyekto nga tinong mapakyas. Kon siya mopadayon gayod niana, siya mapugos sa pagdawat sa iyang sayop. Sa makadaghan, gipakita sa kasaysayan nga walay-kapuslanan ang pagsupak sa labing-gamhanang Maglalalang. (Basaha ang Proverbio 21:30.) Apan, tungod sa garbo ug taas nga paglantaw ni Satanas sa iyang kaugalingon, siya mitalikod kang Jehova. Busa ang Yawa tinuyong misubay sa dalan nga mosangpot lamang sa katalagman.
6 Ang mapangahasong tinamdan ni Satanas gipakita usab sa usa ka magmamando sa Babilonya kinsa nanghambog: “Ngadto sa langit ako mosaka. Ibabaw sa mga bituon sa Diyos akong ituboy ang akong trono, ug ako molingkod sa bukid sa panagkatigom, sa kinalay-ang mga bahin sa amihanan. Mosaka ako sa ibabaw sa hatag-as nga mga dapit sa kapanganoran; akong himoon ang akong kaugalingon nga sama sa Labing Hataas.” (Isa. 14:13-15) Ang dili-maalamong ambisyon niana nga magmamando wala matuman, ug ang dinastiya sa Babilonya nakaagom ug makauulawng pagkatapos. Sa samang paagi, si Satanas ug ang iyang kalibotan sa dili madugay makaagom ug bug-os nga pagkaparot.
Kon Nganong Gitugotan
7, 8. Unsa ang pipila ka kaayohan gikan sa pagtugot ni Jehova nga maglungtad ang pagkadaotan sulod sa usa ka yugto?
7 Tingali maghunahuna ang uban kon nganong wala pugngi ni Jehova ang mga tawo sa pagdapig kang Satanas ug sa pagsunod sa matang sa pagmando nga tinong mapakyas. Ingong Diyos nga Labing Gamhanan, makahimo gayod siya niana. (Ex. 6:3) Apan, wala niya kana buhata. Tungod sa iyang kaalam, siya nasayod nga ang dili una pagpangilabot sa pagrebelde sa tawo modangat unya sa labing maayong sangpotanan. Sa ngadtongadto, si Jehova mabindikar ingong matarong ug mahigugmaong Magmamando, ug ang matinumanong katawhan makabatog kaayohan sa Iyang desisyon.
8 Malikayan gayod unta sa tawo ang kagul-anan kon siya wala magpahaylo kang Satanas ug wala mobulag sa pagmando sa Diyos! Bisan pa niana, ang desisyon ni Jehova sa pagtugot sa mga tawo nga momando sulod sa usa ka yugto adunay mga kaayohan. Nasilsil gayod diha sa matarog-kasingkasing nga mga tawo nga maalamon ang pagpamati sa Diyos ug pagsalig kaniya. Latas sa kasiglohan, gisulayan sa mga tawo ang daghang matang sa kagamhanan, apan walay usa niana ang nagmalamposon. Nagpalig-on kana sa pagsalig sa mga magsisimba ni Jehova nga ang iyang pagmando mao gayod ang labing maayo. Tinuod, ang pagtugot ni Jehova sa daotang pagmando ni Satanas miresulta sa kalisdanan sa tawo, lakip na niadtong matinumanong nagsimba sa Diyos. Bisan pa niana, ang temporaryong pagtugot sa pagkadaotan miresulta usab sa mga kaayohan alang niining matinumanong mga magsisimba.
Pagrebelde nga Miresulta sa Kahimayaan ni Jehova
9, 10. Ipatin-aw kon sa unsang paagi ang pagmando ni Satanas miresulta sa kahimayaan ni Jehova.
9 Ang pagtugot sa mga tawo nga maimpluwensiyahan ni Satanas ug magmando sa ilang kaugalingon wala magpakita nga dili maayo ang pagmando ni Jehova. Sukwahi gayod niana! Gipamatud-an sa kasaysayan nga tinuod ang gipamulong ni Jehova pinaagi kang Jeremias bahin sa kawalay-katakos sa tawo sa pagmando sa iyang kaugalingon. (Basaha ang Jeremias 10:23.) Dugang pa, ang pagrebelde ni Satanas naghatag kang Jehova ug kahigayonan nga mapasundayag pag-ayo ang Iyang mga hiyas. Sa unsang paagi?
