Mga Pangunang Punto Gikan sa mga Sulat ni Juan ug Judas
Ang Pulong ni Jehova Buhi
Mga Pangunang Punto Gikan sa mga Sulat ni Juan ug Judas
LAGMIT gisulat sa Efeso niadtong 98 K.P., ang tulo ka sulat ni apostol Juan maoy lakip sa ulahing mga basahon sa inspiradong Kasulatan. Ang iyang unang duha ka sulat nag-awhag sa mga Kristohanon nga magpadayon sa paglakaw diha sa kahayag ug suklan ang apostasya. Ang ikatulong sulat ni Juan nagdasig sa mga Kristohanon sa paglakaw diha sa kamatuoran ug sa pagtinabangay.
Sa iyang sulat nga gihimo didto sa Palestina, lagmit niadtong 65 K.P., ang igsoon ni Jesus sa inahan nga si Judas nagpasidaan sa iyang mga isigka-Kristohanon batok sa mga tawong daotan nga nakayuhot sa kongregasyon, ug siya nagtambag kanila kon unsaon pagsukol sa daotang mga impluwensiya. Ang atong pagpatalinghog sa mensahe sa tulo ka sulat ni Juan ug nianang iya ni Judas makatabang kanato sa pagpabiling lig-on diha sa pagtuo bisan pa sa mga kababagan.—Heb. 4:12.
MAGPADAYON SA PAGLAKAW DIHA SA KAHAYAG, GUGMA, UG PAGTUO
Ang unang sulat ni Juan maoy alang sa tibuok kapunongan sa mga nahiusa kang Kristo. Kini adunay maayong mga tambag nga makatabang sa mga Kristohanon sa pagbarog batok sa apostasya ug sa pagpabiling lig-on diha sa kamatuoran ug sa pagkamatarong. Iyang gipasiugda ang kahinungdanon sa pagpadayon sa paglakaw diha sa kahayag, gugma, ug pagtuo.
“Kon kita nagalakaw diha sa kahayag ingon nga [ang Diyos] anaa sa kahayag,” si Juan misulat, “kita adunay pakig-ambitay sa usag usa.” Sanglit ang Diyos mao man ang tinubdan sa gugma, ang apostol miingon: “Magpadayon kita sa paghigugmaay sa usag usa.” Samtang ang “paghigugma sa Diyos” mopalihok kanato nga “bantayan ang iyang mga sugo,” atong madaog ang kalibotan pinaagi sa “atong pagtuo” kang Jehova nga Diyos, sa iyang Pulong, ug sa iyang Anak.—1 Juan 1:7; 4:7; 5:3, 4.
Tubag sa mga Pangutana Bahin sa Kasulatan:
2:2; 4:10—Sa unsang paagi si Jesus maoy “usa ka halad pasig-uli”? Ang pagpasig-uli nagkahulogang “paglukmay,” o “pagpahimuot.” Gihatag ni Jesus ang iyang kinabuhi ingong usa ka halad pasig-uli, kay pinaagi sa pagbuhat niana, siya naglukmay, o nagtuman, sa hingpit nga hustisya. Kana nga halad nagpaposible sa Diyos nga kaluy-an ug pasayloon ang mga sala niadtong mga nagpasundayag ug pagtuo kang Jesus.—Juan 3:16; Roma 6:23.
2:7, 8—Unsay gitumong ni Juan sa dihang siya naghisgot ug ‘daan’ ug ‘bag-o’ nga sugo? Ang gitumong ni Juan mao ang sugo bahin sa nagasakripisyo-sa-kaugalingon nga gugma alang sa mga igsoon. (Juan 13:34) Iya kining gitawag nga ‘daan’ tungod kay sa dihang gisulat ni Juan ang iyang unang sulat, kapin na sa 60 ka tuig ang milabay sukad nga gihatag ni Jesus kanang sugoa. Busa, kana nabatonan na sa mga magtutuo “sukad pa sa sinugdan” sa ilang kinabuhi isip mga Kristohanon. Ang sugo ‘bag-o’ sa diwa nga kini nagpasiugda dili lamang sa ‘paghigugma sa isigkatawo sama sa kaugalingon’ kondili sa pagpakita ug nagasakripisyo-sa-kaugalingon nga gugma.—Lev. 19:18; Juan 15:12, 13.
