Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Buweno, sulayi kon makatubag ka ba sa mosunod nga mga pangutana:

• Unsang problema ang giatubang sa pipila ka minyong mga Kristohanon, ug unsay angay nilang paningkamotan?

Ang pipila ka Kristohanon mibati nga daw dili nila ikasinabot ang ilang kapikas. Sanglit nahibalo sila nga ang dili-Kasulatanhong diborsiyo dili maoy tukmang solusyon sa maong suliran, angay gayod nilang paningkamotan nga molungtad ang ilang kaminyoon.—4/15, panid 17.

• Unsang mga kalisdanan ang mahimong masinati sa usa ka Kristohanon nga nagpuyo sa nursing home o puy-anan sa mga tigulang?

Lagmit wala siya mahibalo kon sa unsang kongregasyona nahisakop ang dapit nga nahimutangan sa maong puy-anan. Tingali ikauban niya ang mga tawo nga lainlaig tinuohan ug ila siyang awhagon o kaha pugson sa pagpakigbahin sa relihiyosong mga serbisyo sa bakak nga relihiyon. Ang iyang mga paryenteng Saksi ug ang kongregasyon sa maong dapit angayng mahibalo niining problemaha ug kinahanglang magmaalisto sila sa pagtabang kaniya.—4/15, panid 25-27.

• Unsa ang upat ka paagi nga makatabang sa mga magtiayon sa pagsulbad sa ilang mga problema?

Pagpilig hustong panahon aron hisgotan ang problema. (Eccl. 3:1, 7) Ipahayag ang imong gibati sa matinud-anon ug matinahorong paagi. (Efe. 4:25) Sabta ang gibati sa imong kapikas. (Mat. 7:12) Sulbara ninyong duha ang problema. (Eccl. 4:9, 10)—5/1, panid 10-12.

• Unsa nga utang ang gihisgotan ni Jesus sa dihang siya nag-awhag kanato sa pag-ampo alang sa kapasayloan sa atong mga utang?

Ang pagtandi sa Mateo 6:12 ug Lucas 11:4 magpatin-aw nga si Jesus wala magpasabot ug utang nga kuwarta. Ang anaa sa iyang hunahuna mao ang mga sala. Kinahanglan natong sundogon ang Diyos pinaagi sa pagpasaylo usab sa uban.—5/15, panid 9.

• Unsang mga komite ang gialagaran sa Nagamandong Lawas?

Komite sa mga Koordinetor; Komite sa Kawanihan; Komite sa Pagpatik; Komite sa Pag-alagad; Komite sa Pagtudlo; Komite sa Pagsulat.​—5/15, panid 29.

• Gilunopan ba gayod ang tibuok yuta sa adlaw ni Noe?

Si Jesus nagtuo gayod nga nahitabo ang tibuok-yutang Lunop. Ang mga pasidaan sa Bibliya nagpamatuod usab nga nahitabo kini.—6/1, panid 8.

• Ang imoral ba nga panggawi nga gihisgotan sa Roma 1:24-32 nagtumong sa mga Hudiyo o sa mga Hentil?

Bisan pag mapadapat kini sa maong duha ka grupo, ang pangunang gitumong ni Pablo mao ang mga Israelinhon kaniadto nga wala mosunod sa Balaod sulod sa daghang siglo. Nasayod sila sa matarong nga balaod sa Diyos, apan wala sila magkinabuhi uyon niana.—6/15, panid 29.

• Diin nahimutang ang Tel Arad, ug nganong hinungdanon man kining maong dapit?

Ang bungtod sa Israel nga nahimutangan sa karaang siyudad sa Arad anaa sa kasadpang bahin sa Patayng Dagat. Ang mga arkeologo nakakaplag dinhi ug mga tipak sa yutang kulonon nga gihimong sulatanan. Nahisulat diha sa pipila ka tipak ang mga ngalan nga makaplagan sa Bibliya, ug gipakita usab niini nga gigamit nila ang ngalan sa Diyos diha sa ilang sekular nga mga dokumento.—7/1, panid 23-24.

• Nganong kita magmalipayon kon kita magmatimbang sa pagtakdag mga tumong?

Kon pugson nato ang atong kaugalingon sa pagpangagpas sa mga tumong nga lisod kab-oton, kita mabug-atan. Apan dili angay nga sobra ra kita ka relaks ug himoon natong pasangil ang atong mga limitasyon aron kita magtinapolan sa ministeryo.—7/15, panid 29.

• Unsay makababag sa maayong komunikasyon tali sa mga ginikanan ug sa ilang anak nga tin-edyer?

Lagmit ang batan-on maulawon, buot mag-independente, ug dili gusto nga dunay magbuot kaniya. Busa angayng mangitag paagi ang mga ginikanan nga ilang maestorya ang ilang anak ug maningkamot nga masabtan ang iyang gibati.—8/1, panid 10-11.