10 Sanglit makita man nato ang daotang sangpotanan sa pagmando si Satanas, mas maklaro pa nato ang hingpit nga mga hiyas ni Jehova. Niining paagiha, siya nabayaw atubangan niadtong nahigugma kaniya. Oo, bisag daw nagkasumpaki, ang pagmando ni Satanas nakahatag hinuon ug kahimayaan sa Diyos. Gipasiugda niini ang labing maayong paagi sa pag-atubang ni Jehova niining hagit sa iyang pagkasoberano. Sa pag-ilustrar niana, atong hisgotan sa makadiyot ang pipila sa iyang mga hiyas ug atong tan-awon kon sa unsang paagi ang daotang pagmando ni Satanas nagtukmod kang Jehova sa pagpakita niining mga hiyasa sa lain pang mga paagi.
11. Sa unsang paagi napasundayag ang gugma ni Jehova?
11 Gugma. Ang Kasulatan nagtug-an kanato nga “ang Diyos gugma.” (1 Juan 4:8) Sa panguna, ang paglalang sa tawo maoy pamatuod sa gugma sa Diyos. Ang makapahingangha ug kahibulongang paagi sa paglalang kanato maoy laing pamatuod sa iyang gugma. Si Jehova usab mahigugmaong nagtagana sa mga tawo ug maanindot nga pinuy-anan diin anaa ang tanang gikinahanglan alang sa ilang kalipay. (Gen. 1:29-31; 2:8, 9; Sal. 139:14-16) Apan sa dihang misulod ang pagkadaotan sa tawhanong pamilya, gipakita ni Jehova ang iyang gugma sa laing paagi. Sa unsang paagi? Si apostol Juan mikutlo kang Jesus: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Aduna pa bay mas labawng paagi nga ikapasundayag sa Diyos ang iyang gugma sa tawo kay sa pagpadala sa iyang bugtong Anak dinhi sa yuta aron sa paglukat sa mga makasasala? (Juan 15:13) Kining dakong pamatuod sa gugma nagsilbi usab nga sumbanan alang sa mga tawo, nga naghatag kanilag kahigayonan sa pagbanaag sa nagsakripisyo-sa-kaugalingong gugma sa Diyos diha sa adlaw-adlawng pagkinabuhi, sama sa gihimo ni Jesus.—Juan 17:25, 26.
12. Sa unsang paagi napasundayag ang gahom ni Jehova?
12 Gahom. Ang ‘Diyos nga Labing Gamhanan’ lamang ang adunay gahom sa pagpatunghag kinabuhi. (Pin. 11:17; Sal. 36:9) Sa pagkahimugso, ang tawo nahisamag blangkong papel, ingnon ta. Inigkamatay, ang maong papel naundan nag mga desisyon, binuhatan, ug mga kasinatian nga nag-umol sa iyang talagsaong pagkatawo. Ang maong impormasyon mahimong tipigan diha sa panumdoman ni Jehova. Sa takdang panahon, mahimong ipasig-uli ni Jehova ang kinabuhi sa maong tawo, uban sa iyang talagsaong personalidad. (Juan 5:28, 29) Busa, bisan tuod ang kamatayon dili orihinal nga katuyoan sa Diyos alang sa tawo, kini naghatag kang Jehova ug kahigayonan sa pagpakita nga siya adunay gahom sa pagbanhaw sa mga patay. Sa pagkatinuod, si Jehova mao ang ‘Diyos nga Labing Gamhanan.’
13. Sa unsang paagi ang halad lukat ni Jesus nagpasundayag sa hingpit nga hustisya ni Jehova?
13 Hustisya. Si Jehova dili mamakak; ni mohimog inhustisya. (Deut. 32:4; Tito 1:2) Kanunay siyang nagsunod sa kinalabwang mga sukdanan sa kamatuoran ug sa hustisya, bisan pag ang pagbuhat niana daw dili makaayo kaniya. (Roma 8:32) Sakit gayod alang kang Jehova nga makita ang iyang hinigugmang Anak nga mamatay sa estaka sa pagsakit nga daw si Jesus usa ka tigpasipala! Apan, tungod sa iyang paghigugma sa dili-hingpit nga katawhan, si Jehova andam nga motugot niining masakit nga panghitabo aron mabayaw ang iyang hingpit nga sukdanan sa hustisya. (Basaha ang Roma 5:18-21.) Ang usa ka kalibotan nga puno sa inhustisya naghatag kang Jehova ug kahigayonan sa pagpasundayag sa iyang kaugalingon ingong kinalabwang ehemplo sa pagpakitag hustisya.
14, 15. Unsa ang pipila ka paagi nga napasundayag ang labaw nga kaalam ug pagkamainantoson ni Jehova?