3:2—Unsa ang “wala pa ikapadayag” ngadto sa dinihogang mga Kristohanon, ug kinsa ang ilang makita “ingon gayod sa iyang pagkamao”? Wala pa ikapadayag kanila kon unsa gayod ang ilang kahimtang sa dihang sila banhawon na ngadto sa langit ingong mga espiritu. (Filip. 3:20, 21) Apan, sila nahibalo nga “sa dihang [ang Diyos] igapadayag na [sila] mahisama kaniya, tungod kay siya [ilang] makita ingon gayod sa iyang pagkamao,” ingong “Espiritu.”—2 Cor. 3:17, 18.
5:5-8—Sa unsang paagi ang tubig, dugo, ug espiritu nagpamatuod nga “si Jesus ang Anak sa Diyos”? Ang tubig naghatag ug pamatuod tungod kay sa dihang si Jesus gibawtismohan diha sa tubig, gipahayag mismo ni Jehova ang iyang pag-uyon kang Jesus ingong iyang Anak. (Mat. 3:17) Ang dugo, o kinabuhi ni Jesus, nga gihatag isip “katugbang nga lukat alang sa tanan,” nagpakita usab nga si Jesus Anak sa Diyos. (1 Tim. 2:5, 6) Ug gipamatud-an sa balaang espiritu nga si Jesus Anak sa Diyos sa dihang kini mikunsad kaniya panahon sa iyang bawtismo, nga nakatabang kaniya sa pag-adto sa “kayutaan nga nagbuhat ug maayo ug nag-ayo nilang tanan nga gisakit sa Yawa.”—Juan 1:29-34; Buh. 10:38.
Mga Leksiyon Alang Kanato:
2:9-11; 3:15. Kon tugotan sa usa ka Kristohanon ang bisan unsang butang o si bisan kinsa sa pagdaot sa iyang inigsoong gugma, siya nagalakaw diha sa kangitngit, nga wala mahibalo kon asa siya paingon.
PADAYONG ‘MAGLAKAW DIHA SA KAMATUORAN’
Gisugdan ni Juan ang iyang ikaduhang sulat pinaagi sa pag-ingon: “Ang ansiyano nganha sa pinili nga ginang ug sa iyang mga anak.” Iyang gipahayag ang iyang kalipay sa pagkakita nga “ang pipila sa [iyang] mga anak nagalakaw diha sa kamatuoran.”—2 Juan 1, 4.
Human mohatag ug pagdasig bahin sa pag-ugmad ug gugma, si Juan misulat: “Kini mao ang kahulogan sa gugma, nga kita magpadayon sa paglakaw sumala sa iyang mga sugo.” Siya nagpasidaan usab bahin sa ‘maglilimbong ug antikristo.’—2 Juan 5-7.
Tubag sa mga Pangutana Bahin sa Kasulatan:
1, 13—Kinsa ang “pinili nga ginang”? Lagmit gitumong ni Juan ang usa ka babaye nga gitawag ug Kyria, nga mao ang Gregong pulong alang sa “ginang.” O posible usab nga migamit siyag usa ka pasumbingay sa pagtawag sa usa ka partikular nga kongregasyon aron libogon ang mga maglulutos. Kon ang ulahi mao ang gipasabot ni Juan, ang mga anak sa ginang lagmit mao ang mga membro sa kongregasyon ug “ang mga anak sa [iyang] igsoong babaye” lagmit nagtumong sa mga membro sa laing kongregasyon.
7—Unsa nga ‘pag-anhi’ ni Jesus ang gipasabot ni Juan dinhi, ug sa unsang paagi ang mga maglilimbong “wala magpahayag” niini? Kini wala magtumong sa dili-makita nga pag-abot, o presensiya, ni Jesus. Hinunoa, kini mao ang iyang pag-anhi sa unod ug sa pagdihog kaniya ingong Kristo. (1 Juan 4:2) Ang mga maglilimbong dili motuo nga siya mianhi ingong usa ka unod. Tingali sila moingon nga si Jesus wala gayod maglungtad ni madihogi sa balaang espiritu.
Mga Leksiyon Alang Kanato:
2, 4. Ang atong pagkahibalo “sa kamatuoran”—ang katibuk-ang hugpong sa Kristohanong mga pagtulon-an diha sa Bibliya—ug ang pagkinabuhi subay niana hinungdanon alang sa atong kaluwasan.—3 Juan 3, 4.
8-11. Kon dili nato buot nga mawala kanato “ang dili-takos nga kalulot, kaluoy ug kalinaw gikan sa Diyos nga Amahan ug gikan kang Jesu-Kristo,” maingon man ang mahigugmaong panag-ubanay uban sa atong mga igsoon, angay kitang “magbantay” sa atong espirituwalidad ug isalikway kadtong “dili magpabilin diha sa pagtulon-an ni Kristo.”—2 Juan 3.
MAHIMONG “MGA ISIGKAMAGBUBUHAT DIHA SA KAMATUORAN”
Ang ikatulong sulat ni Juan maoy alang sa iyang higala nga si Gayo. “Wala nay labaw nga hinungdan sa akong pagkamapasalamaton kay niining mga butanga,” siya nag-ingon, “nga akong madungog nga ang akong mga anak nagpadayon sa paglakaw diha sa kamatuoran.”—3 Juan 4.
Gidayeg ni Juan si Gayo kay siya “nagabuhat sa matinumanong buluhaton” pinaagi sa pagtabang sa nagaduaw nga mga igsoon. “Atong obligasyon nga abiabihon ang maong mga tawo,” matod ni Juan, “aron kita mahimong mga isigkamagbubuhat diha sa kamatuoran.”—3 Juan 5-8.
Tubag sa mga Pangutana Bahin sa Kasulatan:
11—Nganong nagabuhat man ug daotan ang pipila ka tawo? Kay wala magpabili sa Kristohanong mga pagtulon-an, ang pipila wala makakita sa Diyos pinaagi sa ilang mga mata sa pagsabot. Sanglit dili man nila siya makita pinaagi sa ilang literal nga mga mata, sila nagbuhat ug mga butang nga daw walay Diyos nga nagtan-aw kanila.—Ezeq. 9:9.
14—Kinsa ang gihisgotan dinhi nga “mga higala”? Ang terminong “mga higala” nga gigamit dinhi wala lamang magtumong sa mga tawo nga adunay suod nga relasyon. Gigamit ni Juan ang maong termino sa pagtumong sa tanan nga mga isigkamagtutuo.
Mga Leksiyon Alang Kanato:
4. Ang hamtong nga mga igsoon sa kongregasyon malipay gayod sa pagkakita sa mga batan-on nga “nagpadayon sa paglakaw diha sa kamatuoran.” Ug dili gayod hitupngan ang kalipay sa mga ginikanan sa dihang sila molampos sa pagtabang sa ilang mga anak nga mouswag sa espirituwal!
5-8. Lakip niadtong nagkugi pag-ayo alang sa kaayohan sa ilang mga igsoon tungod sa ilang gugma kanila ug kang Jehova mao ang nagapanawng mga magtatan-aw, misyonaryo, Bethelite, ug mga payunir. Takos gayong sundogon ang ilang pagtuo, ug angay nato silang suportahan sa mahigugmaong paagi.