14 Kaalam. Human makasala si Adan ug Eva, gipadayag dayon ni Jehova ang iyang paagi sa pagwagtang sa tanang daotang epekto nga gipahinabo sa ilang pagrebelde. (Gen. 3:15) Ang iyang paglihok dayon, maingon man ang anam-anam nga pagpadayag sa mga detalye sa iyang katuyoan ngadto sa iyang mga alagad, labaw pang nagpasiugda sa kaalam ni Jehova. (Roma 11:33) Walay makababag sa katakos sa Diyos sa paghusay sa isyu sa malamposong paagi. Sa kalibotan diin kaylap ang imoralidad, gubat, pagkadili-makataronganon, pagkamasinupakon, kawalay-kaluoy, pagpihigpihig, ug pagkasalingkapaw, adunay daghang kahigayonan si Jehova sa pagpasundayag ngadto sa iyang mga linalang kon unsa ang tinuod nga kaalam. Ang disipulong si Santiago miingon: “Ang kaalam nga gikan sa itaas maoy una sa tanan putli, unya makigdaiton, makataronganon, andam mosunod, tugob sa kaluoy ug maayong mga bunga, dili mapihigpihigon, dili salingkapaw.”—Sant. 3:17.
15 Pagkamainantoson ug Hataas-nga-Pailob. Ang pagkamainantoson ug hataas-nga-pailob ni Jehova dili unta mapadayag pag-ayo kon wala siya makiglabot sa pagkadili-hingpit, sala, ug kahuyangan sa mga tawo. Ang pagkaandam ni Jehova nga mobuhat niana sulod sa libolibo ka katuigan nagpasundayag nga hingpit niyang nabatonan kining kahibulongang mga hiyas, ug tungod niana kita angayng magmapasalamaton kaayo. Husto ang giingon ni apostol Pedro nga angay natong ‘isipon ang pailob sa atong Ginoo ingong kaluwasan.’—2 Ped. 3:9, 15.
16. Nganong ang pagkaandam nga mopasaylo ni Jehova makahatag kanatog dakong kalipay?
16 Pagkaandam nga Mopasaylo. Kitang tanan makasasala ug mapandol sa makadaghan. (Sant. 3:2; 1 Juan 1:8, 9) Pagkamapasalamaton nato nga si Jehova andam nga mopasaylo “sa madagayaon gayod”! (Isa. 55:7) Tagda usab kining kamatuorana: Tungod kay natawo nga dili hingpit, atong masinati ang dakong kalipay sa dihang pasayloon sa Diyos ang atong kasaypanan. (Sal. 51:5, 9, 17) Sa dihang atong masinati kanang makapatandog nga hiyas ni Jehova, mas molalom ang atong gugma kaniya ug madasig kita sa pagsundog sa iyang ehemplo diha sa atong pagpakiglabot sa uban.—Basaha ang Colosas 3:13.
Kon Nganong Masakiton ang Kalibotan
17, 18. Sa unsang mga paagi napakyas ang pagmando ni Satanas?
17 Ang tibuok nga sistema sa kalibotan ni Satanas—nga resulta sa iyang paagi sa pagmando—kanunayng napakyas sulod sa kasiglohan. Niadtong 1991, ang mantalaang The European nag-ingon: “Masakiton ba ang kalibotan? Oo, masakiton gayod, apan . . . dili kini pagbuot sa Diyos—ang sakit sa kalibotan gipahinabo sa mga tawo.” Tinuod gayod kana! Sanglit naimpluwensiyahan ni Satanas, gipalabi sa atong unang ginikanan ang pagmando sa tawo inay ang pagmando ni Jehova. Busa ilang gisugdan ang paagi sa pagmando nga dili gayod molampos. Ang kasakit ug kagul-anan nga nasinati sa mga tawo sa tibuok yuta maoy pamatuod nga ang pagmando sa tawo sama rag gitakboyan ug makalilisang nga sakit.
18 Ang paagi sa pagmando ni Satanas magpukaw sa kahakog. Apan, ang kahakog dili gayod makabuntog sa gugma, nga maoy gibasehan sa paagi ni Jehova sa pagmando. Ang pagmando ni Satanas wala makahatag ug kalig-on, kalipay, o kasegurohan. Ang pagmando ni Jehova nabindikar gayod! Aduna ba kitay pamatuod niana karong adlawa? Oo. Ato kanang hisgotan sa sunod nga artikulo.
Unsay Atong Nakat-onan Bahin sa Pagmando Gikan sa . . .
• Roma 13:1, 2?
• Colosas 3:13?
[Mga Pangutana sa Pagtuon]
[Mga hulagway sa panid 25]
Ang pagmando ni Satanas wala gayod makahatag ug kaayohan sa katawhan
[Credit Lines]
U.S. Army photo
WHO photo by P. Almasy
[Hulagway sa panid 26]
Si Jehova adunay gahom sa pagbanhaw sa mga patay
[Hulagway sa panid 27]
Ang gugma ug hustisya ni Jehova napasundayag pinaagi sa halad lukat sa iyang Anak