9-12. Angay natong sundogon ang panig-ingnan sa matinumanon nga si Demetrio ug dili ang kang Diotrefes nga usa ka witwitan ug mabutangbutangon.
“MAGPABILIN KAMO DIHA SA GUGMA SA DIYOS”
Ang mga tawong dili-maayog impluwensiya nga nakayuhot sa kongregasyon gitawag ni Judas nga “mga bagulbolan, mga reklamador bahin sa ilang kahimtang sa kinabuhi, nga nagpahiuyon sa ilang kaugalingong mga tinguha.” Sila “nagsultig hinambog nga mga butang, samtang sila nagdayeg ug mga personalidad.”—Jud. 4, 16.
Sa unsang paagi masuklan sa mga Kristohanon ang daotang mga impluwensiya? “Mga hinigugma,” misulat si Judas, “hinumdomi ang mga pulong nga gisulti kanhi sa mga apostoles sa atong Ginoong Jesu-Kristo.” Siya midugang: “Magpabilin kamo diha sa gugma sa Diyos.”—Jud. 17-21.
Tubag sa mga Pangutana Bahin sa Kasulatan:
3, 4—Nganong giawhag ni Judas ang mga Kristohanon nga “kusganong makigbugno alang sa pagtuo”? Tungod kay ang ‘mga tawong dili-diyosnon nakayuhot sa kongregasyon.’ Kining mga tawhana ‘naghimo sa dili-takos nga kalulot sa Diyos nga katarongan alang sa malaw-ayng panggawi.’
20, 21—Sa unsang paagi ‘kita makapabilin diha sa gugma sa Diyos’? Mahimo nato kini sa tulo ka paagi: (1) pinaagi sa pagpalig-on sa atong kaugalingon diha sa “labing balaan nga pagtuo” pinaagi sa makugihong pagtuon sa Pulong sa Diyos ug sa masibotong pagpakigbahin sa pagsangyaw; (2) pinaagi sa pag-ampo “uban sa balaang espiritu,” o pagpaimpluwensiya niini; ug (3) pinaagi sa pagpasundayag ug pagtuo sa halad lukat ni Jesu-Kristo, nga maoy kinahanglanon alang sa kinabuhing walay kataposan.—Juan 3:16, 36.
Mga Leksiyon Alang Kanato:
5-7. Makalingkawas ba ang mga daotan sa paghukom ni Jehova? Sumala sa tulo ka pasidaang mga panig-ingnan nga gihisgotan ni Judas, imposible gayod kana.
8-10. Kita angayng mosundog sa panig-ingnan ni Miguel nga arkanghel ug mopakitag pagtahod niadtong gihatagag awtoridad ni Jehova.
12. Ang pakaaron-ingnon nga gugma sa mga apostata makapameligro gayod sa atong pagtuo sama nga ang mga bato nga natago ilalom sa tubig makapameligro sa mga barko ug mga maglalangoy. Tingali ang usa maghunahuna nga daw daghag ikahatag nga kaayohan ang bakak nga mga magtutudlo, apan sila nahisama sa mga panganod nga walay tubig sa diwa nga wala silay ikahatag nga kaayohan sa atong espirituwalidad. Sila nahisama sa mga kahoyng patay ug walay bunga sa hinapos sa tinghunlak. Sila pagalaglagon, sama sa mga kahoy nga nangaibot. Angay gayod natong likayan ang mga apostata.
22, 23. Ang matuod nga mga Kristohanon nagadumot sa daotan. Aron masakmit gikan sa kalayo sa dumalayong kalaglagan ang “pipila nga nagduhaduha,” ang mga hamtong sa kongregasyon—ilabina ang tinudlo nga mga ansiyano—mohatag kanilag espirituwal nga tabang.
[Mga hulagway sa panid 28]
Ang tubig, espiritu, ug dugo nagpamatuod nga si “Jesus ang Anak sa Diyos”